Home Elkay Mate KABAW VALLEY MOLLEM LHANG-V

KABAW VALLEY MOLLEM LHANG-V

211
0
KABAW VALLEY MOLLEM LHANG
KABAW VALLEY MOLLEM LHANG

-Elkay Mate

Elkay Mate, kwc

Final Episode5

THILHA THUSIM

(..amani jong bong thing lang chu ajon Suh lhon in atahsa lhon ah thao akinu lhon in ahile Bongthing chu akinuh lah lah jengin huivom in thing chu atom chah kheh tan Po Anam in ahung lum lah lah kit tan ahile mi apeng toh sa in mi angih bangin ahung kingih in ahi.)

Hichun amani jong hilai chu jon talouvin kom chu ahosuh lhon in Si sante umna lang chu ajon lhon in ahile agm lah achun ahung kinuisat lhon in thinggbah ho akinuh in El tol nui le noise tah nuiyin Po Anam in lei ahung kithe in ahile. Ngamdou alung hangin in tuchan a ima kabol nailou nahiuve neiphin hih uvin neiphindoh ule tunile koima ahinga kalha lou diu nahiuve atin ahi song ahung kitang kit in hichun aman jong alung hang in thal akap in hiche ki katoh ahipoi nahiti ule pasal kahin kapa chapa kasei kajui kajuilou ana ve uvin atin ahile chom khat athip kit in ahi. Amani jong Vokom chu asuh hopeh in ahile vadung pam a chun thangkip thile vangah ganhing thi tampi amulhon in chule vapam lah chu song in akhah na a pop deh duh adimset in ahi. Hichun Holsei in jong nom mo asah in vacha thile ganhing thiho chu apai peh ah alohkhom in achesuh peh tan ahi.

Amani jong hitia akum Suh Suh lhon le Si sante kom alhun lhon in thangkip tampi ana thin ahile Ngamdou alunghang behseh in akitom in ahi. Chule mi lhisoh a aninga akithing thing aja in ahi. Hichun amanin jong kap hih un lhase hih uvin keini kahung lhon tai atilhon in ganhing thijouse chu achom khom lhon in abon in leiset alai lhon in avui doh lhon tan ahi. Si sante hi kom langa um ahijeh chun Chung langa cheng ho hin Song tum len tah tah atah khum ji dan u hidan ahi. Si sante sunga chun Song len tah achun ahi. Hichun amani jong Song ho chu alohdoh lhon in Si chu asutheng lhon tan ahile chung langa pat nuisat le noise pum in song ahung kisap jingin ahile Ngamdou alunghang val jeng in neiphin phin hih un atin ahile aloipa Holsei in ibol ding bolchai masa hite atin ahi. Hichun amanijong song jouse alahdoh chai lhon in avel chu avat theng lhon in akom a go chu Holsei in asat in nang in alem in chuin thingtoi themkhat asat lhon aban teng chung langa song ahung kitah teng Si sunga achuh nathei lou din chung lang kai se chu pal phatah in agey pih lhon tan ahi. Hiche pet injong chung langa thinggbah kiheboh gin le mipeng lah chu aja jing lhon in ahi. Amani jong akichai lhon in sun an ane lhon in vadung pam achun chomkhat atou lhon in ahi.

Chung langa ho umchan chu akhoh lheh in ahin la amani jong thil lhinset a akipoh lhon ahijeh chun imacha akicha lhon pon ahi. Hichun Sun an nehchai chom chakhat agah tou lhon le nungah chapang nu chu ahung in Holsei chu akin in ahile Ngamdou in kicha hih in loipa kahet khahsa ahi atin ahi. Hichun nungah chapang nuchun ama ni koma akipa nathu aseiyin kakho mite alung lhei lheh in nachung lhon a akipah lheh e. Kakhosung mi ijat in ahinkho achan tah vangin nang ni kithopi na kakipah lheh uve hiche song hi kilah lhon in atin chomkhat jouvin gamlah a akumsuh in amang tan ahile amanu touna laitah a chun song khat aum in hichu ahin kilah lhon in ponse thaotui anuchet lhon in atom lhon tan ahi. Hitichun cchomkhat aum lhon in ol ol in ahung kal tou lhon in ahile hung langa ho hibangse ahungsoh kit tan leiset ahung kithe in thing a ahung kinuh tan mi akap le apeng hibangse asoh in amani jong akhongai lhon in ahile aleiset ahung kinuh in ahi.

