Home Crosby Haokip JOBEI LE JEMNA

JOBEI LE JEMNA

36
0
JOBEI LE JEMNA
JOBEI LE JEMNA

Gollui Thusim

Story and Narrated by
Crosby Haokip

Crosby Haokip kwc
Crosby Haokip kwc

Masang chun nungah alungthim kichem lou khat anaumin amin chu Neikim akitin ahi. Alungthim lam boi ahijehin a-inkoten jong aching jou tapon adei deina muna ache sah tauve. Chuleh masang chun koiman mingol ho hi anakhohsah behseh pon, numei ahileh pasal phalou phabepin kichepna aneiya aluppi ji anahi. Hiche bang chun Neikim jong nikhat gama amoh va va nan pasal kultah jinei nailou khat hin atoh khan, gamlah a chun hunamin asuse tan ahi. Hicheva kon chun Neikimin nao ahinvopin pasal khat ahingin koiman apa ahet tahlou jehin amin jong Jobei asah uve. Naosen chu apinun hoitahin akivah khangin aseilet sah tan ahi. Anu lungthim boi hijongleh athisan a kijil achapa vang aheideh pon ahi. Achapa koma aumleh nom asan, hijehchun achapa angailut jehin masanga bangin amoh va va tapon ahi. Naosen anu koma kona apoh doh tengu leh ahol jin, akoma apuilut tengu leh akipahin anao asang jin ahi. Hitichun apinun naosen avah khangin ahileh Jobei jong pasal hoitah leh thahat tah ahung hitan ahi. Koiman ahung kondohna boipi talouvin nungah hon adeilheh jeng uve. Hijongleh Jobeiyin vang anu asumil pon, sun tengleh anu koma achen akipom sah jin ahi.

Masanglai chun pasal gamsa that hat ho chu nungah hon adeiyin chuleh mipin jong angai sangin ahi. Chuleh nilhah tengleh gollhang ho Sukta lam akihil jiuvin alam jiuve. Hiche chu nungah hon avetnom un, hiche Sukta lam them ho chu nungah hon anangai sang uve. Chuleh akisei chengse thepna chu Jobeiyin aneiyin hijehchun nungah ho guhthimin anakiphun phun jeng jiuve. Chukeo hilouvin Jobei gamsa del ahatin; thalpi le tengcha mang chan sakhi, sajuh ngelchang, gamvoh, hompi, keipi chuleh salen adang dang tampi anathat e. Hijehchun alhang
gamtin a amin athang tan ahi. Hiche lai chun nungah ho in ah gollhang ho som ageh jiuvin ahi.

Lenlhang khosunga chun numei ijatin tam jongleh Jemna banga melhoi nungah aumpon ahi. Amelhoi jeha anun thingna jem hoitah toh atekah a amin jong Jemna tia asah ahi. Aneo laiya petʼa Jobei toh hung kivop jing ahiye. Hijehchun kah lah leh mihon akingai bangin atetha jiuve. Amani jong guhthimin akideicha to lhonin, mihon ahin tetha tengu leh lunghang beh akisa ji lhonin ahi. Ahinlah guhthima kilungset to anahi lhonin ahi. Jobeiyin jong Jemna alungset lheh jengin, chubang chun Jemnan jong Jobei guhthimin alungset e. Ahinlah akiseidoh peh ngam lhon pon, aguhin akipuldou to lhon jingin ahi.

Jemna chu insunga chang khat seh ahin, anu le pa min chu Jadim le Kaikho akitin ahi. Amani jong miphatah ahi lhonin, ahinlah amanin vang achanu ji dingin mihaosa chate anadei sah lhone. Chuleh Lenlhang khosunga chun mihaosa tah insunga anaumin, inneipa chu amin Tonglam akitin ahi. Amachun siel jouget avulin, loipi somni, loichal somle nga chuleh ahcha uicha tampi avulin ahi. Hijehchun lhang sunga amin akithangin mihon ginle jan ananeiyuve. Amapa chun chapa khat aneiyin amin Diplun akitin ahi.

Khosunga chun Jemna sanga hoijo numei akimupon, hijehchun Diplunin jong Jemna ahin deicha tan ahi. Mihaosa ahijeh-uvin Jemna jol ding chu akisonglal pon ahi. Jemna mitmun guntahin akivon jin, jule sa anen, hiche lai chun amaneh banga jule sa mantam le tuitah ne jou koima anaum pon ahi. Changle min jong ahouvun, koima otcha louvin ana in cheng uve. Hiche jeh chun amajong numeiya kisonglal lou ahi.

