Home N Lhungdim ITI HAO THEI DING HAM?

ITI HAO THEI DING HAM?

33
0

Haona hi hoi a kon ham?

Asun
N.Lhungdim
Thangting House
Molnom-West

n lhungdim
N-Lhungdim

24th September 2022

Haona kiti jat chom chom aum in, sum le pai a, nei le gou a hao, umchan chondan pha a hao, thudih le thutah a hao, abailam pen a sei ding in Sum in achoh thei a Hao le Sum in achoh theilou a Hao, jat ni in a khen thei ahi. Ahinla, eihon alhangpi a ahao itile sumle pai nei a hao ho khu iseinau ahi.

HAO NA HI HOI A HUNG KON HAM?
Natoh hat, kikhitthem, thepna, chihna neiho chu ahao nom tei uve. Ahinla, mikhat chu natoh hat jongle, kikhitthem hen, chinghen, them jongleh moh hao thei ahideh pon ahi. Chuleh ahaotah ho jong hi ivet leh natoh hat jeh, kikhi them jeh, chih jeh, thep jeh jong ahi khel khel pon ahi. Ahile mikhat chu iti hung haothei ham? Mikhat chu avang ahung kivei toh phatleh hung hao thei ahi kiti le dih dom pen inte. Pathen hou masanga ana hao ho chu Maltong hou ahi ana kiti jin, Maltong jong chu ahouten aneh ding achah ding sathin, salung ahoipeh uleh Maltong chu kipah a vang ahin boh a ahouji dan ahi. Ahinla aphamo tah chu Maltong houho chu ahao sot ji pon ahi. Chom khat joule a ingam uvin abugam ji tauve. Tu a Pathen hou joua hi natoh hat, kikhithem, leh chihna le thepna jong apangpoi tina jong ahipon, mikhat chu ahao ding tengle vang kiti khat ahin nungjui in ahi. Hichu Pathen a kon ahi ti taote.

SUM PHUTLOT A TAMTAH MU VANGSETNA:
Sum mukhalou le neikhalou te dinga sum photlot a tamtah muhi vangphat na sanga vangset na tamtah a um nom ji in ahi. Sum cheng 100 jeng jong nei khalou leh thamkhalou mi chu ipi hamkhat jeh a cheng lakh tamtah mutale ama ding in iti akoi dingle iti aman ding ahe thei tapon khatvei mua lakh tamtah amu chu inchen kisemdohna a anei tah sangin inchen mo nale hindan kisuhmona lentah neina aneithei in ahi.Sum mong mong hi hahsa tah akimu le aphan thachol loule lunggim lou a tamtah mule nei hi kipana sangin hesohna ahin polut bai jon ahi.

HAO AHIVANGA VAICHA:
Mihem sum le pai nei le gou tampi neijongle ama ading beh a jang nomlou le mang nomlou ho chu alangkhat a sei dinga MIVAICHA ahi thou un ahi.Hiche tobang mi hi mun khat khat a aum poi ki ti le kisei khiel ponte.Sum hi jah dinga kisem manchah ahi.Ajang ding lah a amasapen chu aneipa ahilou le aneinu chu ahi. Midang ding a na it jongle nangma ding invang it hih in. Sum hi hol ding imule jah ding ajah toh tho a hol kit ding. Insunga furniture, almirah ho bang a koi ding ahi poi.

HAONA DING THUGUH THUCHENG 6 HO:
English pao in ‘FIND THE NEED AND FILL IT” eiho pao a NGAICHAT CHU HOLDOH IN SUDIM IN. Hiche thucheng gup hi hao na dinga THUGUH ahi. Lunggel hat le chihna thepna nei Mr.Sanford Chreth kiti pa chun pon-cloth kin -shrink -hohi akin lounading thuguh khat ahin holdoh in hichejeh chun ahung haodoh in ahi. Het ding chu masang in Bazar a pon ichohle aman na dinga iman masang in tui a isop leh ana kin in ichoh ni a asao dan chu anahi ji tapon ahi. Ama min akon in pon kin lou nachu ‘SANFORISE’ akitin pon sem -cloth manufacturer jousen angaichat pen u khat ahijeh in ahung hao doh tan ahi. Ama min akon in pon
kin lou na chu ‘SANFORISE’ akiti in hiche ponkin thei lou na tin ahung kihe tan ahi.

