JANLAI LENGNU
-Lelen Kipgen
(7629033890)
(Part-I)
“Thilha nungah toh kilungset thusim:”
Nikhat hi kakijam jong le kachimin, katou jong leh kachimin, hichelai phat chu Ccpur a SK(Seikam) Sport’s aumlaitah ahi. Tuni beh kenjong Ball peh gakive hen, tin kahung pot tai. Ka-veng uva thinglhang lang ho golhang kum 24 vel mikhat aumin, kilhonpi ding aumlou jeh chun ama chu kahin koupa in Public ground lang kajon lhontan ahi. Public ground kalhun lhonin, ground pam a nehthei kijoh ho chu tamthim khat kakichoh lhonin, ticket 40/- in kakah lhonin kalut lhontan ahi.
Kichem ho jong ahung kipan tauvin, kei chu kapen toh, akah le kahoh jin hibangse kasoh e. Ahinlah kakilhonpi kaloipa chu thipchet in aumin, ball kichem ho lunglut tah in ave e. Kagolpa hi adamlou jeh a Lamka a kijen a hung um ahin, ipiti damlou ham vang kahepoi. Amin hi Gogou ahi. Hiti chun lunglut tah in kichep kave lhonin, half jou chomkhat akichep jou un kagolpa Gogou chu khohe louvin ahung moh lhuh tan, kavet le amitkang ale in, achilphon akaiyin, kati ajat val jeh chun kamoh pen jengin ahile kakom lhon a tou ho chun twi athe khum un alo-le le uleh ahung lipdoh nah nah in ahi.
Chuphat in kenjong akin thei pen in inlam ah kahin nungpui tan, a-inn uva kathahpa in, kenjong ka-inn lam u kahin jon peitai. Inn kalhun in jalkhun chunga kagolpa damlou dan chu kagelin, ipiti nat ham, kalung atheh lheh tan, kachuti gel-gel jengtan ahi. Jan in jong ihmu thei louvin kagelin, kakin kathou jaolou beh chun kalungdon peh keiye.
Ajing in toh ding tham ding jong aumchom pon, sun in kagolpa Gogou koma chun kholaileng in kagache tan ahi. Aumnate, apaneo le anuneo toh anaum uvin, kei eimu phat chun kiphatlam tah in anaum e. Amahi mi kiphatlamse, mi kamtam beh lou, miphatah, mikitah tah khat ahiye. Chomkhat katou jou un anuneo leh apaneo jong kin khat a dingin apot lhon tan “Gogou, nagolpa toh nomtah in anaum lhonin lang neh ding aum le ana kibol lhonin lang ana ne lhonin, keini kin khat a kapotna lhon ding aum e” tin apot pei lhontan ahi.
Anuneo le apaneo potdoh jouvin thinglhang langa kona ahin poh [Molthei] ga ho chu kane lhonin, kakihoulim lhone. Chomkhat kakihoulim jou lhonin,
KEIMA: “Gou, janhi a chu ipiti mong mong nahim? kati ajat dan chu”
GOGOU: “Boilen, hiti hi akihi jeng e. Hiche jeh a hi inn langa um thei louva kijen toh kop a hilanga hi hung um kahiye”
KEIMA: “Gou, inn langa um theilou, nati chu ipi naseina ham? kahe them thei hih e”
GOGOU: “Aa…. Len, athusim hi asao bouve, nangai ngap ding hinam?”
Aseidan chu kalung atheh cheh cheh in, kahet nom ten tan, “seiyo, asei bon nasei le angai chu ipi hah ding ham” hitia kasei phat chun athusim, anat dan ahinsei tai.
GOGOU: “Boilen, seiding jong jachat aumin, koima kom’a kicheh tah a kasei khah lou ahin, kanu kapa ka-insung mi kom jenga jong kicheh tah a kasei khah lou ahi. Nahet nom ten ahileh naseipeh inge”
Kakho uhi thinglhang ahin, thinglhang ko-chong bet, gari jong lhung lou, Electric jong lhung lou, gari lhun theina a kipat keng lam a nithum kijot ahin, Manipur sunga dingin thinglhang pen ahiye, kiti jong le seikhel hiponte. Hichangeiya gamhahsa gam’a chu cheng kahiuve. Chule kei hi insunga pasal changkhat kahin, penpi numei ni bou kaneiyin, kanu le kapa toh mi nga(5) kahiuve.
Kei hi thinglhang gam’a hung seilen akihi jeh in kagolhan til’a kipat gamlen kalunglut in, Sajuh, Vompi, Ngalchang chule adang dang Sapi tampi jong kathat e. Kagam u hi thinglhang ko-chong ahina kalval’in gam gimnei, si-gimnei atam in, Thilha Sangah jong atam e. Hitichun Thinglhang mi akihi jeh chun Bu-lei kalhou un, louva kageh jiuvin, natoh on-kah leh gam kaleng ji’e.
