Home Crosby Haokip JANMANG KILUNGSET HINKHO

JANMANG KILUNGSET HINKHO

118
0
JANMANG KILUNGSET HINKHO
JANMANG KILUNGSET HINKHO

Lungset um Thusim

Story and Narrated by
Crosby Haokip

Crosby Haokip kwc
Crosby Haokip kwc

Kachennau thinglhang gamnom, mitin in thinglhang lei kabol un, louvah changle min, malcha chuleh anme chi tampi katu-uve. Themjilna lama sei dingin Ccpur a kakaiyin Class 12 kasim tan ahi. Kamelso chapang cha abah vangin kakum vang 24 lhingset chu kahitan ahi. Themjilna ngaisang mi kahi jehin kaboulna vangkho dalhan ccpur a school kakaiyin kainkote kom khat a kapan san ahi.

Dongma kicheh tah kanei lou vangin nungah phabep toh lungset hinkho kahin mang tan, kikhen le kingai chu keidin ka daily routine abang jenge. Ajeh chu lungset dihtah kananei pon, numei kamu jouse kadeichan chuleh kahel jouse anom thei kit e. Hijeh chun nungah lama lungneo louvin kanaumin, chuleh kalimtoh kilom louvin nungah hon eideilheh uve. Pasal kahi vangin eihin hel nungah atam thouvin, eihin hel jouse toh kahung kingaiyin hiti chun nungah mi gup kahin kop tai. Nungah kakingaipi ho laha apha tampi kamu doh in, ase jong atam ui. Hijongle lungset dihtah kanei lou jehin keidin kingai kilungset chu lhakhat validity ngen ahiji tan ahi.

Lungset dihtah kanei poi kati vangin mijousen mikhat chunga lungset dihtah akinei teiye. Hiche a chun Class 11 simlai nungah khat kahin deicha tan amin jong Thenhoi akiti. Kavetnom lheh jengin ahinla kajachat kit e. Numei dang koma vang jahchat kahe pon, ahinla Thenhoi houpi ding chu kagel jongleh kadip in kahai jitan ahi. Guhthimin kahin lungset tan, aman vang kei chunga ase apha imajong agel poi. Nungah tampi toh kakivop theiyin, kakoma ahung nomun, ahinla kalungset nun vang eihe pha poi. Avel a katou jin, ama mu mu na dingin kaumin ahinla amit sihin jong eive deh poi. Hijeh chun na kasa lheh jengin umje touje jong kahe tapon ahi. School a tuidon ding ahin kipoh jin, thum ngamlou sasan kaga thumjin aman jong hongphal tahin eipe ji. Hoitaha houpi ding kati ji tengleh aboiyin aloi numei hotoh apotdoh pei peiyin ahi. Chuti chun guhthim lungset nan kahung dammo pan tan athoh hah lheh jenge.

Class 12 exam kapat masang un farewell cum annual day program kamang un khatvei beh Thenhoi houpi tei ding katup tan ahi. House khat jong kahiuvin sport kabol un t-shirt blue color kaki ah cheh uve. Amale aloiho waiting shed koma atouvun, keile kaloiho thingphung neocha noi khat a katouvun aguhin Thenhoi kave ve tai. Kavet chanin amelhoina kamun kave chim thei poi. Chutia aman eihin le vet tengleh mundang kaven kakihei mang jitan ahi. Hichun kaloihon, “Hung uvo, nungah ho koma gatouvu te,” atiuvin kache tauve.

Akom kalhun un kaloihon adaicheh tauvin keivang kajah achan nungah ho koma me heu heuva kaum chu ahi jenge. Thenhoi jong kei banga mikam thip ahin, anuina jong kimu beh seh lou kei banga me heu chaa anui chu ahin kahina lhon akibang lheh e. Chuleh kalunggel lhon kibangin kahen, hijeh chun kalungsetna jong asang chom e. Jing nikho hung lhung leh exam hipei ding ahitan, kimuto na um theilou ding ahitan, tuni bou keiya dia kalungset mel kamu achaina jong himei thei ahitai. Ajeh chu result out jou tengleh College chom chom a school kai ding kahi tauvin, nikho chomcha hijongle Thenhoi toh kingai ding kanom lheh e.

