A in–go sangin agam–go ngai puldou nan kadim ji.
Lelen Kipgen.
__________________
Somasa banjom.
Jan jong asot tan, mangpha kahung kithot uvin kei ni jong inlam jon dingin kahung kipat doh lhon tan ahi.
Lam gamlha ahi jeh chun khovah kon langin in kalhung lhonin ahi. Mary kadei, kangai, kalungset jeh chun lam gamlha jong leh che kit ding chu ka ngap lel hih beh jengin ahi. kalhun lhonin nom in ka emu lhonin, ajing nilhah leh che kit dingin ka kigel lha lhon tan ahi.
sun in, nom in ka kichol lhonin nilhah langin Mary hel dingin Sahei lang kajon kit lhon tan ahi. khojin kon in ka galhung lhon in, insung kalut lhon le anu le apa toh ana toukhom uvin, apa in kei ni eimu mu lhon chun ading doh in kholai lang ajon jel tan ahi. chuin anu le Mary toh ka tou khom uvin, ka kihoulim lim kit taovin ahi. chomkhat jouvin anu jong kholai leng dingin ache doh kit tan ahi. chuin ken jong Mary jah ah lungset nathu kahinsei pan kit tai.
KEIMA: “Mary, janlhah a nakom a lungset nathu kasei chu neisan pih jeng tan. nei lungset lou ding kanom thei poi. ang danga napah ding kaphal thei poi. lungset tah in kalungset e neiti jeng tan.”
MARY: “heu Boilen, lungset na hi koi jouse kimoh pih pih thei lou ahi. kalungset e, hijong le khonung leh gebthei na,lhilon na hung hikha ding ham tin lungset hinkho a hin kalut ngam ji poi.”
KEIMA: “Mary, nei songlel hih in, ka lungset nahi lunglaigil a kon lungset thengsel ahi. ven nei lungset pouleh na kimvel a pal bangin kisong jing na nge. phat tin in na kipasah jing ingting nalhi lon sah ponge.”
MARY: “heu Boilen, chu chan geiya nei lungset ahi leh ken jong kahin lungset e.”
hitia ka kihou lai lhon in, tapsah khang pheiya kijam kaloipa chu ahung kithou doh in, “ahem,,, kei a withness ding kahi chuo.” ahin tin ahile kanui khom taovin ahi.
kalungset pen Mary’n kalungset na eisan pih chu kipanan kadim in, ajeh bei keiyin kamoh me me jeng tan ahi. Mary kadei kalungset jeh chun, a voh nou hou kamu jong leh kamoh lungset’set jeng tan ahi.
hitichun nomtah in ka kihoulim lim uvin ahile jan asot tan, kei ni jong inlam jon dingin kahung kipat doh kit lhon tan ahi.
lam lhung kei chun kipa nan kadim in kamoh nui nui jin ahi. hiche pat tah kalungel a chun, cha ejat hamkhat kanei lhonin, ka incheng lheh lhon tan ahi.
hitichun phat ong kanei seh in Mary ka gavil jing tan ahi. abang le kagolpa toh kache ji lhonin abang leh ka chang in kache jin ahi.
lungdei nu mel mu nading ahipou leh lam gamlha hen lang kichat tijat na um jong leh, jan muthim nui hijong le kache jing tan ahi.
abang ni le kahung kile ngap lou phat leh kahung geh den jin ahi.
Abang kom leh ni–ni nithum kahung um den jin anu le apa natoh in kahin kithopi jin ahi. hijeh chun anu le apa homtho ka chang in ka insung bang bangin ka um thei in ahi. hitia kaum jing phat chun amahon jong a insung mi bangin eigel uvin, anaote hon jong eingai ji lheh uvin ahi. insunga naosen banga kisen sah hinkho mang jing nalai pa, natoh ipi ham jong hepha lou pa chu Mary ngailut na jal chun atoh jouseu chu bolthei bolmo umlouvin kabol jing tan ahi.