Kakho kom u, gamlha lou munkhat a hin Bol, twi kiveina lentah khat aumin, hichelai Bol a chun nga lentah tah jong aumin, chulen nipi lai leh hiche Bol a chun Sajuh ho aum jiuvin, jan leh kaga kap jiuve. Keiho neolai chun hiche Bol a chun Chapang kichepna Ball anaum jih kaga kilah jiuve. Chule chapang kichepna adang dang jong anaum jin kakilah jiuve. Kakho uva kona gamlha lou ahijeh chun jan leh mi husan, chapang ka-gin ho jong akija ji’e. Hiche Bol a jan leh Sajuh kap a kache seh u leh jan kamang in nungah khat kamu ji’e. Chuleh hiche Bol kom lah a chun JANLAI LENGNU(pahcha) akeh dimset e.
Chuleh kakho-gal uva kol khat aumin “Khoi kol” kati jiuve. Ajeh chu hiche kol a hi Khoipi ho cheng ji ahin, Nipi lai April, May tilah, mong-se lai leh khoiju kala jiuvin, litre in kisim leh litre. 70/80, ho kaladoh jiuve. Hiche kol chu asan a sang ahin, achung lang’a chun gam lentah aumin, hiche gam a chun gamgeh/gamleng in kache jiuve.
2017 kum a kalou lho nau chu hiche khoi kol toh chun kigalsei ahi. Agal lou kalho jeh u chun nikhat mong-se lai hin khoiju la dingin kakigong tauvin, khosung pasal jouse mi 25, tobang khoi la ding chun kache uve. Khoi la ding ihi leh het ding khat chu khoi lah pet a ikhot-jung a khoiju anat ho khu kiducha lheh jong leh ileiya kileh ngeilou ahi. Khosung tehse konkhat chun kamang anop poi, tin kache diu eijahda uvin, ahinlah kakigong tei teiyuvin, kache tei teiyuve.
Amun kalhung tauvin, apoimo ding ijakai kakisuhtup jou un anuoiya lhumpi kadeng uvin, akhu thei ding thing-boh, thing-na ahing ho meiya chun kahal uve. Meikhu in khoipi ho umna alhut phat leh khoipi ho khu lengdoh jiuva chutah le aju ho kila ji ahi. Kol chung langa konin Jou-tengngat agui asaova sao ho kajop uvin, kol a chun kahin lhung lha uvin, khoiju lading mihangsan jep jep ho chu hiche khaova chu hung kijut lha uva, khaova chu kikhai uva khoiphang, khoiju umna ho chu chemcha a ahin at-lhah jiuva, hitia chu genthei tah a khoiju hung kiladoh ji ahi.
Hitichun anuoi langa khoiju, khoiphang ho khol tup ding leh mei-teh ding chuleh achung langa kon a khaova hung kijutlha a khoiju hin lalha ding kahung kihom toh tauvin, kahung kipan tauvin ahi. Kamadon cheh in kakiseimo uvin ahile kalah uva golhang mi ni, ima hethem lou teni chun khoiju akhot-jung’a nat ho chu ana leh kha lhontan ahi. Adangho chun kahe pha pouvin, lungmongsel in kabol diu ho chu kakibol uve. Chomkhat jouvin achung langa kon’a khaova hung kijutlha ho chu khoipi in aha-pe val tauvin, pansatna ahitheilou phat in chung langa kaldoh ding agot laitah uvin chung langa khao akhi nau ahung kilham in, abon un kol a kon chun ahung khelha tauvin, apet pet in mi thum abeitan ahi.
Chuphat in kakhoi lah u jong don talouvin, athi ho thum chu akin theipen in kahin kipoh uvin inlam kahinjon tauvin ahi. Lam gamlha ahijeh chun lampi’a kakhojing tauvin, hitichun jan nidan 9.00pm vel’in khosung kalhung nah nah uve. Khosung kalhung tauvin ahile khosung chu kana le maona athong leu tan ahi. Inn lhom, mi lhom kahijeh u chun mi thum in thakhat a eidalhah phat un athomhao lheh jenge.
Phat le ni jong achal in Chang-tu jong akichai tan, gamlen phat, gamge phat ahung hikit tai. Kum dang’a jong ana kibol ngei ahijeh chun Chang-tu kichaiyin gamgeh dingin kahung kigong kit tauvin ahi.
Banjomkit ding.
©️2020, Lelen Kipgen, All Right’s Reserved
