Home Crosby Haokip KACHUN LE KASEN GOLNGAI-III

KACHUN LE KASEN GOLNGAI-III

126
4
KACHUN LE KASEN GOLNGAI
KACHUN LE KASEN GOLNGAI

Lungset um Thusim

Story and Narrated by
Crosby Haokip

(Contact number 7085168510)

Crosby Haokip kwc
Crosby Haokip kwc

Chutia Lhingboiyin eikoiya aka chu Boithemin eihinmu lhon phatin nommo asa behseh jengtan ahi. Chuphat in lunghang tahin Lhingboi ahin houvin, “Lhingboi, namelse nalom lom e, hitia chu pasal khat nagah koi jeng chu, jachatna him him nanei lou ham?” atin ahungin Lhingboi chu akhutin akaidoh go tan ahile Lhingboi anomdeh tapon eilha deh pon ahi. Hiti chun amani ucha akinah lo go lhon tan ahi. Chuin kenjong Boithem koma, “Boithem, nang aujo nahin lunglet ding ngaiton, moh lunghan han hih in. Imathu aumpoi, lunghanna ding aumpoi. Lhingboiyin aupa banga eigel nangin jong nahet them hilou ham?” katin amani ucha kikah a kei chu thutan in kapang pang tan ahi. Ahinla Boithem jong lhisoh pumin achemang tan ahi.

Boithem che nungin kenjong Lhingboi jah a,
KEIMA: “Nao, hiti hihin, tia kapho masah nahilou ham? Tua na-unu le nang kikah a kilung lhailouna aum jeng hi keidin anom thei poi. Jachat jong aumvale; hilaiya ipi kahung kibol khah hitam kajah jong acha vale,” kati chun Lhingboi jong akiphat lam val jengin akap jeng tan ahi. Chuin Lhingboiyin jong kajah a,
LHINGBOI: “Heu, lungset tahin neingaidam o. He nasasa a kabol ahi. Kan lungset val jeh a kabol ahivangin kei themmona ahiye.”
KEIMA: “Phatante. Hichanin ngataute. Nang anaum inlang ken na-u Boithem galhem lungmong tadinge,” katin Lhingboi kadalhan Boithem koma kache tan ahi.

Boithem kom kalhun chun insunga analhisoh tan ahi. Chuin akoma kachen ajah a,
KEIMA: “Nao, Lhingboiyin ipi bol jongleh einin ihet them lhon angaiye. Ajeh chu amakhu chapang ahibouvin, iti um jongle einin phamo isah lou ding ahi.”
BOITHEM: “Heu, kanaovin jong nahin lungset tah tah ahibouve. Kanao ahijeh in jong akoma ima kasei nompoi.”
KEIMA: “Nalungneo nalom lom e. Inao chu eikoma anop dan dan a aumlou leh ipi abol ding ham?”
BOITHEM: “Henge heu, hijongle eini kikah vang suboi po hite ong?” atin kenjong phatahin kalhamonin ahi. Adihtah a sei dinga chu keiman kalungset tah tah chu Lhingboi joh ahi. Ajeh chu kaneo lai lhon a pat a ucha bang a kingaitah a hung kivoppeh kahi lhon e. Ahinla tua Boithem kalungset dana aum vangin kalungset tah tah theipoi. Boithem toh kakingai hi Lhingboi le kanu oltah le thusim ngeitah banga kakihetsah nom jeh ahi. Keima Minlal kahi Lhingboi le kanu kakihetsah teng Lhingboi kakilungset pi ding ahi.

Boithem le Lhingboite kho chu Pallel lang akhomin jong Bongjang akiti. Chule amahon changlei le kolbu lei abol un ahi. Hiche teni chu khomite dinga kivahna thei aumsun ahitai. Chule khosunga chun nungah gollhang atamin ahi. Ahinla kei kalhun a pat chun Lhingboiyin eilungset doh tan ahi. Tua Lhingboi kakingaipi jeng sanga kakihetdoh teng kilungset pi jo leng aman jong eilungset na sang intin chule kei le Lhingboi thusim Boithemin jong ahetsa ahijeh a chu ahet them ding ahi. Hiti chun Lhingboi te khoa chun hapta khat lhingset kaga um tan ahi.

