Home Sasat Baite KA-U LHOMIPA

KA-U LHOMIPA

320
0

BY:Sasat Baite
part I(one)

Masang lai a chun Khongjang kiti kho khat ana aumin, hilai khomite chun phat khat komkomle gentheina le hahsat na anathoh ji u ahi.
Khongjang a haosapu chun chapa khatle chanu khat cheh ana neiyin pusal pa minchu Songkhup asah in achanu min chu Janei asah in ahi. Achateni chu aneova pat anuin ngailutle khankho hoitah in ana hik toupeh in, chutahle anun akingailut jing lhona akikhen theilou nadin sumeng a kisem HAH khat cheh ana sempeh lhonin ahi. Kingai lutah in hinkho ahin mang tou lhonin nikhat cha jong akikhen thei ji lhonpon aneh neh ane khom jilhonin angol ngol jong angol khom ji lhonin ahi.


Songkhup chu gam aleng jin gamsa kimat matnin ahinpo jing pute pehding dol hihen thah dinga lom ho jouse jong thonlou vin apejin ahi.Hitia nomsa tah a hinkho amanlai in nikhat Songkhup chu Sakap din gamgil thingmang noiya achetan ahil. Gamgil lah avalut chun sajoi khat amuin hichu ajuijui tan ahile khatveile sajouchu aman sah jin khatveile tamtah ahin mujin ahi. Hitia sajoi chu ajui juiin ahile alel tan asajoi juina panga chun tuikidil ni chimaet amun, mitvet ding chun ahoi mama jengin donlou di chu ai a kilhim abang jengin ahi. Amanjong twi chu atwi thei in akidip in ache pai pai kittai.

Nilhah lang ahi phatin jule vaten age nading ajonpan taovin ahi. Ima nelou ahijeh chun agilkel tan, aman jong twi chu adon chop tai. Atwidon chu twivamit ahijeh in twi adon a pat a chun atin alu athah pantan akitom tomle atin saotah ahin jedoh tan ahi. Amale ama chu akiven ahile akichatan iti inlang kache ding hitam ti agelle tinle ha saova galut a min eohin nuisat khante ti tijat nan inlam ache ngam taooi. Phatchom khatjen gamla a chun gamsa akapjin ahing hingin ahi. Nikhatma gamla a avale le lholen thim khatin ahin ngeh tan ahile ama jong alungin kibotoi din akijein ahile atin aha ahin jedoh tan ahike lhochun akichan ajam mangtai. Akingaito jin ahile ma le ama jong akiki cha jin hinkho ni mang ahitah jehin hah aaa lheh in ahi.


Alangkhat a Janei jong aupa in ahunglouna asotphat in alunggim tan, holna thei ahol vangin amujou tapon ahi. Aupa pulchu adou douvin ahile atahsan jong ajoutapon alim amel akikhel tan anu apan iti alhep vangun alungmong thei him him tapoi. Kumkhat kumni jouvin amanjong agentheina chu ahin haimil mil tan, masang ahinkho bang ahung kile doh kittan ahi.


Songkhup chu gamlah ngen cheng a hinkho amangtan ahike paodan hamdan ho chuke khankho ahe tapon mihem jong amunom tapon gamlah a chun hinkho amang mang tan ahi.Nikhat avah lelen ahile akhou Khongjang chu aga sudoh tan ahi. Kichalou hellin khosung chu ahungvah lutnin ahile khosung chapang hochu tijat nan adimtan aeu.. taovin ahile Lhomipa chu alunghang in chapang khat alol a amanin alhaimang pitai.
Khosung haosapu mipite chu ahinkhom tan phate a akichih thei iva chapangho akivet kok na diuvin thu apetan ahi.Hitia kiging jing a aumlai uvin imacha jong atitapon kichat tijatna jong aum tapoi. Kipah tah a hinkho amangtaovin ahinkhou chu masang bangin amangtao vin ahile nikhat gimneitah in huile go akithoin van agingin kol aphe phe jengtan koima polang potthei in aum tapon ahi.

