Home Crosby Haokip I-KIMU KIT KAHSEN-3

I-KIMU KIT KAHSEN-3

41
0

Published by Thusimbu

Crosby HaokipConvenor KWC

Pathenin nang naumpi jing hen

PART 3

Kuki Love Story

Che dinga kakigel vangin MA semester exam kanei kit jehin lungdon nan kadim tan ahi. Semester exam kanei na ding u lhakhat bou avat tan, lekha hoitaha sim lou thei kahi kit poi. Hijeh chun kalung akika den jengin, che le che lou ding kagel mo hel tai. Che nom jong leng exam anai tah jehin kanu le kapan eiphal tah ding katahsan poi. Hijeh chun lungdon nan kadimin kaboi lheh tan ahi.

Chuin nikhat kenjong kanu koma,
KEIMA: “Henu, kani te kho langa ga che kit tange.”
CHUNNU: “Boi, na-exam nai hitalou ham?”
KEIMA: “Ka-exam vang chu anai thou tai. Hijongle henu, kache louthei ahipoi.”
CHUNNU: “Boi, ipi thu mong mong um ham?” atin eidong tan, ahinlah kanu koma kasei ngam pon ahi. Hijeh chun lunggim nan kadim tai. Kanun Hoineng toh kakingai lhon ahet doh sangin katin, chuphatin kanu koma kaseiyin,
KEIMA: “Henu, che da tange. Lekha joh hoitahin kisim tange,” katile kanun kajah a,

CHUNNU: “Henge boi, lekha joh hoitahin sim tan, ajole fail khan nate,” atin kenjong kanu sei kangaiyin che lou din kaum tai. Ahinlah kalung anom thei chom pon; lekha kasim thei deh pon ahi. Chuleh Hoineng toh kilungset hinkho mang khom kahi tah jehin, kangaiyin agenthei ding kanom pon ahi. Tua kei eingaiya lunghel taha hinkho aman kagelleh kapona lheh jenge. Che a galhep lung mong ding kanom lheh jenge. Hijongle exam anaitah jehin che lou din kaum tan, chuleh kache ding kanun jong aphatsah pon ahi. Hijeh chun lekhasim thei chom louvin hinkho kamang tan ahi.

Nikhat hi kanun eihin kouvin kajah a,
CHUNNU: “Boi, kakoma atheng thengin seiyin, Hoineng toh nakingai ham?” atin eidong kit tan ahile, kanu koma ka-im jou tapon kaseidoh jeng tan ahi. Chuin kenjong kanu koma,
KEIMA: “Henu, aman jong eilungset val jehin kakingai lhon taʼe.”
CHUNNU: “Ahile, ibola kajah a na-im ham?”
KEIMA: “Henu, neingaidamin, ajeh chu nalunghang ding ham kati ahi.”
CHUNNU: “Boi, tua ipi iti ding hitam? Nani nun phone eihin bolin, Hoineng adam pon nang nahol hol jenge. Khatvei hijongleh hung kimupi hen, tin aseiye,” ati phatin keijong lungdon nan kadim tan ahi. Chuphatin kanun kajah a, “Boi, chen lang aphat phat nan ga houpi tan. Ihamtin hung boi leh themmo ichan diu ahi,” atin, kache ding kanun eiphatsah phatin keijong kache tai. Chuin keijong jingkah matahin kache tan ahi.

