SERMON || JERUSALEM NILHANGKAI..!
(Thina leh hinna hoijoh ilhendiu ham?)
By, Rev. Lunneo Haokip
Chamna khopi tia kihe Jerusalem chu mangthah koncha ahitan, akhopi kihal vam’a, amite soh le kol a kikaimang koncha ahitai. Weeping prophet tia jong ana kihe Hilki’ah chapa Jeremiah chu kum 17-18 vel bep ahi laitah hin amite chonsetna sosal a huhdoh ding ,thutah seipih dingin Pathen in ana kou tan ahi. Hinlah jeremiah in vang lim-leh-mel a chapang, thuseiji helou kahi ti’n ana ana nompoi._
Tulaiyin Pathen natohna jouse hi mi akichutho tan hijeh chun interview touding angaitan, nasatah in kivechil tan ahi. Ahinla Masanglai themgao khanglaiyin vang Ana kiphatlam jiuvin ana nomji pouve.
Ajeh chu;
1. THUTAH SEIPHONG DING’A KISOL AHIUVE:
(Jer 23:28, Ezek 33:7-11)
Miching koma thutah sei leh chun nahin ngailu’n tin kipaman nasan ding ahi. Mingol koma thutah kisei vang tahsa leh lhagao gepna bep ahi.
Pathen in judahte kom’a thutah seiding, achon- setnao sosal din themgao 70val ana lheng doh e. Hinla amahohin lengpa ngainom2 dinbou thu aseiyun kitah lou tah -in na atong uvin, Pathen min in jou asei tauve. Ajeh chu lengpa gihsalna-mipi doumah ding thutah aseiyu leh thina- gentheina atuo ding’u akihet jeh uvin koiman thutah aseingam pouve. Hiche jeh chun thutah seiphong ding, amite sosal dinga Pathen in jeremiah ahin sol ahi. Hinlah vangset umtah in kum40 val Thutah ana seiyin amiten ana tahsan pouvin, ana sangpouvin Jeremiah johhi ana bolgim jiuve. (Jer 1-3; Ch 5:31)
A. Tulai jeng’in jong Pathen natong- Houlamkai, Nampi lhacha tampi hin thutah asapphong leh thina- Kipalna,natohna mun lhaso ding tampi aum jeh hin thutah a immang uvin miho ngainom2 ding in thu asei gam tauve.
B. Thutah seiding’a kingense hon thutah aseiphong ngamlou na phat/khang chun eihin phatauve. Themgao jeremiah khanglai jong chun thutah seiphong ngamlouva aum phat uchun Pathen lunghanna ana chutan Kum70 gentile te (babylon) khut noiya sohchang in achetauve.
C. Eiho namsung jonghi maipha vetna leh phatlhemnan vai ahom khah a, Thutah seidoh-thutah phongjal ho igihsah thu2 khah uleh mikhutnoiya isohchanna diuhi gamlha lou ding ahitai. Thutah kihotbolna, thutah seiho kidoudalna gamsung’ah Pathen gaosap alhung tei jie.
2.MIHEMTE CHONSETNA SOSAL DING’A KISOL AHIUVE:
(Jer 3:12-13, Jonah 3:4,)
Leiset chung’a thil hahsa pen khat chu mihemkhat amitmona ga sosal ding/imitmona jeh a mikhat in eihung sosal dinghi ahi.
A. Jeremiah themgao dinmunhi ivetleh deilhen hahsa tah, Deihen lang deihih jong leh Pathen in asol ahijeh a chu themgao natohna (akisolna mun a chu) achetei2 aboltei2 ngai khat ana hikit e.
B. Amite chonset dan leh achung uva Pathen alunghan dan, chonset akisih lou uleh amanthah diudan ahetsohkei ahi.
C. Achonset nao aga sosal a ahileh lengpan ahin tha ding/songkula akhum ding, ahilou leh themgao lhem tampi lengpa angsunga lengpa ngainom2 dinga thujou seiho Themgaolhem ho chun Jeremiah chu jousei ahi tia ahin hehset uva adoudal kitdiu jong ahet ahi.
