(Based on a TRUE LOVE-STORY)
(Episode-2)
Compiled by:
Gogou-Chongloi
Arranged by:
Max@Hegou-Dimngel
(Episode-1) Somasa banjom, kin naloipa (Gogou) dingin Mercy (kaloinu) anakou nang’e” ahin tichun kame seu jengin keijong “ahile o” ti’n kahung kiletan ahi.
Chutia kalungsed Thethem in asei jouphat chun keijong inlam kahin jontai, inn kalhun chun kanu in kajah ah “Boi naomin nahung lhun hitam nao kisutheng inlang nakichai phatle dokhang chunga kakoipeh bu le me chu ananetan; napa le ken kin khohtah khat kanei lhon in gache lhon inge” tin kanu chun ahin seijin, keijong kaki sutheng in kakichai jouchun ann kanen ahile kaloipa jong ahung in kakomma atou in ahi. kaloipa chun eihinve jin kakoma “bhai tunilhah chu namel chu nidang toh nabangpoi khatveile alung kipahtoh nakilo in khat veileh nalung akipah loutoh akilouve epithu um hitam?” ahin tin,
Kenjong emadang seilou in baii tuni lhah Thethem in nangchu hinpui in akipa nading khat kana koipeh dinghe atie katipeh leh; kaloipa chu ahung nuijin😂 ole iche tahhih diham? ahin tin keijong kaki sachai tan, keini jong kalungsed pen Thethem te inn chu kache lhontan ahile Thethem pi le pu jong anaum lhon in anahi. keini jong kasung lha lhontan ahile Thethem touna kom chun Mercy jong anatou in Thethem in eihin mulhon chun kiphalam chan he-Umin nahung kholaai
-len lhon ham hungtou lhonno ahintin, Touna eihin pen kaloipa chu pelou vin aloinu Mercy koma chun nakomma touna chu na Hero pachu pe o ahin tile; Mercy jong jahcha pum leh maisan thethu pum in he-U hi o touvo tin touna ahin pen keini jong katou lhon tan ahie, kahung kihoulim2 un ahile Thethem pi le pu injong eihin kou in kenjong hoijo hepu epithu hitam katin ahile naloi teni toh hung kihou lim tao in napi le keini jong kichol lhon tange. Tuni kapot doh lhonna ahahsat jeh in kalel vaal lhonne ahintin amani jong kicholdo din room lang akijot lhontan,
Chutichun kahung toukhom naaipan taovin kahung kihou lim2 leo Mercy chun kaloipa jah in He-U lhavah anom val’e hungo eini innpam langiin gatou hite ahin tin”; hiphat chun kaloipa chun tunilhah chu lhavah anom lheh jenge tin eidalha lhontan hichun keini jong emacha thu seijoh sang umlou in chomkhat chu thipchet tan anahije, katoulhon chun kenjong kalungsed pen Thethem asomai chu kaven ahile akipahpoi tichu seilou in kahe paijeng in kenjong sunna aumchan holeh kakomma amitlhiso naho chu athahbeh in kahin gel doh kittan ahi. Chuin keijong gahdoh paijeng ding chula kaki phalamkit in kenjong helou bang kisan, “Them iloiteni potdoh jeh’a chu nakipa theilou ham khatvei neihinve temmo; Them ahipoi eini changseh ehilhonhi anom theipoi loiteni hin koulut o nangin kagah tin ahile, kaseichai masang chun “he-Umin hiche manchu ahi poi” tin kakom chun mitlhi longpum in keilam jong vengam lou in ahung lhisoh tan ahie. Keijong kaki gelleh kakipha lamtaan kenjong nao edia kakomma lhisoh nahim lhisoh tahih in, “ven na U-mimin kei kaum nai seijin epidia lhisoh nahim” tin amaaija luong mitlhi chu katheh hul pehtan;
