Base on a True life story
Narrated to me by her and reproduced by me in written…….
-S Thangjakap Haokip
Lha ijat hamkhat jou a DM College a kanaote kai khat kimu pidia kaga che le lonlhin thonggo bang in kati pumpim eichup jing in kalung gel alamdang sah mama jing e. College campus sung kavet leh kalhi amoh pot pot jing in ahi. Mun tin a students umho chu kavet leh kum 3 sung a hiche campus a kahin kho man ho chu aban ban chan kalung a ahung kilang doh jing e. Thingna ho kavetle ipi ham kageldoh in , touna mun ho kavetle kalung ahal in , ground kavet leh sports lai eigel doh sah in , auditorium kavet leh functions kiman lai eigel doh sah kit in , kalung ahal ma ma jing in kalhi ava chut chut jing in ahi. Ajeh chu hiche ho jouse chun kaloi ho pasal Lelen kiti khat athah beh in eihin geldoh sah in , kum 3 sung kahinkho man ho avel vel in eigel doh sah kit in ahi. Kahin kho kum 3 sung a kana toh kakhanghoi laile kalen noplai nikho DM College , Manipur a kana experience neo khat lungmit a hung kilang ho kagah sei nom e.
Kum 3 lampi Gollhang khat toh kahung kivop in hinla tu ni chan in kakinep na lenpen chuleh nungah hina jal a ama a kon a ka expect jing chu kachang jou tapon ahi.DM college a kakai lai in Lelen kiti ka classmate ho khat toh loile pai in kana kivop hun in , hita chun hinkho kana mang bom hon in kahin kho asunom lheh jing in ahi e. Lelen hi sadar hills lang a kon ahin Imphal a DM a graduation bollai chuleh adimjati ST boys hostel a pansa ji ahie. Lelen te vang a inncheng beh pouvin anu leh apan hahtah a thinglhang lou abol hun a lekha asimsah hon ahi e. Tahsa melput lam a seidin Lelen hi khutia mi melhoi tah pasal vang ahipon ,mivom ahin ,kei sang in themkhat height lampang a anem jon,ahin amihina hohi pasal dang toh tekah hoi ahipoe. Lelen hi mi kineosah, kiphatlam se ,lekhasim gunchu ,mi kitah chuleh Pathen ging jing a hinkho mang gollhang khat ahi e. Kei hi kahileh New Lambulane a pansa kahin ,kapa hi business bol mi ahin , kanu ahileh govt college a lecturer ahi e. Inchen lampang a seidin Pathen lungset in ka inn cheng thou uve.
Keijong gampang tichu Delhi a graduation boldin kanu le kapan eiphat sah in hinla inn kadalhah ngap lou jeh in DM a admit kakibol in ahi. Hilai mun a kon a chu Lelen toh kahung kihetdoh hun a hitia chu loile pai best friend kana hi hun ahi e. Keini kikal a chun secret imacha aumthei pon, ken jong golhang hon eihel phatle ama kom a ka share jin , chuti ma chun Lelen in jong a nungah hel thu ho kei kom a ahin sei ji in ahi. Neile gou chuleh innchen lampang a keini kikah sunle jaan abah jing vang in , hichun ka friendship relation hun chu ima asuboi pon ahi. Kamihina khat chu keijong neile gou kanu kapan tampi anei vang in kisonnan kanei pon , loilepai hotoh hitachun kakivop jiuvin , amaho chondan dan in kachon jin , amaho neh neh kanejin hitachun college life chu kana enjoy uvin ahi. Ka college life chu Lelen in asunom lheh jing in , tua DM akiti pou pouleh amasa oen in kalung mit in Lelen ahung kilang jin ahi. Adeh a Imphal sung a kagava doh phatle lonlhin eichup ji e , masang a Lelen toh kanop lenbom laini ho lungmit in ahung kilang doh jin phatchesa ho eigel doh sah jin ahi.
Kum ijat ham khat loile pai bang in Lelen toh kahung kivop hon tan, hiche sung chun loile pai hinkho nomtah kana mangbom hun in ahi. Ahin hitia hinkho kahin mangbom hunchu phat le ni ahung chal toh lhon in kei ni kikal a seitheilou relation khat ahung umtan ahi. Keijong kingaipi neilou a kaum pet chuleh Lelen in jong dongma anei lou pet ahi e. Athim thim in ka ki friendship na hun chu friendship limit ahin khel tan, ahung thuh lheh kigo tan ahi. Ken vang Lelen chu lungset na kahin chantan ahi ; ahinla numei kahijeh in Lungset thimthu gah pat masat di chula numei akihijeh in kaki oi thim hih in hita chun kaki moh tan den tan ahi. Chuleh Lelen umchan holeh eikhohsah dan ho kavet leh aman jong Lungset na eichan ahi tae ti chu akichen lheh jing in ahi. Ahin Lelen in kakom a Lungset thimthu kiti him him ahin lal tapon , phat sotpi a pet kana ngah
Jing kinepna chu athon in aum kigo tan ahi.
Hitachun hinkho ahung kimang in kum 3 college life chu akichai lam kahe man pon final year jong ahung kichai kigo tan ahi. Hitia akium jing lai Chomkhat jou in Lelen in eihin ignore pan tan , chukeo hilou in nidang a kivah khom ji kinekhom ji chu tun hitobang ho bolna din kei din phat ahin pe nom ta pon ahi. Keichula kangai mong mong tan graduation ahung kichai dichu kamoh dat thei kit ta pon ahi. Hitia akium jinglai chun loile paite dangho chula kiki khen vah tading tin golnop picnic chuleh party ho abol jiuvin hinla Lelen vang hiche ho lampang chu ima agel ta pon ahi. Nidang a hibang a kikivop a itia chomkah lou a hitia hu hung kimoh khel jing ahidem tihi kalung adong lheh jing tan ahi.
Boina ipi anei ham , kachung a ipi lungnop mo na anei ham ti vang kahepon , hinla Lungset thimthu kakom a sei lou in eidalhah kigo tan ahi. Oleba Lelen hin kanei kagou chuleh ka innchen u ama atoh avet kah leh Lungset thimthu laldi chu kisonglal ngap ahidem ? Ahiloule Lungset thimthu hinlal leh ken kasan peh lou di ahisah ahi dem ? Ahiloule kingaipi dang aneijeh a eithim dalhah kigot ahi tadem ? Hichula katahsan pon ajeh chu tuchan in Lelen in dongma kingaipi anei po e ti kahe kit ngal e.Ahin tua kalung don na chu ibol a LUNGSET THIMTHU lal man lou a hitia hi eimoh dalhah kigot jing ahidem ?