Leiset kinuh dan chu agimnei val jengin amani jong vakom a kiche le leiset in avuhden thei ahijeh chun aning langa ahung lhei tho lhon in vakom apat hung potdoh dingchu angaito lhon in ahile. Chomlou kah in thing ahung kiheh bongin amun mun a thinggbah kiheh bong gin ahung ging tan ahi. Amani jong hitia chu lung opkai pum a ahung lhei lhon a kino tah a ahung lhon le thinggbah ahung khe in Holsei avei lhadeh in ahi. Alangkhat ahin dalhah lhon Si te um nalang jong khong kiteh le mi husan ahung ging tan ahi. Amani jong kicha thimle Lunghan thon apeng lhon in tunia hi nangho gamsunga neisuhboui ule kamoh umlhon lou ding ahi. Kasei sa lhon banga ima boina Kasem nom lhon poi atilhon in ahi. Alangkhat a Thilhate la akhohse cheh cheh jengun ahile mol langa um song ho ahung kitang pan tan amani jong song hoa kon a kihoidoh natei din akihong lhon in ahi. Hitia ahung kitheh le le lhon a ahung lhon le thingphung ahung lhu in alampi lhon akiting tang tan tan ahi. Hichun Ngamdou in Holsei koma hiche song man tam hi choiyin lang nang che masan enung lang lhon a min eihin del lhon in kahin tin angaiye atin ahi. Hitichun Holsei ahung masa in Ngamdou in anung lang chu thal in amoh kap kap in ahin ahung lhei lhon in ahi. Alangkhat a noilanga te le chung langa ho kina hiding dan hintin mi apeng Jah Jah jengin gamsung chu akithong den in alung neodoh lhon tan ahi.

Noi langa Bongthing phung chu akithing in pum vom in avom tan ahi. Alah uva akanga kivon numei tobang khat apeng jah jah jengin ahi. Hitia chu ahung lhon le leiset hung kithe keu hilouvin song chang ahung leng tan ahile Song khat in Ngamdou luchang akhan ahile alhuntan aloipa Holsei jong amasanga che ahijeh chun milhuh gin ajan avet le aloipa chu alhuh keu hilouvin kol Ken lai gam noi achun akilih in ahi. Hichun amajong alheisuh jengin ahile Ngamdou aluchang a thisan tampi along in ahi. Hichun amanjong aloipa chu aman in atuh in alo lele leh ahung khangin aluchang phatah in akan peh in ahi.Alangkhat a Ngamdou alung hang in aloipa koma nang nache nom le chetan amahon hitia eisuhgenthei jing uva ipiti nom a echen diu ham ati tan ahi. Ahinla Holsi in aloipa adalha nom pon ahi. Ngamdou in tuni kei kathile kathi chite hi kaki bolpi ding ahi atin ahi. Hichun amajong aloipa thil Choi ho meilou ahin lou chule thao ho akichoiyin ahile alampi chu huichim kipei bang nathu le huise akiveiyin pum jing in ajingin ahile amajong amuthei pon hichun Holsei in jong cheda tan atile amajong Kinga louvin ache nah nah in aloipa koma chedo vangin atin ahi. Hichun Ngamdou jong thing phung lang chu ajot le achithei tapon achat but tapon hichun Hilsei in avet le aloipa chu achal but lou phat in Holsei in thal akap in aloipa lang ahin del in meilou athe in meikhet asuh le amit lelei yin hichun mei ajonan mei ahin chodoh in mei Achu meilou athe le Ngamdou chu ahung chat thei yin ahi.

Ngamdou jong Bongthing lang chu ajin jeng jeh chun Si lang chu Adel in Ngalou chu Si. A asun le nga le Aicha chule Ukeng ho akipeh lele uvin mi akap in apeng in Si chu aphul jengin ahi. Chuina.an jong melcha dichu(powder) alan asunga chun asungin neithei nah Uvem atin ahile song ahung kitang in amani jong akikhen doh lhon in ahi. Mipen le ka chu ngai ngam ngam hilou ahin agam sung chu kichat le tijat nan adim tan ahi. Si vang chu aphul lah lah jengin ahi. Hichun thingbah ahung khe in uicha kap bangin gamsung chu akithong den in ahi. Chomlou kah in go jugo bangin van ahung jingin khovah kon a mi le kongbul kihet khen Lou bang ahitan ahi. Hichun amani jong pot doh ding atilhon le Ngamdou in song akilho pil in alhun ahile aloipa aman in atuh in ahi. Hichun ahung kithoudoh in aluchanga thisan along in ahi. Hichun Ngamdou in Holsei koma loipa nang chetan kei koma naum jingle naboui ding ahi atin aloipa asol sol jeng tan ahile Holsei in jong chiloi in kho ajin masangin atin ahi. Hichun Ngamdou akithoudoh in thao( Kerosene) chu achoiyin Bongthing phung chu ajon in ahile amaiya khao a akipal toh alhudeh deh in ahinla ache nah nah in apeng in ahi. Achepun chum thao achop in chule Meilou ho chu aban the the in ahile mi apeng Jah Jah jeng in thingphung chu avel Kim in abon in thao achop in meikhet a ahal got le Thilhate chun asem mit peh leilei un ahi. Ahinla angadeh pon angho kicha ding kahisah ham atin ahi. Hichun amajong meikhet a mei ahal theilou phat in alunghang in ameithal a tol chu akap leh bomb pohkeh bangin mei ahung kouvin amajong alhun ahi chule aloipa Holsei injong Ngamdou chu akou vin ahile adonbut tapon hichun mei akou jengin Bongthing chu akithing in ahile mi akap in Bongthing chunga chun numei khat akanga kivon chu aleng le le in akisem in ahi. Hichun mei akhun ahile Holsei jong ahah thei taponmeikhut jeh chun amit a mitlhi along in chule aloipa jong akithopi thei tapon ahi.

