Heart Touching Story
[Lungset Um Bemshi]
PART – II
Seiboi Khongsai
8473864702
[ SOMASA PART – I LAST LINE ]
PART – I = Hitia kanun ei vailhah phat chun kitim jou talou vin ka chunnu chu ka kolin, hakan ka hung kap lha tan ahile kanun jong akhut in ka mitlhi ho chu eihin theh peh in, mailhai sel chan eihin ven Boi kasei chu hin sumil hih beh in o…tin ka khut chu hatuh in ahin tuh in, ama jong Pa koma chol do din ache tai.
[ SOMASA BAN PART – II ]
PART – II = Kanun eidalhah jou vin kei jong sun nilhum lhum min kanu ngaiyin hinkho kamang jing tan ahi. Hiti chun kapa to genthei tah in kahung ki khosa lhonin kapan jong atoh thei thei atong jin, ken jong in kom ho a natoh to inngah ho chu ka hin bol pan tan ahi. Kanun ei thisan tah vang chun, athi ding konna kapa ana vailhah na bang chun kapan jong kanu thusei ho chu asumil thei pon ahijeh chun ei-lungset nale ei-ngailut na chungin eiha lungset cheh cheh in, eiha ngailut cheh cheh jo jeng in ahi. Hitia kapan eilungset a eingailut jeh chun, kanu kangai nale kaka na jong, ka sumil dom jin, ken jong kapa chu ka ngaisang cheh cheh in, athusei ho jong pha hen lang, se jong le, kam khat jeng in jong kanel kha pon, ahi jeh chun aman jong ka lhaset na ding le ka lungnat na ding kiti him him min, ei um peh ji pon, kitup tah le pha te chan hinkho amangin, hiti chun kapa cha lhonin kipah tah in hinkho kahin mang jing lhonin ahi. Kum le lha jong aki khel jing bangin thingna louna ho jong ahung don thah gam kit tan, hi bang chun kei jong nungah melhoi tah in ka hung khanglen tan ahi. Nungah lhingset kahung hiphat chun kapan jong kanu, angai naho le alung genthei naho jong ahin sumil dom tan, nidang ngai na in them khat khat in kapa chalhon chun ka lunggel lhon le, kanu kangai na lhon jong chu ahung mang dom dom tan ahi. Kanu thi nikho ahung hiphat chun kapa to ken jong kanu lhan ho chu avel in hoitah in kasem pha kit lhonin, ken jong kanu lhan na chun pahcha hoi tah tah ho chu alhan kom lah achun katu peh kit in ahi. Kum pha bep jou hin ka pahcha tuho jong hoi tah tah in ahung pah doh gam tan, hiti chun phat kanei jousen kanu lhan ho chu, kasuh theng peh jingin sun nilhum lhum in kanu lhan chunga chun ka moh tou den ji tan ahi. Nikhat ka pan ka chang in, in ngah din ei dalhan, ken jong in mun na bol thei thei ho chu ka bol tan, ka toh ding jouse kaki toh chai gam phat chun, imut ding katin, khangphei chung in, kaki jam min ka imu tan ahi.
Ka imut jing lai hin, ka mang ahung umin, ka manga chun kanu kana mun, mai lhaisel chan ka koma chun ahung touvin, “Bemshi, bemshi, kanao, boi, kithou vo ja an hon phat ahi tai,” tin kalu, kasam chu ahin khoi yin ahileh, ka hung king khang in, ken jong “Henu henu, ibola neida lhah ham,” tin kalup na akon chun kahung thou doh in ahile, nilhah an hon phat jong ana lhing tah bah tan, ken jong chom khat lung ka gel denin, kanu adamlai ja, noma kana lenkhom lhonlai, nikho ho chu kamit lhan ahung ki langin, kahin geldoh thah kit in ahile lonlhin eihin chut den tan, kanu ngaiyin alhembi ding bei naocha bangin hakan ka hung kap lha tan ahi. Hitia kaka jing lai chun, ka loinu ahung in, ka lungmon na ding le kaki pah pah na ding chun eihung lhemin, kei jong chom khat jouvin, ka hung kitim ham ham’in, kaka chu kahung hai tan ahi. Ka loinun jong, chom khatset eitou pin, ama jong a in koten, an hon dinga, angan se jeh uchun, hitin ahin sei in “Golnu kei jong an hon ding kahin, che kit tange; phat chesa ho ana gelin lang, ana kap kap jita hih o” tin ka loinu chu a in lang uvin aki nung le kit tan ahi. Hi phat chun ken jong, nangchet, chut pum chun kapa hung lhun kah kah tin, an ho chu kino tah in kahou in, kahon min jouvin va dunga kisil din kache kit tai. Kapa jong ana toh na akon’in ahung lhung kit tan, kei nin jong an chu tui tah le kipah tah in kane khom lhonin, jan jong ahung hipai kit tan, kei ni jong nom tah in kaki chol kit lhon tai.
