Home Lahkhom INSUNG NOM SEMDOH NA DINGA MINU, MIPA MOPOH NA

INSUNG NOM SEMDOH NA DINGA MINU, MIPA MOPOH NA

303
0

By :- Thangboi Kip’s
(9531808617)
Arrange by :- Ngul Kipgen

Minu mipa mopoh nahi tamtah seithei hijong leh point thum (3) anaveo hite.”

  1. Nangma chunga namopoh-na..!
  2. Naji chunga namopohna leh
  3. Chate chunga namopohna..!

1. NANGMA CHUNG’A

NAMOPOHNA

  • Insung mipa khat nahitah leh, Bible in “amasan amagam leh achonphat na holmasan” ati bangin. Thildang jouse sangin amasa pen’in nangma kiven lang, natahsa chunga natibah hohi thunun inlang control jou masaphot phot in. Mipa khat hungki semthah na insung chu aga-phan anung ajuitei tei ahi.

Leng ahung-hi chun, Solomon’in! Amite chunga Pathen deilamma vaihom themna anathum jehchun; Pathen alung lhaijin, amajal’in a-insung leh anam mite changei phatthei anaboh in ahi.

Tuni’a mipate jong nang jeh-a na insung leh nanam mite phatthei chang thei gaosap najong changthei ahi ti nahet angaiye.

2. NAJI CHUNG’A

NAMOPOHNA :-
(A) Nasana khang chulna leh..! Nadeipen na nakilhen nasen-ji toh christian insung khat semkhom’a,” damsunga tahsa leh lhagaova kalsong khom ding nahitah le, na-kingailut nalhon chu alembeihel hihen.”
Naji-toh nakah-a third person ti chu “numei dang or pasal dang, mong mong hungki jeplut theilou ding ahi. Hijeh chun naji toh nakah chu Pathen a pelha jengin lang naji tahsan lel hih-in.” Nangman jong Pathen ang’ah naji’a din kitah tah-in hinkho mang’in.

(B) Nupa kah ahin kitahna leh kitahsan tona apoimo pen’e. Kitahsan tona a-umlou teng..! Thutah aum theipon, thutah aumlou tengleh, kinah kibao ki-engkal tona adim jin, hitobang insung chu leiset jenga jong DAMUN tobang leh sunlaiya mei ki-oi tobang ahi.

(C) Naji ang’a guhthim-ma nakitah joulou leh, Kihet in nang ang’a jong naji hung kitah joulou ding ahi. Hichu nanop hinam?

(D) Miho masang’ah naji deilou lam’in. Thusei, lasah, umcham khanchan bolhih in. Japi’a nahi pon; anji’a bou nahi sumil hih-in. Naji lungdei’a naum chu na-insung damtheina ahin, insung damtheiya kon hung’ga muchipha chu japin amu thou thou ding ahi.

(E) Taona hi imajouse bolthei leh thiljouse kikhel sahthei Pathen toh kinai napen ahijeh-in, najitoh lungkitoh-in maicham bul’ah dilsun kineosah in..! Khut kituh-in Pakai beljing lhon’in. Ajeh chu taona hi Pathen a-kon phat theina hungkonna kang ngailou hintwi nah tobang ahi.

(F) Jile, cha neinung’in jong nupa kah-a khen na ding thulam leng atamji’e. Hijeh chun, naji toh lungmong’a jalkhun a nakithu mop nalhon tailou adang boipi agaipoi.

INSUNG BOINA AJEH CHOMCHA HO.!

~Insunga minu/mipa kineosah sanga thunei ding kichu’a mitthah te nupa banga achung nung ding kichu chu jeng hi insungboi kipatna hilou ham?

~ Insungmi sanga kholai mi thusei nalah a natahsan hi insungboi kipatna hilou ham?

👉 Najipa hilou/Najinu hilou guhthima jidang naneihi insungboi kipatna hilou ham?

~Jile, cha neinung’a naji ang’a guhthima dongma naneiya joldang nasai ji chu naki-oi hinam? Ahin, hichehi hen kichenna phutdoh pa Pathen’in chung’a kon’in navelhi jing’e..!

“VO MIPA”

Hiche khamna thei (Ju) Drug’s, Kaani, Heroine, etc… hohin, ipi damtheina, Haona, minthanna napeh a naji nacha sanga nangailut joh hitam?Phat chomkhat nakham kah maimai nopsah nachu nadam kumkho’a nagentheipi ding ahi nahetlou ham?

