Lelen Kipgen. 762903389
Hitichun jingkal an kaneh jou uvin, mol leh lhang kaldingin kakigong taovin ahi. Kaponbuh hou, kajanpon hou, chule kaneh kachah hou chu poh dingin kahin kigut taovin kahung kipatdoh taovin ahi. Keichu meithal choi kahijeh chun amasang pen’a kahungin, kanunga Nagaho golhang khat ahungin ama jong chun meithal achoiyin ahi. Chule gam maps, khat lekha’a kijih khat jong kakipoh uvin, Hiche maps dungjui chun Dingpi Lhang kahung kaltaovin ahi. Agam anom lheh jengin, amol alhang akichoi seuseuvin, hui athengin, Ju ham Vaham angei theiyin, anomlheh jengin ahi. Hitichun kahung kalkal taovin, mol leh lhang kahinjot taovin ahile gamgil, gammang lah kahinpha taovin, Lhokhuni, Saikhuni lentah tah holeh gimneitah tah ho ahung kimu pantan, kaloiho adangho chu khohepha louvin aumuvin ahinlah kei leh Nagaho golhang khat kanunga hungpa toh chun kakiveto lhonin, kakihou lhonlou vangchun kakichat, kalungneo lhonchu seilouvin jong kakiheto thei jeng lhonin ahi. Saothim khat kache jou uvin keijong ka kichat thim phat chun kagolpa Nagapa koma chun, “golpa, kei kalel valtai nang chomkhat hung masan,” tin kaseitan ahile amajong anom tan ahung masa tan ahi. Chuin kajah a, “golpa, hiche Dingpi Lhang thusim kiseiji hohi najah khah em?” tin eihin dongin, ken jong “henge kajakha e,” hitichun kakihoulim lim lhonin, nom nomin kache che lhonin ahile munkhat kalhunguvin, hiche mun chu patlah ahin, amun muna chun tui aveiyin, Songpi lentah tah ho aumin chule sun chang nui ahivang chun gamnui lah a chun nisa akimu pha pon athim let lut jengin lungneo aumlheh jengin ahi. Hitichun ama amasan kei anungah lam li, lam nga tabang’a kigamlhat in kachen ahi. Saothim khat kache jou uvin kagolpa Nagapa chu ahung peng jah jengtan ahung nung lhuh in chat thei louvin atouden tan, chuphat in ken jong kadellut in kaven ahile amasanga chun Sam(Gulpi) lentah khat anaumin, alu ahin phong kangin keiho lang ahinven ahile fit sagi, fit get langin akikhang jouvin ahi. Chuphat in ken jong kagolpa chu ka kaidoh in, “Housa,housa, nathat ding naman dinga hung kahipove, lam nei ot-un.” tin kaseiyin ahile achatloh chom pon, aum bep chun aumin ahi. Chuphat in keihon jong lam chomin kahin peldoh uvin kahin dalha taovin ahi. Kagolpa Nagapa chu amasat ngamlou phat chun, nop le da thu umlouvin kahung masakit tan ahi. Hichi Sam(Gulpi) kahin mu uva kipat chun kaloi adangho jong chu ahung kicha pan taovin ahi. Hitichun kiging geh chan lam kahin jot kit taovin ahi. Chomkhat jouvin hiche pat lah, tui kivei nalah chu kahin khokhel taovin, lhang khat’a hin kahung kal taovin ahi. Munkhat khat a chun thing chungah Jongte, Ngaote, Guldute anaum jiuvin. Munkhat khat kit ma achun, thingleh sang tah tah chung langa Vaphol, Vakul, Vahai, Langkeh, anaum jin ahoithei lheh in vetnom aum thei lheh jin ahi. Chule gamnui lah a chun Sajuh, Sasan(Pilkai), Sagol Ngalchang, Sakhi, anaum jin lim kachuti kap kap jengtan ahi. Munkhat a hin Sakhi, achal lentah khat anaum in ken jong kagolpa Nagapa jah achun, “golpa, hiche Sakhi khu hinkap o, nilhah me dingin kipoh uhite,” katin aman jong ahinkap in ahile amuna chun akijam leiyin, chuin amal teni leh adah teni chu nilhah me dingin kahin kipoh taovin ahi. Hitichun sao thim khat kahin jot doh jou uvin munkhat’a hin Mihem khuni tabang alet’a len khat hi anaum tan, hoitah in kaven ahile Lhomi khuni ahiding chu kahe tan, kalungthim a chun, “oh… Dingpi Thusim a kisei jing, Lhomi kiti hi atah hiding dan ahi.” tin kagelin Dingpi thusim kisei kana jah ji ho chu thusim mei mei hilouva atah ahi ding kaginmo cheh cheh phat chun kichat nan kadimin, kalung aneo lheh jeng tan ahi. Hiche Lhomi khuni chu kaloiho chun aveuvin, “Mihem khuni dingin alen lheh jenge,” atiuvin lungdong tah in aveuvin ahi. Amaho chun Lhomi khuni ahiding chu ahet louvu ahi. Ahinlah ken kahet vangchun kagolho kaseipeh tapoi, ajeh chu Lhomi khuni ahi chu heuleh akichat val ding jeh uva kaseidoh lou ahi. Ahinlah Nagapa chun ahen, aman jong aseidoh chom pon ahi. Chuin hiche laimun chu kahin dalha kit taovin, lhangvum langah kahung kaldoh taovin ahi. Munkhat’a hin munjang neo khat aumin, akom achun Vacha neo khat alongin ahi. Nilhah lam ahiphat in hiche munjanglaiya