Home Lahkhom JOHN WESLEY

JOHN WESLEY

200
0

(Hinkho thusim lah chom)

Written By: Naocy Haokip

John Wesley Methodist Houbung phutdohpa thusim achom lamin anasim khom’ute;
1703-1791

  1. ANEOLAI THUSIM
    28 June 1703 kumin Epworth United Kingdoma ana penge.

John Wesley apenna apa chu Rev. Samuel Wesley Anglican thempu ahin, anu chu Sussanah Wesley ahin, Pathen gingtah numei ahi.
John Wesley sopipa Charles Wesley chu lasemthem ahin, Pathen vahchoila sang gup (6000) anasemdoh-e.

John Wesley aneolaiyin aumnau Epworth a a-inu chu mei (fire) in anaka tan, anu le apa hin cha som le ko (19) aneilhon chu “meikong lah akon kihuhdoh soh hitam,” tia agel laiyun, insong/indan/floor chung langa meikong lah a chun John Wesley chu adalha tauvin ahi.

Meikong ahat lhehtan apa Samuel Wesley chun “Pathen nangin John kilahtan,” tin Pathen anapedoh tan, hitia lunggimtah a aumlaiyun John Wesley chu window a ahungdah doh nalaiyin ahi.

Hitichun a-inveng hou kitho khomin John Wesley chu anahuhdoh tauvin ahi, hiche nikhoa pat chun anu Sussanah Wesley chun “Pathenin chapang John chu amanna nom um hiteiyinte,” tin agel jingtan ahi.

John Wesley amatah-in jong “Pathena ding le midang ho dinga thilpha bol ding atup tan ahi.”

  1. THEMJILNA;
    John Wesley le anaopa Charles chu Oxford a school anakai lhonin, Oxford University a chun “Holy club,” ana phutdoh-un, taona, thilphabol, songkul tang ho vil, meithai ho panpina natoh atongun ahi.
  2. MISSIONARY NATOH;
    John chu apa Samuel Wesley chun ama natohna muna thempu natoh atohsah got le anompon, “Georgia” kiti muna missionary in anachen, Oglethorpe toh ana kitho khomin ahi.

Ama chu a strict behseh jeh-in agam miten anajui jou pouvin hehna ho jeh-in Georgia adalhan England gam langa akile kit tan ahi.

  1. HUHHINGNA KIHETCHET:
    Anun aneuva pat Pathen thu aseipeh jing vangin John Wesley in huhhing kihetchetna ana neipon, Georgia apat England lam jong achelai chun Moravian mimol hotoh konga (ship) atoukhomun ahi.

Huipi hat laitah chun “Thi ding kichatna anei pouve,” Avet’a ahile aman kichatna aneijeh chun amaho nei “Huhhing kihetchetna,” angaichatdan akimudoh tan ahi, England alhun kit phat chun Moravian lamkaiho agaholdoh-in, May 24.1738 jan chun Moravian kikhopna achun mi khat’in, “Martin Luther,” in anasut “Rome hilchet thumakai,” asimpet chun vangphat umtah-in huhhing kihetchetna ahin neitan ahi.

  1. PATHEN NATOHNA:
    Ahung penthah jou chun Pathen na atongpanin, thusei ahabol’in ahi,
    Atamjon houin sunga thusei ding phal ahipon, polama thu aseijin, lhagao mangthah tampi sochatnaa alhut tan ahi.

John Wesley in Scotland leh Ireland vel somni (20) val agavil’in, sakol chunga touva thuseiya achena asaodan ahethem ho seidanin 2,50,000 miles apha jouve, atiuvin ahi.

Sermon sang somli (40, 000) ana seidoh-in, Pathen thusei tilouvin thildang ho jong khohsahna chu anei jingin ahi.
Hiche ho chu:
i. Panpi ngaiho apanpi jinge.
ii. Songkul tangho avil jingin ahi.
iii. Vaicha ho le tahlel chaga ho akithopi jinge.
iv. Soh a kiveina anadou dal’e.
v. Lekhabu tamtah anasun’e.

  1. JOHN WESLEY HINKHOA KON JILDOH THEI:
    i. Hou lhacha natong chaten anu, apa natohna jui theileu aphai, ajuilouvu jongle Pathen thu toh kitoh a hinkho amandiu angaiye.

ii. Pathen natong ding chun huhhing kihetchetna nei tei ding ahi.

iii. Pathen natohnaa kisaboi jinga phat-ong tamneilou ding ahi.

iv. Mi tamtah-in agelkhoh lou ho anagel khoh-e, eihon jong igelkhoh diuva phaho chu:
(a) Songkul’a tang ho Pathen thu seipeh ding.
(b) Meithai, genthei chaga ho panpi ding.
(c) Lou-in (dispensary) ana bolpeh-e, chubangin Christian hospital/clinic ngaichat ahi.
(d) Soh (servant) a kiveina ho anadou dal’e, tulai eiho khanga anaum hileh loule aiya kivei, khamnathei kani, ganja, thal’a kivei ho doudal teiyinte.

Huhhing kihetchetna aneiyin Pathen natohna le mitampi huhhingna honga apuilut nungin 2 March 1791 kumin London United Kingdom a Pathen anga acholdo tan ahi.

AJONAN:
Rev. Samuel Wesley teni nupa insunga John le Charles Wesley apenna gambung tampi Pathen thua acho thou lhon banga Pathenin nulepa te akon anatong ding pasal pha, numeipha, eipe teiyu hen.

John Wesley banga huhhing kihetchetna neiya chol le gim khohsa louva hinkho lhung keiya Pathen natong dingin Pathenin phatthei eiboh tauhen.

NOTE
Achomlama hung kijih ahin, akahlah thu tampi jihbe thei umjongle akijih tha tapoi, chomcha hijongle lunglut’a simdoh jouse din lhagao gam kehbe na ahitheina din Pathenin phatthei boh jinghen.

Kakipah-e.

©️Copyright October 27.2020

Articles hi anom lheh e nati le anoiya “LIKE” button khu meh in writer ho na support nau vin, chule seinom nanei le anoiya comments nahin bolthei u ahi.

Previous articleNA TAHSANNA ITOBANG HAM?
Next articlePATHENTOH KIHOUTO THEINA DINGA AHOLDAN PHABEP