Nikhat vailou konin ache tauvin ahileh mihon Jemna koma aseiyun, “Jobei le Diplun koijoh anglaiya nakoi nom em?” tin Jemna anadaijiuve. Diplun te ichanin haosa jongleu Jemnan vang Jobei alungset jon, adeijon ahi. Chuin Jemnan jong alungsetna Jobei ahetsah nom jeh chun, Jobei masanga akipal lhun akeng akisuhnat tan ahi. Chuin nasatah bangin Jemna akap tan ahileh Jobeiyin jong Jemna kengna chu hamhing khat alan alhaiyin chuin atui chu Jemna kengna laiya chun anupeh tan ahileh adam tan ahi. Chuin akipatdoh go tauvin ahileh Jemnan jong Jobei koma jahcha tahin aseiyin, “Ka-u, kakeng ana valin, lungset tahin nei po o,” atileh Jobeiyin jong Jemna ahin pon lou chan apo lhung keiyin ahi. Ahinlah Jemna alungset jeh chun chu chana gamla chu imacha lou bangin agelin ahi.

Louva abung tauvin ahileh Jemnan Jobei guhthimin aphinin song neovin asep sep tan ahi. Ahinlah Jobeiyin ahedoh pon, koiham tin ave le le tan ahi. Chuin aman jong Jemna aven ahileh aguha anui chu amun ama ahiding atahsan tan ahi. Chuin Jemna koma Jobei achen ajaha, “Ajem, songa eihin sep chu nang nahi ham?” atileh Jemna jong akiphat lamin akilep in aseiyin, “Ka-u, kei kahipoi. Koima songin kasep khapoi,” atin, chuin na atong kit tauvin ahi.

*Jobei le Jemna kidei*

Nikhat Jemna tuikhaiyin ache tan ahi. Chuin tui aga thalin ahin pon ahileh lampi alhonalin atuipoh chu alhahsahin amajong kol a chun akilih suh peh tan ahi. Akeng akiha suhkhah jehin ache thei tapon panpi ding asam sam tan ahi. Ahinlah koiman ahung huh tapon, chutah chun Jobei angaicha lheh tan ahi. Akapin alhi alongin; koiman ahung donbut lou jehin lhase tahin a-imu tan ahi. Chujouvin Jobeiyin Jemna ahol hol vangin amu tapon, ahol hol tan ahi. Chuin anu adongin ahileh tuikhaiya ache chu aseipehin, chuin amajong luikhuh langa ache tan ahi. Luikhuh langa achen ahileh Jemna kengchot amun, chuleh noilanga Jemna tuibel keh chu amun, amanjong tuibel keh koma chun aga dingin ahileh anoi jepa Jemna kho helouva analup chu amun, chuin akoma achen Jemna ahin dom dohin alohin akou kou tan ahi. Chuin Jemnan jong ol tahin amit ahin hasah in ahileh alungset pen Jobeiyin apoma anajen chu amun, chuin akipah valin mitlhi long pumin Jobei akoiyin akap tan ahi. Chuin Jemnan Jobei jaha,
JEMNA: “Ka-u, nang um hihle chun koiman eijen lou ding kathi den ding ahitai. Nangin neilungset a neihung huhdoh jehin kakipahe.”
JOBEI: “Ajem, kap hih’in. Namel kamulou phata kahung hol nahiye.”
JEMNA:“Ka-u, lungset dang nanei nailou leh neihin koi tem o,” atin, chuin Jobeiyin jong alungset vetsah nan akoi tan ahi. Chuin Jemnan jong akoiyin lungset hinkho ahin mang lhon tan ahi. Chuin amanin jong inlam ahin jon lhon tan ahi.

Chuin Diplunin jong Jemna ahin hel pan tan ajaha aseiyin, “Ajem, keitoh nakichen leh neile gou tampi chunga najalkhun nakido ding, jingkah nilhah sehleh atui tui naneh ding ahi,” atin, Jemna ahel hel tan ahi. Ahinlah Jemna vang anom pon ajaha, “Neilungset kahe themin, ahinlah nanei le nagou chunga imu dingin kalom joupoi. Hijehchun keiman kachan kibahpi kom jon jonge,” atin anom tapon ahi. Hiche jeh chun Diplun jong alung hang valin avohpi athatin khosung mipi akhomin anehsahin ahinlah Jemna le Jobei vang akou pon ahi. Hichu ahaosatna mipi avetsah ahi akiti. Amavang Jemna le Jobei kilungsetna vang alen cheh cheh tan ahi. Hijeh chun Diplunin Jobei abol hesoh pan tan ahi. Ahinlah Jobei mi thutah ahijehin ima alo thei chom pon ahi.