Hichun pasal ni ahung in Holsei chu Adah a aman lhon in akailhon in alhei pi lhon in ahi. Hichun Holsei yin kaloipa kaloipa atile amahon jong imacha tiponte hung pot in atin ahile Holsei chu aleng abangin aban tuh teni chun apentho pi lhon in Lhang Chung lam alhut lhon in ahi. Hichun tui adonsah lhon in hichea hin kichol in atilhon in ahi. Hichun Holsei jong tui adon jou apat ana mulha tan kho ahepon ahi. Alangkhat a Mollem Lhang chu meiyin akah ajeh chun meikhu akitungin alangkhat a khomi ho jong Holsei le Ngamdou khojing ding hita ahung kile lhon lou jeh chun hilanga achilhon ding chu aging mo uvin ahi. Hichun golhang hole Ngamdou le Holsei insung miten gamnlang ahindal un ahol in ahung uvin ahi. Kho ajing chep chep tan amaho jong kino tah a ahungu le Kho ajing tan amahon jong meisal akidet un lampia ahung peh ule Mollem Lhang alhun kon un amin lhon in akou un ahi. Mollem Lhang chu meiyin akan mei jong chuti tah a khoh chu ahitapon ahi. Hibang khal laitah chun Go ahung phin in gonel ahung nun hichun Mollem Lhang kah ahin ahi. Amaho jong hitia chu ahung hungu le Mollem Lhang ahung lhun kon ngel un lampi pam a Holsei chu ana touvin ahi.

Amahon jong Adel lut uvin naloipa lah em atin ahile aman jong tua nang ho hung masang jep inchun mitam tah ahungun un ei umpi uve kaloipa noilanga khun aum e atin ahile mi themkhat pin noilang chu Adel ule Bongthing chu meikhu in atom in Si kangte um nachu akoma hampa hogeiyin lou jeh in athijeng uvin ahi. Bongthing chu akithing in leiset pumpi chu akiling in ahi. Amahon jong Ngamdou tia akou uva ahol le le ule akeng hiuva thinghung bul’a ana kingaiyin aluchang chu thisan along in kho ahe tapon ahi. Amahon jong ahinpo un hitichun ajan ajan in inlam ahinjon tauvin ahi. Ngamdou loule ai jat jat in anen un ahile ni nijouvin ahung limdoh in ahi ahi. Asun ajan in thempu pan aching jingin a in maiya doi buh asem in achang jingin ahi. Ngamdou ajan mangle Thilhate chu amu jin akah le akicha jin ahung peng jin ahi. Thempu pan Ngamdou athoijin ahile alhagao umchan ho avethei yin ahi. Alangkhat a thilhaten thadinga anga jingu ahin akhosungu Ngamdou in asuh set jeh keu hilouvin amaho Si teni kikah a gam vaipo ding akichu jingun amaho kikah a mithum lang akidou uvin ahi. Hinla Ngamdou jeh in Si (sante) in akangte chu ajou uvin ahile Si kangte chu aum nao dalhan akichon tauvin ahi.

Ni phabep jou nungin jankhat Ngamdou jong in a achanga atou le pasal mi thum a in a hung kholai leng uvin ahi. Amaho chun akinaipi kho apat kahiuve atiuvin abon un inmai ya um kemchunga chun atou un lhavah noiya akihou lim un ahi. Hitichun amaho loi chu nilhah seh tobang in ahung jiuvin akivop nop lheh un ahi. Khosunga um mipi teho geldan in akho gal lang uva cheng eimikho ho hinte atiuvin ahi. Ngamdou ol ol in Holsei toh akivop nale loicha ahilhon na aheimil in hiche pasal hotoh chun akivop jin ahi. Kah kah kom le gamlenga kache ding ahi atijin anun adoh le kaloiho toh atijin ahi. Hitichun nilhum konle sa ahin pokit thoujin ahi. Amadin sakap le Sa chu adei phat phat tobang in amutheijin ahi. Nikhat Seiboi Jong Gamlenga achanga ache a thingga anga le aloipa Ngamdou chu ahungin uichal hoisel ajem jong kilou cheh thum toh ahung vaikon in ahi. Aman Jong avet vet le Ngamdou chu uicha hotoh akihou jin Sakkhi khat ahung in avet le Ngamdou chu achom in Sakhi chu ahung changin aman in ahile uichal ho chun anuisat in ahi. Hiti chun amaho hung pot jouvin Holsei jong lampi agom lam ala in khosung ana del gangchal in ahile aloipa Ngamdou chu aloi mithum toh sa chu ahin po uvin Ngamdou te in a chomkhat aum jou uvin sa khat chang kilah louvin inlam ahin un ahi. Holsei in Ngamdou kivop pi hochu mihem ahilou dan ahen ahi.