Hitia kaum jing phat chun ka inkoten jong ka dongma nei ahin he doh taovin ahi. ahin lah ema chu asei deh pouve. ka khosung uva nungah khat “Helam” kiti nu hin aguh in ei deicha jingin ahi. ahinlah ken kahet lou jong ahipon, he nasa a ka kihetmo sah ji ahi. chule ama hi ka pute chanu jong ahi kit e. amel vet ding chun ahoi lheh jeng in ahi. aumchan akhan chan mi seiphat achang jingin, khosunga nungah lah a jong mi vet jui thei tah khat jong ahi.
Lenpi loi leh gol hon asei jiuve,” ebola hibang mi melhoi mipha khu nadei lou ham?” tin eidong jiuve. amelhoi nai, achon chan akhan chan apha lheh nai. hijong leh ka pute chanu ahi jeh a ka gelthei him him lou ahi. mi tampin pute chanu pute chanu eti jiuvin, ahinai pute chanu chu khankho dol a kichenpi thei ahi nai. ahinlah kanu hi nungsang ngailu ahijeh in ka pute toh insung khat bang bangin kaum uvin ahi. Helam jong ka neo lhon a kipat ucha banga hung khang len khom kahi jeh lhonin, kahung nungah kahung golhan jou lhon a jong ka naonu banga kagel a, kingai pi ding kichen pi ding chu kagel thei him him lou ahi.
Aman vang eijui jing in ahi. jingkal nilhah in ahung vah lut jingin, a insung bangin agelin ahi. ken jong ka penpi kanao bangi “Nao,” tin ka kou jie. abang leh ka kinah pi jin, abang leh ka kitot pi jin ahi.
Insung miten ka dongma nei ahet phat uvin, kaphat atam jo Helam toh ka umkhom nading in eibol jing taovin ahi. ahinlah kei vang Mary ngaiyin hinkho kamang jing in ahi. thilkhat kabol ding jong leh Helam toh kahin bol khom jing lhon tan, che nading khat aum jong le Helam toh kache khom jing lhon tan ahi. Helam jong kalungset, kadei da poi Mary toh lungset dihtah a kilungset kahijeh lhon leh, Helam kanao banga kagel jeh chun kagel thei pon ahi.
nikhat na nun joulei a Helam toh kolbu po dingin eisol kit lhon tan ahi. nidanga ka kivop lhon bangin ka kivop pin ahi. ama vang nidang toh abang tapon, seinom khat nei hile akilom lheh e. ahinlah thudang dang in kahou pi jin ahi. kolbu ka sat lhon in, ka sat chai jou lhon in buh sunga kolbu hoh ho chu ka khe lhon in ahi. thil chom chom kasei in ahile aham nom tapon ahi. chom khat jouvin kajah ah,
HELAM: “heu Boilen, numei hinkho hi ahah val e.”
KEIMA: “nao, ahah nati dan chu ipi lamdol a ong?”
HELAM: “nahet chula, pasal le numei akibah lou dan, pasal hi mikhat nadei na ngaiyu jong le najol jeng thei uva, numei hi…”
hitia ahin sei phat chun ken jong,
KEIMA: “nao, na na kaisang lheh tai. koi na ki star ham? lungneo hih ta na upa kei kaum chu, nadei nangai aum le kei toh eki tho ding ahi.”
hiti chun nui pumin athusei achom beh in ka hei doh pih kit tan ahile, ama jong nui mo sa san anuiyin, ema asei tapoi.
hitichun inlam kahin jon lhon tai.
Phat le nikho jong het man lou kah in achalin, ka upa’n jong ji anei tai.
Nilhah khat hi kanu ka room a ahung lut in, ka kom ah atouvin kajah ah,
KANU: “Boi, min asei le nang hin dongma aneiye atiuvin, nanei tah beh ham?”
hitia eidoh phat chun, ken jong ka im thei tapon,
KEIMA: “henge kaneiye, aset na um em heno?”
