JOUJAM LE MANGCHA THUSIM-1

JOUJAM LE MANGCHA THUSIM

-Crosby Haokip

PART 1

Masanglaiyin ZOGAM kiti kho khat anaume; agam chu anomin, khosung miten thinglei changlei abol’uvin, agamga ahoiyin, amol alhang chu ahing dil delin aphatsehin chamkang lai abang jingin ahi.

Khosung chu molchunga um ahijehin hui athengin, mi adam theiye; chuleh acheng khosung miho jong ahoi-theiyuvin ahi. Jingkah langleh
miho vai akon’un na atong’uvin, nilhah lang vailhun tengleh khosung lentola nunao chapang, nungah gollhang ho akichem’uvin, chule houin lampi kom thinglong chunga chun nungah gollhang ho atou’uvin avela hung ho chu achemo helna thei chan in adaiyuvin ahi: chujongle
nungah, gollhang, minu le mipa hon volley ball abeng’uvin, gollhang chapang hon ponsea kisem pehlum apeh un, nungah chapang ho, kichepna jatchom chom kichem in a-ao lah lah jeng uvin ahi.

Nikhat hi lentola Joujam, Mangcha, Kimboi, Thangpu, Lulun chule
aloi dang hotoh akichem’uvin, alah uva Thangpun khom akituhin, aban ban chan amasanga pa kong cheh chu akituh’uvin ahi; chuin
Mangcha ahungin Joujam jah a,

MANGCHA: “Hepi, hepi, nachangmai tu min tammo?”
JOUJAM : “Amin naipoi, katu pan nalaiye.”
MANGCHA: “Hepi, hepi, nachangmai tu min tammo?”
JOUJAM : “Amin naipoi, apah pan nalaiye”
MANGCHA: “Hepi, hepi, nachangmai tu min tammo?”
JOUJAM : “Tun vang amintai, kiuvin lang atah pen pen kilo tan,” ati tan ahi.

Chuin Mangchan anungpen pa a pat’in khom tuhpa chan geiyin olchan akiu soh keiyin, chujouvin anukhah pen a pangpa akai pantai. Amaho jong anuitoh apentoh athouvin nom asalheh jeng un ahi; ahinla Mangchan Thangpu sangkhol abo eh peh tan ahileh, Thangpu
jong alunghangin Mangboi abon lhun akidel lhontai. Hichun aloihon aphal uvin ahi.

Chuin Thangpu jong lunghang tahin akitom in Mangboi jah a,
THANGPU: “Thanglenmang, nagamhoise dia kasangkhol nabo eh ham?”
MANGCHA: “Thangpu, neingaidam o, kabo eh lhim jong ahipoi,” atin chuin Thangpu alunghangin Mangcha ahin jonin alol ameh peh tai.
MANGCHA: “E..he! Kalol nahin meh jeng chu nakingap chat toh tave!”
THANGPU: “Kaki ngapchat louleh nang ipia kigel nahim?” atin hichun Thangpun Mangcha tola abon lhun ahile aloi hon hon ahin dellut’uvin Thangpu akaidoh tauve.

Chuin Thangpu akitomin, akisen kit in Mangboi jah a,
THANGPU: “Neilhauvin, neilhauvin, jongsan gol, ipia kingaito hiya, ahung pao ngam vehta!”
MANGCHA: “Hung tango, hung tango, nalol kabo tan ding hichu, koi kichat ding ngeitaha.”
THANGPU: “Naham tam nahlai ham, nalol thi kachop ding hichu o.”
MANGCHA: “Nahat leh hung chop tango,” atin chuin Mangcha le Thangpu jong ahung kijonto lhontan ahile Joujamin Mangcha khut atuhin akaidohin ahi. Chuin Joujamin Mangcha jah a,
JOUJAM: “Heu, hungo, inlanga che tahite. Hiche mitoh kichem theilou toh ikichem chem hih uve,” atile Joujam thusei chu Thangpu alunghang tan Joujam ahinsen in:
THANGPU: “Lhingjoujam, nani tah lhona nathoh khom lhon ding ahiye, hamval in,” atitan ahile aloipa Lulunin aphohin ajah a,
LULUN: “Cho, nangtah jong hi, numei ho poutoh kina jihihin, jachat naum e. Cheute cheute,” atin chuin Thangpu le aloiho jong achemang tauve