Nikhat Jong Ngamdou achangin Mollem lhanga ache in, Mollem Lhang gam gamlha ahin khosunga pat aman chomlou kah in alhung jin ahi. Thilha phalou ten aum nao Si le Bongthing meiyin akah a ana agop apat adalha tauvin ahi. Hiche Mollem Lhang chu masang tobang hitalouvin mipi ho gamlenga acheji tan ahinla Ngamdou bou vin hiche gamsunga chun sa akap jin ahi. Ngamdou phatseh tobang in gam a aum jin thilha pasal ho toh akivop jin ahi. Phat chomkhat jouvin Ngamdou hatah in ahung dam mo in ahi. Thempu pan jong adam nading in thil ijat ham abol kit tan ahi. Ngamdou ahung phadom dan in aum in, nikhat Anu le apa in achanga adalhah kah uvin ana mang in atahsa avel mukit tapouvin ahi. Holsei mangin in aloipa akimupin loipa kanu le kapa ana vekol jio keila hilanga kaum tan bouina nanei teng Mollem Lhang hinjon jin atin ahi. Holsei in anule apa aseipeh in Ngamdou athi hilouva achen na akhel thu aseipeh in ahi. Lhagup jou nungin Ngamdou khatvei in ahung pha in hiche jong chu Jan ahin Anu le apa akimupi in ahi. Apan mihem lah a nachen nomlou ngal ahitah le khosunga numei chapang nakichat sah in hung velphah tahih inlang khosung jong nangho thilhate hunglut tahih uvin atin ahi. Hiche nikho apat chun gam leng hon alupna le atouna mun ho amu jiuvin ahin la ama atah tahsa le amel akimu kha pon ahi.

Thempu seidan in Ngamdou thilhate te toh loicha ahitan amaho toh akivop taovin ahi. Ngamdou nu le pa lou lhona mun jouse a sa alut ngei pon chule alou u ana kilho peh ji in ahi. Thempu pan Ngamdou ahingin thilhate lah a nomtah a cheng ahitai atin ahi. Ngamdou nu le pa in jong achapa anehsah nom lhon aum teng louva adalhah peh ji lhon in ahi. Alousoh ga u ahoijin midang a sangin apha thei lheh jin ahi. Khomite jousen hiche Mollem Lhang chu Ngamdou chen na gam in aheuvin koiman hiche lhanga chun sakap ho abolji tapouvin ahi chule masang bangin gam gimneitah chu ahipon ahinla hiche gamnoiya chun chapang ham le mi ho Ogin akija jing nalaiyin ahi. Gamsung haosapa in hiche Mollem Lhang gamsung kah chu lou a lho louding chule koima gamlenga moh che ji taloudia thupeh anei dungjui in hiche Lhang chu akum akum a tohkhah lou le suhkhah lou gam ahin ahi. Ngamdou kah kah le Holsei manga akimusah jin ama tailou koima akimusah pon ahi. Aum chan ule akhochen dan jouseu Holsei in anule apa aseipeh jin mihem le thilha ahitah jeng lhon vangin aloicha hina lhon akijop jingin ahi. Kah kom komle Holsei gam lenga ahiji teng aloipa mihem Mel in akimupin gam alengkhom jilhon in sa akap lhon teng achen nacheh lhon akijot jilhon e akitin ahi. Hijeh chun tunichan in mijousen Ngamdou ahung nalaiyin hiche Mollem lhanga chun achenge atiuvin chule Holsei le Ngamdou golcha hina jong aum jingin ahi.

——BEITA—-

Thusim hi anom lheh e nati le anoiya “LIKE” button khu meh in writer ho na support nau vin, chule seinom nanei le anoiya comments nahin bolthei u ahi.

Site nalut a notification pop up hung potji ho allowed anabol ji uvo maban a thusim thah ahung ki post teng notice namu ji diu chule Bell button a subscribe kiti chu meh un.

Previous articleKACHUNNU MELIN NALANGE
Next articleEIMA KINGAILUT HI MIDANG NGAILUTNA HUNG KIPAT NA AHI

LEAVE A REPLY

Please enter your comment!
Please enter your name here