I KAH A LING LE KHAO TAM JONG LE ANA PANG DET JINGIN
Seiboi leh Kimneo
Lungset Hinkho Thusim.
Part – IV
Amasan lunglut na nei tah a Part-I a pat ahin sim ho jouse chung in kipah thu ka seijin chule ngaidam ka thume. Ipi jeh a ngaidam ka thum ham iti le, PART-III na chu, alast part hidia kana gelin part-II nain TO BE CONITNUE LAST PART-III tin akisun in, hijong le a Story che dan hi, ahung sao jep jeh in Part-V chan continue kibol ding ahi.
STORY W. SEIBOI KHONGSAI.
8473864702
Seiboi in jong alungset pen kimneo le anu chu alungmon mon na din ana lhem jin ahi….
SIM MA SA BAN JOM.
Seiboi in jong alungset pen kimneo le anu chu alungmon mon na din ana lhem jin ahi. Hiti chun lungset thimthu jeng cha jong nom tah in alel thei lhon tapon, kimneo pa hol toh kimneo le anu alhep jing toh ahung hile seiboi jong a service na toh jong dei bangin atong jom thei tapon ahi. Phat ahung che chen thanggin le lulun in jong na sa tah in, aloi chapang ho chu pan ahin lah khom pi lhon tan, nasa tah in ahung pha mo uvin, thanggin le lulun jong kimneo pa chunga ana lunghang sa lhon ahi jeh chun, kimneo pa jong lhadoh lou vin gam lah a ahen den lhon tan, abang kom le ajep ji lhon in, genthei tah in aum sah lhon tan, ama ho loi jong ju le san, nasa tah in ahung kibol khom un, kham na thei ajat jat ahin ne un, ahin bol tauvin, hiti chun leiset a, abol thei ding dang le, aching athem, ahat um talou bangin hinkho chu sun le jan in ahin mang uvin, chule mi kho mi veng in, a che le jiu vin mi thil iit lai lai ho, le gancha iit lai ho atha peh jiu vin, nu nao chapang ho jeng jong lungset na beijin ahin vo pan tauvin ahi. Sum le pai jong ache na jouseu vin adong jiu vin, hiti chun gamsunga mi jouse jong ki chat tijat nan adim gamtau vin, lung mong lha mong in jong acheng thei tapou vin ahi. Hitia thanggin le a loi ho, ahung khanset uva, gam sung a ima cha hepha lou nu nao chapang ho le nungah chapang chunga khanset na nungah suhset na lam in jong ahung machal lheh jeng tauvin ahi. Mi ahin suh genthei nau leh nungah chapang rape ahin bol nau jong ahung sot cheh cheh phat chun, gam sunga mi ching tah tah le, nam sung, gam sung adia kison pi um tah tah hon jong nasa tah in lunggel ahin nei tauvin, iti pan lah a thanggin te holoi hi aum nau khol doh a tha gam ding ham, tin ahung ki hou uvin, hiti chun ama hon jong nam sepai ding le thanggin te ho toh ki dou din, mi ahin hol pan tauvin ahi. Nam sepai dinga mihol ho lah a, mi thum chu seiboi te khon ahung lut un, haosa te in ahin hol tauvin, kho sunga chapang khat chu haosa te in adong uvin, ama ho jong haosa te kimneo te in chun acheu vin ahile kimneo le anu chule seiboi lunggim tah a, um chu aga toh kha un, seiboi in jong mi hung hol ho chu, amu chun thanggin teho loi hi kit dingin aging mon, aman jong, bol chah pai jeng ding ati leh, ahung ho lah a, lamkai pa chun ka te kate gollhang kho ngai tadin, koi nei hisah u jong ka he nai, tin ol ol in ahung ki hou hou tauvin ahile, thanggin te hon kimneo pa amat uva tuni chan na, hoija um ahi ahet doh lou u, thu jong seiboi le kimneo nun jong pha tah in ahung ho komin asei lhon tan, hiti chun kho sunga upa ching thei dom se leh gollhang um cha sun sun chu toh ahung ho chu aki hou khom uvin, kho sunga upa ching thei tah tah ho leh kimneo nu phat sah na jal