Home Crosby Haokip JOUJAM LE MANGCHA THUSIM-IV

JOUJAM LE MANGCHA THUSIM-IV

532
0

Crosby Haokip


PART 4


Jingkah khovah in Joujam le apan jong gamnoi ahin jot lhontan ahile miphalou hon analamtin uvin aman tauve. Chuin Thangpu le aloihon moltum ahin kichoiyuvin:
THANGPU: “Tuchung vang Mangcha hi kalenthanga a-oh tai ong. Joujam le apa chu man uvin lang thing chunga apa khaidoh uvin,” atin Joujam masanga apa havon avouvin, thisan naisan pumin thing chunga akhai tauve. Anoi thingphung bul a Joujam khaovin thingphung toh akan beh uvin, apa thisan long lha ho chu Joujam chunga achun ahile Joujamin avengam pon akap kap tai.

Alah uva mikhat Mangcha kou din asolin akisolpa jong achen Mangcha thu agahetsah tai. Mikouva chepa jong Mangchan havon ahinvon ahung lhon tai. Mangcha ahung lhun phatin Thangpu jong thingphunga konin ahung chom lhan Mangcha ahin phin pantai.
THANGPU: “Mipa theithuh neh achate ahajat lo e, kiti thuchih hi tunin aguilhung tai. Ipi kisonna naneiya kaloipa nahin voh ham?”
MANGCHA: “Humpi ihmu ahung suhkhah jeh a thoh lo ahin tua nang ho jong kabol chah ding nahiuve,” atin akidin te tauve.
Chuin Mangcha nunglang a pat’in mikhat in Mangcha hin chon in amaho jong akidel tauve. Abul langin Mangcha athohin ahinla Joujam pa ahintha phat uvin athang tom valin akipan tai. Chuin Joujam pa jong ahung kitom dohin Thangpu chunga achutai. Chuin Thangpu akile thohin Joujampa chemin asunlih tan ahi. Chuphat’in Mangcha jong akipan in alah uva mi 3 athat in adangse maha pun ajamdoh tauve. Athi ding konin apan Joujam availhahin,
JOUJAM PA: “Boi, lungmong selin um inlang nanu le napa lungtup anamolso tei teiyin lang; nanao pa jong nangnin aphat phat nan anavesui lhontan,” atin atan tan ahi. Apa thi phatin Joujam hakan akap in; chuin Mangcha’n Joujam akoiyin alhemin, amanin jong Lhangnom lam ahin jon lhontai.

Thangpu jong in alhunin apan anahouse tan ahi:
APA: “Napa thahatna le napa boltheina tunin nangin eh naga so jeng ahitai na? Pasal, numei nadei leh naban tha nahat sah ding, napan hichan geiya nalampi kasempeh nunga, chule khomite ankonga kona mi neh ding tasa kalah doh a nang kapeh nahilou ham? Hichan geiya jong hi ima hilouva ahomkeova thisan naisan puma nahung kile nah lai, napa kei hi khomite masanga kamai kalah doh ngamlou hita chu-o,” atin lunghang tahin apotdohin achapa loiho koma, “Nache diu, Mangcha kitipa hi nahin veilih diu, achuti loule nabon uva amaho kabolna sang a khoh joa kabol ding nahiuve.”

Joujam jong apa thi phatin Lhangnom a aninu(Mangcha nu hilou) koma aumtan ahi. Apa pul adouvin amao mao jeng tan ahi. Lhangnom khosunga chun Mangcha jong mi vetjui theitah ahin, toh le tham a jong koiman apha joupon, nupi, upa, tehse ho ahu jingin ahi. Hitia chu thilpha tampi ahinbol jing phatin khosung mihon ahin ngaisang uvin, chule thil len hihen, aneo hijongleh Mangcha jao louvin alolhing jipon ahi. Hijeh chun imalam jousea lamkai dingin Mangcha ahin hol jiuvin, chuleh Mangcha jong gamlen sadel hat tah mi ahijeh in sa apo po jengin ahi. Khosunga Gym le Taekwondo neocha ahongin khosung chapang athanom ho ahil’in ahi. Khosung chapang hon angailu’uvin chule khosunga nupi, upa hon jong alungset lheh uvin ahi.