Kakamin la kasei ngam tapon, chuin dukan a kachen card hoitah khat kachon asunga letter kakhumin kaseiyin, “Hoi, koi kahi jong neihe behseh pon nate. Keima na-u Minlal in phat sottah kana im kalungsetna ho cheng tunin hiche letter mang chan kahin seiye. Nagelthei leh kakipahin, nalung ahilou jongleh ngaidam kahin thum e. Tahbehin kahin lungset e. Kalungset na hi lungset in neisan peh o. Nungah hoile hoilou tampi kamun, nangin vang amaho nakho khel soh keiye. Nahoina keoseh ahipon, ihin dan lhonleh ilunggel lhon akibange. Hijeh chun kahin lungset e. Lungset tahin hin gel in lang genthei keiman kahin lungsetna hi neisan peh tei teiyin. Keima nahin lungset Bro Minlal Class 12,” tin kajih in card sunga kakhumin, chuin aloiho khat kakouvin Thenhoi anapeh dingin kanganse tai.

Lunghel tahin Class 12 board exam kahin chai tauvin kaboulna vangkho jon dingin Sugnu bus a katou dohin Thenhoi geldoh pumin kache tan ahi. Kakhou kalhun chun kalung ahel lheh jenge. Kakhouva nungah tam jongleh kalungset Thenhoi tailou koima kadei aum poi. Kalung ahel val jeh chun kakhouva nungah khat amin Khanthem kiti khattoh kahung kingai lhonin kilhamon nan kamang in kalungset tah tah vang chu Thenhoi ahi. Kalunghel jeh chun Thenhoi toh kakingai kaha kingaipi dingin kakingaipi tai. Ahinla amanun vang eilungset lheh jengin kakingai lhon anu le pa koma jong aseiyin, anu le pan jong aphat sah e. Aman penpi numei khatbou aneiyin panpi pasal bei ahi. Eilungset in dongma le a-u pa kigom in eigelin amajong kalungset lheh e. Kalhun nia pat in kakivop jing lhonin, kakingai lhon jong khosung mi hon ahe tauvin, aja jousen eikipa piuve. Chuleh kanu le kapan jong kakingai lhon aphat sah kit in ahi.

Kum sunga khosung twineh lama kapan mopohna apoh jeh chun twikai aset jehin kapa toh kom langa kache lhonin twikai kaga ve lhon tai. Twikun a chun twi veina mun khat aumin hilaiya kona chu mipi neh ding twi kila ahi. Kapa toh kasem lhonin, chuin kapan kajah a, “Boi, ken pipe hi ase lai suh khol khol ingting nangin abul lang hinsem to,” atin achen pipe asuh juipeh tai. Chuin kenjong abul lang kasemin ahileh khojin konin kasem chai tan ahi. Kasem chai chun kho ajing thim tan kom lah ahijehin jong mu athim chom e.

Chuin che dingin kaum tan ahileh kamasanga nungah khatin kakom ahin jot chu kamun koi ahidem katin kave tan ahi. Kakom ahung lhun chun eihin houvin, “Heu, nahung kile hah tave. In a kanga le kanga lel phat a nakoma kahung ahiye,” atin muthim jeh chun amel kamu chen theipon, chuin ajah a, “Nang koi chu nahi ta?” katin kadongin ahileh aman, “Heu, Thenhoi kahi chula. Neihet lou ham?” atin, chuin chunga kona chollha vahin amai ahinsal in ahileh kalungset Thenhoi chu ahitan, ahinla hilaiya ahung chu kalung adong lheh jenge.

Chuin kadongin,
KEIMA: “Hoi, itih a nahung ham?”
THENHOI: “Heu, tunia kahung lhun pan ahiye. In a kanga le nahung vaigei phat a nang chu hilaiya aume ti hepan eiseipeh a kahung ahi.”
KEIMA: “Akidange. Koi koma nalhun hinam?”
THENHOI: “Heu, kani Chongpi te koma kalhun ahiye,” atin, amel kamu chu kakipah lheh jenge. Chuin kajaha aseiyin, “Heu, farewell iman jouvuva chu kahin hol hol jeng a kahin mu doh lou. Card chu nangin neihin peh tahbeh mong mong ham?”
KEIMA: “Henge, keiman kahin peh ahinai. Asunga thu kijih jouse chu keima jih ahin, iti nagel em?” katileh me heu heuvin chung lam aven, chuin keilam ahinven kajah a,
THENHOI: “Heu, chung chollha vah noiya nang kahung holdoh hin kalungsetna avetsah e. Lekhaa nahin jih jouse chu kasim soh keiyin, kakipah lheh jenge. Lungset dihtah neichan ahileh kanomin kahin lungset e,” atin anop na asei chu kakipah lheh jenge.