Nu Neikim jong akum ahung tam tan chuleh adammo mo jeng tan ahi. Adammo chanin alungthim lam aboi cheh cheh tan amoh ka ka tan ahi. Aum chan chu Jobeiyin avejou tapon anu alunggim pi lheh jenge. Chuleh Jobeiyin apa koi ahiding aguhin ahol hol jeng tan ahi. Ajehchu anu koma la alunggel aseithei pon, apa beh umleh alhaset ni komleh kiphin thei ding ahi. Alunggel seina ding ima aneilou tengleh Jemna koma aseiyin ahinlah alungna achim theipon anu le apa angaicha lheh jenge. Anu le apa amadinga athi tobang hijongleh Jobei vang adongmanu Jemna jehin alung mong ham ham e. Chuleh Jemnan jong Jobei lunggel ahet them pehin lungsetna dihtah achanin ahi. Amani kilungsetna chu khosung mijousen ahetan kilom asathei lheh uve. Lhang sunga chun amani vala hoi ding nungah gollhang anaum poi.

Diplun te mihaosa ahijeh-uvin hijongleh lungsetna lama vang anei agouvin ima abolthei tapoi. Hijehchun lungthim khat akengin haosaopu koma ache tai. Chuin amanjong haosaopu koma aseiyin, “Hepu, Jemna kalungset lheh jengin, hijongleh aman vang khuche Jobei um laisen eilungset thei mong mong poi. Hijehchun dangka hijat hi kahin lui dohin nangin ipi lo ding ham ti neigelpeh tem o,”_ atin, dangka ahin poh chu haosaopu masanga asung lhan ahileh tapkong adim jeng tan ahi. Chuin haosaopu jong suma chun angol tan, thudiha konin avahmang tan ahi. Chuin haosapun ajaha, _“Gollhang lungneo hih’in, keiman alampi hin gong nange,” atin akihou toh lhon tan ahi.

Chuphatin haosapun jong ajou apanin khosunga semang pachong ho akou khomin, chuleh alau uvah chun Jemna nu le pa jong ajao lhone. Chuin haosapun ahung kikhom mipi ho henga chun aseiyin, “Ahung kondohna apa kihelou hiche Jobei hi athu kholchilna akineiyin amahi thilha akona kijil ahi. Hijehchun amahi thilha ahibouve. Chuleh kakho sunga hin thilha le mihem change khom thei ponte,” atileh mipi jousen pha asa soh keiyun akihou lhahna bangʼun khosunga kon chun Jobei anodoh tauve. Jobeiyin khosung adalhah dingin konin Jemna alhamonin nikhatleh ama puiya ahung kit tei ding ahidan aseiyin chuin amanjong khosung ahin dalha tan ahi. Chuphatin Diplun jong Jemna hel dingin ache jing tan ahi. Ahinlah Jemnan vang kam khat jeng chan jong adonbut pon ahi.

Jobeiyin khosung adalhah phatin Jemna jong alunghel lheh tan, nisehin Jobei ngaiyin akap kap tan ahi. Chuleh Jobeiyin jong Jemna angaiyin niseh leh aumna muna Baza amutin Jemna alachoi choi tan ahi. Abolnau chu agelleh Jobei jong athang tom valin, amajong achen gamnoiyah thimthu le jaila ajihin, chuleh thalpi le tengcha akisemin galsat dingin ama le ama akichuh tan ahi. Alal tengleh Baza amutin Jemna jailan a-oi oiyin ahi.

Hichelai chun Jobeiyin Thingphung khat aphuhin ahileh hiche thingphung ah chun khoipi anachengin ahi. Hiche khoipi chu alungsetin ajaha, “Pa khoi, pa khoi. Kagolngei toh hin thing banga pah khom dingin kachunga nikhatleh thale jungin hung pang tan,” atin, athing phuh anga tan ahi. Chuleh niseh leh agamlenna a sa khatbeh athat teiyin ahi. Chuleh agam alhanga kidouna aum tengleh ama alamkaiyin, ama thahat jalin gal ajou jiuve. Chuti chun aman anam mite anahuhdoh jinge. Aman anakidoupi jingte chu tulaiya meitei holeh Naga ho hi ahiuve akiti.