Jingkah khat Mangcha jong matahin athouvin ahile nupi hen thim khatin thing ana eh in ahile alungset jehin amajong achen thing chu aga eh peh tai. Joujamin guhthim chan anaven ahile Mangcha natoh chu amun apahcha lhehin ahi. Chuin Joujamin twi khonkhat asohin Mangcha don dingin achoipeh tai.
JOUJAM: “Heu, cha kahin dop peh e, don o.”
MANGCHA: “Kakipahe,” atin adon got leh cha hilouvin twi joh anahin ahile Joujam jong anuija valin hanuiyin anuitai.
JOUJAM: “Heu, nalung hang ham kahin engbol chu?” atin achuti nuikit tan ahi.
MANGCHA: “Ipibola ba kinei nahim mo?”
JOUJAM: “Guhthima kahin vet leh natoh napot tho valin tin le lel in nate, katia twi kahin dop peh nahiye, neingaidam ta o heu.”
MANGCHA: “Akhoh hih beh e, nang nuina thei ding ahipouleh kakipah e.”
JOUJAM: “Kei-u maman eihe them pen ji e; kalungset set ji hi,” atin amani umchan chu nupi nun aven aguhin ajapi lheh jengin ahi. Mangcha le Joujam kilungset chu khosung nungah gollhang hon athangset pi lheh jeng uvin ahi. Seiboi jong a-school kaina langa gunchu tahin apangin lekha asim tai.

Nikhat hi room a Seiboiyin lekha asim pet’in aloipa Minthang ahungin,
MINTHANG: “Seiboi, exam a nalolhinna thusoh kana mu hichu o; vetang, vetang,” atin aloipan newspaper avetsahin amuphatin Seiboi jong akipah valin alungthimin, “Tua pat’a hi ka-u nu le kapa kanop sat sah ding hita hila,” atin aunu le apa koma alolhinna thuguh ahetsah nom lheh tan ahi.

Nikhat Joujamin Mangcha koma alungset dan thu aseiyin,
JOUJAM: “Heu, Seiboiyin jong sepai lang service akijih doh in, janhi chun apanna ding mun ajontai, ti thu kaja e.”
MANGCHA: “Wow, nao, kipa aum behseh e. Nang vang hi mi lolhing tah nahi ta e.”
JOUJAM: “Henge, kei le nangjal ahibouve. Adehin nachunga kakipana kasei jou hih e, heu.”
MANGCHA: “Ahile lungtup imolso ding hitam?”
JOUJAM: “Henge heu, kanome,” ati chun Mangcha jong akipah valin,
MANGCHA: “Ahile, itihleh ikichen ding ham?”
JOUJAM: “Heu, neikipui pui phat leh ikichen lhon ding ahiye,” atin kicheng dingin akitem toh lhon tan ahi.

Nikhat Mangcha’n gym anabolin ahile Joujam jong akoma achen,
JOUJAM: “Heu, tunile heitup neiga lo peh o, kadu cha vale.”
MANGCHA: “Kaga lo peh leh nangin ipi neipeh ding ham?” tin atotin,
JOUJAM: “Peh ding jong kanei hih e. Ipi nadei ham?”
MANGCHA: “Nangin nadei pen pen.”
JOUJAM: “Ahile heu, nahung kile tengleh nangkom kahin jot pei pei ding ahitai,” atin ahile akipah in ahi.

Chuin Mangcha jong Joujam dingin gamlaha heitup hol dingin akipatdohin ahi. Ahinla Thangpu le aloi mitampin lampi a analamtin tauvin ahi. Mikhatin Mangcha amu phatin aloi dang ho hetsahma apen alah uva mikhatin thalpin Mangcha keng ahin kap khatan ahile Mangcha jong lamnoi langa akilih suhin, chuin miphalou hon ahin delsuh pei peiyuvin ahi; Mangcha jong ajamin ahi. Mangcha alhai hat jeh chun adelpha jou pouvin, ahinla athisan kai ho chu ahin juipeh tauve. Chuin Mangcha ahung chomdoh in alah uva mikhat thingin ajep in ahile kom lang senan akinei tai. Hadel in akidel uvin amuna Mangcha’n mi 4 athat in ahi. Ahinla anung langa konin Lulun in thing tum khat in Mangcha lu ahin vei tan ahile Mangcha jong kho helouvin alhutai. Chuin achung a achu cheh uvin, Mangcha chu athi ahitai, atiuvin kol a aleh lha tauve.