D. Ahinla Hahsatna tampi thimpi bang’a ajin vang chun akipat doh a achelou leh Jerusalem khopi mangthah ding- soh a kikai mang ding ahi tichu ahetsa ahijeh in GIHSAL LOUVA umding chu hahsa asai.
E. Tulaiyin jong jeremiah banga nampia dinga vision kicheh neiya hangsan tah a eipui hoidio ngaichat pipen khatchu ahi. Judah
miten nampi dindohna ding, Lenggam detna dinga themgao thusei angailou jeh uleh, Themgao sosalna ngaisah aneilou jeh uvin kum 70 (Daniel 9) ana sohchang uve. (Jer 29:10)
F. Nampi dindetna ding, damna dinga politician, Social leaders, Nampi lamkaihon Thutah idoudal uva, Pathen thutah lhonkhom lou, Pathen thu lhangsam ho thumop janomlou, theinomlou ihikhah uleh Jerusalem amanthah kona themgao thusei ajahdaova tobang ihi khah maitheiyu ahi. Nampi lamkai, politician ho leh Houlamkaihon nampi thua kihoukhomna ahinneiya anngola taona ahin neitheiya, Pathen ahin botkhom tengleh inamsung u dam intin, Khangtou tante. Vangset umtah in inamsung uva hangsen tah a Pathen thu seiya eisosal hou totnan akineiyin, phatmun akipe nom tapoi. (2kings 2:23-25)
THUCHAINA
Kuki namsung’a Pathen in adeilou pen khat hi, “Lhacha hon Pathen thu aseidio Kivaihomna- politics thua kikumsah lou ding tihi ahi. Ajeh chu i politics bolnaovahi Pathen pang theilou himai thei ahije.” Writter khat chun, “Politics without God is sin” atin ahi. Judahten jong leng-leh-lal kivaipohna hoa themgao Jeremiah ana paidoh uva, songkul changei ana khum uva ana doudal jeh un lengho jong amit akikal doh in,leng chapate jong mite khut noiya sohchang in ana chegam tauve.
i) Old testament khanglai ivet leh leng holeh Themgao hohi Tuileh nga banga kilhon khoma, lengho hin avaikon availhunna, Kivaihomna jousehi Themgao ho ana kudohjiu ahin ahi.
ii) Tulaiyin Politics thu/Gamle namthu kiseina hoa Bible sang’in juu-leh-saa akiha mu jotan, Taona mitlhi sang’in themmona bei thisan akiha mujoi.
iii) inamsunga ahaosa, aching athem jouse akisel gamtai. Koiman thutah aseingam tapon, ahaona le chihna jong akisel khinkhen tauve.Ajehchu thutah ihasei leh mi kigot kha ding, mi igot khah le kithi ding ahi ti akihet uve. Jeremiah khanglai banga thutah aki immanga, thutah in mun aneilou khah dinghi nampia dia vangsetna, Nampi manthahna kotbul geikoncha ahijoi.
iv) Proverb chun hitin aseiye , “mihemchu akiheina lamlama Pakai alunglhai teng, Pakaiyin hitobang mihem chu amelmate toh jong akichamsah theiye” atin ahi. Pakai lunglhaina vai akihom’a, thutah in inamsung uva na ahin toh teng namsung, gamsunga chamna um intin, melmate jeng in jong eihin kichampi nomdiu, kichampi dinga eihin joldiu ahi nalaiye.(Prov 16:7)
Tunin gelpha kit uhite Kilungtuo louna nisa’n eilhum den diuham,ahilou le kilungtona kolni isosah diuham ..!
Pathen in inamsung, nam lamkaiho, mipite phatthei eiboh cheh tauhen.!