chun jan gena ding ngahmun kahin kisem taovin ahi. Kloite adang dang ho chu ngahmun sem nading thingtoi asat uvin, abang chun meiya teding thingo ahol uvin ahi. Kei leh kol(Burmese) ho khat in ka Sakhi sa poh uchu nilhah me dingin Vacha neo, tuilonna achun kasem lhonin ahi. Tehseho thusei khat, “Gam ge teng leh thingo, thinghing aleh langa patin akikai ngei poi,” kiti khat kana jakhan, ahinlah kaloiho ponbuh son nading thingtoi satho, tiding thingo hol hochu kaseipeh manghil khatan, athing sat hou aleh lang, abul lang khan louvin ahin kai taovin ahi. Hitichun bu kakihon uvin, jan choldo nading ponbuh kakison uvin, kiseimo tah in kaum uvin ahile chom lou kah in Nisa ahung lhumtan ahi. Hitichun an kaneuvin, kho jong ajing kigutan ahi. Chuin kaloiho pasal khat kem neokhat, kasem chung uva chun adingdoh in atuhsan ahile kagal lhang uva chun mikhat ahung tuhsan ahi. Chuphat in kaumna cheh uva chun aham johsang umlouvin thipchet in kakiveto taovin ahi. Hitichun kaloipau chu atuhsa kit in ahile ahin donbut kit in ka camp nuilangu nai thimin ahung tuhsa tan ahi. Chuphat in ken jong, “ibola chu atuh a tuhsa nahim? ngadoh in,gamnuiya nilhum konin akituhsa ngeipoi,” tin kaphoh in ahile aman jong anga tan ahi. Kho jong ajingtan munkhat ahin lhumpi kadeng uvin, akoma chun atou loi, akijam loi, akitot loi hitichun nomsatah in kaum uvin ahi. kei chu munkhat a kakijam in Beer(Diabloo) kadon in chunga, chung Chollha leh Ahsi hochu kaven, kakom a chun kadongmanu Jenny atouvin kakihoulim lim lhonin ahi. Chomkhat jouvin ka Camp nuilang uva chu thilkhat um tabangin kahe jing keiyin, kalung atheh jeh chun kakiheiyin kaven ahile thingphung bul khat ahin mikhat bah thethu’a adin chu kamutan, theoboh in ale jeh chun akimu chen theipon, chuphat in kakithoudoh in kaven ahile anaum kit tapon ahi. Chuin Jenny in, “heu Len, ipi navet ham, ipi namu ham?” ahintin ahile kahung kinjap jengin ahi. Jenny in, “ipi namu ham?” tia eichutidoh vangchun kaseidoh nom pon, thilchom chomin kalep in ahi. Jan asot tan keiho jong emu dingin kaponbuh cheh kajon taovin ahi. Hitichun ka emu taovin ahile kagal lhang uva chun Saite(elephant) alha uvin, gamlhatah ahi vangchun ahusan hou chu naichan akijan ahi. Jan nidan som le ni velhin ka-Camp chung lah uvachun Lho(Humpi) ahung ham tan ahile kabon chaovin kakin khang soh taovin ahi. Chuphat in ken jong troch light leh ka-meithal kakimat in kathou dohtan ahi. Kaloiho jong ahung thoudoh uvin, chuin lhumpi kadeng uvin kichatah in kaum taovin ahi. Chomkhat jouvin ahung ham kitin ahile Camp nuilang ahitan ahi. Ahamgin chu aging demdumin, leitho akithing liuvin, agimnei lheh jengin ahi. Abang komleh kaumnao ahinpha deh dehjin, akimu khah le kap jeng ding tin, troch light in kakho lele jin ahinlah akimu chompon ahi. Hitichun emu louvin kakhovah taovin ahi. Jingkalin bu kakihon uvin, jan emulou kahijeh uchun kalelthei lheh jeng uvin ahi. Camp chonlou ding jong kagelthei povin, kaloiho chun munchom a kichon ding atiuvin, ahinlah ken vang kagelthei pon, “munchom a i-chegamlhat sang uvin kinungle taohite,” tin kaseiyin ahile anom kitpovin ahi. Chuphat in kathil hou kakigut uvin, kahung kipat dohkit taovin ahi. Hitichun kahung kit taovin ahile go ajutan, mei ajingin, mol le lhang ema akimuthei tapon ahi. Saothim khat kahin jotdoh jou uvin go jong ahat cheh cheh jengtan, keiho jong kalhop jou taovin kakhu’u asih gamtan, Chuphat in munkhat ahin mei katih uvin ka kisanglum taovin ahi. Go jong aphatdom lou phat chun ponbuh kakison uvin kaumden taovin ahi. Nilhah lang ahiphat in bu kakihon uvin, kane taovin ahile chomlou kah in kho jong ajing peitan ahi. Go ahajuh beh jeh chun bolding jong aumpon ka emutaovin ahi. Janlhah hah khovah kahijeh uvin kalel thei lheh uvin, kei jong chom lou kah in kana emulhu peitan ahi. Jan lang hin mang kaneiyin, kamanga chun golhang asamsao mi ni ka Camp uva ahung lhonin, kalupna kom a ahung ding lhonin kajah a, “tujan ma ma a hiche gam hi nadalhah diu ahi.” tin eihung seipeh lhonin ahile kahung kinkhangin ahi. Kamang chu kagel le dihthei kasa tapon chuphat in kaloiho kathoudoh in kamang chu kaseitan ahile eitahsan tapouvin ahi. Banjom kitding. ©2020, Lelen Kipgen, All rights reserved.