Mangcha chemcha thisan nat deh duh chu ahin choiyun Lhangnom khosunga Joujam hol dingin ahung tauve. Joujam um na insung ahung lut uvin ahile Joujam le Kimboi anaum lhonin, chuphat’in Kimboi akichan Joujam pang a abehtai. Chuleh Thangpun Mangcha chemcha chu ahinla dohin Joujam le Kimboi avetsah tai. Chuin Joujam le Kimboi akaptan ahile Thangpun asen thip lhonin,
THANGPU: “Mipa theithuh neh achate ahajat lo e, kiti chu tunin aguilhung tai. Ven, nakisonpi pa chemcha hi, kipahtahin tunin chung lang peh a kicholdo din ache masa tai,” atin aeng houvin, chuin amahon Joujam aman uvin apuidoh tauve. Kimboiyin akithopi got leh Thangpun ahin beng lhun chuin amajong athoukit in ajamdoh in apa kou dingin ache tai. Mangcha pa ahung phatin akinah pin chuin Thangpu le aloihon Mangcha pa avouvin Thangpun Mangcha pa lol avat tan peh tai.

Joujam ahin puiyuvin ahile gamlah a Joujam akitomin aban tuh teni kalkah tah apeh pehin ahile amani jong akijam jeng lhonin, Joujam jong ajamdoh in gammang laha ajamtai. Chuin amaho jong lampi chom cheh a Joujam del din alhai kimvel leuvin ahile mi ni hin Joujam ahin mudoh lhonin adel lhontai. Amanin jong Joujam amat lhon phatin Joujam jong akitomin akidelpin ahile vangset umtahin abon uvin kol a akhelha soh uvin, Joujam jong, khat teni jong abonun athi tauve. Chuin Thangpu le aloihon Joujam le pasal teni long chu amu’uvin Thangpun jong kikao nan aseiyin,
THANGPU: “Mipa theithuh neh achate ahajat lo e. Apha jenge, keijong changlou, mijong changlou ding,” atin ahin dalha tauve.

Ajingin khosung nupi mini thingpon ache lhonin ahile Joujam long chu amulhonin amanin jong khosung a miho agahet sah lhontai. Chuin Kimboi le Joujam ninu jong ache lhonin ahile Joujam long chu amulhon phatin hakan akap lhontai. Hiche ni ma ma chun Lhangnom koma um Kabui khokhat a chun nupa khat akihoulim lhonin,
PASALPA: “David nu, David in eidalha lhon ta jongle lungneo louvin aumin, ibola lhisoh soh jeng nahi ham? Cha tampi nanei sanga keijoh hi thupi jo kahi lou ham? Phat chesa ho gelnan hinkho mang tahih’in.”
AJINU: “Henge David pa, David in eidalha lhon jongle eini kilungset to tahin chengkhom hite.”
PASALPA: “Tunile loulanga aipah holin che hite ong?”
AJINU: “Henge, che hite,” atin amani nupa jong ahung kipandoh lhonin ahile gammang kol noiyah Mangcha amu lhonin amanin jong adellut lhonin ahile Mangcha ahai hai nalaiyin, ol ol in, “Joujam, Joujam,” ahin tin ahile amanin jong inlanga jen dingin ahin pui lhon tan ahi. Kabui teni nupa chu miphatah ahijehin Mangcha jong amani chapa bang bangin agelin, Mangcha angol banga aumtah jehin amin jong asei thei tapon hijeh chun amanin jong achapa min aputsah lhonin amin David ma ma asah lhonin ahi.
Mangcha le Joujam la aum tapon, ajipa jong athi kit leh apona valin anu jong akap kap tai. Hitichun Kimboiyin anu alhem lhem tai.

Seiboi jong asepai panna muna asap ho lunglhai na achan jehin Captain akaisah tauvin ahi. Jammu and Kashmir a posting achen gunchu tahin akin ding atongin asap te lunglhaina jeng jeng aboldoh in ahi.