Nikhat Saturday nikhon khosunga konin lamlen a kavah uvin ahi. Akoma chun Lamkangte kho aumin hitichun va to gomin kengin Senam chan kacheuvin ahi. Kahung kile lam un munkhat, hamhing tamna mun phaicham neokhat kamu tauvin ahile amani athanop jehin kihuilha to gomin katou tauve. Chuin kavei lama Boithem ahung touvin kakhut veilam chu akhut tenin akol chah in, chule kajet lama jong Lhingboi ahung touvin kakhut jetlam akol chah in kachunga akingai lhonin ahi. Hichun kenjong amani jah a,
KEIMA: “Nao, neingai ma ma lhon ham? Kei chedoh leng iti hinkho naman lhon ding hitam?” kati chun Boithem in eihinven kajah a,
BOITHEM: “Heu, nang nache doh nikho leh keijong Lamka langa kahung kit ding ahite. Kachangin hinkho kamang nom hih e,” atitan ahile Lhingboiyin ahin donbut pai paiyin,
LHINGBOI: “Heu, nang nache ni leh kenvang nanung kahin jui ding ahite. Keijong nang louvin hing jou ponge,” atitan ahi. Chutah chun Boithemin anaonu ahin housen,
BOITHEM: “Hiveh ta, ibola nangin heu Seiboi najui ding ham, nang itileh achom nahiya kei le heu Seiboi itileh dongma kahi lhon ahi nahet lou?” atin hichun Lhingboiyin ahin donbut pai kit in,
LHINGBOI: “Ahi kasei chula. Nang sanga ken heu Seiboi kalungset na sangjo ahi. Heu in jong nang sanga kei eilungset joh ahi,” ati chun Boithem jong alunghang valin anaonu voh dingin ahingo tan ahi. Chuphatin kenjong Boithem kanung kaiyin,
KEIMA: “Ipi jong chu nasei lhon ham? Ibon uva koi chom jong ihilou piuva. Ken nani lhona kalungset. Lhingboi jong keidia kanao banga kagel chule Boithem jong aitih a pat kalung set nahi chula. Nahiti lhon ding leh kei kakile ding ahitai. Boithem, nang jong nanaonu thusei ho ma ji hih in kati hilou ham?” tia kapho chun Lhingboiyin olchan,
LHINGBOI: “Nahet nah heu Seiboi thusei chu?” ahintin, ahinla Lhingboi jah a,
KEIMA: “Lhingboi, kakoma kani chapa kakinga ding ahi, nati hilou ham? Kei le na-u Boithem kingai jong nahet them hilou ham? Ibola kasei nangai jilou ong? Kicheh in nani chapa chu kinga dohin nikho khat leh nakimuto thou thou lhon ding ahi. Tun keitoh kingaiyin lang khonung leh nani chapa toh nahung kimuto tengleh nakisih louding ham?” kati vangin Lhingboiyin ima ahethem pon ahi. Hiti chun amani ucha kikah a thutan in kapang jing tan ahi.

Lhingboi jong aninu (kanu) koma um talouvin Boithem te ina aumtan ahi. Nilhah an kaneh diu konin kakoma tou ding ahung kichu kit lhon tan ahi. Chuin Boithemnun aphoh lhonin, “Boithem, nanao chu tousah tang. Nang ahan joh hiya ibola nanao nakinahpi jing kei ham?” ati phatin Boithem jong mun chom a atouvin chuphatin kakoma kipahtah in Lhingboi ahung tou tan ahi. Chuin kenjong Boithemnu koma,
KEIMA: “Henu, kapi chu iti damlou ham?” katin Lhingboinu chu kapi, tin kasei khan ahileh amajong ahung lungdong man in,
BOITHEMNU: “Boi, koi napi nasei ham?” ahinti chun kaseithem vang veiyin,
KEIMA: “Henu, kaseikhel joh, Lhingboinu katina ahi.”
BOITHEMNU: “O, khosih natna ananeiya damjou louva thi ahiye.”
KEIMA: “Lainat aume. Lhingboi hi anu le apa aumtah lou jeh a hi kalungset dan hi o. Kanao bangin kagel in kakhoto mong monge,” kati chun Lhingboi akipah hintin kakoma ahung kikhin nai jep jep tan ahi.
BOITHEMNU: “Hiche jeh a hi min ahin houset jongle kimoh lung han han jia houset ding jong kinom lou ahi. Khatvei tou ahung kiphin jongleh nanao hin hethem jilou aleng kibahpi ho bangin kimoh nah pi pi jeng jin tin,” atin ahi.

