Thilha thusim.
Lelen Kipgen.
___________________
Kagolpa Lalboi hi ahung dammo tai. anat na hi ana ngol, gamlang in abol um etiu ho khu ahi.
adam lai chun jan leh kana geh khom ji lhonin, ka emut kon lhon leh, “athi masa sa kilhem to hite” ka kiti ji lhon in ahi.
Nilhah ni lang katou piu ahitan, nilhah thumna hin aphadom dan a aum tah jeh chun 8:00pm in emu dingin inlam kajon tan ahi. lha vah ahin, kho kimu gao phel phul ahi. inlam kajon tan ahile kanung langa hin mi hung tabang in kahe jin, kanung vet le koima aum ji pon ahi.
hitichun kahung emu kit tan ahile, leitol langa chun mi vahle le tabang in aum jin abang le bang lah dung chu khut a kijut tabang khun ahung ging jie. ka kichat thim jeh chun pon ka khu khumin ahile kana emu lhu tan ahi.
ka golpa Lalboi hi atahsa alen in asam asaovin mi khalah ahi.
hitichun ka emu tan ahile, Jan sot lang 12:00am don hin kaloiho khat in eihung thouvin kajah ah, “baii, Lalboi ka emut kah uvin ka holmo taove,” tin eihung seipih tan, kei jong gang chelin ka kithou in, Lalboi te in lang chu kajon tai.
ka lhun in mi tamthim anaum uvin ahi. “hol nathei chan kahol uvin kamu tapove,” tia asei phat uchun kei jong ka kigelin ahile, ahung nat phat le hin gamlang ajut ji jeh chun kaginmo nakhat aum tai. ain nui lang uva hi gammang khat um ahi. hiche gammang leh in kikah a chu mot(banana) lei khat um ahi.
ken jong kaloipa khat ka kipuiyin, in nui lang chu kajon lhon tan ahi. troch light khat ka kichoi lhonin, ka trochlight lhon chu avah hat kit lou emasang nai cha bou kimu pha ji ahi.
kache lhon le gammang chu kalhung pei lhon tan, thing chung lang chu evet le lha avah jeh a chu thing chunga thil um ho akicheh lou vanga kimu thei ahi.
mot lei pam gammang lah kalhung lhon tan, kei ka masat a kanunga kaloipa hung ahi. chung lang ve louvin kache nading bou chu kaven kache che tai. chuin chung langa thilkhat um dan hin kahe jin ahinlah ka ve deh poi. kache che le anui kaphah hin kalung atheh val jeh chun trochlight katou kho a kavet le, vo henu…. kachung laitah a bah thethu, mit lot ket kut, alei saotah in achol lhan thing chunga kaloipa Lalboi ana kikhai kamu chu salam in eithat in kadin na mun a chun kalhu den tan ahi.
Chomkhat jouvin kahung khang doh in ahile mi tamthim ana um tai. aum dan chu kei katijat val jeh a kho helouva kalhuh a chu kaloipa jong tija val a aka toh apen atho jeng le inlanga um ho chun ajah uva eihin dellut u dan ahi. hitichun kaloipa tahsa chu thing chunga pat i. kala lha uvin, tehse hon “thise khosunga aki polut ngei poi, chule lenkhom jong akibol ngei pon ka jong aki ka ngei poi,” ati jeh uvin khosung a polut louvin lhanmol langa ka po phei taovin ahi.
mi som val bep in ako kalai uvin jan ma ma a vui doh ding tin kino tah in ako kalai uvin ahi. thilong hi munkhat a kalupsah uva chule light jong aha vah ding umlou lame khat bouseh um ahi, velkhat hi lame ahung mit in kabon uvia kapen jeng ule ahung vah kit tai. chuin thilong chu ka veuvin ahile, athal langa kilup sah pa chu akhup langin analum tan ahi. chuphat in ka kichat jeh uvin ako jong kong chanbep kilai doh nalai chu kamoh vui taovin ahi. akong jong kisem lou meilhei del khat kasil peh uva hitia chu kamoh vui jengu ahitai.
aum dan hi ka vui chai masang uva numei chapang ana bol chah pan dan ahitai. nupi khat mithi te inlang hin jon khat hi ana kimusah a thideh chet a ana lha dan ahitai. hitichun ka vui chai uvin inlam kahin jon taovin ahi. khovah kon lang ahiphat in mithi te in a tou khovah dingin kache taovin ahi. mi jong katam beh povin, hitichun ka kihoulim lim uvin ahie husan kahin ja pan taovin ahi. athi na in nui langa chun mi ahung kihoulim jin, abang le mi ahung kap jin ahi.
Chomkhat jou chun husan jong ahung nai diu diuvin inkom lah ahin phatai. in nui lah dunga avahle le jin, inchung dung inbang lah ho poh lah lah in ahin lha jie. chuphat in insunga touho chu koima aham ngam akihou ngam kaum tapovin ahi. hitichun koima emuthei talouvin katou khovah taovin ahi.