Jing kho ahung vah in kapa jong na tonga che talou vin inmun joh a bol thei thei abol jo tan ahi. Hiti chun ken jong nupi le nungah hinkho chu kakop jingin kaloi telah jengin jong kadei bangin jong kalha thei ji tapon, genthei kaki salheh jin hijong lela in sunga kapa lele nganse thei ahi lou jeh chun kihet mosah tah in kabol ding jouse chu thase lou vin kabol jing in, lang khat in kapan jong hitia kadei banga nungah hinkho mang thei louva nupi banga hinkho kaman na ka genthei thei naho chu ave jou tapon ahijeh chun jankhat kapan ka komin hitin thu ahin sei tai.
Ka Pa : Nao bemshi, nang jong nungah lai tah a na dei banga jong nungah hinkho mang thei louva jile cha nei banga hinkho na man nahi kave jou tapoi boi, ahi thei ding le napa thusei hi neingai peh in lang ken jong nahin ngailu ding le nahin lungset ding; kahol ngap a pha ding hitam?
Kei : Kahe ta hih e hepa, ken jong nungah hinkho nom tah in ka loi kagol to kamang nom nan hijong le nangin ji hin nei kit jong le chun, kanun ei ngailut bang le ei lungset banga ei lungset a ei ngailut jou ding mong hinam, chule eilungset hih hen lang, eilunglu hih le ka genthei na sang cheh cheh jo ding ham, tika gel le kalung agime hepa, hi jong le nang kapa nahin nang gel gel chu himai tan te hepa, tin kasei peh tai..
Hitia kapa koma kasei phat chun kapan jong aji ding le eingailu thei ding chu mi ahol pan tan ahile numei khat ama hinkho to kibang ding khat ahin kimun, kapan jong alunggel hole kei hinkho um dan ho chu abon chan asei peh in ahileh, numei nun jong kapa thusei ho chu agel le ama hinkho to ki bang ana hi khah jeh chun ahin nop peh tan ahi. Nilhah khat kapan ka koma Bemshi boi, tujan le na nu ding kahin pui ding ahi tan, in pha ten ana ngah o tin, numei nu pui ding chun ache pai pai tan ahi. Kapa che doh doh chun kei jong kaki gelin, kapan hin la ahin pui lut tei ding ahi tan, ei ngailu thei lou khat hin kipui lut le vang, koi nop sah malah a ka genthei cheh cheh joh ding ahe tin kei le kei chu kaki hou vin, kapa teni hung lhun ding chu ki ngaise tah in ka ngah tan ahi. Chom khat jouvin, kapan jong kanu ding chu ahin kipui lut tan, ken jong pha tah in kanu ding nu chu kana lam toh in cha ho kasem in kadon jou phat uvin kapan jong maicham khat sem khom ute tin, aman jong kanu le kei chu pha tah a kingailu to ding in thu tampi eisei peh lhonin, ka bon chau vin tao khom na kamang uvin, jan jong kaki chol pai pai tauve. Hiti chun kei ho thum jong nom tah in kahung umkhom tauvin kanu thah nun jong ahung chen til til ahi jeh chun ama sung mong monga peng bangin eigel in eilungset lheh in, ken jong kanu tah tah nu bangin kagel in, ka hah sat, kaboi na jouse sei nan phat sot tah chu kahin mang tan ahi. Hitia phat sot tah kaboi na ho chule kadei kangai chat jouse sei jing na a kahin man jing phat chun eihin chim doh in, kapa het lou vin aguh in ei engbol pan tan ahi.