Janin toilet kache nom jeh chun thaomei kakidet in kache tan ahi. Chutia toilet sunga kaum laiyin Lhingboiyin kanung ahin juiyin eihin kouvin,
LHINGBOI: “Heu, toilet a twi um hinam?” tin eihin dongin kenjong,
KEIMA: “Aum na e nao, twi adimset na e,” katileh eihin houkit in,
LHINGBOI: “Heu, ka-u Boithemin heu Seiboi, tin nahin kou jong leh kenvang heu Minlal, tia kahin kou ding nahiye.”
KEIMA: “Ibola em nao? Kei na-u Minlal kihi louva,” katileh aman kajah a,
LHINGBOI: “Heu, ka-u Minlal banga kahin gel nahiye. Amatoh la kikimuto tapon tin, chule kanin jong nangchu ka-u Minlal toh nakilo dan thu aseiji jeh a ama banga kahin gel nahitai. Hiche jeh a chu kahin lungset doh nahita e.”
KEIMA: “Lhingboi, kakilo lhon vanga ama kahilou leh iti hithei ding ham? Ahithei lou ding thu seiji lhon hih tang,” kati chun kajah a,
LHINGBOI: “Heu, kei keo ahipoi. Kanin jong nahin lungset e, ajeh chu achapa banga nahin gel ahijeh in chule kenjong kahin lungset mong mong e.”
KEIMA: “Na-u Boithemin navoh lo naveh ta,” katileh aman kajah a,
LHINGBOI: “Eivo jongleh khoh kasa poi. Ajeh chu kei eivoh leh ama anun ale voh kit ding. Kanulen in kei alunga eilungset ahibouve,” ati thou thouvin ahi. Chuphatin kapotdoh in insunga kalut lhon tan ahi.

Janin Boithemin Lhingboi ahousen ajah a, “Lhingboi, jansot tahi ina chenlang kimut doh jeng tang,” atileh Lhingboiyin aunu ale jet in, “Kathu thu ahi. Kadei leh hilaiya kaihmut ding kanop leh kain a kaihmut ding ahi,” atin chuin Lhingboiyin kakoma, “Heu, keiho ina ageh in hung o, ka-unu akhoh vale,” atin ahileh Boithem alunghang valin Lhingboi chu khatvei ahinson in ahile lhong laiya alhun Lhingboi jong akap tan ahi. Chutah chun Boithemnun jong Boithem aphohin ahile Boithem jong lhisoh pumin alupna ajon tan ahi. Chutah chun Lhingboini (kanu) ahungin Lhingboi ahung puidoh tan ahi. Kei eikou vangin nopmo kasah jeh chun kache tapon ahi.

Ajingin Lhingboi teni koma kholai lengin kagache tan ahi. Insunga Lhingboi le kanun chang anasep lhonin ahi. Kalut chun Lhingboiyin touna eihin pen katouvin ahile touna neojep kamasanga ahin kidon ka-angsunga ahung tou tan ahi. Chuin kanun kajah a,
KANU: “Seiboi, nanaovin hibanga nahin lungset a ibola na-engbol ji ham? Kakoma ahung lhisoh ji e.”
KEIMA: “Henu, ama le aunu aumkhom lhon teng kiketto pai pai ji lhon a khat ipho leh khat lhase ahilhon jeh a hi kahin lhiso sah khah ji ahiye,” katile kanu jong amoh nuiyin,
KANU: “Boi, nanaonu hi hethem tang, kachapa toh nakilo jeh a chu ama banga nahin gel ahibouve. Nadalhah teng imati tapon te.”
KEIMA: “Henu, nachapa toh nakimu khah talou ham?”
KANU: “Kamu khapoi. Ahin kumkhat chun mihon kachapa JNV CCPUR a aumthu eiseipeh uve. Dam dam nante.”
KEIMA: “Tun kinungmu lhon le chun nakoma naumsah dem?”
KANU: “Kaumsah nom ding hiya, ahivanga custom in aphal talou ding hiya kahe tahih e.”
KEIMA: “Kanao Lhingboiyin, keivang kani chapa toh kakichen ding ahi, atijin chutia custom in aphal louleh amani jong kicheng thei lhon ding hinam?”
KANU: “Tulai khang kikhel dung juiya akihetdoh uva amaho akilungset pouvu leh koiyin akham jou ding ham? Akilungset uleh kicheng theiyu ahi,” atin kenjong Lhingboi katot in,
KEIMA: “Nao, nanin asei chu najah chuna? Nani chapa kinga jeng tang o,” katileh aman,
LHINGBOI: “Heu, kani chapa toh kakimuto kah a nang kani chapa banga kagel ding eini ikingai thou thou ding ahiye. Kani chapa toh kakimuto khah leh apha ijemtia kakimuto jou lhon louleh eini ikichen lhon ding chu,” ati thou thou tan ahi. Lhingboi thusei chu kanu anuija lheh jengin ahi.

