~Story By
Nick Hangshing~
Tunia thusim hi kichat nathei beh wang ahipon ahin, thusim tah2 wang ahi. Keima to wang ahipon ahin kei to bang2 a kahin sut ahi. Asim jousen ehet them ding uvin kahin tem e.
Thusim kapat masang in, hichi thusim a kisei room aum dan hi hin sei inge. Hichi ahin kum 15 kahin ahi, chuleh kalup na kikoi dan chu ahileh kalup na lulhun lang chu ka almerah toh kido mat ahin, chuleh ka almerah kot chu aum lou jeh in kot khel in pon kadah tho in ahi. Jaan khat hi almerah lang kangat in kaloipa toh phone a kaki hou lhon in ahi. Chom khat jou in ahung dap cheh2 in ahi, hichun kamasang a almerah a kikhai pon chu hui in ha mut a amut a amutlhah bangkhun ahung khelhan ahi, ahin hui in amut ding injong window chu phatan akikhah in ahi. Hichi almerah pon akile lhah2 chun kachunga thil khat aum bang in kahe in ahi. Hichi pet tah chu kamin hi ol cha chan ahung kikou gin kajan ahi, ahin room a vang koima aum pon ahi.
Hiti chun nikhat jong hi inna kachanga kaum in tv kave in ahi. Hichi pet chun room khat langa kot kikha gin kaja in, hichi jou chun light hi ahung kithah in chuleh ahung kivah kit jin ahi. Hichun kei jong room lang chun kajon phei in ahileh koima aum kit pon ahi. Inna kachanga um kahi jeh in light kitha leh kivah chu midang ngoh thei jong ahipon ahi. Ni ijat ham jou in ka room chu kaki semtup in ahi. Kalu lhun lang chu ahom keu bang in aum tan ahi. Ajeh chu kalu lhun langa almerah kot dinga kikhai pon chu aum tah lou jeh in ahi. Hichi nilhah a kalup a chun kavei lang sang a bang chu ahung kikiu gin kaja in ahi.
Ahivang in ema kabol pon ahi, hichi pet tah chun ka jetlanga sanga bang chu ahung kikiu gin kaja kit in ahi. Ahin hichi pet a vang chun nivei ahung kikiu tan ahi. Hichi phat chun kaki ahung chathim tan ahi, hichi jouchun kamin hung kikou gin kajan ahi hichun ken jong lungset tah in neisuboi hih o, ka emu thei hih e katin ahi. Hichi pet tahchun ema jouse athip chet jeng tan ahi. Ahung thip ngal tah chun kathusei chu kagah kinung gel leh keile kei kihou kabah jeh chun, kaum chan chu angol kabah jeh chun kanui jong ahung jan, kahung nuilhah chun kaki chat najong a oldom in ahi. Hiti chun kanui jeh a kaki chat na alhom jeh chun, nuina ding in tot na bou kagel in ahi. Hichi jou nini jou in kaloipa toh ka room a hin ka emu lhon in ahi, kalup hon vang achun ka emu lha hon pon ahi. Hiti chun keini jong kalup pum lhon in kaki houlim2 lhon in ahi. Hichi pet tah chun ka room bang a thil koina ho chunga robot kichep na thum kikoi ho lah a kalup na akon a kinai pen pa chu alhu ahung kihei in keini lang chu anga in ahi. Amasa chu room window lang angat ahin, tun wang kalup nalang anga tan ahi. Alu chu kahei toh jong leh kaum lou kah in ana kihei kit jing kalup nalang chu ana nga ji in ahi. Hichi jou a pat chun hichi kichep naho se2 chu room a kon in kala doh tan ahi.
Achai napen a kasei num chu ahileh, nikhat hi light ahung thi in ahi, hichu jingkah pung 7 vel ahin, ka inn window u atam lou toh, nisa aso loulai jeh chun inn sung chu athim in ahi. School a chi dinga kaki got pet ahin, chuleh light ahung hung leh akihet pai nading in room sung jouse a jouse a light chu ON san kakoi uvin ahi. Hichi pet chun ka table chunga kitung emergency lamp chun ahung phe lap2 in ahi, hichi jouchun ka room kot chu ol cha ahung kikha leh kihon gin chu kaja kit in ahi. Hichi jouchun minute khat tabang athip chet jeng in ahi. Hichi jou2 chun common room langa socket chu akisadoh leh akibuto gin kaja kit tan ahi. Hichun common room lang chu kachi phei in ahileh socket chu tham jong akitham loh pon chuleh kot hojong phatan aki khah tup chet in ahi.
Khat gah seibe kit leng, hichi hi room sunga kona soh wang ahitapon ahi. Ahiwang hichi thisoh hi ka compound sunga kon a soh ahi. Compound sunga hin inn neocha khat aum in ahi. Hichi inna kon chun mi kihou lim gin aki ja jing in ahi. Chuleh amaho kihou nachu akicheh thet ji in ahi. Atam jo in akihou nao athusei uchu phatan akija jin chuleh abangleh athusei uchu akihethei jipon ahi. Hiti chun phat ahung chi2 leh ema jouse angai nadan in kahin lan kichat lampang hi kana hebeh tapon ahi. Chuleh mihem chunga khanset na ema anabol doh lou jeh injong kaki chat najong chu alhom chom in ahi.
~BEITA~
