Home Lahkhom JESUN ATHODOH JOU’IN AMA NGAILUA MUNOM HO ANAKIMUPI SOHKEIYE

JESUN ATHODOH JOU’IN AMA NGAILUA MUNOM HO ANAKIMUPI SOHKEIYE

39
0

By Shonkhogin Hegin Haokip
Maranatha Cottage Hebron Veng
Phaipijang Langol Imphal West # 9774096152

Shonkhogin

..Pathen lekhabu dungjuiya eiho chonset jala Christa thi-a ahitai, ..Ama avuiyun anithum nin Pathen lekhabua kisei dungjuiyin athoudoh kittan ahi. Chuin Ama Cephas (Peter) hengah akilah’in, abanin somleniho henga. Chujou vin, mi janga val jen sopiteho henga tha khat lah in akilaah in ahi.

I.CORINTH 15:3-6.

Leiset chunga thilsoh lah thil kidangtah khat chu ipiham itileh Thina a kona athodoh hi ahi. Leiset chunga miching mithem tamtah umhen lang achihnaovin van phatajongleh tuni changeiya mithi kaithou tah tah aumkhah hih laiye. Chuleh leiset chunga pathen tamtah a crore a crore in umjong leh tuni changeija pathen kahi tia athi a kona thoudoh koimacha aumkha hihlaiye. Thovang athodoh nom mama jenguvin, koima chan tuni changeiyin aumkhapoi. Ahinla Pakai Jesu Christa vang mipi angsunga ana kithat in, Cross chunga akhailih uvin, nithum nin lhana konin athoudoh tai.

Athodoh chungchang thudol hi vannoi min atahsan loujeh uva lam dang asahlou u thu ahin, atahsan eiho dinga vang itobanga loupi hitam ? Thokitna thuhi ana um lou hileh mihemte jouse hi kinepna bei sale nga, ganchatoh ibah jeng dingu ahi. Hijeh a chu Pakai Jesun thina hi asuhmang tobang ahi. Hijeh a chu atahsan tedinga thijongleh hingkit teitei dinga thu ana peh ahitai. Hijeh a chu, koihijongleh adihtah a Pathen houjousen Jesu pendanleh athia athokit na thuhi phatecha a natahsan leh Pathen hou kitihi ahahsapoi. Pathen ahina photchetna phate cha a het theiloujeh a hi mi tamtah boiji thu ahi.

Apen na a jong mihem ahivangin, mihem pen banga mihem thisana kijil ahipon, Pathen lhagaothenga kona kijil ahibouve. Hichejong hi Pathen tahsan te dinga tahsan lalna ding imacha aumpoi. Pathenna aki pehlut or Pathenin asei sei boltang kate atileh Pathenin akin chu akibol jeng ahibouve. Athinale athokit chung chang a jonghi ivetle, athinading ahahbehseh jeh a thilou teiding angai to vangin thilou thei ahitah louphat na apa Pathen koma,

Hepa thilouthei kahi tah louleh thitang kate tia akipeh doh doh chun, apa Pathenin vana konin, vantil khat ahinsolin, thina changeija thoh jouthei na Thahatna apetan ahileh, amakhoa um athina ding chu ngapchatna ahilouleh doujoutheina thahat apetan, hijeh a chu itobanga akisuhgim vanga kichatna beihella athoh lhumkei ahi ti imuthei yuve. Pathen chapa ahijeh a hilouvin, Pathena kona thahat hung chun tha apeh ahi. Egypt a Israelte amaho thahatna jaolou hella, Pharaohin ahinlha doh banga chu, Pathen lung lam ibolkhah phatleh ikihenna chonsetna kona kilhadohna umji ahibouve.

Achaina in, Pakai Jesuhi athia konin athou doh mongmong e tia eye-witness mi tamtah anaum ahi. Jesuhi athia kona atho doh nungin, leisetna ni 40 anaum nalaiye. Hiche ni 40 sunga hi koitobang Jesuhi athoudoh mong mongtai ti photchetnoma amit tah a munom jong aumding katahsanin, hijeh a chu Jesun ni 40 aumsunga chu ama munom jousehotoh akimuto soh keiyuve.

Amumasapen chu Mary Magdalen ahin, ipijeh in em itileh athinunga athi ponapentah jong himai thei ahi. chuleh Emau kho jona cheteni` ahin, abana seijuiho jouse ahiuvin, chuleh mi 500 munkhat a thakhatna aumnaovah ana kilah kitne akiti. Hitiho jouse hin amit tahuva ana mu u ahi. Jesu vanna akal nungin jong angaichaho akimupi jingin, Mitheng Paul jong chu, Damascus lamlena ana kimupin, hiti chun ama hola lung thim pumpia hol ho jouse hengah ana kilaah jin ahi. Nangma jong atahtah a Pakai Jesutoh kimuto nom mongmong chu nahileh aman naki muto a nahuhdoh tei tei ding. Pathenin asimho jouse phatthei boh tahen.

Articles hi anom lheh e nati le anoiya “LIKE” button khu meh in writer ho na support nau vin, chule seinom nanei le anoiya comments nahin bolthei u ahi.

Site nalut a notification pop up hung potji ho allowed anabol ji uvo maban a thusim thah ahung ki post teng notice namu ji diu chule Bell button a subscribe kiti chu meh un.

Previous articleMI UPA HINKHO
Next articleJESUN ATHODOH JOU’IN AMA NGAILUA MUNOM HO ANAKIMUPI SOHKEIYE