Home Crosby Haokip I-KIMU KIT KAHSEN-1

I-KIMU KIT KAHSEN-1

46
0

Published by Thusimbu

Crosby HaokipConvenor KWC

Pathenin nang naumpi jing hen

PART 1

Kuki Love Story

Nikhat keijong Tuibong bazaar a kachen Students’ Book Store a kaumlai tahin kani jong anaumin, kenjong kani kamu phat’in kahou paiyin,

KEIMA: “Heni, hilaiya ipi nabol ham?” tia kadoh chun kani jong akin jengin,

KANI: “Minlal, nanaote ho lekha kahung choh peh ahi. Nangla ipi nahung bol ham?”
KEIMA: “Jingvalpa tulha issue a kathusim jih ajao jeh a kahung kichoh ahiye.”
KANI: “Napontho vale boi,” atin; chuin kakoma, “Minlal, jingleh kakho lang uva hung tang o. Natute ho exam anai tan, kenla alekhasim u kaboipi joupon, exam abol sung uvin nangin hung umpi tan.”
KEIMA: “Henge heni, kanu le kapa toh hung kihouving ting, aphal uleh hung nange.”
KANI: “Henge boi, nahung lou leh kaboi tai. Nagangpa la jouleiya akon leh in le louva um man lou ahin, nang hungin lang nanaote ho hung vesui tan,” atin keijong kahung kile tai.

Kani thusei chu kanu le kapa koma kasei leh amanin jong aphatsah lhonʼin, hiti chun ajing maman kani toh Lamka a patʼin Sugnu bus in kahung tou lhon tai.

In kalhun lhonin kanaote hon waiting shed a eina ngah uvin; nehthei athum un kenjong katute ho abonchan nehthei kahop peh tai.

Ajing nikho, choldo nin kachangin in-a kaumin ahileh, nungah niʼn longkai ahin kipoh lhonin kajah a,

NUNGAH: “Heu, khutsip anchang dong a hung kahi lhon e,” ati lhonin, chuin kenjong kaven ahile, nungah khatnu chu kavet nomin hoi kasa lheh tan ahi. Aman jong jahcha tahin vengam lou sa san eihin ven, kenjong anchang kate peh lhonin amani jong ache lhon tai. Chuin amanun me seu seuvin eihin nung vetin ahileh, nervous nan kadim tan ahi. Chuleh dongma nei kha nailou kahijehin dongma nei anop le ahah jong kahe poi. Hijongle gollhang khat ihi jala chu dongma nei ding kathanom lheh tan, chutia lung kagel laitah a amanu kamu chun kalungthim akipasahin, aman hepha hih jongleh kenvang lungset kahin chan tan ahi. Chuphatin keijong amanu munom na kadim tan, kimupia houpi ding kanom lheh tai. Ahinlah jachatnan kadim kit in houpi tah tah ding kangam kit pon ahi.

Nilhah ahung hitan Houin dah jong ahung ging tai. Hijeh chun keiho jong Houin kai din kakigong tauve; chuin kanaote le kani toh kabon uvin Houin lam kajon tauve. Houin sung kalut tauvin ahile, kagel gel nungah nu chun laphel anasep in, aloinu, ahin kilhon pi nu chun khong avon ahi. Chuin kenjong kakoma guitar um chu kalan kasai tai. Chuin amanun eihin ven, guhthimin, anuiyin ahile, keijong katha anom cheh cheh tan, kipat masangin guiter jang khat kasai tan tan ahi. Chuphatin kakiphatlam na asang kittan, hijongleh kasai tah jeh chun kikhop kichai chan kasai tan ahi.

Phat hom pan kipatna ahin sem tan, keiho jong kakipan tauve. Chuin phat hom pan, “Tun, vahchoila sa dingin nungah HOINENG lasa dingin ikouvuvin, amajong Pathen phattheiboh chang pumin aphat hin kilo tahen,” atin ahile, guhthima kalungset nungahnu chu ahitan, amajong mipi masanga lasa dingin ading tai. Chuphatin guiter sai ding atiuvin, mipin keilam ahinve cheh tauvin ahileh kajahcha valin kamai asan lha jeng tan ahi. Guiter kana sai khah jong kakisih lheh jenge.

Chutia mipin keilam ahinvet phat chun keijong kading dohin nungah nu koma chun kading tai. Ahinlah amel kave ngampon ka-guiter bou chu kave tai. Chuin kenjong amanu jah a olchan, “Ipi la nasah got ham?” tia kadoh leh, aman jong kajah a, “Heu, Nitin kachonna le kalunggel ho, kiti la kasah got ahi,” atin; chuin keijong kakipan in guiter kasai tan ahi. Ahinlah jachat nan kadim tan guiter key jat jat kahin sai doh tai. Guiter le la key ahung kito lou tengleh mipi ho anuiyun, anah nahin amanun jong asa lha tan, mai am leovin katouna kakijot tan ahi.