Hichun “He-Umin kahinkho hi agenthei valle hitia kahin2 sang’n khulsin joh hiding kanom jotai, chutijoh chu hileh chaga hinkho genthei nahi kiledoh najong hitante” tin amaija mitlhi luongpum2 in kalungsed kangaipen Thethem chun ahinkho thusim chu kakom in ahinsei tan ahikitne. Ahinkhuo thusim chu Thethem chun hitin aseijom kitne “He-Umin keihi innsunga dia mi-unu chanu laigil-gaa masapen chu kanahin, kapien pihi nao pasal khat kanei jin kanao pahi apien2 achun vangset umtah in mibangin kineppi thei chapa chu ana hitapon; hinlah kanu leh kapan Pathen in eipeh kachan dia lomma eipeh ahije tin lunglhaisel in kaki vah un ahi, kanao chu ka chunnu injong ahithei chan in ama aanglum in ahin khou-khah jingtan anahi. Hichun phat ahung che2 tan kanaopa jong ahung chiethei tillai phatchu ahung hitan, keijong ka khou chun school khat anaum in hichun school kaitoh naosen don kakop jin; ka school kaina achun exam kahin neipan tan kanu chun kanaopa chu ama noija-nu kanungah chate tohchun suun leh akichep khom sahji in,
Chutengle kei Exam kichai phat teng kanao chu ken kadon kit jin nikhat ka exam hi morning evening kanei tha jehchun mathim in exam boldin kachetan; kanu hin kanao chu nidang bang’n kanungah chate koma ana dalha kitnin hichun amani jong kapa’n sawmill khat ahonjeh chun, sawmill a natoh namun anachekit lhontan hiche nisuun chun kanaopa chu kanungah chate toh akichep khomnau vin huonsung aning langkhat chun twikul (well) kilaai kuohom khat ana uminn ahi. Hiche sunga chun kanaopa chu ana kitang luttan chapang-cha ahijeh chun kanaopa chu hichi twikul sung chun ama le ama ana kihuh dohjou tapon aleiset hinkho ana beitai, hichi thilsoh chu kanungah chate chun ana hepha pouvin kanaopa chu amiel amu talou phat uchun ahin holpan taovin ahile; amujou tapouvin hichun kanungah chanu atahpennu chun hiche amaho huonlei ninglanga twikul umna a khelut ding in ahin gingmo tan, amajong lunggim leh tijat nan adimtan hichun tijat leh lunggim pumchun huon sunga twikul kilaina chu agave tan ahileh kanaopa chu twichunga chun akhup langin anaum tan ahi.
Twichunga ana kilet (float) le2 chu ahin mutan hichun kichatleh tijat chuleh akatoh thon apengtan, chutia apenna akaphat chun innkom leh invel aum sun2chun ahin dellut taovin hinlah kanaopa chu ahinkhuo huhdoh theichu ana hita pon; hiphat chun khuosung a pasal khat chu keiho exam kabol nao school achun thupe leh thilsoh umdanho seiding in ahin sol’un ka Ojaho koma chun ahungsei taovin ahile, ka Oja hojouse chu akikou khomun akihoulim taovin hichun Oja hojouse chun eihin kou khommun “tunni exam kibolhi kisuhai (cancel) ding ahitai nainn cheh u juon taovin” tin ahin seitaove. Chuphat chun school chapang jouse chu innlam cheh juondin kahung kikhen (dismiss) taovin hichun keijong innlang kahin juon tan, Inn kalhun dingkuon chun thipung (dah gin) chu ahung ging tan keijong tijat leh lunggim nan eihin phatan akinthei pen chun keijong innlam kajuon tan anahi; Inn🏚️kalhun ding kuon chun ka inn’u leitol (campus) maichun mi ana dimset tan chuin keijong lungdong tah leh tijatna dimset chun…… innchu kalut tan ahile, kanu leh kapa chu kanaopa luong-damsa chunga chun anakap2 lhontan anahi.