chun, gollhang kon khat chu thanggin te ho to ki dou din ana lheng doh un, ana phat sah tauvin ahi. Lang khat a thanggin le aloipa lulun in kimneo ana suh genthei jing, lhon na kah a, tua apa kisan jong phat sot tah melmu lou va, athi ham ahing ham kihe ta lou ahi jeh chun, seiboi in jong thi le thi, dam le dam tin, kimneo pa, hol doh ding le, huimut dia jong ana phal lou, alungset kimneo phula ding in, ahinkho phal ngam min nam sepai din ana ki pe doh tai. Chule aloipa mamang jong chuto bang chun, aloipa kitho pi ding le thanggin te holoi toh ki dou din ana kiphal theng in ahi. Seiboi jong hitia kimneo phula dia ahinkho phal ngama, aki peh doh jeh chun ahung ho lah a, lamkai pan jong seiboi lunggel ho chu ahet them peh in, hiti chun thanggin te ho toh ki bol chah dinga alhen doh seu gollhang son um tah ho chu, seiboi le mamang lamkai nan, a jing mama leh a training bol na diu mun na, ki mu khom dingin, lamkai pa chun seiboi leh mamang chu lampi holeh aki mun to na diu mun chu phat tah in asei peh in, ama ho thum jong anung che kit tauve. Kimneo le aloinu momoi in jong a u te ni, hitia lunggel anei lhon ahi chu ahet lhon phat in, kimneo jong akipah thou vin, hinlah a u seiboi toh phat chom khat jong kikhen thei louva, aum ma, tua a u seiboi jin chom cha sung ding hijong leh,adalhah kit a, aki khen lhon ding chu agel le aki ngaise lheh jeng in, hijong le ama dei dan dan le, alunggel banga, a u seiboi chu chon thei, um thei ahi tah lou jeh chun, ama din, lunggel genthei nale, lunghel na ding ahung hi doh tai.
Seiboi te ho jong ache ding jan uvin akho mipi ten kimneo te in nin maicham asem peh un, damsel cha aki mu to kit na diu le hangsan tah a, a pan thei na diu vin maicham asem khom tauve. Seiboi le kimneo jong hiche nijan chun kilha lel tah in aki hou lhonin, kimneo jong numei lunglhom lungneo ahi jeh chun a u seiboi chu asong jou jipon, moh a, a useiboi beija a changa hinkho aman thei jilou na leh, angai ji val jeh chun, a u seiboi kom ma chun, useiboi che da ngap jeng to, nangin nei dalhah kit a, vangset pin toset na hin nei kha le chun, na lungset kei le he nu hepa te ho toh, ipi ti ka um uva kalung u mong dinga na gel ham? che da jengo ti-in asei tai. Hijong leh seiboi jin alungset kimneo phula ding le apa hol doh tei ding atin, chu jong le thanggin teho loi chai doh dinga ana kitep sa ahi tah jeh chun, alungset pen nun jah da hen lang ngai lheh jong leh che lou thei ahi tah lou jeh chun, aman jong alungset kimneo komin hitin asei peh tai. Nao ipi dinga nei jah da ham? neija da hih in ven phat hitih chan thanggin le lulun jeh in, genthei na le hah sat na, lungnat na, chuleh lhaset nan hinkho ina mangin, nomin jong lungset hinkho ina mang thei pon, nang jeng jong na na su genthei lheh lhon in, tun hepa jong aman kit lhon tan hepa jong amel ki mu ta lou tuni chan na athi, ahin jong kihe talou, aum na jeng cha jong kihe lou hi, lungna lou, lhase lou na him, hepa jong kahol doh a chuleh nang phu jong kalah nom ahi, nei ja da hih in, henu hepa te toh nom tah in ana um min, nei jah da sangin Chung Pathen komin nei lhan doh in lang hepa kahin mu a, ka lungtup kahin molso a, damsel’a iki mu thei na ding joh in, lunglai sel leh kipah tah in nei lha doh tang em, tin alhem lungmong in seiboi in jong ama nu le pa chu call abol