By Shonkhogin Hegin Haokip
Maranatha Cottage Hebron Veng
Phaipijang Langol Imphal West
9774096152
Hichun amaho tijat’a akunchah kheh pet tah un, chuche mini chun ajah uvah, “ Athiho lah a ibol’a ahinga nahol u ham? Ama hikoma aumtapoi, athoudohtai..
Luke.24:5-6
Pakai Jesun ana seibang bangin, nithum lhinin athi a konin ana thoudoh tai. Athodoh ni hin Jerusalem khopi sung chu, Pakai Jesu thodoh thun pumlo in alotan, mijouse kihouna chu hiche thu chu ahijenge akiti. Pathen thu tahsan lou dinga chu lungdon lou thei ahipoi.
Ajeh chu chutabang thusoh chu ana kijakha loulai ahi. Athodoh nia athodoh thu hemasapen holoi chu ahileh Mary Magdalene le aloiho ahiuvin, amaho konin seijuiho kom alhungin, seijuiho a konin aban banin akitahangin, Pakai Jesu thodoh thu chu akithangleu tan ahi akiti. Hitabanga Pakai Jesu hol la lhanmol lang a ahung u chun, vantil nichun, amaho koma chun, Ibola mihing athiho lah nahol uham? Ama hikom aumtapoi, athoudohtai anati pih uve.
Sopiteho, tunin jong mi tamtah hin, I Pathen holdan uhi, phate cha ichihthei lou uleh, athiho laha ahing gahol ho tochun thakhat ihi diu ahi. Thil hi aumna loukhat a hol atia hol kitijong hi phat sumang bep akihibouve.
Hitabangchun, leiset na hin mihemten ingai chat pentah u chu ipiham itileh,chamna, lungmona, kipana, chihna le themna, natohpha neiding, jipha jihoi neiding chuleh haonale nopsahna imajouse ninglhingsetna uma lunglhaisel ding kitihi mihem jouse lunggel ngaito ahicheh e.
Ahinla ingaichat houhi haholla naholleh na mumaithei ahinan, ahivanga enjoy tichu nanopsah pithei louding, Katina chu ajouva iseiju chamna, lungmona, kipana, lunglhaina kitiho chu umlouhel ahi.
I-hamu channa kingaicha cheh cheh ahi bouve. Ipi jeh ham itileh eihon aumna dingdol i-holkhah lou jeh u ahi. Hicheho jouse hi Pakai koma um ahibouve, aumnalou khat iholuva iboichengu hi eiho hetna lhahsamjeh ahibouve.
Pathen jaolouva thilkhat nahol tengleh adih achanga naholthei lou ding, adihlouva phat chomna thil kimuho chun nakipasah thei lou ding ah. Amavang Pakai Jesu chu Kiholdoh masat le chun, naboljouse phat thei bohnale chamna lungmona lunglhaina namutha ding ahi.
Hijeh a chu, Ama sapen in Ama gamle Achonphatna holdoh masan, chujouteng adangse nakipehbe ding ahi kitichu ahi.
Matt.6:33
Pakai Jesu athou dohtai tia amit tah a mu chuleh kiloikhompi mi tamtah aumin, hiche laha amasapen chu, Mary Magdalene ahin, seijuiho jouse ahiuvin, adangdang Jesu athoutai tithu ja a akimupi nom jouse toh ana kimuto uvin, mikhat mini thu hilouvin mi tamtah in athoudoh mongmonge ti phot chetna ananeijuvin ahi.
Hijeh a chu Jesu thokitna chungchang thu a hin lung-opkainading mongmong aumpoi. Ajehchu amahi athodoh jouvahi ni 40 leisetna ana um nalai ahi. Aumkah sunga chun akimupi nomjouse koma Ama anakilah e.
Tuninin jong, angaicha jouse toh kimuto dingin aman ingah jinge, nangin jong kimupi nomna mong mong naneileh aman nahet ahi, nakimupi tei tei ding ahi.
Ajeh chu aman milungthim jouse hesoh musoh ahin, adihtah a ngaicha chu akimusah jin ahi. I.Chro.28:9. Eiho a kona ngaichat chu ahileh Pakai munomna lung thim nei angaije. Pathen in asimho jouse phatthei bohtahen.
Thusimbu Machal jing thei na ding a pan lanom ho kipah tah in lem ahijing in ahi anoiya button “Click Here” khu meh utin details anasim ute.
