By Shonkhogin Hegin Haokip
Maranatha Cottage Hebron Veng
Phaipijang Langol Imphal West
9774096152
Ohe, iti hiya mipi dimset khopi chu Akeohel, ahomkeova kijam hitam ! I-atileh khopi khu meithai bang umdoh hitam, Namtin vaipi lah a aloupi lheh jeng me! Vannoi khopi chujat lah a lengnu chanu tabanga um khopi chu, i-atileh tu a soh hung soh a hitam ?
Ka La. 1:1.
Sopiteho, hiche thuhi lainat umtah Jerusalem khopi thusoh ahi. Jerusalem khopichu Pathen mite chenna khopi chu anahin, ahinla amahochu Pathen mite chonding dol lin ana chonjoupouvin, Pathen in amite themgao thempu hon avel vel in gihna ana pehsah in, nanghon Pathen thupeh nangailou uleh manthahna hung lhung ding ahi tia ana gihgihsa ahi. Ahinla athu ngailou jeh uchun, BC 586 in Babylonten Jerusalem chu ana sumangtan, chuleh amiteho athaotoh, asuhgenthei utoh chuleh adangse chu galhingin ana kai taove. Mipi dimsetna, jule va, uicha ahcha dimsetna khopi aoleng lungpi chu, chomkhat jouvin khopi sung chu JUTHIP VATHIP in athiptai akiti.
Hiche thusoh chu, Jeremiah themgao pun, nasatah in alunghempin, ajehchu Jerusalem khopi chu, melmate Babylon sepaihon khopi chu ahenchah a uva, chubana ain thupilai laiho ahal lhah uva, amite galhinga akaimang chungchang thudol chu achen achai ahetnom jeh chun, aman doctor hon atolthi ho POST MORTEM abolbang uvin ahin bolin, ipi jeh mong mong a hitabang soh hitam tia ahinkhol leh, aman ahin mudohna ahin, athilsoh hi Baby- lonte leh Judate ahivang in Pathen mopohna ajao ve tihi ahin mudohtan. Ahin ama lungboina khat chu, Pathenin iti aphal ding ham tichu anahi. Themgaopa chu alung dong tan, chutilom loma Pathenin amite asuh mang yengding hitam ? Ka La.2:5 a chu Pakai chu melma abang tan,aman Israel aval lhumtai ati.
Chubangtah a Pathenin amite asuh genthei vangin, themgao pun vang Pathen kitahna chu atahsanlel dehpon, hiche a konchun, Jerusalem kisuhmangna jeh pentah hi CHONSET JEH ahi ahin titai. Kala.1:5 na ahin, Pathen chate ho achonset jeh uva kisu gentheiju ahi tihi ahinmu doh tan ahi. Hiche a pat chun 3:32-33 a chun, aman sugim jeng jongleh amihepi themna tamtah jalla chu hepina aneiding ahi ati. Hiche Bible chang a aseihi ahileh chonset jeha kisugim ahijeh in chonset chu akilahdoh tihtih leh kintah a kingai dam a kidamsah ding ahitai tihi ahi.
Sopiteho, Pathenin atumbeh a alhendoh amitehon bon thu angai lou uva ahileh chubanga melse tah tah achung thu u atanleh eihohi ipi a kingai to ihiuvem ? Pathen thupeh ingailou uleh imacha kinepna ding aumpoi. Jeremiah in anadatmo tah khat chu ipiham itileh, Israelte a chonset jeh uva agenthei ju chu adih e, ahinla ibola amaho sanga khohjo tichu chonsejo Babylon hon kichepna a aneiju ham tihi ama boina chu ahin, ahinla Pathenin ama koma ana seichu ipiham itileh, Babylonte aphat le aphat loujeh uva thu ahipoi, keiman molla(ajepna dinga) kanei ahibouve, kaman chah jouphatleh kaheboh a meilhumsunga kalelut thouthou ding ahibouve atiphatna lunglhai nah nah ahi. Jeremiah in Post Mortem abolna a amuchu ahileh chonset jeh ahin, asumangho chu ahileh mol(stick) a kamanchah ahin, kaman jou phatleh ka paimang ding ahitai tihi amudoh ahi. Pathenin asimho jouse hetthem theina eipe taohen.