Boithemte kho a kaumsot lheh tan ahi. Inlanga kanuneo khoh toh ahile phone eihin bol bol tan ahi. Munchom chom a CID hon kaumchan ho analhut tauvin ahi. Chuphatin kenjong Boithemnu jah a, “Henu, kei kile tange. Kainkoten jong eihin kou kou tauve,” kati phatin anomin nilhah in kilhahna togom in ahcha athat in kane khom tauvin ahi. Ahinla khat langa kei le Boithem umchan thangset jehin Lhingboi kanu koma akiphin phin tan ahi. Janin lunghel tahin innung langa vanlam kaven ahile kakoma Lhingboi ahungin kakhut in eikaiyin kajah a, “Heu, hung o. Keiho in a hung o heu,” ati phatin kache tan ahi. Insung a chun kanu anaum pon chuin Lhingboiyin kajah a,
LHINGBOI: “Heu, nanghin ka-unu bou nalungset chu na? Kei imaa neisim nomlou pi chu na? Hitia neibol ding leh kakikhailih ding ahitai,” atin akiheimang in amai akisip in akap tan ahi. Chutah chun kalung ase lheh jenge. Kihetsah jeng ding katileh kanom nai pon ajah a,
KEIMA: “Ibola hitobang lunggel chu nanei ham? Nakikhailih a nanop sah chom ding ham? Kikhailih le chun nathi nungleh kei le na-u Boithem kikicheng tadinga,” katileh ajahda behseh in kaop achum chumun, eisonin,
LHINGBOI: “Mikhohpa! Mikhohpa! Lungsetna neilou. Genthei chagate khohsah lou nahi. Kei genthei chaga kahi man a imaa neigel lou hichu na? Ka-u Boithem bangin nu neileng neijabol jep naveh ta chun. Kiche doh komtang, nang banga mikhoh kahet khah loupi,” atin kathusei apohnat val jeh chun anop nop in laina tahin eihouse tan ahi. Chuphat in kenjong,
KEIMA: “Hitia khoh dinga chu neingaito dan chu na? Aphai neimu nomlou jongleh kache jeng ding ahitai.”
LHINGBOI: “Ken nakhoh e, kati khah ham? Neihouna ho khu kapoh jou ding nahisah? Hiti chun ka-u Boithem nahouse ngam nadem? Hiche jeh a chu naselungmol e, kati ahi.”
KEIMA: “Nao, thil jouse kamasei peh nahitalou ham? Na-u Boithem toh kakingai jong nahet hilou?”
LHINGBOI: “Kahe ma ma e. Hijongle kahin lungset hi kei kanop a kabolthu beh hiya ong? Kanop a kalungset da thei hile chun hou jong nahoupi ponge. Lungset hi eima bolthu ahilou jeh a kahin lungset na hi nahetthem mo ham?”
KEIMA: “Na-u Boithemin la eikhen jou pontin, nangin la neilungset ma ma jengin, iba kalo ding ham? Khat jong khat jong nalhaset lhon nalou dinga kahin kop lhonle ahijenge. Nanop nam?”
LHINGBOI: “Nalungsetna neokhat beh kachan mai mai jongleh lung ol tange heu. Amabou ka-u Boithem joh in adetmo ding ham, kati ahi,” atin kakingaipi tan ahi. Ahin hiche ni jana kon chun Lhingboiyin eilungset na akipeh be abang tan agenthei lheh tan ahi.

Ajingin keijong inlang che dingin Tengnoupal bus kangah tan ahi. Kajet kaveiyah Boithem le Lhingboi adingin ka-bag khat khat achoi lhonin khatcha kihoujo sang umlouvin maithim ket in bus kangah tauvin ahi. Bus ahung lhung tan ahi. Chuin keijong bus chunga kakaldoh in window koma katouvin ahile Boithem kakoma ahungin, “Heu, damsel in galhung o. Neihin sumilhih tang o. I love you,” atin kipah tahin akumkit tan ahi. Ahinla Lhingboi kahol lele vangin kamu tapoi. Chuin Boithemnu le kanu kakoma ahung lhonin kajah a, “Seiboi, Lhingboi hoiya che ahi nahet lou ham kahol mouve,” ati chun kalung akham lheh jenge. Chutah chun Bus jong akipatdoh pai ngal tan ahi. Chutia lunggim a katou laitah chun kakoma, “Heu,” eihung kitin amanu chu kakoma ahung touvin kaphei chung a akingaiyin akap tan ahi.


©2019, Crosby Haokip All Rights Reserved

Thusim hi anom lheh e nati le anoiya “LIKE” button khu meh in writer ho na support nau vin, chule seinom nanei le anoiya comments nahin bolthei u ahi.

Site nalut a notification pop up hung potji ho allowed anabol ji uvo maban a thusim thah ahung ki post teng notice namu ji diu chule Bell button a subscribe kiti chu meh un.

Thusimbu mobile app ki install nom hon Google playstore a “thusimbu” tia search nabol u le namu lei diu ahi.

Previous articleHINKHO A IPI MONG AHI KIHECHEN LOU KHAT HOLA BOIPI LOUDING AHI.
Next articleGamsung’a mikitah ho chu Pathen in lungset mit na kavet ding ahi ati

4 COMMENTS

LEAVE A REPLY

Please enter your comment!
Please enter your name here