in, henu tujan ka nao kimneo te in nin hung geh tange atin, ama jong hiche ni jan chun alungset kimneo te in nin ageh den tan ahi. Jingpi matah in seiboi le kimneo aki thou doh lhon’in, aki suhtheng lhon le, kho jong ahung vah emsel tan, hichun seiboi jong a inlam uvin achen apoh ho aki suhtup in anu le apan jong taona aman peh in, hiti chun nam sepai dinga alhen doh seu jong haosa te kimneo te in nin aki sukhom tauvin, lhahdoh na le Pathen songa ahung pan uva damsel cha aki nung mu cheh thei na dingu leh tilkhou na thu sei ding in, kho sunga upa pu apan sah uvin, aman jong tilkhou na thu asei jin, ache ding se tao na aman peh tai. Kimneo le momoi in jong kho khel chan a ute ni aga thah lhon tai. Kho gal aphah phat un, seiboi le aloipan jong kimneo teni chu, hilai apat in ki nung le lhon tan ajo leh, vai gei kha lhon le chun lampi dungin boi na toh kha lhon inna te tin asei lhon tan, seiboi le kimneo jong aki lha lel lhon mama jengin, hijong le kikhen lou thei ahi lhon lou jeh chun seiboi in anao nu kom chun, nao eini kingai lheh jong lehen iba ilo ding ham, damsel in kinung len lang kei jong damsel chan hung kile kit nange, chu le kasei peh nom khat aume, ven ikah a ling le khao tam jong le ana pang det jingin, ong, tin asei pai pai jin, iki mu to kit teng henu hepa te kinep na bang leh eini kinep na, ilungtup jong imolso a Pathen in-sung nom isem khom ding, ahi tai ati peh in, kimneo in jong henge heu tin, aki lha lhon tai. Seiboi te ho jong lamkai pan kimu to na ding, asei na mun jong aga lhung tauvin, ajingin training pha tah in ala un, chai jong ahin chai kit tauve. In na um kimneo jong a useiboi jin adalhah a konin lunghel nan sun le janin hinkho amang jin, fon in kah lah le aki hou jilhon nan, hijong le phat tam jo deibangin aki hou thei ji lhon pon, anu te leh aloinun alhem jiu vin, hiti chun a u seiboi hung ding kal le apa melmu ding kal angah lel lheh jeng tan ahi. Thanggin in jong hitia seiboi te hon tha ding mat dinga ahin got u thu ajah doh phat in, aman jong aloipa leh a chapang ho chu asei peh in, ama hon jong seiboi te ho toh ki dou na ding in, gal man chah lhingset toh, ki ging jing san duty ho pha tah in, abol jing tauvin, kimneo pa jong lung mong lha mong in aum sah tapou vin akai le, apui le jing tauvin ahi.
Seiboi te ho lah a, alenpen leh asap pen pan jong, seiboi chu ama noija, lamkai khat in akoi tan ahi. Hito bang chun seiboi te hon jong gal man chah lhingset le, gal bol dan thep na ajat jat nei pum chun, seiboi lamkai nan, niseh in thanggin te ho um na chu ahin hol jing tau vin, hinlah thanggin te ho jong mi ching le jon chih tah ahi jeh u chun, seiboi te hon jong aum nau mun iti akhol vang un akhol doh jou ta pouve. Seiboi te ho jong avah le le nau achol lheh jeng phat un, nikhat aki chol tauve. Thanggin in jong seiboi te ho toh ki mu a ki bol chah to ding leh seiboi le aloipa mamang chu tha ding tin ahin gel tan, ama hon jong seiboi te ho chu hoija um hoija pat hung diu ham, ahet lou jeh u chun, nikhat thanggin in kimneo leh anu din, lekha khat hitin, ajih tai. Hello my dear kimneo, na dam lhon hinam, phat sot tah ka hin hel jing in, khat vei cha jong nei na nop peh kha pon, na pa kisan in jong, na hel dinga, ka loipa toh ka hung ni jan na, ei-hou na chu, tuni chan in, …
TO BE CONTINUE.. PRT – V