Akomma ding kakhou mipite chu mitlhi luonga lhi (tear)😭 kitheh pumchun kanu leh kapa umchan chu anave tho taovin, hichun kanaopa chu janmang dia jong kadei loule lomlou hel’a khulsin chu anahi tahjeh chun keijong chu kana kappan tan; alang khatna kanu’n einamu2 chun eina aangkoi (embraced)🙆♀️paijin akaptan, kajah in “Boinu kanao…… ven…..nanaopa hi!”…. atin emadang jong seithei talou jenchun eikoi jin akapkit tan; kanu chu anaha kaa (weep) vaalphat chun akap-chat paikit tan chubanna tuolla alhu den kittai, hichun mipi ahung kikhom mi themkhat chun kanu chu room chom khatlang pan adomlut un kanu chu aboipi un anahe. Alang khatchun kapa jong kaven…..ahile kanaopa luong-damsa koma chun atouvin kapjong akap doh theiji pon abangle anaha kaaval kitji phat tengle kapa jongchu akapchat pai go jitan ahikitne, achuti jiphat chun mipiho chun kapa chu alhemji un hinlah ajona phat le alonaji ahekit jita pouvin kanu jongchu chomkhat setpi haitalou in ahung um kittan; Mipi hung kikhom hochun kanu chu alangkhat in ale lunggim pijoh kitji taovin sasah nathei chan in ahin boipi taovin ahile,
Kanu chu minute somho chejou chun khuo (conscious) ahin hedoh theitan ahe. Chuche nikhuo chu keiho innsung mite dingchun kana le lhiluonna chule lungjinna nikhuo chu anahitan, nilhah lam pung 04:30cn velchun kanaopa chu thikuong (coffin)⚰️ sunga ahin koitaovin ahi. Phat chomkhat jouchun kanaopa longdamsa chu vuidoh ding ahin tiphat uchun keiho ding chun ahahsa lheh jeng in, hinlah Pathen thil-guon joh ana hitah jehchun alou theilou chu ahimai tan; Chuin leiset a kisemma hung pieng anahijeh chun leiset lesokit dingchun atahsa chu vuidoh dingin khuosung gollhang hochun kanaopa luong-damsa (dead body) chu ahinpo doh un lhanmol (cemetry) lang chu kajon taovin, kalhun jouvu chomkhat jouchun aluong chu kokhuh (grave) sunga chun ahin domlut nun kahin vuuijou (buried) taovin Chuin mipin innlang ahin juon gamtan; hinlah kanu leh ken vang kanaopa chu dalha joulou in akivuina chung chun kakap den lhontan, Chuphat chun kanungah ahungin kanu chu ahung lhem in hinlah alhembi chom dehpon ama jong kappum in kanu leh keichu eilhem jin ama jong akap denji tai;
Kanungah chun alonaji eihe lhon tapon chutia kaptang theilouva kaum lhonphat chun kapa ahung in kanu le keichu eikoi lhon’n kanu leh keijah achun mitlhi long pum chun kapa’n,…. Boinu le kangaitah ka inneipi kap lhon tahih in leiset hi innsungmi kikhen nagam ahibouve. Nikhuo khatleh kikhen kit louna gam nomma chun insungmi kikim sella ilenkhom kitdiu ahinai, tuni khuohi eiho innsung mite din kikhen nikhuo hijong leh kikhen kit lou nagamma eina ngah unte; ven tunia eiho innsung athil lhunghi Pathen thilguon joh ahi Pathenin tunia eigon peh u sanga sangjohi, khat innsung in jong agong nae tisumil lhonhih in tonsot vangam nom ichan nathei diuva thokit theina leh thina hi Pathen in anasem ahi tin….. kapa chun einalha muon lhonne. Hichun hahsa pumleh mitlhi pumin innlang chu kahin juon taovin Chuche nikhuo chu keiho insung dia a etih a jong suhmil theitalou ding nikhuo chu ahitai, Chutichun phatle nikhuo ho ahungche2 taan kanaopa’n einadalhah nau lhanga (5’months) lhinni-khuochu ahung lhung kittan;
