JANLAI LENGNU
–Lelen Kipgen
(7629033890)
(Part-II)
“Thilha nungah toh kilungset thusim”
Kum dang’a jong ana kibol ngei ahijeh chun Chang-tu kichaiyin gamgeh dingin kahung kigong kit tauvin ahi. Gamleng thei, Sakap thei cheh pasal get(8) kakigong un, Gamlang kajon tauve. Nilhah lam nidan 2.00pm vel’in kagena diu mun kagalhung tauvin, gena ding mun ho kakisuhtup un ahile gamlen phat jong alhing peitan ahi.
Munkhat a hin Si lentah khat aumin hiche Si-twi chu jan leh Sajuh, Sakhi hon aneh jiu ahi. Keihon jong hiche Si chang ding chu kakigong uvin camp mun ah bu hon ding mi ni kadalha uvin, Si umna lang chu kajon tauvin ahi. Amun kalhun un Si chu len ahijeh chun amun mun ah kahung kihom khen uvin, kigamlhat thim thim in panmun kahung kihom tauvin ahi. Keijong thingphung khat a kakaldoh in, touna ding anom laitah khat a katouvin, Sa kahin chang tan ahi.
Kho la jing pei ding ahitan ahinlah Sa husan imacha akija tapon, gamnuoi chu athepchet tan, kaloiho beh in Sa ahin kap diu ham, tin meithal gin kangaiyin, ahinlah meithal gin monh mong akija tapon ahi. Kho jong ajing tan, itih leh Sa ahung dem, tin kiging geh chan kaumin ahile jan nidan 7.00pm vel hin Sa husan kahin ja pantai. Katouna sah lang’ah Sa hung tobang in ahung poh the thu jin, kenjong kakom ahin phah phah leh kap jeng ding, tin meithal doisa’n kachang pang in, ahinlah kakom ahung lhun teng troch light a kakho ji leh imacha anaum ji tapon ahi.
Hiti chun abang leh sahlang ah kaja jin, abang leh katouna nuoilanga kaja jin, hitia aum phat chun kahung kichatan, kaluchang Ah-bom te apha jeng e. Loi le golho koma che ding chula ma val nalai, kasuhboi nom lou jeh u chun kicha pum pumin katou tan ahi. Chomkhat setpi hita kaum jou chun husan jong athep tan, lungmongselin kaumin ahile chomkhat jouvin kanung lang ahung vot jen jen in kamulou vang’a thilkhat um ahichu kahe tai. vetlou je la aumpon, kicha pum pumin kakile heiyin, troch light kagah meh vah leh kanung laitah a chun sambah thethu in anatouve. Amai avui cheh chuh in amitchang lentah tah aphan, ahatu saotah tah apha e. Chuphat in kakicha val’in hapen a pen ding kati jong le ka-O asoh tapon, katouna thing chung’a kona kumlhah a jam ding kati le katichung achah den in kakheh lhah tho tan, thing chung’a kona kakheh chu kahe in tol kachuh chu kahe tapon ahi.
Kakhangmang tobang, katah tobangin JANLAI LENGNU(pahcha) nam kaja in kahung khah doh leh Phoi-nel hing sit-set chunga kana ihmu in, kaumna mun chu mun nomtah khat anahiye. JANLAI LENGNU akeh dimset in, apah hoi leh anam tuina chun kalung alhaisah lheh e. Ahsi ho naicha’n akimu in, ganhing neocha cha vah lep lep in aleng un avet hoi thei lheh jenge. Kathou doh in kipah tah in Pahcha ho le mun nomtah tah ho chu kave le len ahile lunghel tah a laa kisah gin khat kaja’n, kanai pheiyin ahile nungah melhoi tah khat anahin, phatah a kavet le Bol a Sa-chang a kache phat leh jan kamang’a kamu ji nungahnu chu anahiye. Pahcha leiya chun avah len, apah hoi ho chu alouvin, lunghel tah in ana maove.
Alasah chu:
“Kajet kavei pahcha namkim pah hen, Kanei kagou, Sana Dangka let jeng jong leh; Lenpi ding beiyin kei selung mong jou lou.”
Hiti chun lung ngui tah in ana maove. Adong hoiselin, asam asaovin, amelhoina leh aumchan, amaiso ngui heu heu chun kalungsung Pat-pon bang asunem e. Guhthim in aumchan kave’n, amelhoina chun hetman louvin lungsetna hongsung’a eilhahlut sah tai.
Chomkhat jouvin munkhat a atouvin, kenjong eimulou ham tin guhthim in kave jinge. Chu in “Ugou, hung touvo” atin ahile kakin jap jenge. Eihet lou ham kiti einahet dan ahiye. Keijong jahcha thim tah in akom a kagatou tan ahi.
NUNGAHNU: “Ugou, neikichat lou ham?”