KEIMA: “Nao, lungset dihtah kahin chan e. Kahin lungsetna hi aitih a ding ahitai.”
THENHOI: “Heu, ahivanga kakison lel chu o.”
KEIMA: “Ibola nakison lel ham?”
THENHOI: “Heu, nang na-luck vala. School a jong chu namin kajah jah jeng. Numei hon nadei thu jong kajah.”
KEIMA: “Nao, kalungset dihtah koima aumpoi. Nangbou nahiye. Nang tailou lungset dang kanei poi,” katin amajong akipahin, chuin kakhut jetlamin kakaiyin khojin noiyah kom lah kahin jot lhon tai. Inlam kahin jot chun lampi kichai thei hih hen lang khovah keiyin akhutin kikai hen lang kivah khovah keile kanom e. Chuin in kalhun lhon chun kaumna mun cheh kajon lhon tai.

Jingkah matahin kathouvin twi hah ahi jehin twikai phunga nungah, nupi chapang twi ngahin anadimset tauve. Chuin kave le len ahileh Khanthem kamun, chuin kakoma ahungin, “Heu, kanun nakouve. Kilhon suh khom hite,” atin, chuin twi kahin khai pehin kache lhon tai. Chuin ainsunguva kalut in ahileh kaden! Thenhoi kamu chun kachom mang dehchet e. Hichun sei ding kahet lou phatin Thenhoi jah a, “Hoi, hilaiya nalhun ham?” katin, chuin aman jong, “Henge heu,” atin, chuin Khanthem in kajah a, “Heu, kanao toh iti na kihet ham?” tin eidongin, chuin ajah a, “Lamka langa school kakai khom uve,” katin, chuin sotpi kakihoulim un ahi. Chuin Khanthem in kajah a, “Heu, keile kanu louva kamache lhon ding ahin, lou nahung tengleh kanaonu hin kilhon pi o,” atin lungdon nan kadim tai.

Anneh jouvin Thenhoi toh lou lam kajon lhon tan ahi. Chuin Thenhoiyin kakhut atuhin lamtou kajot peh lhonin ahi. Chuin kalhun lhon ding konin Thenhoi jah a, “Hoi, lounah a pahcha lei khu keiho lou ahin, alang khat a buh kisa a von kiphouna khu nangho lou ahi,” katin, abuh uva kaga thah in ahi. Nilhah lang kile ding konin Khanthem le Thenhoiyin lampi a einangah lhonin, chuin kakilhon tauve.

Chuin Khanthem in eihin daiyin,
KHANTHEM: “Heu, kanaovin nang chu school a aluck a luck ahi ati chula. Nang vang ochat chat naume.”
KEIMA: “Hoilah! Ajou asei hibou chu.”
KHANTHEM: “Heu, nahiti luck leh kilungneo kha nah ta,” atin anuiyin,
KEIMA: “Ahilou lou sei hih o. Kajahnom hih e.”
THENHOI: “Heu, ka-u Them in nahin lungset hin te,” atin anuiyin, ahinla sei ding helouvin kaum tan ahi. Anitah lhon a kakingaipi ahin, hitia kahung kivop khom khah dingu katahsan pon, kikivop khom ahitah jehin khat jo sang kakhen angai tai. Ahinla thusei ding dan ahah lheh jenge. Khanthem sangin Thenhoi kalungset in kangaiyin, Khanthem khen ding kati jongleh anu le pa kachunga lhase kit ding ahin amani kikah a kei kakikhai sang go tai. Chuin Thenhoi aham tapon chomkhat chu thip chet in kakijot tauvin ahi.

Nilhah khat Thenhoiyin mun khat a kimuto dingin eitemin keijong kache tai. Akom kalhun chun lhase tahin eiven kajaha, “Heu, lungset khat bou nanei thei hilou ham?” atin sei ding kahe tapoi. Chuin aseikit in, “Heu, ka-u Them toh jong nakingai chu na?” atin eihin dongin, chuin kenjong athu um dan ho kasei pehin ajah a, “Nao, ken ama kalungset poi. Nang joh nahiye kalungset pen,” katin, chuin aman kajah a, _“Heu, kingai lheh lhon jongle hen hilaiya ium laisea eini dingin lampi ahah e. School kaiya che dingin Lamka langa che tahi te,” atin lungdon nan kadim tan ahi. Chuin ajah a, “Nao, thu hiche ho them them jeh-a khen ding nei got ham? Nanop le neikhenin kei ipi kati am ivet ding ahi,” katileh alhisohin kajah a, “Heu, kikhen ding lunggel kanei poi. Ikingai lhon vangin ka-u Them dingin dou hah inte kati ahi. Nakhen jou him him ponge. Nanga dia pangdet kahitai,” atin chuin munkhata katou khom lhonin lungset thim thu kalal lhonin ahi.