Joujam le Mangcha jong lunghang tahin in ahin jon lhon tai. In Varanda alhun chet lhonin Joujam nu kot a pat’in ahung potdoh chetin ahileh Mangcha mai dup ho amutan ahi.
JOUJAM NU: “Mangcha, ipiti nahim? Koitoh nahung kinah ham?”
JOUJAM: “Henu, lentola kakichep uleh Thongneithang hung lunghanga ka-u Mangcha ahin voh ahiye; ka-u Mangchan suhkhel ima aneiloupi chu, henu.”
JOUJAM NU: “Boi, tukal koima toh nakinah lhon lou ding, naloi napaiyin nahin phin lhona voh ding nahin got jongleh kile thoh louva naum lhon ding chu o. Mitoh kina ho khu mingol ahiuve.”
JOUJAM: “Henge henu, koima toh kina lhon ponge,” atin ahi.

Chuin Mangcha naonu, Kimboi hungin aupa anne dingin ahung koutan ahi:
KIMBOI: “Heu, henun anne dinga eihung kousah ahiye. Hungo cheta hite.”
MANGCHA: “Ahile Joujam, kei annen chetange.”
JOUJAM: “Henge; heu, nang jong anneh tuiyin lang, ahivangin haneh hih ta o,” tin ahin tot in ahile Mangcha’n jong,
MANGCHA: “Nangin jong haneh hihta o, ajole kipolel khan nate,” atin amani jong anui lhonin, chuin Mangcha le anaovin jong inlang ajon lhonin ahile aupa maidup chu Kimboiyin amuphatin alungdong tan ahi.
KIMBOI: “Heu, namai chu ipiti ham? Mitoh nahung kinah ham?”
MANGCHA: “Nao, khuche Thongneithang, mingolpan eihin suhpeh ahiye.”
KIMBOI: “Khuche pa vangkhu aphatmo dan khosunga kithang jeng ahiye. Janhia jong kaponsil eilahpeh a, ahidan dana tua suh-o tou-o alhah nah khu. Kihasei kit leh anu le apa mi bahgam thei ding ngen hikit u.”
MANGCHA: “Nao, hitobang thu chu seihihin, mijah dingin anom theipoi; abol nom nom u bol jeng uhen, aphatthei diu phot uleh.”
KIMBOI: “Amaba chula, kikhohsah vala,” atin ahi.

Jan ahung hitan, Joujam le anu jong lupnaa alum lhonin akihoulim lhonin ahi:
JOUJAM: “Henu, ka-u Mangcha vang aphavale, khosunga pasal dang ho khula aset thei dan dan u khu, jachep loi, judon loi, aphatseh a lampi alet aneo te ngen; ka-u Mangcha vang hicheng ho khatcha abollou jehin kangai sangin, amatobang pasal tamleh gamsung khangtou inte na?”
JOUJAM NU: “Na-u Mangcha khu, nu le pa thusei ngai chule mipha ahijeh a amatoh nakivop ding kadei ahi. Nang jong na-u Mangcha bang a thilse ima naneh lou ding chu o.”
JOUJAM: “Henge henu, kenjong khamna thei imacha kane nompoi. Anam mei meiyin jong kangol go ji e.”

Chutah chun apa insunga ahung lutin Joujam koma,
JOUJAM PA: “Boi ihmu ta o, jan asottai. Ajole jingkah leh kithou vaigei khan nate.”
JOUJAM: “Henge hepa, nunu le papa mangpha.”
ANU LE APA: “Nanao, nang jong mangpha,” atilhonin, chuin amaho jong aihmu tauve.
Mangcha jong nilhah langa akichep alel val jeh leh Thangpu toh akidel jehin alel valin amang asen, amangin Thangpu toh akidelin Joujam ahuhin, ahinla Thangpu le aloihon Joujam ajampi tauvin ahi; chuleh ama jong
Thangpu le aloihon chemin asun’uvin ahi. Chuin Mangcha jong ahung kin khangtan ahi.

