Home Lelen Kipgen IN–GO LE GAM–GO(Part-I)

IN–GO LE GAM–GO(Part-I)

191
0

A in–go sangin agam–go ngai pupdou nan kadim ji.

Lelen Kipgen.
__________________

Koiman golhanga eisim lou lai vang chun, kigolhansah hinkho chu kahin mang pan taovin ahi. Jankhat hi ka lupna jalkhun chungah ka kigel gelin ahile, kei jong kaloi kagol ho banga dongma nei ding chu katha anom lheh tan ahi. hijeh chun Nengpi hel dingin ka kigel lha tai.
ajing nilhah in kaloipa Mangcha ka kipuiyin Nengpi te in kajon lhon tan ahile, leitol ah ka upa toh ka kitoh taovin ahi. keini jong kalut lhon tan ahile.
NENGPI: “Hung tou lhon o, kidang sanin nahung kholai leng lhonin.”
keiho jong thudang dang kasei uvin, ka kihoulim lim uvin ahi.
chumkhat jouvin, “tun vang kisei tahen. thi le thi, hin le hin.” tin kasei tai.
KEIMA: “Nengpi, thu khat kadoh thei ding ham?”
NENGPI: “Dongo, na nup le som jong nadoh thei ahiye.”
KEIMA: “Nengpi, dongma nanei tam, nanei lou lai ahi khah leh tia nakom a lungset nathu sei dinga hung kahi lhon e.”
hitichun kaseiyin ahile, chomkhat mit phe louvin eiven, chuin lunghang thim tah in,
NENGPI: “Umm… na ucha lhonin hung kilha mat chat lhon tang.”
hitia asei phat chun keini jong thip chet in kading doh lhonin, inlang kahin kijut dap beh lhon tai.
aumdan chu keini masang chet a ka upan jong ana jol dan ahi.

Youth tha kon na, ahilou le khanglai thakon na khat ahung um leh golhang eikiti jin, chuleh toh ding tham ding khat aum le golhang, golhang ei kiti jin ahinlah mun danga la ethu kila mong mong ji lou, ehasei leh “chapang nakam kihup in,” ei kiti kit ji. hiche hi kahung golhan til a khah kana sah loi khat ahitai.

kei hi insunga sanglhum kahi. ka upa toh keini bou kahi lhonin ahi. insunga numei umlou kahi jeh uvin, numei kalha ngai lheh uvin ahi.
insunga sanglhum aki hijeh in naosen bangin eibol jing uvin ahile kangol thet jengin ahi.
Jankhat kagol ho toh katou khom uvin, ka kihoulim lim uvin ahile ahcha gu dingin ka kihoulha taovin ahi. ahcha chu koi in a guh ding ham. ti kahin sei khom kit taovin ahile, guh nading kahe tapovin, hijeh chun keiho ahcha atui op khat ka gu taovin ahi.
hitichu ahi, kho lhom na, in lhom na kho ah kicheng khaleh, lungdon a houbung lamkai tuh pha akihi tah vanga hichan geiya chu ngol a hinkho kimang nalai ahi.

kapa hi khosung housa khat jong ahi. chule lhangsunga, chief association langa mopoh na nei khat jong ahi. kachen nao hi Naga gam toh kinai ahi. nikhat hi kapan Naga kho thinglhang lang peh a che nading kin khat aneiyin, lam gamlha ahijeh chun angap cha pon kei eisol tan ahi.
ken jong kagolpa Mangcha ka kipuiyin kache lhon tai. nilhah lang nilhum konin ka galhung lhonin ahi. Jan ahung hitan keini jong inson kahin chon lhon tai. kache nalhon jouse achun anthom tiding ham ju ngou tiding ham kahe poi, ju jat khat vang hiding dan ahi. eiho langa jin leh leng cha tuiya eki welcome tabang uhi hiding dan ahi. amahon hiche ju chu amanu ahi. kache lhon na in jouse a chun hiche ju chu eihin sunpih jiuvin, alhum jeh chun kadu kei tan kadon don leh in somthum lang chon ding pa chu, in nga kachut jou lhonin lhong laiya kho helouvin ka kijam den tan ahi.
ajing in somthum lang kachut lhon vang chun koiman khon khat jong eisun pih tapovin ahi. aumdan chu janlhah a chu, Nagamese helou pa chun Nagamese ka jan tho dan ana hitai.

kakho uhi thinglhang ahijeh chun jan leh guitar ka kipoh jiuvin, veng nah langa pat veng to lang gei ka mao jiuvin, hitichun vengto langa pat kahung tou mao kit jiuvin ahi. hitia vel thum tabang aki kile lhung phat leh chun emut phat kitoh chet chetji ahi. hitichun lenpi gol le pai cheng toh hinkho nomtah in ka mang uvin ahi. chutia kaloi kagol ho kom a kaum phat leh ka kigolhan sah kei ji vangin, in kalhun teng ka kisen sah jin, ka kiphin in ka kap kap jing ji nalaiye.