Kani te kho kalhunin amasapen in kani koma kache tan ahi. Chuin kani toh Hoineng te in a kache lhon tan ahi. A-in u kalhunin anuneovin hoitahin eina lem e. Chuin keijong room sunga kalut tan ahile, kalungset Hoineng chu lupna a amit a lonlhi long pumin drip ana kikhaiyin, kamu mu chun kalungset valin kalhisoh tan ahi. Chuin kenjong ponnem khat kalan amitlhi ol ol in katheh peh tan ahi. Chuin anuneovin pindan chom langa eipuiyin eikihoupin kajah a,
ANUNEO: “Minlal, Hoineng hinkho man ding dan kagelleh lhasetnan kadime. Keihon kalhep jou tahih uva le nang khoh tah a kahin kou nahiye. Aman nahin ngai valin namin phah phah jeng phat a kahin kou nahi.”
KEIMA: “Henu, akhoh hih e. Kenjong aboi dung juiyin boipi nange.”
ANUNEO: “Minlal, nanao Hoineng hi damsot lou ding ahin, lungmong taha ache thei na din nangin lhamon inlang kingai pi jing o. Adamsung ni chom cha hijongleh kipahtahin hinkho man sah u hite,” atin ahile, kapona valin kalhisoh tan ahi. Chuin keiman ajah a,
KEIMA: “Henu, lunggim hih uvin, keiman kakijen dam thou thou ding ahi. Kajen dam ding kakichen pi ding ahi. Hinkho Pakai khut a um bou ahi.”
ANUNEO: “Ahinai, hijongle damsot dingin koiman katahsan tapouve.”
KEIMA: “Henu, lunggim hih’in, keiman hoitaha kakijen dam ding ahi,” kati laitahin Hoineng ahung kap in, “Henu! Henu! Heni! Heni!” atin ahile, keinin jong kadellut lhon tai. Chuin aninun ajah a, “Boi, ven, na-u Minlal ahung tai,” atin ahile, amanjong hoitahin eihin ven alhisohin kajah a,
HOINENG: “Heu, itiha nahung ham?”
KEIMA: “Nao, tua chu kahung lhun pan ahi nalaiye. Dam loi loi ta-o nao,” katin nehthei kahin choh peh ho kala dohin kape tan ahi. Chuin amajong akipahin kajah a,
HOINENG: “Heu, kakipah e. Hung o ne khom hite,” atin chuin kenjong nehthei kalan kaneh sah tan ahi. Chuin kajah a, “Heu, kenjong kaneh sah ding,” atin nehthei khat alan eineh sah tan ahi. Chuin lupna chunga kakitot lhonin, kakichep khom pi tan ahi. Totna ho kaseipehin kalhamon tan ahi. Asun ajanin aninu toh kaumpi lhon tan ahile, ama jong ahung ol dom tan, che le vahle theiyin aum tan ahi.

Hoineng toh kakingai he khosung mite jouse chu keini hinkho pona lou koima aum pon ahi. Ajeh chu nikhat leh thinan eikhen tei lhon ding aheuvin, alung na cheh uvin ahi. Ahinlah keini kilungsetna vang asang cheh cheh tan, keijong ama koma kaum jing phatin moh ngaiyin kangai doh tan ahi. Kakichen lhon nailou vangin kaji bangin kagel tan, kangaina asang mong mong tan ahi. Choldo nitheng tengle Houin kaiyin kache khom un, khosung mipi hon keini hinkho man amu teng uleh guhthim a alhi kitheh lou koima aum pon ahi.

Nikhat jong hi Pathen-ni jingkah kaikhom in Hoineng a dingin maicham kasem tauvin ahi. Chuin Hoineng in ladeilhen khat anei jeh chun kading khom uvin kasa tauve. Amajong sottah adam ding kitahsan lou hitan tin ala jong “I-KIMU KIT KAHSEN” kiti Houbung la alhengin kasa tauve. Kasa tauvin:

  
Pathen’in nang na umpi jing’in,
Chonna ding chan nahil jing’in;
Ahon lah-a naching jing’in,
Pathen’in umpin kimu kahsen.”

“I-kimu kit kahsen,
Jesu keng khopi muh a;
I-kimu kit kahsen,
Pathen’in umpin kimu kahsen........ ”



Chutia la kasah laitah uvin kapona val uvin alhisoh lou koima aum pon ahi. Athu um dan hoitaha kagelleh kalungset Hoineng hi adam dinga kihollou ahitai, ti kahe themin pohnat na sang tah kaneiyin ahi. Ahinlah amakoma, nadam tei tei ding ahi, katin kalhamon jin ahi.

Nikhat Hoineng in kajah a,
HOINENG: “Heu, hung o, ikimuto naji munʼa che hite,” atin ahile kenjong ajah a,
KEIMA: “Nao, ibola em? Na damlou toh pot sao da hite.”
HOINENG: “Heu, hung o che hite. Kahung ahel vale, heu,” atin alhisoh in, kenjong kapohnat jeh chun kapui tan ahi. Chuin hamhing chunga chun nom tahin katou lhonin kakihoulim lhonin ahi. Chuin aman kajah a, “Heu, chomkhat hijongle nomtahin leng khom hite.”
KEIMA: “Nao, nang kei dalha a hoilanga nache got ham?” katile alhisoh in, chuin aman kajah a,
HOINENG: “Heu, kahinkho man hi lhasetnan kadim e. Iti nang dalhaa hinkho kaman mong mong ding ham?” atin chuin kachunga akingaiyin kajah a, “Heu, neilungset mong mong hinam?”
KEIMA: “Nao, kahin lungset jinge. Kahin lungsetna asang cheh cheh e.”
HOINENG: “Heu, kei beiya hinkho naman theiyem?”
KEIMA: “Nang louvin hinkho mang jou ponge, nao.”
HOINENG: “Heu, neilungset a kakoma nahung jehin kakipahe. Keiman kahin dalhah tengleh vang lung mong tahin anaum tang-o,” atin ahile kapona valin,
KEIMA: “Nao, ken bon nakidalha jou louva, itia nangin dalhah ding nei got ham?” HOINENG: “Heu, kingai lheh lhon jongle hen kikhen lou thei ihipoi,” atin ahile kangaiyin kapona val tan ahi.
KEIMA: “Nao, damlai hinkho a kikhen kang loudinga nei lungset hilou ham ong?”
HOINENG: “Heu, hichu kei dei ahi. Hijongle kei hinkho toh abang tapoi.”