Speaker pa thusei patʼin aloinu toh akithim hou lhonin, keilam ahinve ji lhonin, ahinlah keivang chu kakihetmo sah tan ahi. Kikhenin keijong kaum denin nungahnu jah a,
KEIMA: “Nao, lasah nathem mong monge,” katin katot in ahile, amajong anuiyin, NUNGAH: “Kathem hih e heu, jachat aume. Ka-o lengval a kajahcha ahi,” atin; chuin kenjong,
KEIMA: “Nathep chula. Kenla hitobanga chu nasah doh dinga kaginchat lou ahi. Kei guiter sai thep lou jeh a na-o ngeilouva nahet ahi.”
NUNGAH: “Nang vang nathem sel-e. Nang behin tunilhah a guiter hoitaha nasai jehin kikhop anom chom e.”
KEIMA: “Kakipahe. Ahile nao, namin ipi ham?”
NUNGAH: “Heu, kamin HOINENG ahiye. Nangmin la ipi ham?”
KEIMA: “Nao, ‘Heu,ʼ tin neikou le chun ahi jenge,” katin kadaiyin ahile, anuija valin,
HOINENG: “Heu, namin tah tah kasei ahibouve. Heu, tin jong nakou nange. Hijongle namin neisei peh tang o.”
KEIMA: “Kamin, Minlal ahiye.”
HOINENG: “Heu, ikihetto lhon kakipah e. Nanao bangin neigelin lang kivop khom jing hite o,” atin kakipahin,
KEIMA: “Henge nao, kivop jing hite,” katin chuin Houin light kahin that lhonin kahung potdoh lhon tai. Chuin a-in uva kaga thahin keijong kipahtahin kaum na kahin jon tan ahi.

Khosunga chun school khat aumin amin jong, “BETHSAIDA ENGLISH HIGH SCHOOL” akitin, hiche school a chun Class X chan aumin, kani chate mithum jong akaiyun, chuleh Hoineng jong hiche school a chu Class X asim ahi. Kanao te ho jong exam bol ding ahitah jeh un jingkah nilhahin lekha kahil pan tai. Chuleh khosung mi kahi lou vangin midang hon jong eihin he tauvin, chuleh lekha lam a boina nei jouse jong ahung un kahil jiuve.

Chuin jingkah khat kani nun kakoma, “Minlal, nungah ni nang koma hung go lhona jahcha a polanga kisel lhon khu, chen lang gakipui lut o,” atin; keijong kache tai. Kachen ahileh, Hoineng le aloinun lekha ahin kichoi lhonʼa jahcha taha ache masa ding kise mo to-a anaum lhon chu kamun, kenjong amani koma, “Nao, hung lut lhon o,” katin amani jong ahung lut lhon tai. Chuin amanin kajah a, “Heu, maths neihil lhon o,” ati lhonin, kenjong maths kahil lhonin.

Ahinlah Hoineng vang hahdoh ngam louvin jachatnan adim tan ahi. Hoineng le aloinu jong nisehin kakoma lekhasim dingin ahung jing lhon tan ahi; achainan amani jong alung ngam lhon tan ahi.

Nikhat school bell jong aging tan, simlai chapang ho jong a-class room cheh uva alut tauve. Chujouvin keijong Houin langa kache tan ahi; chu muna chun Hoineng le aloinu anaum lhonin, lekha anasim lhonin ahi; kalung adongin, chuin keijong amani koma kachen ahile, eihin mu lhon chun houin nung langa akisel mang lhon tai; chuin kenjong tot pumin, “Nungah teni hung lhon o, kisel sel lhon hih in Taku ahat e,” katile nuija tahin ahung potdoh lhonin, chuin aloinun kajah a, “Heu, kaloinu, Hoinengin lekha neihilʼin, ati e,” atin anui lhonin, kenjong, “Hung lhon tang, nahil lhon nange,” katin amani jong ahung lhonin ahi. Chuin kenjong Hoineng jah a,
KEIMA: “Tuni ibola school nakai lhon lou ham?”
HOINENG: “Heu, tuni school suty kahi sah lhon ahi. Hijeh a chu thing po a kache lhon leh, school bell gin kajah lhona, chuphat a lekha kakilah lhona hilaiya lekha kasim lhon ahi.”
KEIMA: “O, nangni vang napontho lhon mong mong e,” katin; chuin Hoineng jah a, “Nao, na loinu min ipi ham?”
HOINENG: “THEMCY ahiye, heu,” atin ahile, aloinun eihin ve lhonin, amani amitin akithim hou lhonin, chuin kenjong amani koma,
KEIMA: “Nao, nang ni vang namel lhon ahoisel sel e,” katile ajahcha lhonin, chuin
Themcy in kajah a,
THEMCY: “Heu, kaloinu in nahin lungset e,” ati chun Hoineng jong ajahcha valin tol lang ave tan, kahet them jeh chun ajachat nalou din,
KEIMA: “Eiho u-cha kikilungset deh ta la. Kingailu taha ikivop khom diu ahi,” katin ahile, amajong ahung dah doh nah nahin, chuin kenjong amani lekha kahil tai. Hitichun Hoineng toh nom tahin sun nilhumin kakihou lhon tan ahi.

