A in–go sangin agam–go ngai puldou nan kadim ji.
Lelen Kipgen.
_____________________
Somasa banjom.
Hitichun ka kihou lhonin ama jong aleljeh chun a emukit tan ahi. hitichun thil ho jong agong chai taovin, dam ding ngaichan Hospital mun jonin kahin po taovin ahi. Henglep chan kengin kahinpo uvin, Henglep’a pat in gari ah kahin po taovin ahi. nilhahlang nidan thum velin Lamka kahin polhung uvin, Hospital mon kajon pei uvin ahile admit eibol peitaovin ahi.
Sun khovah pat chun aphadom nan ahinlah ni ahung lhangkaiya kipat chun akhoh cheh cheh kit tan houpi thei jong ahi kit tapon ahi. Jan lang hin anat na akhohset kit phat chun Doctor hon phai langa eisol taovin ahi. anu le apa, anaopa toh mi phabet khat ambulance a phailang kahin jon taovin ahi. anat dan chu koiman kasei nom lou vang uvin kinepna chu umlou ahitan aguh in kalhiso pipi taovin ahi.
Alupna kom’a katouvin akhut lha louvin katuh jingin ahi. Moirang ka khel uvin amit’a konin amitlhi ahung long in kave jou pon kalhisoh tan ahi. Chomkhat jouvin amit ahung hahdoh in eihin ven kajah ah,
MARY: “heu Boilen, ibola na ka ham? kap hih in kalung leng khante. heu Boilen, nangin jong nei lungset lheh e ti kahei, kilungset hinkho eman til lhon’a pat in nei kipasah jinge, nei ngailut kahen, nachunga ka kipahe. heu Boilen, ven nalungset kei hin nalungtup ka molso jou lou ding ahitai. hijongle kei jeh in kinepna bei bang hih in, laidang leng tan kei banga nalungset, na ngailu ding jong hung um nante, heu Boilen, lhase kisa hih in chung Pathen jang gop lou ihilhon’e tin gel mei hite.”
athusei ho chu lhaset nan kadimin kamoh ka tan ahi.
Chuin ken jong ajah ah,
KEIMA: “Mary boi, ibola hitia chu thu nasei ham? nalungset pen kei kom dalha’a hoilam che ding kigu nahim? kanom poi nei dalha thei pon nate, nang tailou lungset dang kanei nom poi.” tin ka kap jeng tan ahile ama jong alhisoh kit tan ahi.
Chuin anu le apa lang aven,
MARY: “Henu, hepa, ebola lhisoh lhon nahim? leiset hi kikhan namun ahi. tun kikhan jong leu hen nikho khat le kipah a ekimuto thou thou diu ahi. phat chom cha elenkhom nasung uva nei ngailut nao le nei khoto nahou jalin ka kipahe, henu hepa, kan ngai uve, ka khangdon hinkho ka it lheh jenge, hijong le eiho bolthei aum tapoi, nikho khat le chung vangam a kipah a ekimu diu kinem jou hite.” atin ahile anu le apa akap lha jeng lhon tan ahi. anun angong koiyin,
A CHUNNU: “Boi, ibola hitia chu ham nahim? kanom poi ekikhan thei lou diu ahi. phai elhun phat ule nadam ding ahitai.” tin akap kap tan ahi.
Hitichun chomkhat jouvin amit asing in a-emu kit tan ahi. akhut katuh in ka it lheh jenge, hiche nilhah chu phai jong agamlha chom lheh jengin kalhung lelkei uvin ahi. alim dan vang chu tahsan aum tapon, ahinlah kei lungel a chun phai kilhung le aphat nakhat hung um nante tin ka kinem in ahi. lungset hinkho kahin man dan lhon ho kagel jin, kou kit kanom ji lheh’e. kihomtho tah le kingailu tah a hinkho kahin man dan lhon ho leh kipah tah a kanuikhom ji lai lhon ho lungmit in ahung kilang jin ahing laiyin apul kadou in kalhisoh soh tan ahi. ama jong kho helouvin alumin amel kave jin kave chim thei jipon ahi.
Jan nidan som le khat don hin phai kalhung uvin Shija kajon pei taovin ahi. Shija ka lhunu chun kalung among lheh tan ahi. ajeh chu Doctor hon aphat phat nan hin bol uvintin hung dam doh tante tin ka kinem jin ahi. ahinlah kipana le kinepna jong chomlou kah in lonlhin ale jitai. kalhun uvin Doctor hon room khat’a atol lut uvin, sot thim khat jouvin aum tapoi tin eihung seipeh taovin ahile ka kap cheh taovin ahi. aum dan chu lampi a nomin aemu e katiu chu, hicheva chu umlou dan ahitai. ahivangin Shija hospital kalhun chan u chun alum jing nalaiyin ahi.
Sot thim khat jouvin post mortern ema abol jou uvin, ambulance ah kahin le poh pei kit taovin ahi. anu le apa akap lhonin ahinlah Mary vang hung kinungle lou dinga leiset gimgenthei na ho dalha’a pa kom a choldo dinga che ahitan ahi. lam lhungkei chun kalungel asuh sah jong umthei louvin angol kabang jeng tan ahi. Jingkal lam nidan ni velin Henglep kahung lhung uvin, Henglep a kipat chun kengin kahinpo kit taovin ahi.