Jingkah in Mangcha jong anun ahin thou khangin, “Boi, thouvin, twi aumta poi; luikhuh langa twikhaiyin gachen, kei ka-anhon toh kakiseimo vale,” atin chuin Mangcha jong ngaplel sasan athouvin, twikhaiyin luikhuh lang ajontai. Ahung kile lamin anun ankam lomkhat apute pe dingin asoltan ahi. Anun asolna bangin Mangcha jong Joujam te inlam ajontai.
MANGCHA: “Hepi, hepi,” tin akouvin, hichun polanga konin Joujam nu ahung potdoh in,
JOUJAM NU: “Mangcha, ipithu hitam?”
MANGCHA: “Hepi, ankam lomkhat nang ho dingin kanun eihin choi sahe.”
JOUJAM NU: “Kipa aume boi, nanghon la ipime nakihon u hinam?”
MANGCHA: “Hepi, kanun ankam changpah me ahon hile akilom e.”
JOUJAM NU: “Joujam, napasal pan ankam eihung peuve, hung lan lang tuitahin metamin hin hon o.”
JOUJAM: “Cho, henu, ahilou lou seiji hihin,” atin Mangcha kom lang jahcha pumin ahinven Mangcha koma, “Heu, kakipah e,” atin kitchen langa alhailut tai.

Mangcha nun an ahonin ahon min jouvin louva konin Mangcha pa hung vailhungin ahile thanga oh vacha khat jong ahin pon ahi.
MANGCHA NU: “Mangcha pa, nahung kile hitam mo? Lou ipiti hinam? Pha pha hinam? Ole masanga banga jong te hatna lai’yem?”
MANGCHA PA: Kahe tahihe Mangcha nu; Jongten na anme tu jouse tampi ana suchavei kit un, adang apha lai laiho kahin phung vuh kit hiya, hing doh jou ding hinam kahe hihe; hiche vacha hi thanga oh a kahin poh ahiye.”
MANGCHA NU: Aphatave, tujingkah malcha men kibol u hite.”

Chuin Mangcha nun an athuhin, amahon jong ankong aum tauve.
KIMBOI: “Henu, tukum ka-u Mangcha school ikai sah lou dingu hamm? Ka-u Joujam jong school kaiya che vah ding ahitai.”
MANGCHA NU: Mangcha pa, tukum beh hi Mangcha phaitola lekha sim a isol lou ding ham?”
MANGCHA PA: “Kahe tahihe, mibanga sum le pai neila ihipouvin, kikai sah nom jongleh sum le pai hoiya ihol diu tam?”
MANGCHA NU: “Sum le pai chu keiman anme ho joh ing ting hol nange. Mangcha school kaina lampi beh gonpeh hite.” MANGCHA PA: “Chutia kaisah ding itiuleh, pu le pa khanga pat’a ihin chin jingu dahpi khu ijoh diu hitante.”
MANGCHA: “Akhoh hihe hepa, inchen vaichat jehin school kai jouhih jong leng, nikho khat leh mi lolhing kahung hi thou thou ding ahiye.”
MANGCHA PA: “Tua Mangcha thusei chu adih lheh jenge. Lolhinna kiti hi lekha sim jengseha hung kon ahipon, koi hijongleh atoh na lam lam a tompan tah a pangpa dingin lolhinna aum thou thouve,” ati.

Thangpu jong leitola atouvin akoma thingtum khat molin atehin la asan amao tai. Chuin Lulun ahungin,
LULUN: “Thangpu, koi nangaiya mao mao jeng nahi tam? Ole Joujam guhthima nadeichat kit hitam? Ahivanga Joujam le Mangcha ahunglet lhon tengleh kicheng dinga ainkoteu kinopto sau ahite.”
THANGPU Che doh o milungneo, numei chu abol hat hat pa chang hibou chu. Veta, veta, jonglha phunga vacha tou khu, aneitum umlou, akap lha thempa chang jeng ding ahi.”
LULUN: “Ahile jol tang o, chubanga kisong nahileh.”
THANGPU: “O, kijol hih jongle nikhat leh eiya hithou thou nah ta.”
LULUN: “Nang vang naki chai deh e, nahiti leh jinei doh hihveh tachun, ahoi dan dan a.”
THANGPU: “Ash, nahet nailou ham? Veta, veta, tulai hi hiche hibou chu; ihat louleh numei kikimu joulou hichu,” atin
abantha aje in aloipa avetsah tai; “Nang tobang tha joideh duh hinba koi nungah nakimu jou ding?”
LULUN: “Henge, henge, anaveute,” atin akiphinto tauvin ahi.

Nikhat hi Joujam nu le Mangcha nu jong thingpon ache lhonin, ahung kile lam lhonin Gova kemdo chunga ahung tou lhonin akihou lim lhontai:
JOUJAM NU: “Mangcha nu, ichateni lhon kingaidan kavetleh mun chom chom a ahung umlhona ahung lunghel khah lhon ding kagelleh lungset aum lhone.”
MANGCHA NU: “O, Joujam nu, ipi hiche hoa chu kilung gim ding ham, hisanga chu phatthei achan lhona, ikihou lhah na bang uva amani jong ahunglet lhon tengleh kicheng theiya aum lhonna ding lampi joh igot peh joh diu ahi.”
JOUJAM NU: “Chung Pathen in hamjangboh lhonin tin amani jong damsel lhonin tin, chutengle ikichen sah diu ahi.”
MANGCHA NU: “Henge, ikinepnau guilhung teihen,” atin; Chuin amani jong inlam ahin jon lhon tai.