Jingkah khat Hoineng jong kakoma lekhasim din ahung kittan ahi. Chuin kenjong lekha kahil tan ahile, ama jong ahung lhisohin, chuin kenjong ajah a, “Nao, ibola nalhiso ham? Nadam lou ham?”
HOINENG: “Ima kati poi. Tuni hi kanu le kapa thini ahi,” atin; alhisoh tan ahi. Chuin kenjong kalhamonin,
KEIMA: “Nao, chaga genthei te Pathen um chula, ibola nalungneo ham? Chutia hahsa nasah leh na-u keima jong kaum nai.”
HOINENG: “Heu, tun kanu le kapa lhan a gache hite ong,” atin; kenjong kalungset jeh chun kanomin kache lhon tai.

Kache lhonin lhanmol kalhung lhon tan, chuin Hoineng in kajah a, “Heu, hiche hi henu le hepa lhan ahi,” atin; achunga thing na chule anen ho apaidohin asuthengin ahi. Chuin kenjong ajah a,
KEIMA: “Nao, henu le hepa itih kum a chu thi lhon hi tam?”
HOINENG: “Heu, kei neo lai ahitai. Hijongle tu chan hin kamil thei lhon poi.”
KEIMA: “Nao, lungset naum e. Hijongleh lung mong tahin umin lang hinkho phatahin hin mang o.”
HOINENG: “Heu, nanao bangin nei gelin lang, tua kanu le kapa lhan a kahin pui jong hi gelse hih o. Kahin vet leh nangin kalunggel hethem penin nate, katia nang kahin kitep nahi,” atin; chuin keini jong kahung kile lhonin, kho koma chun hamhing kena mun nom tah aumin, hichun Hoineng in kakoma, “Heu, khuche hamhing chunga khun chomkhat tou hite,” atin; keini jong katou lhon tai.

Chuin aman kajah a, “Heu, nang henu le hepa dam dam lhon hinam?”
KEIMA: “Nao, Pathen lungset in adam lhon nai.”
HOINENG: “Heu, nang vang navangpha e. Henu le hepa chu kamu nom lhon e.”
KEIMA: “Kakho lang uva kapui ding ham?”
HOINENG: “Heu, kathanom a, ahivanga kanu neo le kapa neo vin eiphal lou ding.” KEIMA: “Nikhat leh napui nange nao,” katin nomtahin kaum lhonin chuin inlam kahin jon lhon tan ahi.

Keiman guhthimin Hoineng kalungset lheh jengin, lungsetna thusei jeng ding kati jongleh kakisong kit pon, hijeh chun guhthim lungset puldou anai ti kahin tho tai. Amakoma kaum leh nom kasan phat che lam kahe ji pon ahi.

Nikhat Hoineng toh kakihou kit lhontan, nomtahin katouna mun lhon hamhing chunga chun kakihou kit lhon tai. Chuin aman kajah a,
HOINENG: “Heu, itih chan hilaiya naum ding ham?”
KEIMA: “Kanao te exam chai chan kaum ding ahi.”
HOINENG: “Heu, nang vang hinom naum e. Ajeh chu nomtaha town sunga naum-u.”
KEIMA: “Nao, kei thinglhang gam nom kasa jo-e.”
HOINENG: “Heu, nom nasah leh keiho khoa um den ta-o. Tua napotdoh ding vang
kagelleh hahsa kasa vale. Ajeh chu hitia ikivop jing lhonʼa patin kalung amongin kahin ngai doh ta-e.”
KEIMA: “Nao, kahung ji ji ding ahi. Lung mong tahin um in lang kahung ji tengleh ikivop ji ding ahi,” katin; kalhamon in ahi.