Chuin Kimboi le anun Seiboi letter athot lhonin atilkhou lhontai. Asei lhonin, “Seiboi, dam a hinkho naman jing hinam? Keiho jong kadam jing nauve. Boi, leiset’a thu le la nop lou jehin na-u Joujam, na-u Mangcha, napa, chule nagang, Thangpu khut’a alou soh keitauve. Hijongle nangin gunchu tahin na hintong in lang lungneo hih’in; kei le na-u Kimboi kaum jing lhon nai. Hung damsel tan. Nahin ngailu jing na-u Kimboi le na ni,” atin athot lhon tan ahi. Seiboiyin letter chu asim chai phatin akap tan a-unu le apa puldou vin akap kap tan ahi. Alunghel valin a-unu la khat asem khum in asan ahi.

Nikhat hi Mangcha jong khosunga nungah gollhang chapang kichem ho umchan chu aven anui nui tai. Gollhang chapang ho chemjam kisem thua akivat tou chu amun ahile ahung lim dohin Thangpu hotoh akinah-u chu ahin geldoh in chule nungah le gollhang kingaiya toukhom ho amuphat’in Joujam ahin geldoh tan akholangu ahin del tai.
MANGCHA: “Henu, kei kainlam uva che tange.”
INNEINU: “Henge boi, nainkoten jong nana ngahlel tauvinte. Chenlang hung damsel in lang kei le napa jong neihin mil lhon hih ta o,” atin akilhauvin, chuin Mangcha’n inneipa koma,
MANGCHA: “Hepa, nang le kanu jeh a hung hing doh kahin nachung lhon a kakipana kasei joupoi.”
INNEIPA: “Henge boi, damselin gachen lang nikhat leh hung kit tang o.”

Chuin Mangcha jong achetan ahile anaonu Kimboiyin chang anasep in, aupa Mangcha amu phatin akipah valin anu akouvin ahile amani jong ahung lhai lhonin akika tauve.
MANGCHA: “Henu, Joujam hoiya um ham?”
ANU: “Boi, Thangpun napa hinkho jong chule Joujam hinkho jong akilah tai,” ati chun na asa valin akap kap tan ahi. Joujam thi ahet phatin apona valin akap tan ahi. Chuin abon uvin Joujam lhan a agacheu vin ahile Mangcha’n na asa valin alhansong akoiyin akaptai
MANGCHA: “Joujam, nao, lhaolha selou jen o, lungtup imolso theilou jehin kenjong ikitepna lhon sumil pong kate; kadamsungin angdang koichom ponge. Nikho khat leh hilai muna hi kenjong kajalkhun kahung kido ding ahi,” atin ache tauve.

Mangcha jong Thangpu chunga alung hang valin thalpi le thih nang akipoh in amajong Zougam khoa Thangpu le aloiho bulhu din akipatdoh tai. Thangpu le aloiho jong lentol a anatou’uvin nungah ho ana daiyun ana nui lah lah jeng uvin ahi. Chuin Mangcha jong alhai lut jelin athalpi le athih nangin mipha lou ho athat pan tai. Amuna mi 5 jen athat tan, chuleh Thangpu loipa Lulun akeng aveibongin alol atan peh tan ahi. Lulun thi amuphatin Thangpu jong alungneo tan akidel lhon vangin Mangcha ajou tapon, amajong thisan kai deh duh pumin ainlam u ahin jontai. Ain u alhunin Thangpu pan Mangcha ahin von ahinla Mangcha akipan in apa le acha avo kop tai.

Chuin haosapun jong athih nang ahin kilah dohin Mangcha chu kap lih jeng dingin ahin gong tan ahile amasanga achapa akidon apa ale houset tai. Apa ahousen ajah a, “Mipa phalou, julop le sadu, alamlouva sum le pai ne le khosung mite suchavei pa, tunia hi nang phat loujeh a nachapa keiman vangsetna kato lo ahi; kalungsetpen jong kachan lo hilou ham? Kaneova pat’a nei nahil na thu ho le neina khoukhah na ho apha dan in kanagelin kana juiyin, tunvang nathilse bol ho nachapa keichunga hi lhungsoh ahitai. Kapa apha dan in kana gelin, kana kisonpin, kana ngampin, neina hilna ho khantou na le machal na ahipoi. Thupha le milungset ding dan neihil louva, alamlouva mi thil lahpeh le neilou chaga mivaicha ho suhgenthei na ding lampi joh neihil hilou ham?