Nikhat hi Joujam le Thangpu lampia akilhon lhonin ahile Joujam pan amun amanjong achanu chunga alungnom mo tan, chuin Mangcha naonu Kimboi Joujam kou dingin asol tan ahi.
JOUJAM PA: “Kimboi, chen lang na-u Joujam gakou vah ta di o boi.”
KIMBOI: “Henge hepu,” atin akipatdoh peiyin, chuin Kimboi jong Joujam kou din achetan ahi.
KIMBOI: “Heu, kapun ina hung tadin, ati e.”
JOUJAM: “Kim, ipithu hitam kapan eikou chu?”
KIMBOI: “Kahe hihe heu.”
JOUJAM: “Ahile Thangpu, kapan eikouvin inlanga che tange.”
THANGPU: “Ole Joujam, ahivangin kiletsah hih ta o, Sweet heart.”
KIMBOI: “Heu, Thangpu toh nakivop chu kapu lunghang ahiye.”
JOUJAM: “Te, akingaibon kihi lhon louva, nang ho ina pat inlam kahin jot leh kanung ahin jui ahibouve.”
KIMBOI: “Heu, kapun ka-u Mangchaa lou dinga nahin it val hinte.”
JOUJAM: “Hidan hinte na?” atin anuilhon in,
KIMBOI: “Heu, kanu le kapan jong nahin deisah lhon dan khu, asei sei jeng lhone.”
JOUJAM: “Kim, kisonlel saha,” atin ahi.

In alhun lhonin Joujam apan anaphoh in,
JOUJAM PA: “Boi, nanu le napa lung suna hih tango. Thil jouse hi gontohsa le seitohsa ahitan, ikisuhmol phou khah diu tijat aume.”
JOUJAM: “Hepa, chutin gelse hih o. Ken nang le kanu thusei palkeh him him ponge,” atin ahi. Anu le apan Mangcha toh kicheng dia aphatsah jehin Joujam jong akipahin guhthimin lungsetna khaogui ahung jamtai.

Nikhat Mangcha le Joujam jong lamlen a akilhon lhonin akihoulim lhonin ahile noilanga konin Thangpu le aloiho ahung tou’uvin ahi.
JOUJAM: “Heu, hungo, che lang joha che hite. Khuche hotoh kakimaito nom hihe.”
MANGCHA: “Nao, nakichat ham? Kei kaum hila. Ahung ham tam uleh kaban peh thang leu hijeng chula.”
JOUJAM: “Hilou chuo heu, mitoh ikinah ding henu le hepa nomlou hichu me.”
MANGCHA: “Amahon eihin khoi masat uleh kimoh vet ding ham, koima kinoise sah lou ding kahi, kakichat ngei tah uva.”
JOUJAM: Ash heu, keivang kanom hih e,” atin ahin amani jong ache phei lhonin ahile Thangpu loiho to akisuto lhonin ahile Thangpu loihon Joujam ahin tot’uvin ahi.

LULUN: “Nangni nupa mama nakilom lhone. Hoilanga nache got lhon hammo, Joujam?”
JOUJAM: “Akijam dinga!”
LULUN: “Kate, hoilanga naki-jam got lhon ong? Keiho koma hung kijam lhon tango,” atin a-el el in adaiyuvin ahile Mangcha ahung lung hang tan ahinla Joujamin guhthima apho jehin ima aseipon thipbehin aume.
JOUJAM: “Kanop nop nalhona kijam lhon taveh tang, nangho sei ngailou.”
LULUN: “E..he.. Numei, nakam angeimo tave,” atin Joujam ahin naiyin ahile Mangcha ahung lung hang tan ahi.
MANGCHA: “Hei! Mingol gol, naphabep uvin kium tang uvo,” atin Thangpu le aloiho akohin ahile Thangpu le Mangcha jong ahung kijonto lhontan ahi; ahinla Joujamin Mangcha akaidohin,
JOUJAM: “Heu, hungo, che tate,” atin Joujam le Mangcha jong ache phei lhontan ahi.