Nupa kiti hi kingailu tah’a jalkhun chunga, lunggel kiseipeh to’a kihoulimji ahin, nang houpi theilouva nakham jiteng alunggel seina ding neilou naloinu lungthim akapkap ji’e. Nahin kipui ni chu geldoh temin..!

Christian mipa khatin abol louding leh aneh louding naneh a nabol jing jeh in, na insung’ah kipana sangin lunggim boina meipi ajingji tai. Hitobang insunga hung khosa minu leh achate hinkho chu lungset aum nalom lom’e.

Milah a nahung kham jiteng, naloinun vetna ding helouvin aloi apailah a jong amai an jou-ji pon, kiphat lamnan hinkho nang jehin amang jing’e.

Tunjong nanglouva mongtheilou naloinun, nikhat teng hung kisemthah intin, tunia einuisat hohin eihin ochatdiu ahi, tin kinemtah in nangah jing’e.

“VO MINU”

Nopni hihen, dani hijongle, genthei ni hihen, kipani hijongle thoh khompi dia
nakilhen naji hilou ham? Ibola gentheina neokhat nahinto leh; leisetna agenthei pen dana kigela naji dalha a nanung sanga jamji nahim? Nangai lou hitam? Oleh kipania bou umpi’a genthei hahsat niteng dalhah dia nahin jot ham? Nahin-juini chu geldoh temin..!

Minu khat moukhat nahina a nalhunna insung chu; akitoh theilou u-tu pacha ki-in khenna, achengkhom dia lom chengkhom louva, kina jing leh chamna umlouna insung anahi khah le hiche insunga dia Pathen in missionary a nasol ahin, na insung chu na-mission field lenpen ahi. Bible a Hanah thusim imuve; aman kagenthei’e tin, anungsang bel’in anungjam pon, Pathen joh belin lolhinna akimun ahi.

1 peter 5:7 in “nalungdon nalungkham najouse amakomah seplhan, Aman nakhankho ding agelnai.” atin ahi.
Nuten na-Pathen bellouva, insunga nalung hanna naphun phun jeng a naboina ho naloi napai kom ahilou le nanung sangte kom nalhut-ji chu aphachom ding aumpoi. Ven nalhut nading tah tah na-Pathen kom nalhut hinam?

Hijeh chun, naji nacha chunga nalungkham napohgih ho hi henlang najikoma naseidoh theilou naboina ho hijong leh; na-insunga din mitlhi long’in na-Pathen beltan.
Hanah banga mitlhi longa nataona Pathen’in moh a akoilou ding ahi.

Numei ching numeiphan, alhunna insung chu angolpi jeng’in, alhunna insung mite ho jouse ang’ah phatseh-in amailhai sel jing’e.

CHATE CHUNG’A NAMOPOHNA:-

Chapang lungthim hi blank memory card tobang ahiye..! Nanop nop nadei dei nakikoithei, natu tu na-at ding kiti banga; apha nakoileh apha namuding, ase nakoileh ase namuding a-card neipa khutna kingam tobang ahi.

Heng’e vangle ham phattheina hinpe ding chu Pathen ahinai, ahin, jingkah nilhah a hinkivoppi’a thilpha hihen thilse hijong leh; tahsa leh lhagaova hinkhou khah a lampi hinkomu ding chu nule pa khut na kingam ahi. Chate hi “future pillar’s of the nation…” akitin, Hiche jong chu ahung kipatna nule pa khutna kingam mama ahikit’e.

Chate dinga nule paten mitlhi long’a an ngola maicham’a Pathen ibel jingu hinam? Taona keo hilouva practical tah a jong bol angaiye.

Nule paten ichateu hi, phat khat leh imalam jouse’a ikhela hung pang’a ibolmo, iseimo, itohmo hintong a japi masang hihen hoilai hijong leh; thusei lasah-a hangsan tah a panga public figure khat hunghi thei ding itileh,
Apuihoi danhi kheljap angaiye.!

Example:- 1 Sapte/English-te cha khat thing chung’a akal chu apan ahin mun ahileh, Very good, hilai chu tuh inlang, hilai chu chon inlang boi kicha hih in, atin akipapin ahi.