KEIMA: “Ibola kakichat ding ham? nang koma kaum le kalung among e. Nao, namin ipi ham? kei min iti nahet ham?”
NUNGAHNU: “Ugou, nangin neihet lou vanga sot a kahet nahite. Ken min kanei poi. Nangin neikou kouna chu kamin hitante”
KEIMA: “O, ken kakou kouna namin ahi ding le… Naumna muntin ah JANLAI LENGNU pahcha jong aum jingin, namin jong JANLAI LENGNU, hitante”
Hitia chu amin kasem peh le ama jong anuiyin, hitichun kakihoulim lim lhon e. Chomkhat jouvin,
JANLAI LENGNU: “Ugou, mol le lhang ho hi anom lheh e na? Ahivangin kei changin kamong jou poi”
KEIMA: “Nao, tuni a kona keitoh I-umkhom ding ahitai. Kei nang toh umkhom bou kanom e”
JANLAI LENGNU: “Ugou, keijong kanom e, ahinlah eini umkhomna ding hahsa’n te. Ugou, nungche tan, naloihon nangahlel uve. Tukal hichelai Si ah chun Sa ana nung chan kit tahih un. Tujan jong kei umhih leng nakiboi diu ahitai. Chen lang tujan maman inlam jon tauvin. Lungmongselin che uvin lang kicha hih un, ken naveng nauving kate.”
Athusei chu kalung adong lheh jenge. Ken ipiti kati ham jong kana kihetphah lou ahitai. Chu in “namit singin” eitin, kamit kasin a kahung khah doh le ka-camp uva kana lum in, kakom ah kaloiho lunggim tah in anatou uve. “Ipi kati ham?” tia kagolho kadoh le “Khojin nung chun nang umna lang’ah chun numei khat kaa gin kaja uvin, abangkah leh anui-gin kaja jiuve. Jansot langa nang nahung lou phat a kahung vet u leh natouna thingphung nuoiya kho helouvin nana umin, chuphat a camp langa kanapoh u nahitai” tin eidonbut uvin, kenjong kathilto ho abonchan kahin geldoh tan, kati aja lheh jenge.
Chu phat in kenjong “kigong uvin, tu ma ma a inlang i-che lou u leh boiding ahitai” katileh kaloiho chu alungdong lhen un, kenjong kathilto ho kaseidoh chom poi. Kasei seiphat chun ahung kigong uvin, ajan jan in inlam kahinjon tauvin ahi. Inlam kajot lang uvin lam lhungin JANLAI LENGNU nam kaja lhung keiyuve. Kaloiho chu alungdong keiyun, ahinlah kaseidoh chom pon ka-imm chahkheh tan ahi. Aumdan chu lamlhung keiya hiche nungahnu chun eilhonpiu dan ahi.
Hiche ni’a kipat chun jan kamang seh leh nungahnu chu ahung kilah jingin, Mihem ahilou jong henasa san amelhoina chun eilhim ngol in, guhthim in kahin lungset, kahin ngaidoh tan ahi. Jan teng kakom kavel’a Janlai Lengnu ahung nam teng kakoma aume, ti kahe thei ji’e.
Jankhat hi ka-ihmut konin ka room sung chu Janlai Lengnu anamin, kakom ah aum’e ti kahe peitan ahi. Hitichun ka-ihmu tan ahile jan kamangin ahung kilah peitai. Kakho kom uva Bol a chun kaum lhonin, songpi chung khat a katou lhonin kakihoulim lim lhon e. Chomkhat jouvin “Ugou, kakho-u namu nom em?” tin eidongin, kenjong “henge kamu nom e, che hite” katin ahile “namit singin lang kicha hih in” eitin, kamit kasingin ahile katouna lhon Songpi chunga kon chun twi lah a chun eikailha in, kahung hadoh leh khopi nomtah khat anahiye.
Hiche khopi chu anopdan Mihem chenna khopi ho toh akilou pon, Cartoon film a khopi lah toh khun akilou thim e. Khopi sunga chun eitih a kamukhah lou, vetnom kidang tah tah ajat jat aumin, hicheho chun khopi sung chu ajemhoi lheh jeng’e. Keini jong khopi lamlen dunga chun kavah le lhonin, muntin kavetnom ngen ahin kakihei le le jenge. Chu in “Ugou, keiho kho hi nom nasah em?” eitin “henge, anom mong mong’e. Hitobang khopi nom hi kamu kha naipoi” kati le einuisat in “hungin, mun dang jong navetsah inge” eitin kakijot phei kit lhontan ahi.
Kachena lhon jouse’a chun alen aneovin lungdong tah in eive jiuvin, kiphatlam nan kadim e. Aumdan chu Mihem amaho khopi sunga gavahlut kahijeh a chu “ipi ahung bol ahidem?” tia lungdong tah a eivet jiu hiding dan ahi.
Banjomkit ding.
©2020, Lelen Kipgen, All Right’s Reserved