KEIMA: “Nao, chutia i-kikhen thou thou lhon ding ahile kei tunin kile tange,” katile anom pon,
HOINENG: “Heu, kanom poi. Chomcha hijongle nomtahin hinkho nei man khompi o,” atin ahinlah kalungnat val jeh chun kading doh tan ahi. Ahinlah eikoiyin kachunga akikhai jengin akaptan ahi. Chuin kenjong,
KEIMA: “Nao, dalhah ding nei ti hilou ham? Ibola kanung naka nalai ham?” katile kap pum pumin kajah a,

HOINENG: “Heu, kalungset lou nahi poi. Kahinsot tah louding jeh a kasei ahi. Kadamsung phat chom cha hi nang toh nom a hinkho man khomna din chom kasa lheh e. Hijeh chun lungset tahin nei dalha hih o,” atin akap tan ahile, kapona valin ajah a,
KEIMA: “Nao, koiham damsot tapon nate, tia nakoma sei chu. Keiman house nange. Ibola thu hetoh louva aseiyu ham?” katin kakitom tan ahile Hoineng in eituhin eikoiyin kajah a,

HOINENG: “Heu, pha tante. Nang le kei themmona ahipoi,” atin chuin kakoma, “Heu, doctor hon Blood cancer naneiye, eitiuve,” ati chun kakikoi lhonin kakap cheh lhon tan ahi. Chuin ajah a,
KEIMA: “Nao, amahon ahet lou aseiyu ahi. Lunggim hih’in. Hinkho hi Pakai khutʼa um ahibouve.”
HOINENG: “Heu, keijong kathi nom poi.” KEIMA: “Nao, nathi thei louding ahi. Thi pon nate, kakoma naum jing ding ahi,” katin kalhemin ahile, amajong akipahin ahung nuiyin,
HOINENG: “Heu, kikhen po hite na? Kahin ngaiye.”
KEIMA: “Henge, eini kikhen thei ding ihi lhon poi.”
HOINENG: “Heu, nei pom o,” atin kenjong kapom tan ahi. Chuin kachunga sottah a-ihmu in, ama kachunga a-ihmut sungin kei lonlhin kalong tan ahi. Kamitlhi achunga achuh tengleh ahung kin khang jin, sottah a-ihmun ahi. Nilhah langin keinin jong inlang kahin jon lhontai.

Nikhat nom taha ankong kaum khom pet uvin Hoineng in keiho koma, “Heu, kadam ding ahitan keijong Lamka langa school kakai nom e,” atin ahile, anuneovin jong, “Boi, na-u Minlal toh Lamka langa school nakai khom lhon ding ahi,” atin amajong akipahin ahi. An kaneh chaiyuvin Hoineng in Bible sim khom dingin room langa eipuiyin kasim lhon tan ahi. Chuin kasim lhon tan ahile, Hoineng in kajah a,
HOINENG: “Heu, Vangam nop dan neisei peh o,” atin ahile kenjong Revelation 21 sung kasim peh in kahil tan ahi. Chuin aman kajah a, “Heu, koi koi Vangam a che ding ham?”
KEIMA: “Achonset kisih a Pakai Jesu tahsan chan chu huhhing a um ding ahi.”
HOINENG: “Heu, keijong kache thei dem?”
KEIMA: “Nang le kei, tahsan chate se se Vangama iche diu ahi,” katile athanomin kajah a,
HOINENG: “Heu, eini jong che ta hite. Kache nom tai. Ahinlah kachangin kache nom poi. Eini che khom hite.”
KEIMA: “Nao, eini ithanop man lhonʼa iche thei ahipoi. Nikhat leh Pakaiyin eihin kou lhonin tin, chuni tengleh iche ding ahi.” HOINENG: “Heu, kamang tengle koi ham khatin eikou jing e,” atin ahile anu le apan akou kou ahitai, ti kahen, kaponan kenjong,
KEIMA: “Nao, avela nahin kou kit teng uleh nom hih ta-o. Nanop leh eini ikikhen tei ding ahi.”
HOINENG: “Heu, nom ponge. Eini vang kikhen po hite. Kahin ngaiye,” atin chuin taona kamang lhonin ka-ihmut sah tan ahi.