Kanu jong kanaopa angaina jong chu ahung oldom jeptan hichun kanu jong natoh ding lunggel jong ahin neithei tan kapa toh natong in ahung cheji lhontan, Chuti chun sunleh kapa toh sawmill in natongin acheji lhon nin keiman sunleh innho kahe theng jin anahi. Chuti chun kahung kimangcha toupeh jitan ahile kumkhat chu ahung lhingtan, nikhat chu sunna kachanga inna kaumpet hin pasal gollhang mili van gari’a ahung kumlha un chule kakomma ahungun kajah in, nanu leh napa umlou ham? tin eina dong un kenjong henge heu teho kanu le kapa natong in ache lhonne katipeh in; nilhah lang 05:00pm hovelle hunglhung lhon tante kati tan ahile, Gollhang holah’a khatpa chun lekha khat eihin pen hiche hi napa ahung lhun phatle anapen tin kikinno tahchun eidalha pai taove. kenjong lekha chu kakoi tup in nilhah lang ahung hiding phatchun kenjong bu kahon in twiho kakhai in kadip sohphat chun tv kalha in kave tan, kanu le kapa jong ahung vailhung lhontan chutolhonna ahung vailhun lhonphat chun akisutheng lhontan;
Chomkhat jouchun kanu chun eihin kou in Boinu Bu anathuh o kahung kichai ditai ann nedoh ute ahin tiphat chun, kenjong ann nehding kahin guongtan kahin guonchai phat in kanu leh kapa jong anne din ahung lhontan chuin annchu kane taove. hichun room langa kakoi lekha kidalha chu kagaladoh in kapa kapetan, kapan jong lekha chu asimtan ahile hiche lekha chu demand letter ana hitan kapa injong dated kipechu avet leh dated som jouleh chuchelai munna chu dangka lakh-nga nahung thah ding ahi; achuti louleh nahinkhuo kilading ahi tin anakisun tan hichun kapa le kanu jong alungkham lhon lheh jengin, kapa lungkham valjeh chun jaanjong nommin akicholdo thei tapuon alangkhatna jingkhuo ahung lhungtan kanu le kapa jong angaija bangchun natong in achie kitlhon tai. Phatle nikhuo ana challin demand letter hungkipe chu apieh phat ahung hitan kapa chun sum aneijouse asuhto vangchun ahile 04 lacs bou alhingtan, Akivat khamchu lah nading aheta pon hijeh chun sum thah ding chun achiengap tapon; chutphat nachun chieta louvin inna aumtan hiche nikhuo chun demand hinbol hochu ahung kitta pouvin,
Nithum jou ahin intom langa hin kaki chem taan hichun vangset umtahchun sum thuum hochu inna ahung taovin achoh thethu jengtaove. keijong lungdong tahchun inn-baang hom (hole) kah a kuonchun kathim vettan kanule kapa chu aman’un kapa koma chun, Ipidia kathupeh dungjuija nachon louham?😡 tin kapachu pistol🔫 in ahinkap tan chutia kapa akaplih phat uchun; kanu jong ahung kitom tan kapa lhuh denna achun adellut in akaptan ahile, miphalou holah’a khatpa chun kanu jongchu ahinkap kittan ahile kanu chu apet2 in tollin alhu den tan; chuphat chun miphalou hochun ka inn’u chu thao alhei khum un ahaal (burned) taovin, hichun keijong kahung jaam tan ahile innpam langchun miphalou holah achun pasal mini ana dingin ahi. Chutia kajam chu ahinmu lhon tan galla patchun pistol in eihin galkaap lhon in hinla eikha pon, keijong kahung jam dohtan kicha pum le tija pumchun lampi achun kahung jam2 tan ahile munkhat laija lampi kikaa (junction) khat kahin phahtoh kitoh ahin car khat ahung lhaijin;
