Home Gogou Chongloi JALAI HANG LE TINGNEM-I

JALAI HANG LE TINGNEM-I

205
0
JALAI HANG LE TINGNEM
JALAI HANG LE TINGNEM

HINKHO THUSIM

πš†πš›πš’πšπšπšŽπš— π™±πš’- π™Άπš˜πšπš˜πšž π™²πš‘πš˜πš—πšπš•πš˜πš’
(7219368064)

Arranged: Naocy Haokip

Masang laihin gollhang jalaihang kiti khat ana ummin ahi. Amahi aneo lai in anu’n ana thisan tan ahi.

Tun zalaihang kitipa chu Ipi ti apenna anu’n ana dalhah ham?? hiche chu ana simma sa tadiu hite.

Zalaihang hi apa min kholkon ahin ahi. Kholkon hi agollhan laijin mimel hoitah jong ana hi in chule atahsa jong alen in atha jonk ahat in nungah amujouse in adeicha lou ana umpon ahi.

Kholkon hi insung genthei te ana hijehchun nungah tampin deilheh jonk le haole vai kivetna khang ahijeh chun a insung genthei jeh in koiman ana deipon ahi.

Kholkon jong vangset umtah in apenna anu chun ana thisan kittan hinlah anu athiding konlam chun achapa kholkon chu akouvin hitin aseitan ahi.

KHOLKON NU: BOI…… Nanu hi tahsa damjou talou ding kahitan kahin da lhah nung tengle napa hi nahin genthei sahlou helding ahi. Chule nungah dang ana kipui hih beh in napute chanu nenglhing toh khun nahung kichending ahi. Kaseihi nabol louva najui louleh kathi nungteng jong le kalha lungdam louding ahi. Tin, aseipeh in achapa kholkon chu amasang a kitepna aneisah in Kholkon injong anu’n aseibang in kitepna anei in kitepna aneijou vin anu jong ahainahu atan in ahinkho ana beitan ahi.

Kholkon jong anu’n ahin dalhah nung in apa toh genthei tah in ahung kivah lhontan ahi. Nikhat chu kholkon injong ama insung genthei hahsat danchu avetle ji aneilou le aboina ding tampi amuphat in apute chanu Nenglhing chu ajiding in aga kipuitan ahi.

Hichun kholkon le Nenglhing jong ahung kicheng lhon in insung inchen ahin semkhom pan lhontan ahile kumkhat jouhin Nenglhing chun chapa zalaihang chu ahin neitan ahi. Hinlah vangset umtah in zalaihang chu apenjou chun anu chun naoso natna thoh joulou vin thina chan geiyin aumtan zalaihang injong anumel amuman tapon anu Nenglhing injong achapa zalaihang meljong ana muman tapon ahi.

Zalaihang jong a nun ahin dalhah jounung in apato aputo ahung kivah taovin ahi. Kholkon injong achapa zalaihang chu asenneo a kipat in genthei tah in ahin sinjing in ahile phat chedung juijin zalaihang injong kum gup(6-years) ahung hitan ahi.

Zalaihang in kum-6years) ahinphahchun apa kholkon in jong achennao kho achun jol ahin saitan chomkhat jouvin kholkon injong jithah ahin neiyin Lhaikim kiti nuto chun ahung kicheng kitlhontan ahi.

Lhaikim injong achapa zalaihang chu ahin lungset lheh jeng in athisan ataigui a peng ahilou vang in lungset najouse in ahin lungset in ataigui ya peng achapa bang in agel in ahin lungset lheh jeng in ahi.

Phat ahung chejing in nikhat chu [email protected] Hangpu chu apa kholkon in ajinu lhaikim chung’a alunghan na khatjeh in achapa zalaihang chung’a achu in achapa zalaihang chu avotan ahile ajinu lhaikim in aphoh in kei chung’a nalunghan jongle Ipi dia nachapa chung’a nachuh ham? Kei chung’a nachuh ding ahi tin akina lhontan ahi. Phat ache jing in kholkon injong alunghan komkom tengle achapa zalaihang chung’a achuji in ajinu lhaikim masang chun avojing tan ahile ajona in lhaikim lungthim ahung setan achapa zalaithang chu ahin muda pantan ahi. Langkhat a lhaikim injong chapa pasal khat ahin neikittan ahile lhaikim injong tunvang ka genthei hesohna akile theitai atin zalaihang chu amuda cheh kittan ahi.