Example:-2 Eiho cha khat thingchung kalchu anule pan ipi asei em? Mi-ummo na ingap dia kal nahim? Nathi nom ham? Gangtah-in hungkum’in tin ilunghang jiuvin, ahi. Thing akal chu amadia abolkhah lou thilthah khat bolthei a kigel’a kipah ahin. Eihon kipapi sanga i-houset uva; nakheh leh thiding nahi tia kichat najoh ihetsah uleh, lungneo den jitao. Milah-a alungneo kit uleh napa keibon kilungneo lou iti kit-u. Over control bolval jonghi, ahchan netadeh inge tia kilokhu tobang ahi. Hitia chate ikhoukhah laiseuvin eiho phahna akimkhat jong hinpha povinte.

Eimite hin insunga atamjon chapang ikhoukhah dan-u hi gollui lai stage toh ikikheh sah naipouve katinom’e. Ajeh chu chapang khohelou khatt in thilkhat ahin suhset leh, kilunghanga thading matding kigo’a ki-kichat sah’a molla kijepma alunga mangmo ding thu ijatham khat iseidoh jiukhun chapang dia ichan hamkhat na discourage/kingaiset na aneilojiuva khonung changei’a chate toh nule pa kah a lunggel kihet khelna gap saotah umloji ahi.

Hiche sangchun asuh khel nalaitah chu lunghang louvin; kamdam selin hiljole chun gamchenga aphat chompi joh ding ahi.

CHATE HI LOILE GOL BANGA JONG KIVOPPI JIDING AHI.!!

Chapang in thu ahin ngailou teng; mola jepji angainai, ahin phatseh a kiki chatsah val jong aphapoi. Alung boina ho nakoma ahinsei ngamlou teng, hungki gom gom a achaina leh last upai a suicide changei umloji ahi.

Chapang’in nakoma tahsan tahle kinem tah-a henu/hepa tia thu nahindoh a ahung houlim jiteng chapang tin ima-a gellou leh donlou vin anakoi hihbeh in. Achuti louleh, aletnung changeiya alunggel ahinsei nomlou loding ahi. Hisang chun phatah in kihoupin lang kimaingal sah inlang, naloibangin kivoppi jo le chun nahin maingal intin alunggel seinan nahin neitante. Chaten alungboi nao nule pa koma phatah a ahinlhut teng insung boinaijat hamkhat baitah a ki solve thei tina ahi.

CHATE TOH KIMAINGAL APHAT CHOMNA.!!

~Nikhat ka-chapa school ahung kikhen hin, a umdan leh amaiso nidanga toh abang tapon..! Nidang banga kicheppi ding kagot vangin imacha thanopna aneitapon, boina khat vang aneichu kahetan ahi. Kenjong, “boi tuni na school kai noplou ham? Ole miss-ten nahinpho ham? Keikoma seijin boi.”
Kachapa: “Hepa, ka miss-ten eiphoh poi. Ka class uva keisanga lenjo mi 4/li hon einoise uva katwi jong adonjiu kalekha jong ajih pon jiu, naseidoh leh nathoh di atiuva, eiphin phin jeng-u kakai nomtapoi hepa school chomma kaitange,” ahinti phat chun aboina kahe tan;
KEIMA: “Boi, lunghang tahih in amaho sese chun jing leh nakoma ngaidam ahinthum diu chu o,” katin, ajingin principal pa komah athu umdan phatah a kasei tan ahileh, amaho sese chu ahinkou doh-in; kachapa masang tah achun aphoh-in “nanghon loitum nasem uva mi nasuhboi u kahinhet kit leh Nanu napa teu kakouva school a kona kanodoh ding nahiuve” tin warning abolin ngaidam akithum sah taovin ahi. Hiche nia patchun aboi kit tapoi.

©️Copyright, Thangboi Kip’s

Please article hi naphatchom pi le anoiya “like” button khu hinmeh in or seinom nanei jong le naoiya comments nahinbol thei ahi, lem ahijing e.

Thusimbu Machal jing thei na ding a pan lanom ho kipah tah in lem ahijing in ahi anoiya button “Click Here” khu meh utin details anasim ute.

Previous articleLUNGSET GILDAN HELOU-III
Next articleNASEI MASANG IN GEL TOH MASAN