Jingkho ahung vah tan, koima lou kon ngap, natong ngapcha kaum tapovin ahi. mithi te in a um ho keu hilou in langa um ho jong koima a emu um talou ahi. hitichun mi jouse chu koima vaikon doh um louvin ka kichol taovin ahi. nilhah ahung hia, jan ahung hiding chu mi jouse kichat na ahitai. ipi ahung ti tadem ti chu mijouse tijat na ahitai.
Nilhah lang ahung hitan, kho jong ahung jing kit tai. khosung mi ejat hamkhat mithi te in achun ka kikhom uvin, in a geh jong aumin ahi. hitichun kho ahung jing tan husan jong ahung kija pan kit tai. khosunga uicha ho jong akipan kit taovin agimnei lheh jenge. insunga mi ejat hamkhat aum uvin, leitol a chu in neo khat kisa ahin, hiche in a chu numei chapang a emu nom ho emu jiu ahi. chule leitol a chu lhumpi kaden uva, mi phabep khat in mei ka ki oi u ahi.
jan lang thim hin, room a numei chapang emu ho ahung peng jah jeng uvin, akap amao hibangse ahung so phat uvin kadel lut uvin ahile ema aum kit poi. aum dan chu akimusah’u dan ahi. chuphat in golhang phabep khat in ka guard uvin ka emut sah kit taovin ahi. abang le khonah langa mi ka gin akija jin, abang le khoto langah akija kit jin ahi. abang le in nui lang athi namun langa ahung kap kit jin ahi. hitichun khosung chu uicha ham athong lha liu jeng in agimnei lheh jenge.
hitichun thi le nang in ka khovah ham ham uvin ahi.
ajing in koima vaikon kaum kit tapovin ahi. mithi te in a um ho jong, in langa um ho jong koima ka emu chom povin ahi. jan ahung hi kit ding chu kihol lel aum lheh in ahi. kho ahung jing kit tan mithi te in a chun mi phabep khat ka kikhom kit uvin, jan 10pm don hin kalel thim in inlang kajon tan ahi. ajeh chu jan ejat hamkhat emu lou kahi tah jeh chun.
hitichun emu dingin ka room kajon tan ahi. kalel val jeh chun kana emu lhu pei tan, jan lang hin kamang tabang katah tabang khat hin kalupna komah kagolpa Lalboi adingin eive ve jengin ahi. thing chunga akikhai pet a amel chu apun kakom a adinge, angong a akikhailih na khao jong aumin ahi, alel acholin amit akang ngen ahin agimnei lheh jengin vetngam ngam ahipoi. hitichun ka kichat val jeh chun kahung lip doh in ahile ema aum kit tapoi. ka room sung vang chu mithi anam thet jengin nah ho–ho ahipoi. inkom lah dung, leitol lah dunga chun mi vahle le tabang in aumin, bang lah dung inchung lah dung chu ahung poh the thu jie. chuin eilhim um bangin kana emu lhu pei kit in ahi. chomkhat ka emut le ka kengto lang pon ahung kihoh kit in, ka kicha val in ka peng jengin ahile kanu le kapan eihin del lut lhonin, thil umdan ho chu kasei in ahile amani kom a lum dingin eipui lhon tan ahi.
ajingin sun in ka emu nilhum keiyin ahi. jan ahung hikit tan kei jong ka changa ka emut ngam lou phat in ka nu le kapa kom a ka emu kit tai. jan sot lang thim hin kahung khang kit tan ahi. kholai dunga uicha ham gin leh husan ho jeh chun ka emu lhu thei tapon ahi. sot thim khat jou hin ka kilhim kigu tan ahile bang ning lang athim lah a chun mikhat um tabang hin kamu jin, ka emu thei tapon ahi. kalung atheh valin troch light a kakho a kavet le vo henu bang ning langa kagolpa Lalboi ana din chu kahin mutan ka kap in ka peng tan ahile kanu le kapa ahung khang in chuphat in amang kit tan ahi. chuphat in kapan, kanu toh akikah lhon a ei emut sah tan ahi. akikah lhon a ka emut vang chu. ka emu lhu thei tapon ahi. khovah kon lang hin kana emu lhu tan kamang hin ka golpa Lalboi chu kamu tan ahi.
kajah a aseiyin, “baii, athi masa–sa kilhem to hite eti lhon hilou ham. ebola chubanga nei kichat ji ham.” atin amang kit tan ahi. kei jong kahung khang doh in ahile kho ana vah tai.
kamang chu kagel gelin ahile, adam laiya kana ge khom ji lhon a, ka emut kon lhon le “athi masa–sa kilhem to hite” tia kana kitot ji lhon chu kahin geldoh in ahi.
hitichun jan le kanu le kapa kom a ka emu jin, husan jong ol–olin athip in lhathum jou lang chun ema ati tapoi.
_*BEITA.*_
*_A fiction story by–Lelen Kipgen._*
____________________