Kenjong gah-ot na jamding katin ahinla car hunglhai a speed chu ana hatvaal jehchun chule kei jong kichat le tija pumma hajamma hungjam kahijeh chun, car hunglhai chu ka ot doh jouman tapon car hunglhai chun eihin tatkha tai. Kenjong apet2 chun car in eitatkha e tichu kahe in ahiinla adang vang imacha kahe tapuon, khuo helouva kalup denphat chun nupi khatle upa khat car sunga kuon chun ahungkum lhontan; chule eihin dellut lhon in apet2 nin car sunga eipo lutlhon in hichun agan nathei penchun Hospital in einapui lhon tai, keijong khuo kahin hetthei phat chun ka umna chu kavetle hospital ana hitan ahi. Hichun kakom in nupani hi anatou in khuo kahetthei phatchun nupinu chun kajah in, Boi lum’in phaten kichollin nalelval nalaije tin eikicholsah kittan….hichun keijong kakichol (relaxed) kittan anahie. Chutia hospital a hapta khat hotobang chu kahung umphat chun keijong kahung damdoh tan, hichun keiho jong hospital sunga kuon chun kahungdoh tauvin ahile Hospital maaija restaurant khat anaum’n chuin nupi nu leh upa pachun eipuilut lhon in;
Ann kane un nupi nu chun kajah a boi namin epi ham? Dr. achu khat kanamoh jih ahije tin eihin dongin, kenjong kavetle nupi nuchu ahanthim tan atehthim tahjeh chun Hepi kei kamin Thethem ahie kana titan ahi. Nupinu chun ahile nakhuo minla epi ham chule hoilai khuoho nahiham tin eihin dong kittan, kenjong hepi kei tuolbung ho kahie kati kittan amanjong eihin dong kit in; ipi atile chuche laai lampi a chu…nahung lhai ham hoilai phadia nakigot hamtin eihin dong kittan, kenjong kahung jamna ajeh le athuho jouse kaseipeh tan ahile nupi nuchu amitlhi analuong mantan; hichun nupinu chun kajah in boi tunia kipat napu toh keini komma naum ding hitachu ong…..olmo hihta napu jong aphat a pha ahie, boi keini komma naum ding hitachu ahintin hichun restaurant a kuon kahung doh un innlam kahin juon taovin anahi. Inn kalhun un kapinu chun kadam theng nailou ahijehchun boi hiche hi nang room ahitai nommin kicholta ong!… tin room sunga chun eipui lut in, hichun kapinu chun boi keile napu in inehdiu Bu kahin huonlhon ding nang nommin anakichol tang o ahintin;
Kenjong henge hepi kati’n lupna chung achun kakichol tan nilhah lang 06:00cn dunghin khuojong ahung jingtan kapi nuchun ann nedin eihung koutan, keijong kakithou in kakisutheng jouchun ann kane taovin ahile kapi nule kapu pachun kajah in boi tuni akipatna napule napi ken…katunu bang2 a kakivah lhonding nahitai eity. Nangin jong napile napu bang2 in neigel lhon tang ong nangjong hoitah a nadam thieng langphat tengle, chule nang school kaina ding nalekhasim nading admission jong kabol lhon ding lekha phatecha nasim ding ahitin ahin seitan; hichun ann jong kanejou taovun keijong room lang juondin kachie kittan, Innpam lang chu kapotdoh in lhavah le chunga ahsi vahho chu kaven ahile; kanu le kapa chule kanao kangai jin kakap kittan chutia ka2 phatchun kapi le kapu ahunglut in, kapu chun epi jeh’a ka2ham ti ahetjeh chun kapichu kakom’n ada lhan ama ale potdoh kittai. Hichun kapi in ka2 laichu eilhem in aphei (lap) eikhap sah in eilhem2 in kasam chu ajut2 (massage) le2 jin ahile, kapi pheichung ngappum chun kana emulhutan chuphat chun kapinu chu ama room sunga emuta louvin;