Jan khangkim donin huile go ho ahungthip tan ahile khosung chu athip behtan michen nalou abangtan ahi. Chomkhat jouvin Lhomi pajong ahung eutan khosung mipite chu imu theilouvin alhatan ahi. Chapangho seh hilouvin minu mipa jong koiman polang aphangam tapon, jingkah khomu chip chip in imacha husa akija kittapon ahi.Hitia hi phat kkhat komkomle gentheina khosung mipi aneo a pat alen geiyin gentheina ana thoh ji un ahi.
Nikhat Janei jong achang a gamlah a thing podin achein ahile gamgil lai a chun thinghoi thingpha adinggo jong atamjeh chu ningkah le ka.u to jingkah tha a poh di tin tamtah atan tan ahi. Sun a pat chun apang avel a chun khatvei veile mikhat ahung tuhsa jin ama lunggel a chu thing ahoithei jeh a khosung mite khattou hidi ham tin micha loutah in abol ding chu akibol bok tan ahi.Lhomi pa nongchun tbing kitan nalang chu ahin nai cheh cheh in ahile Janei chu amutan ahi.Anaonu ahilam chu ahetapon hoi asah val jeh chun gal lang khat a pat chu ave ve jengin ahi.

Nilhah vai chephat ahiphatin Janei jong athing amipoh in inlang ajon tan ahile Lhomi pan jong ajui juiin ahile Khongjang kho a alut chu amu phat in amajong akile kittan ahi. Ajing in Lhomipan jong Janei amunom maninJanei thing tanna koma chun thinlom tamtah agakiset tan ahi. Janei jong nidang bangin thing podin gamlah lang chu ajontan ahile Lhomipa injong thing alhon lhon a anaset chu amuphatin Janeiin jing heu ipi dinga thingdong nalah ham thingtah hija lah a atile Lhomipan adonbut nadig ahetapon sottah jou in kamoh lahkhom mai mai he ahintin ahi.

Janei: Heu among mong a nangho kho huila.g ham?
Lhomipa bol di.g ahet loumana gamgil kang koh.
Janei:Heu nain kote huilang a umtam?
Lhomipa:Kahet talou sot a kaki khen ita.

Janei:Heu namin ipi ham?
(kumsottah gamlah a achang a hinkho aman phat a ima cha ahetlou ahitan pao ahet kham kham a adon but ji ahitai.)
Lhomipa: Kahetlou
Nachang a naum ji tam heu tia adoh kitle Lhomipa chu alung ahang doh in ada lha in Janei jong vai haiphat ahitoh kilhonin inlam ajon kittan ahi.Chuchi nijan chu Sial le Kamkei aham in khosung chu gimneitah in ahung umkitai, jankhang kimin khosung lam lhongpi a chun miche gin akija jiin koima vang ave ngam aumpoi.Hitia chu ahung um pantan, sunle khosung gollhang ho akihou jiun tuni lhah mat doh ding ahitai akiti jiuvin hitia akitep jiteng ule kichatna husa hojong chu ahat jep jep jitan ahi.


Jankhat chu hitia ahungum kitphat chu khosung gollhang khatin kicha sasan ave in ahile Haosa teinmai a chun koiham kihe theilou mihem tobang thilha tobang khat Haosate inlang avet pet amu jin, khosung chu phatkhat komkomle aga vel jin achai chaina le Haosate in chu avet namun chule avet bang bang chun ave jin ahi.


Hitia thuum chu mipi koma asei phat u chun thile thi hinle hin natthei ham tha tbei ham tin akikhom taovin ahi. Jan ahiphat in khosung gollhang jousen chem hihen thal hijongle anei sun sun u chu akigot un achang taovin ahi.Jansot thimtah anga nungun koima ahung deh pon ana imu lhugam tao in ahi.Lhomipan mipi umchan amu phatin amajong akhoh cheh cheh tan ahi. Janle khosung chu gamsa hamto tuhsat to chapang ho kato aul jeng jung jin ahi.Ahchamul kibottang to ganche hojong amang mang jeng tan ahi.Khosung a uicha aneojep hojong aham ngam jipon gimnei aum lheh in ahi.

banjom kitding

Previous articleNUNGAH CHAPANG
Next articleKHAMTANG LANU(Part-3)