Bro. Shonkhogin(Hegin)Haokip.
Maranatha Cottage,
Hebron Veng, Phaipijang,
Langol. 17/04/2020.
Lungset tah in sao jong leh achaina changei ja simdingin Pakai mina tem ihiuve.
In sa-a Pakai apan louleh, In-sahon Panna beija asah u ahin, Khopi ngah a Pakai apanlouleh, Kho-ngahpa mohseh a janhah khovah ahi. Psalm.127:1.
Insung nom semna dinghin, insung hinsem dohpa toh kihet to a aman iti semdingham ama sei dungjuija, sem angaijin, insung phutdoh pa donglouva eimaho lungsuh toto-a isem vang uleh insung nom tah tah chu imudoh joulou dingu ahi. Insung semdoh kitihi hinkho a dinga thil khoh pentah chu ahin, ahinla mihemten inahsah mo pentah u chu ahi ti kasei nome.
Ajeh chu inchen sem na dingin nungah gol -lhang ho akigolou atame Mi tamtah hin numeikhat leh pasal khatchu aki chenna chale nao anei leh hichu insung kisemha ham tia ngaito jong umdaponte, hitabanga insung semna ding kigotna aumlou jeh in, igamsungu hi nupa kikah lah jong kithungai na le kilungsetna ahi banga umjou talou, nule pa le chate kikah a jong kijatohna le kilungsetto na ahiding dolla umthei talou, mijousen angai-na tabanga ngaito a genthei ding mong tabanga mi kingaito gamta, hiche a kona chu phatlouna tamcheh cheh a vannoi hi chonsetnan alo dimset ahitai.
Insungkhat semna dinga ikhangdon laija patna kigot angaije, iti kigot dingham itileh, tahsalam pang vang ihetsoh keidiu katahsan in, lhagao lam thudollin, achomlam tahin gahveu hite. Insungkhat semna dia amasapen chu ahileh. Pathen chapa chanu nahi masat pen angaije. Hiche a kona chu taona puma jidinga hung kitao ding, thengsel la jinei ding tupding, hita banga chu jineithenga ji nahin neitheija nahileh, insungnom semna dinga pucca foundation sem doh tabang nahitai.
Hiche a kona chale nao nahin neija, chapang chu aneova patna insung maichama nahin vah khang thei pou pou leh ahungkhang doh chate ho chu Pathena kona vahmanga akingolsah umdingin katahsan pon ahi. Ajeh chu chapang hi apenna patna phamo puma hungpeng ahipon, mijousehi ipen na mona neilou(innocent) a hungpeng ngen ahin, ahina a chu chonsesa a hung kipeng hijongleh. Ahungpen lhah a patna ahinkaihoi thu thua kingam ahi. Hijeh a chu insung maicham phate cha a jingkah nilhah a chateho aneova patna Pathen thu hiljing angai je. Adehin amahon
Pathen thu ahin ngainom laitah u le chun, phate cha a anakol uva ahilou leh amit uva hetlutpih ding ahi. Achuti a ahileh Proverb 22:6. na in Chapang chu acheene dingdol in khou khah in chutileh atehchangeija asuhmil lou ding ahi. Chukitleh Deut.6: 1-9 ve le chun, chate aneopet chaova Pathen thu hillou akhoh dan chungchang thudol jong imu uve.
Hiche ho tabang achena lhongpi ichepi lou uva inahsah lou uleh, chate ahung let phatleh, amaho chunga kipa tah sanga kana maona a kineilo ji ahi e. Achuti louleh, chapangho jalla insung nom ahibouve. Hijeh a chu Labolpan, Henu, kaneolaijin Pathen thu eina hil le chun tua kihiti lou dinga, tunla damun meidil che din kaum tai Henu tia akalo chu ahi e. Hijeh chun, sopiteho chapangho neolaihin boilheh jong leuhen alekha simdingu ikhoh sah banguvin, Pathen akimutheina diuvin, khohsah u hite. Amahon Pathen ahetlou uleh jingtengleh amaho sehseh hilouvin anule apa kana hung hiding ahi e. Hijeh a chu chateho ahina dingdol uva eina hil loujeh uva chutabang sohji ahi ti heuhite.
Hijeh a chu, insung nomtah man na dinga chu Pathenin iti bolding ham ti thupeh einei sau ahitan, abolho jousen abol-gau phatthei bohna ga chu aneh u ahitan, abollou jouse jong abol lou ga gentheina chu aneh ding ahitai. Gapha gahoi imutheina diuvin, muchipha kitu u Hite, Pathen thu chu. Pathen thupeh hi phatechan in-order in jui u hite. Ephesia 5:22-33 changei chu ivetna ahileh thupeh dungjuijin, amasapen in, insunga Minu komah thupeh akipe masa penin ahi. Numeiho nangho Pakai thunoija bangin nainneipu chengu thu noija umun; ajeh iham itileh, Christa Houbung luchang ahibanga inneipu jong numei luchang ahi. Chuleh houbung Christa thunoija aum bangchun, numeiho jong imalam jousea a inneipu cheng thunoija um cheh uhen.
Anichan a chu ahileh inneipu koma akiseijin, inneipuho nainneipi te chengu ngailu vin. Christan houbung mi angailut a houbung mite dinga akipeh doh jeng bang chun, nanghon jong nainneipi chengu ngailu vin. Pasalhon ainneipi chengu angailut ding dan uhi, amaho a phatle phatlou jeh thu ahitapoi, Christan eiho ichonphat le chonphat lou jeh thu hilou va eingaidam jeng banguva hi eihon jong un-conditional a tichu adih adihlou thu hilouva imoh ngailut jeng diu ahi. Verse 33 na chun, Nanghon jong na ineipi chengu nangma na kingailut bangin ngailuvin, amavang inneipi chun inneipu chu agin ding dol ahi. Hiche teni hi phatecha a Pathen thu dungjuija achelhah poupou leh abanna nule pa le chate kikah hi hahta loudin katahsane.
Chubana athumna in chate komah thupeh akipen. Chateho Pakaijah nanu napau thun nungun, hichu chondih ahi. Leiset chunga nahinkho sotna dingleh naphat theina din, nanu napa jabollin. Eph.6:1-2. Chaten jong ama nople da thu hilouva anu le apa thu thu angai dinghi Pathen thupeh ahi. Pathen lunglam akibol doh phat leh, Pathen a kona phattheina, hinkho sotna, anule apa hinkho sotna jong aboldoh tha diu ahi. Chaten thu angaiphatleh anuleh apa kipah intin, akipa jeh a chu damthei lhona, hingsot thei lhon ding ahi. Minun akin akibola, mipa le chaten ama ama kincheh akibolphatleh lhagao thengin ama kin hin kibol intin, hitia chu insung nom kisem doh thei ding ahi. Eima eima kin iboltokahuvin Pathen in imacha bolthei ponte. Asimho jouse Pathen in phatthei bohtahen.