Chuin Thangpu le aloiho Thangpu te in a acheuvin ahile insunga anun ahin house’uvin:
THANGPU NU: “Nangho loi jong, mingol dan dan a namoh va vau ham? Na-in na-in cheh uvah toh ding, tham ding kihol tang u.”
THANGPU LOIHO: “Kate, hepi, nang jong akisei nah lom vanga chubang sen nalunghangin, keiho jong khosunga aselai lai semphat thei um ding ham, tia kahol le leu ahibouve.”
THANGPU PA: “A pha e gollhang ho. Nangho jong gunchu tahin hung pang uvin lang semphat thei thei hin semphauvin.”
THANGPU NU: “Asempha nahiu ham, asem se nahiu vem, mitoh kidel bouseh nahet u hila.”
THANGPU LOIHO: “Hepi, khosunga miphalou chu keihon vet tup a suhdih ding, katiu chula. Nei themmo sah nom u jongleh themmo neichan jeng uvin,” atiuvin amaho le amaho akithim si touvin anui lah lah jeng uvin ahi.
THANGPU NU: “Thip uvin chapang kamthem gol,” atin asen uvin kholaiyah apot tan ahi.

Nikhat Joujam, anu le apa atou khom uvin tapkonga mei akioi’yuvin ahi.
JOUJAM PA: “Boi, lhathah leh nang jong phaitol a lekhasim a che ding nahitan, hoilai muna um jongle chun nanu le napa, keini thumopna ho hin sumil hih tang o.”
JOUJAM: “Henge hepa, gunchu taha kenjong lekha kahin sim ding ahiye.”
JOUJAM PA: “Boi, chapang cha hijongle chun hung nungah pan nahitan, tulai dongma kilungset na hoa kona nakikangse ding chule naneo laiya kanakihouna banguva nahung let tengleh na-u Mangcha toh kicheng dinga khao khina kin kibolsa ahitan, nangin jong nahetthem a nalunga nakichin jing ding ahiye.”
JOUJAM: “Henge hepa, midang toh kilungset kingai bol ponge,” atin chuin janin aihmu tauvin ahi.

Joujamin anu naovop chu aoi ajut pehin,
JOUJAM: “Henu, kanao ahungpen ding kangah lel e, ahung pen tengleh kei ave a kapan pan jeng ding ahiye.”
JOUJAM NU: “Boi, tunia napa thusei chu sumil hih tango. Achuti loule nani le nagang kachunga lhase lhon ding ahi.”
JOUJAM: “Henge; henu, ken jong ka-u Mangcha kalungset doh ta e. Ajeh chu kahahsatna jousea eipanpi jingin, miphatah ahiye.”
JOUJAM NU: “Henge, hijongle nalekhasim boisah hih tang o.”
JOUJAM: “Henge; henu, hoitaha lekha kasim ding, kalolhin tengleh kei le ka-u Mangcha’n insung agenthei jouse kavet lhon ding ahi,” atin ahi.

Nikhat Joujam jong Mangcha te in a agachen insunga alut leh apa insunga atouvin chua chun anun kong ananot in,
MANGCHA PA: “Boi, hung touvo, hung touvo.”
JOUJAM: “Hegang, ka-u Mangcha hoiya che hammo?”
MANGCHA NU: “Hoiya ba che hiya, nangni tah jong hi insunga midang umlou nabah sah jeng lhonin, nangni jeng bou nakihol lhonin,” tin ahin daiyin,
JOUJAM: “Heni, hilou chu o,” tin jahcha tahin aseiyin,
MANGCHA PA: “Kate, Mangcha nu, min alungset ahol louleh koiba ahol ding ham, nangin bon nikhat tou neimu lou jongle lunghel ji a,” tin ale atot inn ahile Joujam jong anuija valin,
JOUJAM: “Heni, kagang chun asei khah thou ham?”
MANGCHA PA: “Kasei khah jeh a ba akam bing ta khu.”
MANGCHA NU: “Hideh ta, hideh ta, ahidan dan a.”
JOUJAM: “Ahile hegang, ka-u Mangcha school kailou ding ham?”
MANGCHA PA: “Boi, kahe tahih e, ama kai nom jongle sum le pai umlouva; man jong ahethemin thil dang dang joh bol dingin akigong e.”
JOUJAM: “Hegang, ka-u Mangcha vang alung len mong mong e athusei chu; kenjong dih kasan nikhat le vang mi hetthei khat hung hithou thou ding ahi.”
MANGCHA PA: “Boi, nang lekhasima nache tengle gunchu tahin hung pangin lang, nanu le napa kinepna chule khosung mi kinepna nahi sumil hihin.”
JOUJAM: “Henge hegang, kenjong kanu le kapa chule nangni kinepna kasuhmil lou ding ahi,” tin jahcha thim tahin aseiyin,
MANGCHA PA: “Ahiye boi, Pathenin nang le na-u Mangcha nikhat leh Insung gou jouse nahin kaikhom sah lhon hen.”
JOUJAM: “Ahile henu, keijong chetange,” atin Mangcha nu thusei chu akipahvalin anuiyin,
MANGCHA PA: “Henge boi,” atin akikhen un ahi.