Hiche nikho a kipatchun phatsehle zalaihang mitmo nading ahollin nilhah phatle ajipa kholkon ahung vailhun phatle zalaihang phatmo nathu aseiyi in ahehse jingtan ahi. Lhaikim injong ajipa kholkon komma zalaihang phat modan ahehset jing phatchun lholkon injong ajinu lhaikim thusei atahsan jeh in thu ima kholtoh louvin achapa chu avojing tan ahi.

Kholkon injong achapa Hangpu ahin vohjou phatle lhaikim chun hangpu ngailu lheh bang kisa in onem hiu chan napa in naphatding adeijitna navoh ji ahin abanle kichih theiyin tin lungset tahle laina tah bangkhun thu aseiji in hinlah guhthim in akipahji lheh in ahi.

Phat ahung chejing in hangpu jong chapangcha ahijeng vang in anu lhaikim in alungset loudan amittah in ahesoh keitan athepmo nalou thu umho chu apa komma asei jongle apa kholkon in atahsanpon ajinu lhaikim thusei atahsan jehchun avojing in zalaihang chu an anehjong leh kipah tah a nehsang in phatseh le mitlhi longpum in an ane jingtan ahi.

Zalaihang jong akumle alha in tohjou lou laiyin gamgil thinglhang lei gamlha tahtah in sunni alhum+ in na atongjin hitichun genthei tah in hinkho ahin mangtan ahi.

Langkhat a hangpu jong athepmo na ima aumlou jong apupa in ahesoh keiyin apupa chun achapa kholkon kom in ajinu lhaikim lungthim phatlou chu aseiyin ahile kholkon injong apa chu asenthip in nang tehse ima helou Kithip in tin alunghangtan ahi. Hitia aseiji teng chuleh zalaihang pupa injong ima seibe louvin athipji tan ahi.

Zallaihang leh anu lhaikim sunga peng anaopa onkho jong lekha simthei ahung hikit lhontan ahile lhaikim chun ajipa kholkon kom in nachapa teni hi khat pen+ hi na tohsah hitin khatjo hi lekha simsah hite achuti louleh insung genthei ihiu vin anilhon in kison jouponte tin aseitan ahi.

Hitia lhaikim in aseiphatchun ajipa kholkon injong lhaikim kom in aile Ipi ilo ditam koipenhi lekha isim sah ding ham? Tin lhaikim chu adongtan ahile lhaikim injong nachapa aneojo pa lekha simsah hite ajehchu nacha ahithou thou in alenjopa hi natohjong athem jon ahi atitan ahile kholkon injong ajinu thu seichu dih asa in achapa lhon onkho chu lekha asimsah lhon in achapa zalaihang chu niso seh in na atohsah lhontan ahi.

Phat ache jing in hangpu chun genthei tah a na ahintoh phatchun anatoh alalpi jehchun atahsa jengjong khangthei louvin aumlo tan aloi agol jouse la nikhan in akhang jeng un hangpu vang atahsa in anatoh alalpi jehchun aloi agol ho khan bang in akhang joupon ahi. Langkhat a hichan geiya hangpu injong genthei na athoh chu apu pa’n ave jou mong+ tapon khatvei chu kholkon kom in nachapa hi jenna thei in jen inlang lungset in ngailu in nachapa hi natha lih paiding ahitai tin aseitan ahile thu kiseichu kholkon injong ajah jahchun alunghang paijin kachapa ka ngailut hila hiche kalla epi ti ngailu hen lungset hen nati ham?? Tin,” apa komma alunghang in akinah lo lhontan ahi.

Nikhat lhaikim in ajipa jah in nachapa zalaihang hi nathah dohlou le eini iki khending ka Inna kaki nungle ditai tin thulhuh na asemtan ahi. Hitia lhaikim in thulhuh na asem phatchun hiche thu aseini jan chun kholkon jong jankho sot nung injong akigel lha thei tapon ajo jo nan achapa chu thah doh ding in agellin thahdoh ding tia agel kit jongle thahdoh nading ahe kitpon ajo nachun aphat phat in po tante tin akigel lhatan ahi.

Jingkho ahung vah phat in kholkon jong matah in akithouvin an ahon in achapa athah doh ding ahitah jehchun achapa nehding in sa me ahon in aminphat in achapa athoudoh in anehva set sah in zalaihang pupa le lhaikim kitho masang in kholkon in achapa zalaihang chu gam a ding in ahin puidoh tan ahi.

Hitichun amani pacha jong gamgil ahin phalhon tan gamgil sungchu athipjinjen in lunghel nan adim in kholkon injong aji masanu zalaihang penna ajinu agel doh in ajotna lampi chun alhisoh peh jeng in achapa jong athah doh ding ahikit jehchun ajinu masanu puldou pumle achapa hinglai puldou in mitlhi long chut2 in achapa tochun gammang sung ahin jotpeh lhontan ahi.