Khovah konin in kahin polhung taovin ahile khosung ka le mao athong jeng tan ahi. hitichun sun in program ho jong akichai tan nilhah lamin lhan a vui dingin in a konin kahin podoh taovin ahi. ka sengol ngai toh kumkho’a kikhan ding kahi phat in angol kabang tan ka ji jong kahe thei tapon min eihoupi jong le asuh sah jong kaum tapon ahi.
In leitol’a apahcha tu Joujam pah chu kalouvin alhan chunga koi dingin kachoiyin ahi.
kavui chai uvin mipi inlam a akile soh taovin ahi. chuin ka pahcha choi chu alhan chunga ka koiyin kap pumin kalhadoh tan ahi.
KEIMA: “Mary boi, kahin ngai nalom lom’e boi, na anglum a lungmong ding kahim kana tin, ahinlah tunin thinan eikhan lhon tai. Boi, eini kilungset lou jong ehilhon poi, thinan eikhan lhon joh ahitai. ipi hijong le lunglhaiselin che tan, nikho khat teng pa henga nomin lengkhom tahite, boi Pathen jangop lou ihimeiye…” tin kap pum pumin ka sengolngai kahin lhadoh tan ahi.
Jan lenkhom kahin bol taovin ahinlah kei vang milah a kalha nom tapon, Mary lupna jalkhun chunga kalumin lunghelin kalhisoh soh tan ahi. hitichun kin ho akichai soh kah in inlam kile louvin kaumden tan, kin ho akichai soh phat in inlam kahung kile tan ahi.
Hitichun lunghel nan kadimin sun le jan lhiso nan kahin mang jing tan ahi. Mary ka ngaiyin, a-kho lang u kiche le Mary’n kipah tah in eina lamto inte tin kinemtah in Sahei lam kajon jin ahinlah ka kinepna abang ji tapon kap pumin kahung kile kitji tan ahi. Jan teng chunga chung Chollha ahung so teng Mary ngaiyin ka kap jitan ahi. Mary ngaiya ka lhiso teng Helam in eilhem jin, ei lhiso pi jie. Helam in eilungset jong kahe nai, ahinlah kei vang Mary ngaiya thipei ding kahitai.
Nikhat hi kalunghel val in Mary te kho lang kajon tan ahi. kalhun le koima anaum pouvin, mi kadoh le louvat a gam a age thu eiseipeh in chuin keijong alou lamu kajon tan ahi. nidanga Mary toh kipahtah’a kakitot lhona kanuikhom namun lhon ho kamu jiteng ka kap den ji tan ahi. sun langin alou u kalhung in anun kei eimu phat in ha kan akap tan ahi. ka ge namun ho, ka natoh namun lhon ho kamu chun Mary kangai valin guhthim in ka kap kap jitan ahi. hitichun kalunghel adang chom pon, inlam kahung kile kit tan ahi.
Hitia Mary ngai’a hinkho kaman jing phat chun ka inkoten, “hiti tileh ngol doh pei tahbah ding ahi,” tin Helam toh suhto tei ding eigong taovin ahi. chule khosunga loi le gol hon jong asei jiuve, ahinlah ken vang A IN-GO SANGIN A GAM-GO ngai puldou nan kadimjo jin ahi. hitia ahasei val phat uchun kei jong ka kigelin,”hitihin kium um jong le Mary’n la hung kinung le lou dinga eidalhah ahitan, hitia lunghel’a kalhiso so’a ka kapi pi sangin kalungmon jep khat le,” katin Helam toh kicheng dingin ka kigellha tan ahi.
Nilhah khat hi leitol’a Mary ngaiya kalhiso pat hin kanung langa konin Helam in eihin koiyin kajah ah,
HELAM: “Heu Boilen, kap kap tahih o, nalhiso ka vejou poi,”
tia kanung langa kon’a eihin koi chun lhaset nan kadimin ka kaplha kit tan ahi. chuin ken jong Helam jan ah,
KEIMA: “Helam boi, nei lungset em? nei lungset le nei kichenpi jengin. hitia lunghel kathoh thoh hi athi lo pei ding kahitai.”
tin kasei tan ahile, akipah in,
HELAM: “heu Boilen, kalungset nahet hilou ham? eini kicheng le hen insung mite deisah jong ahiye, heu Boilen, kahin lungset e.”
hitia ahin sei phat chun ka ngong koiyin ka kap tan ahi.
Hitichun insung mite kom’a kaseiyin ahile amahon jong aphatsah lheh uvin. phat chomkhat jouvin Marriage jong thupitah in eibol peh uvin Helam toh ka kicheng lhon tan ahi. ka kichen ni lhon jan kamang in Mary kamun mai lheiselin kipahtah in eiven jing kal kahung khah chun Mary ngaiyin aguh in ka lhisoh kit tan ahi. ang dang koi kahitah vangin Mary kamil thei poi, A IN-GO SANGIN A GAM-GO ngai puldou nan kadim jing nalaiyin ahi.
*_BEITA_*
_*apat a pat achai chan lunglut tah a nei simchai peh jehin kakipahe, Pathen in phatthei naboh hen.*_
_*Keima- Lelen Kipgen.*_
7629033890
*©2020, Lelen Kipgen, All Right Reserved.*
