PART: 1
By; Haokholen
Genthei kiti jong le kei ho genthei dan hi alhingsel jengin, kakho het apat in lou konna natoh chu kahin che pih peh ahitai, keiho chu chapang thum kahi uvin kei chu alenpen miupa dinmun katuh kha khel2 kit in ahi, school kai thei kahung hi in kanu le kapan kachih dingle kathep ding adei hon jeh chun Government school khat a lekha kahin sim pan tan ahi. Genthei hahsa aki hi jeh chun school uniform jong mi vonsa kaki von in school kai in kache jinge. Insunga lekha ei hil thei aum lou jeh chun kaloi kagol nung jong kapha jou kit pon ahi. School suty kanei kom le natoh in kanu kapa kaki tho pi jin loi le gol to ki chep khom na phat jong kana nei kha pon, kadu kangai jong kane khapon, kadei jong kana nei jou pon ahi. Ahin kanu le kapa akonna kipa na kana nei jeh chun lungmong selin kana umme.
Kum le lha ahung chal2 in ahile nikhat hi kanu le kapa alou kon nahonin kapa chu alung avai in alhu den in apet2 in aleiced hinkho ana bei tan ahi.
Kapan eida lhah chu kahe nai pon school kikhen in kanao teni to inlam kahin jon taovin ahile lampi in kani in eina lamtin uvin ama ho inna ei put lut uvin kani chun kino thethu in bu ahonin keijong kalung adong tan kani jah a kasei in
“Heni bolla bu nahon ham ina chetao vinge nilhah le kanu tenin ei pho dingu ahie” kati le kani chun ei donbut pon abol ngai2 abolin kani maiso chu kavet le thilkhat umding ahi chu kaging mo kei jong ema sei lou in kamoh umtan ahi.
Bu ahin hon min in bu ei neh sah uvin kaneh jou uvin jong inlang a cheding anom kit naipon kalung atheh lheh jeng tan ahi. Khojin ding konin kanao aneo pen gugun chu kani in apo in inlang a ei pui taovin ahi.
In kalhun ding kon uvin kakel kot u kaphah ule nupa ni ahung doh honin lunggel nom tah in “len nahung lhun u hitam” eiti uvin kenjong henge kati le ka insung uva konin mi kagin kahin jatan insung chu kadel lut tan ahi le lhong lai a kapa longdap sa ana lum chu kamu tan epi kibol naham jong kahe vah pon chomkhat pi kapa chu kave denin ahile kanun kap pum2 in “lelen pa nachate ahung lhung taove ga lam to temmin” ahin ti chun kanuh gui ahung bingin kapa long chunga achun kanu to kapa chu kaka hon tan ahi. Avela kimu kit lou dinga kapa in eida lhah chu kagel le hahsa kasa mama jengin kakap kakap hai thei tapon kahet lou vanga chun kana kap tan khatan ahi. Chomkhat jouin khong gin in kahung khang doh in kahung kitho doh le kapa chu thilong in ana lum tan kapa mel kaven ahile kapa chan dinga kilom mo kasa val jengin ahin lai mel ho kalung mit in ahung langin kapa kangai vallin hakan kahung kap doh tan ahi kaka le kani ahungin “boilen kap tahih in boi nang mi upa hija bolla nakaka ham khat vei naka a ahile apha tai nang milhem ding nahi e kap tahih in” tin ei hung lhem in kei jong kalai ana cheh2 jo tan ahi.
Kaninu… “Boi napa in kinep pi tah a nanei ahiye bolla nalungneo a naka ham kapkap le chun napa jong alha mong pon te napa lha mong tah a aum na dingin sei in lang kaka lou di tai tijon nanu teho nanao teho aka lebon nang nalhep ding hichume bolla kapkap nahim” tin ei lhem kit in kenjong kani thusei chu kagelle dih kasan kapa kangai a kaka nom lheh vanga chun kaki tim in eti kaka vanga jata lou kapa komma chun hitin kasei tai,
“Hepa, na um chan hi kalunglai gel bangin adap e, hepa ka a hung thou ding hile chun na chate ka nahi japha tei in nate ahin lhagao umtalou tahsa keo nahi phat in kaka nao nahe pha tapoi. Hepa lungmong selin umtan. Nahin lai damsunga kachung uva nalung han nale kabol khel hou neingaidam jo uvo. Chung pathen komma taona nei hin mang pih jingun. Hepa nang um tahih jong le chun kanu hinki pa sah jing nange” katin kap nom lheh jong leng lunglen kaki pe in kakap tapon ahi.