KANU: “aum deh poi, hijong le boi, kei lungel a chu na pute chanu jong hija Helam na kidei pih keiya, hijong le boi phaten kigel in khonung le na kisih nalou dingin.”
tin eidalha tai. kei jong ka kigelin Mary toh kikhen ding vang kagel thei him him pon ahi. ka sen golngai khat jong ahin, kei man kadei kalungset tah a ka kingai pi ahijeh chun kanu thusei chu ka gelthei pon ahi. lenpi gol le pai hon jong asei jiuve, hinlah ken vang *IN–GO LE GAM–GO* ka te thei pon ahi.
Mary toh ka kingai nalhon jong asot lheh tan, kum thum, kum li lam alhing tan ahi.
hitichun kei jong Mary te in a ka ga um jin, louvat ema in ka kitho pi jin ahi.
Nikhat hi angai bangin Mary te in a kache kit tan ahile, louvat a gam a age ding dan aseiyin, kei jong alou vat’u kithopi ding tin anung’u kajui tan ahi.
Thinglhang a cheng hon ehet diu ahi. lou gamlha akivat kum leh gam a ki geh ji a, hitia chu lou kivat ji ahi. keiho jong anu le apa toh anao pa toh ka geh taovin ahi.
hitichun lou ka vat uvin kalel ji lheh e. ahinlah kalungset nu toh tong khom, ne khom kahijeh chun gim ingting chol jong leng thanom tah in na katongin ahi.
ka ge naova katui neh uchu, Si ahi. nilhah natoh kangah phat uleh Mary toh hiche Si achun tui thal in kache ji lhonin ahi. nilhah khat hi Mary hiche Si achun ki sutheng dingin ache tan ahi. jan lang hin ahung dammo tan ahi. anat dan chu kalung’u adong tan, ajan janin inlanga kahin podoh taovin ahi.
In kalhun uvin natong aki hijeh chun kavon ho anen in, von khel kilah dingin ajan jan in inlang kahin jonin ahi. kahung hung in ahile ka masang langa hin mi kihoulim ka ja jin, kilhon pi ding tin kahin del jin hat thim thim a kahung ji vang in koima ka mu pha chom ji pon ahi. hitichun hat thimin kahung in ahile, lam gamtha tah chu chom lou kah in kahung lhung in ahi.
In kalhun chun lampia kathil to chu kalung anom tapon, ajan jan a nung che ding katile kachang in kache nom kit tapon ahi. “Mary hi ipi atidem? ana phadom nadem ole aha nat cheh cheh khadem?” tin lungim tah in ka tou khovah tan ahi.
Jingkal khovah then thenin ka kipat doh in kache kit tai.
kino thim tah in kachen ahile matah in ka galhung in ahi. kalhun le lamka lang hospital a poh dinga ana gut laitah’u ka gatoh in ahi.
ama jong ana lel lheh in ahin houpi thei ana hitai.
chuin ken jong alup na lang ka nai pheiyin ajah ah,
KEIMA: “Mary, na phat hinam nao, hoilai na thoh lel ham?”
tin kadongin ahile ham lel sa san eihin donbut in,
MARY: “umm, ka pha dom tai, heu Boilen, ebola tujan in langa nache ham?”
KEIMA: “kavon ho nen thei val a von khel ding ka ga kilah ahi. tukal ka dalhah lou ding nahi tah chuo, lungmong selin um inlang…”
MARY: “heu Boilen, hospital a poh ding eitiuve. nang in jong in jui tang o.”
KEIMA: “umm, kahin jui ding nahiye, lungmong selin um ta ka dalhah lou ding chu.”
hiti chun ka kihou lhonin, ama jong alel jeh chun a emu kit tan ahi.
banjom kit ding.
Lunglut tah a nei simpeh jeh in ka kipah e. Pathen in phatthei naboh hen.
Keima–Lelen Kipgen.
7629033890