Nikhat Khanthem koma kachen kagalut in ahileh anaboi cheng uvin, insung langa Khanthem anakap in, chuin kalungdon manin kachen Khanthem jaha, “Nao, ibola naka ham?” kati leh eidonbut pon avelin kadongin kitin, chuin aman kajah a, “Heu, kanaonu toh nakingai lhon ibola hena sa saa neikingaipi ham? Lungsetna lama ibola neisuh genthei ham?” atin seiding kahe tapon ahi. Chuin akoma ngaidam kathumin, “Nao, kei themmona ahi. Ngaidam kahin thum e. Nanaonu toh kakingaiye,” katin, lhepbi jou louvin akap tai.

Chuin Thenhoi ahungin a-u nu jah a, “Heu, kakhel tai. Heu Minlal toh nakingai lhon lam kahet lou ahi. Kei nanao kahin nathu thun nung tange. Keini kikhen lhon ing ting che tange,” atin akap lhon tan ahi. Ken amani umchan kaven seiding kam khat cha kanei tapoi. Gollhang ho dingin mittam aphat chomna aumpoi. Nungah ho jong chuti ma ahi. Dongma tampi nei kiti hi ju banga midai chavei ahi kahin hedoh tai. Chuphatin che dingin Thenhoi akigong tan kapona lheh jenge. Chuin akoma kachen, “Nao, che naihih o. Aboi jouse seitoh thei hilou ham?” katin, chuin aman kajah a, “Heu, che tange. Neilungset mong mong leh Lamka langa nahung tengleh neihin hol doh tan,” atin a-bag akipohin ache tai. Chuin anung kajuiyin hung kile kit dingin katemin anom mong mong tapoi.

Chuin kalung ahang tan kachemcha choi chun kakisun go tan ahileh Thenhoiyin kap pum pumin, “Heu, kenjong kahin lungset e. Neilungset mong mong leh Lamka langa nahung tengleh neihung hol doh o,” atin ache tai. Chuin laina tahin tol a katouvin kalhisoh tan ahi. Chuin Khanthem ahungin kajah a, “Heu, kithouvo. Anneh phat ahitai,” atin kalung hang behseh in kahousen, “Mingol! kitouva iti kakitho ding? Tulai taha koiyin an aneh ding ham?” katin kalung hang jah jah tan ahi.

Atah tahin kajinun(Khanthem) eihin thouvin, “Heu, kithouvo anneh phat ahitai. Nang jong hap mal hih in. Koi Thenhoi chu namang mat a nachuti kou kou ham? Hin nachapa kivet in ankong hinsem inge,” atin kahahdohin ahileh kajanmang anahin kaka kanan kamit kamai ana pom hel e.

Ajingin kaneolaiya ka school kaina muna kachen principal pa toh kakimuto lhonin sottah pi kakihoulim lhonin ahi. Chutia kakihoulim lai lhon chun nupi khatin achapa admission ahung bol pehin amanu min chu Thenhoi akitin ahileh kakindot in, chuin amanun chibai eihin bolin kajah a, “Heu, u-Minlal chu nahi ham? Lunghel aum tave. Kum 5 lang ache tan tua ikinung muto lhon hi apatna ahi na laiye,” atin kamang kageldohin lunghel toh nuijat toh kathon, chujouvin inlam kajon tai. Oh! Janmang ahivangin ajinei nunga amel kamun jong kalungset jing na laiye.


THE END


Kakipahe asim jouse Pathen in phatthei boh tahen.


©️2019 ,Crosby Haokip, All Rights Reserved.

Thusim hi anom lheh e nati le anoiya “LIKE” button khu meh in writer ho na support nau vin, chule seinom nanei le anoiya comments nahin bolthei u ahi.

Site nalut a notification pop up hung potji ho allowed anabol ji uvo maban a thusim thah ahung ki post teng notice namu ji diu chule Bell button a subscribe kiti chu meh un.

Previous articleNACHUNG THU TAN DING PA LUNG HOL JING IN
Next articleDongma-nei nahileh

LEAVE A REPLY

Please enter your comment!
Please enter your name here