Nikhat Thangpun apa koma ajou jou aseiyin:
THANGPU: “Hepa, Joujam toh hinkhoa kilungset dingin kakingai lhontai. Namounu dinga nadei hinam?”
THANGPU PA: “Kachapan adei chu kenjong kadei hijeng chula’em. Joujam vala hoijo le phajo khosunga um ding ham?”
THANGPU: “Kakilungset na lhon alenin ahinla hichenga hin kipana kanei theipoi khuche Thanglenmang jeh khun.”
THANGPU PA: “Napa kei kaum hila’em. Kon ipi asei thei dingu ham? Nanu jong khosunga village authority lamkai atuh hila, lungneo hih’in; nanu jong hi anungah laiya chu anop a kakichenpi a nagel ham? Pasal in numei ideichat leh iguh le kichai chume. Ahung ham tam aumleh ka-kartos longkhat aneh leu kichai, lunggim na ding umlou.”
THANGPU: “Hepa, nang vang hi, na gollhon laiya chu thusim a Lamdil kiti pa tobang nahi ding dan bou hila, na?”
THANGPU PA: “Thusim a Lamdil chu imacha ahi hih e kachapa,” atin; achapa aphalam taha hil talouvin, alungthim setnan apuimang jo tai.

Joujam nu jong anaovop ahung kihe tan, anao nei ding phat ahung nailam tan ahi. Ajipan natoh hahsa tichu, thilgih dop le ho abolsah tapon hijeh chun Joujam in anu ahin thakhel pan tan ahi.
JOUJAM NU: “Boi, keila kalel cheh cheh tan, lhathah leh nang lekhasimin potdoh le chun kaboi ding dan hi o.”
JOUJAM: “Heu lunggim hih o. Ka-u Mangcha’n nahung kithopi jing nante. Lunggim louvin ahung peng ding kanao joh gelle chun kadeiye,” atin anu alhamonin chule hoitahin ajen jing tan ahi.

Phat le nikho ahung che che tan ahile Joujam jong lekhasim a ache na ding ahung naitan anu le apa dalha ding agelleh alung asen chule Mangcha pul jong ahin dou ding jong agelleh hahsa asan akingaito to tai.

Nikhat Mangcha leh Joujam luikhuh langa twikhatyin ache lhonin akihoulim lhonin,
MANGCHA: “Nao, nang vang hinom naume, phaitola lekhasima che tading.”
JOUJAM: “Heu, nang jong kani le kagang koma hoitahin seiyin lang, lekhasim khom hite.”
MANGCHA: “Nao, kanu le kapa kalekhasim ding nomlou ahipoi. Inchen hahsat jeh a kainom jongleng kai jou ponge. Nangbeh hoitahin lekha hinsimo.”
JOUJAM: “Henge heu, kache nungleh nangin kei henu le hepa jong ahahsat agenthei na lhona anave jing o. kache nungleh kanu genthei ding dan kagelleh dalhah ding hahsa kasa e.”
MANGCHA: “Nao, lunggim hihin; ken aboi dung juiyin anave nange. Ipute koma ibola kikiphat lam ding ham?”
JOUJAM: “Heu, nang jalin kalung among in kakipah e. Chuleh keijong gunchu tahin hung pang nange. Ahinla kache nungle nangin neihin sumil tan natin,” atin lhase tahin akun lhan alhisoh tan ahi.

To be continue…

©2020, Crosby Haokip All Rights Reserved

Thusim hi anom lheh e nati le anoiya “LIKE” button khu meh in writer ho na support nau vin, chule seinom nanei le anoiya comments nahin bolthei u ahi.

Thusimbu Machal jing thei na ding a pan lanom ho kipah tah in lem ahijing in ahi anoiya button “Click Here” khu meh utin details anasim ute.