Hoineng in jong eilungset e , ti kahen, hijongleh lungsetna thuseiya jol ding kati tengleh nungah jol kha kahi lou jeh chun kajol thei pon ahi. Kalungin seinom ma ma jeng, ahinlah kakamin ajou pon ahi. Chuin Hoineng in kajah a,
HOINENG: “Heu, dongma nanei khah hitam?”
KEIMA: “Nao, kanei kha naipoi. Ipi ti ham?”
HOINENG: “Heu, ima thu aum poi. Kahin het nom mei mei ahi.”
KEIMA: “Nang in la nanei tah em?”
HOINENG: “Heu, dongma kanei nom nai hih e. Nei jong leng keidin hinkho nop na hipon
te.”
KEIMA: “Ibola ong nao?”
HOINENG: “Heu, dongma nei leng kadongma pa kangai val ji ding, mi hinkho kasuhset bep ding ahi. Ajeh chu ken mi kalungset tah tah leh moh ngaiya ngai ho kahi kit-e.”
KEIMA: “Nungah gollhang kingaiya kidei chu akingai lou koi um ding ham? Hijongleh masang ding hinkho gelnaa kikilhamon to ji ding ahi.”
HOINENG: “Heu, keivang koima dei thei jong kahi poi. Mivangse tah kahiye.”
KEIMA: “Nao, kilungset hinkhoa hi mi amel a navet leh, lungsetna lama nakipal tei ding ahi. Lungsetna dihtahʼin melhoi ave pon, hao le vaiyin jong koima akhen poi. Nahin lungset dihtahʼin nangah hat e.”
HOINENG: “Heu, nang tobang pasal khat toh kikingai leh eilhamon themʼin tin, eijong kilungmong inte.”

KEIMA: “Nao, ngah hat in. Ajole dongma kilhen khel in nate,” katin; chuin keini jong kahung lhon tai. Hoinengin jong aseidoh lou vangin eilungset e, ti kahe tan, tua avat chu, keiman ama koma, “Nao, kahin lungset e,” kati ding bou ahitai. Ahinlah lei kileh lou keiman akoma lungsetna thu kasei ngam tapon ahi.

Nikhat keiho thum jong lusu ga holin kache tauve. Lim kikap na dingin phone kakichoiyun, nomtahin lim kakikap un ahi. Chuleh Themcy in kei le Hoineng eihet them jeh chun keini jong lim eikap khom lhonin, ajat jatin eikipost sah lhonin ahi. Chutia gamlaha lusu ga kahol laiyun linghem khatin Hoineng kengto ahin sun tan ahile, amajong akap in, na asa valin hakan akap tan ahi. Chuin kenjong kadel lutin akengto kaven ahileh, linghem saotah khatin asandel to a patin asunin, akengto asun pehin, kenjong linghem chu bodoh ding kagon ahile, na asa valin akap tan ahi. Chuin kenjong,

KEIMA: “Nao, neihin koiyo,” katin ahile, eihin ven kajah a,

HOINENG: “Nang ong heu? Neihin koiyin, nati ham?”

KEIMA: “Henge, anat nathoh jou hih e,” katin; chuin amanjong ol ol in eihin koiyin ahi.
Chuin ajah a, “Nao, thoh ham ham ta-o,” katin linghem chu kabot tan ahile, na asa valin eikoiyin achuti ka tan ahi. Kenjong kabot doh tan ahileh Hoinengin,
HOINENG: “Heu, anavale,” atin eikoichah kheh tan, chuin kenjong kakai ding gon ahile, Themcy in kakoma,
THEMCY: “Heu, anat athoh ol kahin chomkhat hiti chun umin lang Hoineng lhakang hih o,” atin ama louhing holin ache tai. Chuin Hoinengin kajah a,
HOINENG: “Heu, kahin koi chu keiya din nat thoh a-ol chom e. Phatseh leh na anga jal ding janome,” atin, chuin kenjong kahe themin, kalungset lheh jengin ajah a,
KEIMA: “Nao, nomtahin um in. Themcy in lou ahin lah ding, natina laiya inu ding, chutengle nadam ding ahitai,” katin chuin Themcy jong ahung lhung pei peiyin, lou kasem lhonin kanu peh lhon tai. Akenga lou kanu laiyin Hoinengin maingui jen jenʼin eihin ven ahile, hoi kasa valin kiss bol jeng ding kanom lheh e.

Chuin keiho jong kahung tauvin; Hoineng akeng a ache theilou jeh chun kahin pon tan ahi; amajong akipahin kajah a,
HOINENG: “Heu, kakipah vale. Nang um hih le chun tunia hi kaloinu toh kagenthei lhon ding dan,” atin; kenjong ajah a,
KEIMA: “Nao, lunggim hih’in, keima kaum nai,” katin kahin po tai. Chuin Hoineng in eikoi chah khehin, keiho jong inlam kahin jon tauve.

To be continued

Previous articleLUNGSET PATEP NA
Next articleI-KIMU KIT KAHSEN-3

LEAVE A REPLY

Please enter your comment!
Please enter your name here