Phat sotpi ahung lhon jouhin amani jong alamjot nalhon alal lhontan zalaihang injong apa jah in hepa kachol vartai kichol hite tin ahin seitan ahile apa injong boi hung in kichol hite nachol vartai tin thingphung bul limnoi khat a achapa aphei akikhap sah in a angsunga akichol sahtan ahi.

Chomkhat jouvin zalaihang jong apa phei kikhap pum in ana imu lhutan ahi. Zalaihang imut lhuh nung in kholkon injong achapa’n aphei akikhapchu kangchan aladoh in thingtum khat akikhap sah in gammang noija chun achapa zalaihang chu ahin dalha den in ama inlang a ahung kile tan ahi.

Kholkon potdoh jou nung in zalaihang jong ahungkhangtan ahile apa phei akikhap chu apa pheichung hita louvin thingtum ana hitan apa mel amuta pon hiphatchun adingdoh in apa ahin koupan tan ahi.

Zalaihang injong jetle vei alhah in apa hinkou pantan hepa, hepa, tin akoutan ahile hoijo boi…..tia ahouding koima aumtapon ahi. Hiche phatchun zalaihang injong apan adalhah ahichu ahin kihettan hichun suhna dingpen helou in gamsa bang in angat ngat nalang jon in ahungtan ahile munkhat laihin apa to ahungna lhon na leiset nemlai achotna lhon amani keng nung ahin mudoh tan hichun apa to ahungna keng nungchu ahin juitan ahile khatvei leh leitah lai ahin phah tengle keng nung ahin juichu amuji tapon aman keng nung ajui chu aman phat tengle maban achetheiji tapon chuteng Chule amadon don in avah kit jitan ahi.

Chomkhat jou leh apa to ahungna lhon kengnung ahin mudoh phatle amani hung na keng nung chu ahin juikit ji in hiti chun genthei tah in ahung hung leh anu toh amaho louva ana konna lhon louchu ahin sudoh tan ahile ahin hetdoh phatchun akipah varlin lounoija chun alhi akitheh den jeng in ahi.

Hiche phatchun lampi ahin hethei tan aman jong inlam chena lampi chun ahung in inlang ahin jontan ahile jan muthim noijin nahchang sallin in aga lhungtan ahile in aga lut masang in anuno nu lhaikim chun ana mudoh masa kittan ahi.

Ajipa jah in nachapa thah doh naseiyin aile epi atile in hunglhung kit ham tin ajipa to akina kit lhontan ahi.

Chomkhat jouvin zalaihang jong insung ahunglut tan ahile an ana nehpet u aga tohkha tan apa amu muchun apa jah in zalaihang injong hepa Ipi dia gammang noija eida lhah jengham? Tin akiphintan ahi. Zalaihang in hitia thu aseivang chun amahi inna kon thahdoh dinga apui lam chu akihet loujeh ahi. Hichun zalaihang injong an ane in alal var jehchun akichol paitan ahi.

Jan ahiphat in kholkon to lhaikim akina kit lhontan ahi. Jing mama leh athah doh ding in thulhuh na asem kittan ahi. Lhaikim seibang chun jingkho ahung vah phat in kholkon injong achapa zalaihang chu thahdoh ding in ahin puidoh kittan ahi. Ama teni phacha jong gamgil lang jon in ache kitlhon tan ahile khopi sung akhel joulhon chun gamvah hoto akitoh khatan ahi. Hichun khopkon injong gamvah ho lah a alenpen pa komchun kachapa hi nanghon kisin jeng taovin nanghon Kilah jengtaovin tin lamkaipu kokchun kholkon in achapa lungset na beihel in gamvah ho ape doh in ama inlang aki nungle tan ahi.

ZALAIHANG LE TINGNEM thusim Episode (1) akichai tan ahi. Aban jingle na simtao hite.

Thusim hi anom lheh e nati le anoiya “LIKE” button khu meh in writer ho na support nau vin, chule seinom nanei le anoiya comments nahin bolthei u ahi.

Site nalut a notification pop up hung potji ho allowed anabol ji uvo maban a thusim thah ahung ki post teng notice namu ji diu chule Bell button a subscribe kiti chu meh un.

Previous articleITABANG NIKHON NAHIN PHAH DING NAHEPOI
Next articleNULE PA KIPANA CHA I HIO HI NAM?