Jan jong ahung sot cheh2 phat in kapa vou jong aki khel cheh2 tan vot jong avot lheh tan ahi.
Kapa komma chun katou in eida lhah nung uva kanu le kanao teni hinkho man ding dan kagel le hahsa kasa ma2 jengin ahi. Kaka lhah lou vangin mit a konin mitlhi akangdeh poi. Chomlou kah in jingkah buh-al ahung khong tan ahi. Hiche ni jingkah nisa hung so chu alamdang lheh jengin ahi. Phat ache dung jui in kapa long lhah doh nakin jong kachai taovin ahi.
Hiche nia kipat achun kachunun meithai hinkho ahin mang tan kei le kanao tenin jong sangga hinkho kamang taovin ahi.
Genthei nakal a insunga mipan eida lhah uchu lungneo um lheh jengin ahi. Paochamtuh a kisei bangin ‘Chagan khovei aki nep pi e’ tima bangin kei ho insung jong chun khovei kaki nep pi taovin ahi.
Kapa umlou apat in kanu jong adam thei tapon kapa pul adou2 jeng ji tan ahi. Hiti chun lekha sim nom lheh jong leng ka insungin ato tah lou jeh chun lekha nga dingin kaki gel lha tan ahi.
Nilhah khat hi an kaneh pet uvin,
Kei: Henu, lekha sim hai tange iba kalo poi e kanao teni joh lekha sim sah hitin nang la kei in na tong tai hite o,,,, katin ahi le kanu chu abu neh na a chun amitlhi ahung valha in bu jong ane thei tapon ahi.
Kanu: Boilen angol nahi ja hita chu thu nasei ham nang mi upa nahi e nang nachih angai e ven napa abei masang in jong chapa boilen hi mikhat so tei hite tia napan akam cheng a ana sei doh khat ahi e boi phate in gellin kei meithai hijong leng na pa kinep na chu subulhit in boi chaga te dingin pathen aum nai ti gel doh in pathen a hat in lang ama jenga kisong jingin chuti le nalungtup nalhun tei2 ding ahi e. Atin ken jong kanu thusei chu kanel nom tapon
Kei: Henu kasei khel tai e neingaidamo ngle kapa kinep na chapa chu hi doh jou go inge. Henu kap ji tahih o namit lhi kamu ji teng leh kalung aneo ji e
Kanu: henge boi kap ji taponge bu kineh va set2 un. Atin bu kaki neh va tao vin ahi.
Ajing nikho apat in angai bangin kanao teni to themjil namun chu kajon kit tao vin ahi. Hoi lai munin umjong leng kanu vang kahai mil pon achang a na atoh ding kagel ji teng leh kapo na lheh ji in class sung jong chu kei dinga kanu gel nan kamang chai ji tan ahi.
Het man lou kah in kum ahung lhung tan Christmas ahung lhung pai tan ahi nah2 in Christmas sum chu kaki peh jou nah2 un ahi.
Akum kitin kanun phai langa lekha sim dingin eisei tan ahile kalung athom hao lheh jengin ahin kanu thusei chu kapal kheh nom lou jeh chun phaija lekha sim dingin kaki gong tan ahi. Kanu le kanao teni chu kangai lheh jeng tan aguh in kamitlhi ana long jitai.
Nilhah khat hi kanu in maicham eisem peh in phate chan ei houlim pi in ahi. Keijong janin kaki gellin kanun eihil naho chu phaten jui inge ahinkhon lhased sah ponge tin kaki tem tan ahi.
Ajing jingkah in first bus lap in kanu in ei hin thou doh in kenjong kapot kaki poh in phai lang kahin jon tan ahi.
Phai kalhun in um nading kaki hollin ahile sum atam thei lheh jeng tan ahi nilhah ding kon chan kaki holin kamu jou mong2 tapon achai nan in khat chu kaga dongin ahile man lhom chan kan kimu tan ahi. Kaum nachu mivet dingin deimo umlheh jong le kei dinga kathem jil kipat nading mun ahi jeh chun khoh kasa pon ahi. Chomkhat school kai nading in thil ema kaki suh tup in school kai pan lou lai ding jeh achun mistry ho nung kana jui in sum hol nathei2 in kana hol le2 jin ahi.
Part 2 jing nilhah le ana sim ute. Ahin sim chai ho chunga kaki pah e.
Thusimbu Machal jing thei na ding a pan lanom ho kipah tah in lem ahijing in ahi anoiya button “Click Here” khu meh utin details anasim ute.