Leiset chunga news, magazine minthang TIMES, NEWSWEEK chule India gama dinga INDIA TODAY tobang ho khu kichen chet chet chomkim tah a mikhat in ahet dinga kilom alhing kei a akimu nathei sem doh ho jong hi hao titah beh a hao ahitao in ahi. Adang dang instant masala, disposable glass, BAND AID ti ho jouse hin mi ngaichat ana apohdoh jeh uva hung haodoh ngen ahiuve. Vetsah na din BAND-AID thusim sei ute . Johnson and Johnson brothers kiti pharmaceutical company, baby powder le
chapang ho toh kimat product tamtah semdoh te pohdoh ahi.Johnson brother ho hi ucha 3 ahiuvin amaho chu Robert, James le Edward ahi. Aneo penpa Edward in hiche BAND AID ahin pohdoh a kisuh khah phat le abai a bai a gangtah a tom na ding dettol, bandage leh plaster kigom amaho achom chom a lah khom le ngai lou ahin semdoh hi tuni chan in mi tamtah in aman a aphat chom pi ahi. Nikhat chu Johnson brother ho ji teho lah a khatnu chun kitchen a an ahoun nauva chemcha in akhut aki at khah in hitin ahinsei e ‘iki at khahle kin tah a hama beh ding thi kham na ding le damdoi jong pang khat hi umle kati e” ahin ti le Johnson brother te lah a adong pa Edward chun alung ahin gel a hiche band-aid kiti hi ahin geldoh a ahin sem doh le hiche hi kijen behseh a phatah a ahin joh uleh haona lentah ahin nei u ahi akitin ahi. Hijeh chun ipi hijongle mi ngaichat khat aki hetdoh thei a aki bol le hao ding tina ahi.

HAODING HOL A VAIKON MIKHAT THUSIM:
Masanglai in mikhat in hon lentah khat anei in ahinla a in chengmo Iheh jeng in ahi. Nikhat chu a in a maljin knat ahung lhung in amapa chun a in lhunna pa jah a chun hitin asei in ahi. Gamla tah khat a lhang le Ihang kikah khat a vadung khat along in hiche vadung chun tuili khat a um in hiche tuili kom a neldi lah a chun thil bang lih leh khat aum in hiche chu naga holdoh a namuleh songmantam ahin hiche songmantam chu najoh a nahao ding ahi atin ahi. Hiche jinlhunna neipa chun a in le ahon jouse ajoh in sakol khat akichoh in atoudoh in ahol in akondoh tan ahi. Nisottah ache jou in asum jouse akichai in chukit le atha ahung chol in agil ahung kiel in mun khat a alhu kam in athidoh tan ahi. In lama a inle ahon chopa chun ahon chu loi a akai a alholeh nikhat chu thil tah khat ahin tohkhah phat in ipi hiding ham tin
alaidoh in avet leh thih box khat ahin ahon a avet leh asunga songmantam kivui le kisel khat anahin aga joh leh sum tamtah anei in mihaosa tah khat ahung hitan ahi. Hiche thusim hin asei chu HAONA hi inmun a jong um mo ahipoi tina ahi. Chuleh vang jong angai in ahi. Eiho laha jong vaichat jeha a in alou joh a Israel lam a kichon le pem atam da pon ahi. Masanga Old Gelmol haosapu Pu Jamsem Lhungdim chu hiche case tobang ahi. Ama chu a in chengmo in phailei hoitah anei le a kho chu ajoh in Israel a achedoh tan ahi. Akho chu Pu Sonkhokhai Lhungdim in phunggun chun na in acho in achen chen leh song lah na -quary phatah leh hoitah khat ahung sohdoh in tun song chu joh sen louvin aum in hiche Gelmol kho chu songmantam -Diamond kivui kilaidoh tobang khat ahitan ahi. Achunga thusim kisei bangin Pu Sonkhokhai in akho achoh a chu song lahna phatah le hoitah aume tia ana choh ahipon ahi.

George Horace Lorimar in hitin asei e ‘Sum le sum in achoh thei thil nei hi aphai ahinla akah lah lah le sum in achoh theilou ho jong hi kanei nai ti kivetchil jui jui in.

Sum in achohtheilou lungsetna, hepina, khotona, thudih le nakitahna kiti ho jong hi sum nei angai banga ngaichat ahi.

Articles hi anom lheh e nati le anoiya “LIKE” button khu meh in writer ho na support nau vin, chule seinom nanei le anoiya comments nahin bolthei u ahi.

Site nalut a notification pop up hung potji ho allowed anabol ji uvo maban a thusim thah ahung ki post teng notice namu ji diu chule Bell button a subscribe kiti chu meh un.

Previous articleMI CHUNGCHON KITI HI NAJAHKHAH TAH UVEM?
Next articlePATHENNI THUHIL

LEAVE A REPLY

Please enter your comment!
Please enter your name here