Gamsunga gal ahung hat lheh jeng tan, kumkhat hi phaicham lengpan asepai te akhomin lenlhang kho doudin asol tan ahi. Amaho jong acheuvin Lenlhang kho abulhu un, mitampi athat uve. Chuleh galhingin mitampi jong akai tauve. Hijehchun nikhat Lenlhang haosapun Jobei henga asemang phabep asolin ajaha hitin agaseiyuve, “Kapu, nakhomuna hung kile kittan, namiten nangai chauve,” ahung tiuvin ahileh Jobeiyin jong ajah uva, “Neimu nom lou uva nei nodoh sau hilou ham? Kei hung thei ponge,” atin anom tapon ahi. Chuin amaho jong akileuvin haosapu koma Jobei thusei ho chu asei tauve. Ahinlah aman asemang ho asolkit leuvin aseibep bep agasei sahkit in, chuleh Jobeiyin jong angei ngeiyin adonbutin ahi. Hijehchun haosapu jong alunggim tan chuleh masanga athemmona ho ageldohin akisih lheh jenge. Jobei ahung lou phatin lungthim khat akeng un ajah uvah, “Phaicham sepai hon khosung miphabep soha vul dingin akaiyuvin; chuleh Jemna jong Phaicham vaihompan aji dingin akikai tai. Nalung ahileh nadongmanu beh gahuhdoh tan,” atin ahileh Jobei jong alungna valin ajaha thu hung sei pa lol chu at dingin agong jeng tan ahi. Chuin amajong akipanin ahung ho toh chun akilhon tai. Chuleh khosunga mihon Jemna aman un Jobei hung masangin Phaicham sepai hon aman tauve atiuvin aguhin aselmang tauve.

Chuin Jobei jong adongmanu huhdoh dingin achen, Phaicham lengpa toh kisat dingin akidinte lhon tai. Chuin akisat tauvin ahileh Jobeiyin amelma ho ano no tan, amasanga koima apang jou tapon ahi. Ama thahat jalin gal ajou tauve. Chuleh gal akisat laiyuvin khoingal tampi ahung lengin akisatpi ho asucheh tan ahi. Chuin Jobeiyin vaihompa koma adongmanu, Jemna athum tan ahileh vaihompan anahepha tapon ahi. Chuin haosapun ajou asei ahi ahet phatin amajong alunghang valin haosapu toh kidinte dingin ache tai. Jobei jong Lenlhang kho alhunin khonaha kulpi kisa chu avei lhun haosapa kom ajon tan ahi. Chuin mihon Jobei ahung haosapa koma aseiyun chuin haosapan jong asemang ho asolin Jemna aselnauva konin agapui doh sah tan ahi. Chuin Jemna jong alhei jelin Jobei akoiyin achunga akap den tan ahi. Jobeiyin jong Jemna alungsetin a-in ah akipui tan ahi. Chujouvin Diplun jong lhase tahin apite kholang a achemang tan ahi.

Hitichun Jobei le Jemna akicheng lhonin, chuin mihon Jobei nu ahin puiyun achapa toh akimuto sah tauve. Chuin anutoh akikoi lhonin akap lhonin ahi. Chuin haosapun jong agam lentah Jobei apen, chuin Jobeiyin jong ajinu le anu chuleh a-inkote akipuiyin *Lhangkhonom* kiti kho khat asemin, nomtahin acheng tauvin ahi.

——THE END——

Kakipahe asim jouse Pathen in phatthei boh tahen.

©️2018, Kilungsetna Theng , All Rights Reserved.

Thusim hi anom lheh e nati le anoiya “LIKE” button khu meh in writer ho na support nau vin, chule seinom nanei le anoiya comments nahin bolthei u ahi.

Site nalut a notification pop up hung potji ho allowed anabol ji uvo maban a thusim thah ahung ki post teng notice namu ji diu chule Bell button a subscribe kiti chu meh un.

Previous articleKAKINEPNA JOUSE ABEI NUNGIN-II
Next articlePAKAIYIN NANGA KONA ANGAICHAT PENTAH CHU IPI HAM ?

LEAVE A REPLY

Please enter your comment!
Please enter your name here