Chavang ahung hitan, epu epa khanga pat inaman jingu Chavang Kut jong ahung lhung kit tan ahi. keiho lhang hin chavang kut sports jong thupi tah in kabol jiuvin ahi. chule sports lai leh amun ah ka geh dan jiuvin ahi. keiho kho jong foot ball team ding golhang ejat hamkhat toh. volley team nungah ejat hamkhat ka cheuvin nom kasa thei lheh jeng uvin ahi. sports jong akipan tan, kei hi goal keeper in eipansah uvin ahi. kahung kichem taovin ahile goal post nung langa tou nungah ho chun eihin hoh jiuvin, kei chu ka nervous jitan din jong kading chah thei ji tapon, goal post langkhat a pat langkhat chan chu ham hamin katoi lhung jin ahi.
hitichun kahin peh taovin ahile Pathen lungset in play ni kapeh lhung ham ham uvin ahi.

Foot ball langa kathi phat uvin, sun leh kaloipa Mangcha toh Volley ball kichep nalanga nungah ho ve dingin kache ji lhonin ahi. nikhat kache kit lhon tan, volley ball kichep chu kave kit lhon tan ahile SAHEI te langah chun nungah khat kahin mudoh tan hoi kasa valin kana ngol den tan ahi. hoi kasah dan dan chu, grand sale in hung kijoh henlang ingap liuvin kitet le kalung ahi jenge.

Sahei kho hi keiho kho toh ki gamlhat lou ahin, ahinlah Sahei ho mi kihe soh keiya amanu kahet lou chu kalung adong tan ahi. chuin kaloipa Mangcha jah a hoi kasah dan ho kaseiyin ahile, aki chep chai phat uleh juiya kihet pi dingin ka kihou lha lhon tan ahi.
akichep chai uvin aumna langu kanai phei lhonin ahile, abui lha jeng uvin houpi man jong ahi pon ahi. chuin chomkhat kangah lhonin ahile akichai phat uvin, aban a play ve dingin kichep na mun lang ajon taovin ahi.
Chuin keini jong anung kajui lhon tan ahile munkhat ahin atou taovin ahi. atouna kom chu a ong in, gatou ding chu ka jahcha kit tan ahi. hoi kasah val kadei val jeh a chu kale jachat kit ahitai.

Chuin kaloipan, “hungo natou ngam lou le kei tou nange,” atin ka dasa san eikai lut tan ahi. kaloipan jong amin lhon adong tan ahile,
“heu Marcy kahiye, nang ni min la?”
KALOIPA: “ohh, namin angeiye, keimin Mangcha kaloipa min Boilen ahiye.”
hitichun akihoulim lim lhonin ahi. kei chu thipchet in akom lhon a chun ju tuimo tun in ka kitung tan ahi. chuin Marcy’n kaloipa jah ah, “heu Mangcha naloipa pichu eti’a ham lou ham, ajah cha ham?” tin ahin sei kit tan ahile, ka jachat nakah chun ka ul’sa along liu tan ahi.
chuphat in kaloipa kathim’se se jeng tan ahile, kaloipan jong ka jachat ahet jeh chun kahung pot lhon tan ahi.

ajing chu chavang kut nipi ni kikhan ni ahitan ahi. phat aumtah lou jeh chun, “tunilhah beh ki kihoupi hen,” tin kaloipa toh gimmo tangmo’n kache kit lhon tai. Sahei te camp lang kajon lhon tan ahile Mary jong aloinu toh ahung pot lhonin, munkhat ah ka kisuto taovin ahi.
KEIMA: “Mary, hoiya nache gut lhon ham. nang ni kom a hung kihung lhon’a,”
MARY: “Heu Boilen, dukan a nehthei kichoh a kahung lhon ahiye.”
KALOIPA: “Pha jeng chula, dukan che toh kop in ga vahle leu te.”
atin ka hung kijot phei taovin ahi.

Dukan a nehthei thei ka neuvin, choh thei thei ka kichoh uvin chomkhat kholaiya ka vahle leuvin ahi. chuin ken jong,
KEIMA: “Mary, Sahei ho nahile ka mukha hih beh in hoiya naum ji ham?”
MARY: “Heu Boilen, Sahei ho kahi vanga in a kaum kha ji hih e. lamka langa ka palen te in a lekhasim a kaum ji ahiye.”
KEIMA: “Oh, chuti chuba hinah ta, ahile kum ejat nahi tam?”
MARY: “tukum 16 kalhin pan ding ahi nalaiye. heu Boilen nang la?”
KEIMA: “kei 17 kahite,”
tin ka kihoulim lim lhonin ahile, kaloipa le Mary loinu’n, “Ahem…. ahem,” ahinti lhonin ahile kahung jahcha lhonin ka nga lhon tan ahi.
hitichun chomkhat kholai dungah ka vahle leuvin, chuin a camp lang uvah kata than lhon tai.

dongma nei ding kana moh thanup ji vangin, lungset ipi ham jong kana hepha pon ahi. tun vang Mary kamu ni a pat in lungset ipi ham kahin he pan tai. amel kadeiyin aumchan akhan chan kavet nomin, ka hinkho a kachen khompi ding, kaneh neh kaneh khom pi ding leh ka genthei ni a kagenthei khom pi ding ka kipa khom pi dingin ka dei lheh jengin ahi. amelhoi na ka lungmit in alang jingin, emu theilouvin ka jan gel tan ahi. jing nikho vah leh kikhan ni ahitah ding jeh chun phat ka homtho lheh jengin ahi.