Nikhat sun’in Hoineng toh thei thuh kane lhonin nom tahin kakihoulim lhonin ahile aman kajah a, “Heu, tulah Vangam kangaiyin kalung ahel cheh cheh e,” atin mihem hi nan vang lungdon nan kadim tan ahi.
KEIMA: “Nao, nikhat leh iche diu ahi. Lung mong tahin um in.”
HOINENG: “Heu, idamlai sung lhonin Pakai vahchoi jing hitin, Ama deilamin hinkho mang hi te.”
KEIMA: “Henge, Pakaiya kingai jing hite.”
HOINENG: “Heu, Christa a Hinna kanei phatʼin kipana kaneiyin, hitobang kipana hi kanei khapoi,” atin ahile Hoineng in Penthahna anei ahi kahe chen tan, lungmonna kanei tan ahi. Ajeh chu tun thi jongleh alhagao genthei talouva, noma Pa koma choldo ding ahitai, ti kahen lungmonna kaneiyin ahi. Ahinlah tahsa hinan vang amatoh kikhen ding kagelleh kakap jin kangai val jin ahi. Hijongle hinkho hi Pakaiya ahijehin keiman ima kalo thei poi.

Hichun Hoineng in kajah a, “English paovin la khat sa hite,” atin labu a phong doh tan ahi. Chuin aman kajah a, “Heu, ken kahin sah masat ding chu o. Hin ngai tang o,” atin asa tan ahi.
Chuin aman lunglut tahin asan,

  
God be with you till we meet again,
By His counsels guide, uphold you,
With His wing securely fold you,
God be with you till we meet again.

Till we meet, till we meet,
Till we meet at Jesus’ feet;
Till we meet, till we meet,
God be with you till we meet again.......



Alasah chu kangaiyin kalungsetna asang cheh cheh jeng tan ahi. Chuin kenjong ajah a,
KEIMA: “Nao, ibola hiche la hi na deilhen ji ham?”
HOINENG: “Heu, athu hi gil kasa valin kangainom e.”
KEIMA: “Nao, kalung sung natong kha ji vale. Kahin lungsetna asang cheh cheh jenge.”
HOINENG: “Heu, kenjong kahin ngaiye. Nom tahin hinkho mang khom hite. Nang koma kaum manʼa lung mong kahiye.”
KEIMA: “Thusim nei seipeh o,” atin ahile kenjong thusim kaseipeh tan ahi.

Hoineng in keiho koma, “Maicham niseh leh sem u hite,” ati jehin keihon jong nisehin maicham kasem jing tauve. Maicham kasem teng uleha Bible simkhom din eingeh jingin, hijeh chun Bible kasim khom jing lhonin ahi. Taona le thumnan niseh le kachang lhon in Pakai kom kabel jing lhonin ahi. Amajalin keijong ichan hamkhat in kisemthahna kaneiyin ahi.

Keijong kaum na asot tan, ka-exam bol phat ahung lhin ding phatʼin che dingin kaum tan ahi. Chuin kenjong Hoineng koma, “Nao, exam bolʼin kei che tange,” katile alhisoh in, chuin kajah a,
HOINENG: “Heu, kei koma nahung kile kit ding hinam? Neihin nunglap nadem?”
KEIMA: “Kahung kile kit ding ahi. Kahung kile kit kahsen lung mong tahin um ta-o.” HOINENG: “Heu, nahung tengle kicheng ta hite,” atin ahile kalungset valin kenjong, KEIMA: “Henge nao, kahung kile tengleh ikichen ding ahitai,” katile amajong akipahin ahi.

Chuin keijong kahung tan ahile aman waiting shed chan eihung thahin, chuin kajah a, “Heu, IKIMU KIT KAHSEN Pathenʼin nang naum pi jing hen,” atin keijong lunghel tahin bus a katoudoh tan ahi. Bus jong ache tan, ahinlah hiche nia kakilhah lhon chu keini dinga leiset a kikhenni ahilam kahe doh pon ahi.

To be continued

Previous articleI-KIMU KIT KAHSEN-1
Next articleTHINGLHANG GAM

LEAVE A REPLY

Please enter your comment!
Please enter your name here