Nang le keijeha mona neilou mitampin ichan geiya genthei hahsatna ato hitam? Nei nalam hilna ho hi tunin keidingin thina ahitai. Keima thi jeng tange,” atin Mangcha koma achen athal long chu ama op toh asuton, Mangcha koma, “Neikap lih jengin,” atin athum tai. Chuin Mangcha koma, “Sopi Mangcha, keihi athi dinga lom joh kahi bouve. Mipa theithuh neh achate ahajat lo e, kana ti ji chu tunin keichung joh a aguilhung tai,” atin ahinla Mangcha’n Thangpu khut alah lhah pehin chuin apa koma achen agahouse tai; “Mipa theithuh neh achate ahajat lo e, kiti thuchih kisei hi keiman kapom theipoi. Mihemin ama chonsetna akipoh ding joh ahi. Naphung gui, nachilhah aman nalou dinga nachapa kahing hoi mei mei ding ahin, nang vang thi dinga kilom nahitai,” atin haosapu chu kap jeng ding ati leh haosapi ahungin Mangcha chunga akap in ngaidam athum tai. Chuphat’in Mangcha jong lunghang tahin apotdoh tan ahi. Ama apotdoh jouvin haosapu jong lhase kisa valin hakan akaptan ahi.

Nikhat hi Seiboi le a-body guard ho gari’n khosunga ahung lhailut uvin, chuin Seiboiyin jong ani le a-u Kimboi amuphatin akoiyin akap tauvin ahi. Chuin Seiboiyin Mangcha koma, “Heu, nangin kaneova pat’a neihin ngailut a neihin sem doh jeh a hichan gei lhung jou kahin, hijeh chun nachunga kakipana kasei joupoi,” atin ahile Mangcha jong akipahin alhisohin chuin amani jon akikoi lhon tan ahi.

Chujouvin Seiboiyin Mangcha koma, “Heu, ka-u Joujam nahin kithopi jinga nahin vetsui jing jehin kakipahe, chule tuhin nangnin lungtup molso jou lhon tahih jongle chun Joujam mel a nahin bol hiche Gym le Taekwondo neocha hi kahin kipapin kenjong kabol jou kham khamin nahin kithopinge,” atin asoh ho kouvin ahile amahon jong envelope khat ahin choiyuvin, hichu Seiboiyin Mangcha apetai; “Heu, hiche cheque hi kilahin lang nangman naman nom nom nalampi a mang jeng tan,” atin ahile Mangcha jong akipahvalin, Seiboiyin apeh sum chun aman jong phaitol’a “JOUJAM BODY BUILDING CENTRE” kiti ahong dohin hichevah chun Gym le Taekwondo ahil jin ahi. Chuin hiche JOUJAM BODY BULDING CENTRE chu Seiboiyin hondohna aneiyin ajingin Mangcha’n Class apan pei pei tan ahi. Hiche kihondoh ni chun Kabui te nupa jong apang lhone.

Nikhat class alah laiyin Thangpu le aloi ho ahungun, Mangcha masanga adilsu’vin ngaidam athum tauve. Hitichun aseiyun, “Mangcha, kasuhkhel nau neingaidam un lang keiho jong na-Class a chun hung pang uvinge. Nang bangin kahat nom uve,” atiuvin ahile Mangacha’n jong angaidam in amanoiya class alahsah tai. Thangpu le aloiho jong kineosah tahin Mangcha thu thun anung un chuleh JOUJAM BODY BUILDING CENTRE jong aminche lheh in ahi.

The End

©2020, Copyright

Thusim hi anom lheh e nati le anoiya “LIKE” button khu meh in writer ho na support nau vin, chule seinom nanei le anoiya comments nahin bolthei u ahi.

Thusimbu Machal jing thei na ding a pan lanom ho kipah tah in lem ahijing in ahi anoiya button “Click Here” khu meh utin details anasim ute.

Previous articleHINKHO NUNGVET KITNA: LOOKING BACK AT LIFE
Next articleHOSTEL KA UM A KATHIL TO