Kei room sunga kalupna jalkhun chunga chun amajong ana imu’n eina aang-koijin ahi, kapi le kapu chun eilungset lheh jengin hichun phat ahung che2 in keijong school kahung kaipan tan anahie. kumkhat jouhin keiho bazar kaina mun khopi sunga chun lekha simdin Boarding’a eihin koilhon tan, hichun kum-nga lam jensao chun inn hung pot khatalou in lekha kahinsim jingtan ahi. Ahinlah kum-nga jouchun ka umna khopi (town) sungchu ahung boitan hijehchun kapi le kapun eihung puidoh ahie he-Umin” ahinti chun, keijong kahai ahung nomdom jengtan kenjong kadong paikit ngal tan school kaithei talouna kumkhat jong alhing tan ahile; hoija naumma neiki musah vahlou ham? tin keichu kanuoh kigotan ahile, ahung nuijin🤣 He-Umin kapi le kapu in hiche lekha eina simsah namun achun kanungah chate khatjong lekha asim’e. Phat sotpi jouchun kana kiheto lhontan nikhat ama umna room’a kaum gom lhonpet in kanungah ahungpet anahin, kahung kihe touvin chule kapi le kapun eihung puidoh jou hapta khat jouva chu kanungah te komma kumkhat setpi kaga um ahi.
Kapi le kapu jonghi anateh lhon phat in amani vettoh gomma kahung kilekit ahitai ahintiphat chun, kenjong ahile lekhasim nangah ahitahle iding a jannia chu school’a nahung kamu ham katitan; aman jong kaloinu Mercy kangai valjeh a keijong ama komma kahung ahie tin ahung nui in, hichun kalungsed Thethem chun he-Umin jannia kaloinu kahin juija room sunga kahinmu chutoh tunia thakuon petna namel kamu chu o tin…..emadang seikit talou in athusei anga kittan ahi. kenjong Them ipithu ham seijo epiti ham ole hoimo neisah valham ole Homo neisah ham kati tan ahile, Thethem chun “He-Umin ahipoi heu namel hi kanmu nia kipat chun lungsed2 umtah somai mel napue” ahinti chun; keijong vetna dingpen kamai motan kalungsed penleh kalungdeinun ahinsei jeng chule pasal kahi jengvang chun kajah jong ahungcha in, kenjong seidi kahetmo man chun “nao chutichun sei hih o kunkei pentah epidi eiti dingham” katin ahile; Amanun heumin tuni ina tohkhom nau akichaija innlang nache kahseh jeng injong kahin ngai manne ahintin,
Keijong kaki gellin ahile sunna kana toh petlhon na mitlha lou hella eina vetjichu ajeh kahin hethem pantai. Hichun kasei louvanga kalungsed Thethem chun eihin lungsedne tichu kahin hedoh tan, kenjong kalunggel’a seidinga kakoi kalungsed nathu chu seijeng ding kagah tileh; ile e hungki toh hapam langa umte nichu ahung kisukap lhontan, Mercy chu innsung ahung luttan akaphat chun kenjong kalunga um lungsetna sangpen chu kakisei manta pon anahi. Chuin kabonu’n Mercy lhem in kaki saboi un ahile chomkhat jouchun akachu ahung haijin ahungnui kittan, hichun kabon un kakihou limmun katou vun hichun kenjong pung kavet leh pung 11:40pm ana valtan; Chuphat chun kaloipa (Gogou) toh kenjong innlang chiedin kaseilhon tan ahile, Thethem le Mercy in jong “chuti ahile o he-Umin nahung thah lhon inge” tin ahinsei in; keini innjong nao akhoh poije nangni numei nahilhon in, keini pasal kahi lhonne hisang chun keini joh innlang chielhon tange tin gate nachun kahung kikhen taovin ahi.
Hiche thusim lunglut tahle thanom tah asimjouse kakipana kaphongin ahi.
~Chule abanna Episode-3 lungneng tah in anangah jingute.