Jingkho ahung vah tan, Chavang kut nipi kahin mang taovin ahi. programe ho jong nomtah in ka mang chai taovin ahi. kho anailam ho chu ajan janin ache taovin ahi. hiche lah a chu Sahei te jong che diu ahitah jeh chun kaloipa toh Mary lha dingin kache lhon tan ahi. a camp lang’u kajon lhon tan ahile thi akigut uvin abui cheng uvin ahi. chuin Mary kom a kache lhonin ka gakithopi lhonin ahi. chuin ken jong,
KEIMA: “Mary, nang ho nache doh diu chu lunghel aum val e, hitia ekikop ule nom a.”
MARY: “heu Boilen, kei jong kalung hel e, tuhin ki kikhan le etih a jong ki kinung mu talou meithei ahite. nang ho la hung vah nom ji pouvin natin.”
hitia ahinsei chu kinepna khat kanei tai. chuin ken jong ka donbut peiyin.
KEIMA: “Mary, nagelthei ding le nikhat nakhouva kho lailenga kahung ding ham?”
MARY: “heu Boilen, ebola hitia chu nasei ham. hung vah ji jiuvo”
hitichun ka kihoulim lim lhon le ache phat’u alhing tan, mangpha ka kithot uvin ka kikhan taovin ahi.
ajing jingkah matah in keiho jong inlang kajon taovin ahi.

Mary mel kamu nia pat in kalung laiyah acham jing tan, sun le janin Mary bou ka gel gel jeng tan ahi. Mary koma um a lungset nathu sei ding bou kanom tan ahi. Saturday nikhat hin kaloipa Mangcha ka tem in ahile ama jong anom tai. nilhah lang hin ka kipat doh lhonin Mary te kho lang chu kajon lhon tan ahile jan, 6:00pm hin ka galhung lhonin ahi.
Mary te in ka galut lhon tan ahile Mary’n,
MARY: “heu Boilen, nahung lhon ham? hung tou lhon o,” atin katou lhon tai.

hitichun katou lhonin ka kihoulim lim uvin ahi. keini hi kile dinga che kahi lhonin ahi. chance aum le Mary kom a lungset nathu sei ding, jan lang le kinung le ding kiti chu apan eidalha mong mong tapovin, apa hel a che toh ka kilou lhon tan ahi. ahoulim chula ngathei talou, apa hi adeh tol ahi. chuphat in ken jong idea khat kahin geldoh tan ahi.
kaloipa amal kathim se pih in ajah ah olchan, “Baii, apa khu ve o, adeh tol dan khu, adeh pang a khun 123 te kijih leh one thousand chan beh dol inte”
hitichun kaloipa kathim seipih in ahile achuti nui tan anga thei tapon ahi. apa deh pang chu ave jin achuti nui tan ahi. apa chula kavet le, ki jong mat thim khat ham kiheh le le jeng, tou thim thei talou. ajo jona chun ading doh in, “Boilen, nang ho nomin ana kihoulim uvo, kei kholai a kache nading khat aume,” atin apot doh tan ahi.
ken la kalungthim a, “che chubah kihol hichume,” katin Mary kahin jol pan tai.

KEIMA: “Mary, namel kamu ni a pat in kalunglaiya nacham jinge, sun tin jan tin nang gelnan hinkho kamang jinge, theng tah in sei jebg leng ken nang kalungset e. Mary, nagelthei ding leh kalungset nahi nei san pih in.”
MARY: “heu Boilen, kiphatlam aum e, kei pen pen lungset nei chan. among mong a jong dongma nai dinga ka kum chapang val nalaiye.”
KEIMA: “Mary, ahipoi kalungset nahi neisan pih in. lungset nan hou le vai akhan pon, lungset nan han le don dong akhan poi.”
MARY: “heu Boilen, ipi hijong le phat chomkhat nei ngah o.”

kaloipa kaven ahile tapsah, khang pheiya chun akijam in eithim nuisat sat jengin ahi. chuphat in thuchom chom in ka houlim kit tan ahi. Mary’n phat chomkhat eingah in ati jeh chun, aki che kit lang leh aban kijom kit tante tin ka gel tan ahi.
jan jong asot tan mangpha kahung kithot uvin, keini jong inlam jon dingin kahung kipat doh lhon tan ahi.
_*banjom kit ding.*_

_*Lunglut tah a nei simpeh jeh in ka kipah e. Pathen in phatthei naboh hen.*_

_*Keima-Lelen Kipgen.*_
7629033890

*Published by.*

*THUSIMBU WHATSAPP GROUP.*

Previous articleNAMPI KOTKHAH BUL(6)
Next articleNUIBOM 13