Hitia kanu thah nun ei suh genthei jing vangin ken kanu tah tah bangin kagel jingin, ka lunggel ho jong kasei ding bangin kasei peh jingin ahin lah aman vang ka lunggel kaha sei peh chan ei eimu da cheh cheh in, eisu genthei cheh cheh jo in, kadei ka ngai chat ho jong kamu lou na jong ahung sot cheh cheh phat in, kei ding chun niseh a kana le lhiso na ding bou ahung soh doh tan ahi. Nikhat kanu thah nun ka koma hitin ahin seiyin, Bemshi nangnu hin napa koma neihin sei doh pou pou le hiche inna pat a na pot doh ding ahi, tin asei chai chai yin, avon nen jouse ahin choi doh in, gang tah in vadunga chen lang; ka von hohi gasop loi in, nangnu hi na ki bolgim dom dom lou le nop nasah val ahi ong, tin avon nen jouse senan eihin nei in ahile kei jong ka hung lung hangin, hitin kasei tai.. Kanu damlai jabon huimut dia jong eina phal louva nangin na nop nop a nei bol a nei suh genthei jing ham, katin ahile, ahung lung hang cheh in, chapang nei hin nel ngam ham, kei hi na nu nei hisah ham, tunia pat a henu nei ti thei lou ding ahi, tin kasam min eihin manin ahileh, na kasa valin hakan kahung kap doh in, kaka kahai phat in avon nen ho sop dinga eipeh se se chu vadung in kapo lhan kaga sop theng peh gam tan ahi.
Hitia kanu thah nun eibol engset a eisuh genthei jing phat chun, kanun athi ding kona hung genthei hih beh in, hung kap hih beh in tia eina vailhah na hole adamlai ya nom tah a hinkho kaman lai niho chu kahin thah gel doh gam kit in, jankhat hi ka changset in kanu lhan na kachen hakan kaga kap in mitlhi long chut chut pum in hitin kasei tai.. “Henu nang ana damna lai hile chun o..genthei na thoh ponge, henu kei jong nei hung pui to ka genthei nale kalhi so na ho ka thoh jou ta poije henu” tin mitlhi va chut chut pum min kakap in kanu lhan na chun ka imu den tan ahi. Jan ahung sot cheh cheh phat chun dap kahin sa in, kanu lhan chunga ka imut na a konin ka hung thou doh in, in na kachen imu talou vin ka lup na chung in ka khovah den tai. Jingkho ahung vah in kapa jong ka room ma ahung lut in ahile lunggel nom motah le pao nom louva kaum chu ahung mu doh tan kapan jong bemshi ipi tina hiham nidang to na bang hih beh e, ipi ti na him boi, tin eihin doh in ken jong kapa koma chu kanu thah nun eibol naho chu seidoh jeng ding kagel in hinlah sei doh leng kapa jong alungna ding chu teng kanu jong abol chah a aki nah lo lhon ding tika het jeh chun sei doh lou vin, thu chom beh in kasei peh jo tan ahi. Nikhat kei jong kanu thah nun eibol engset na hole eisuh genthei naho kathoh jou lou jeng phat in, kitha jeng ding kagel in gam mang lah a kachen kei le kei chu ki khai lih jeng ding in kaki gon hijong le kapa lung genthei ding chu kagel kit le kapo jou kit pon kithat talou vin, hakan kakap in ka in lang uvin kaki nung le kit tai.
In kaga lhun le kanu thah nun mainei lou jahcha thei lou, lungna thei lou bol in eina bol in, melse tah tah in kalu katon eina hou vin, kei jong jacha tah le lungna in thip beh in ka room min ka chen kaga kap kit tai. Nikhat kapan jong kanu thah nun eibol set na ho chu kholai miho sei nan ahin ki het in, kanu chu habol in abol chah in, tukal hito banga hi na hung um lou ding ahi tai, tin ha phoh in aphoh tan ahi. Hitia kapan aphoh phat chun kei sei doh in agel kit in, ki phat lam tah sangin nikhat kapa um lou kah chan eibol chah kit in, sei doh hih in kati nahi lou ham, tin kasam bu ching in eiman in tol in ei sondoh thon, sei ding jong helou vin kanu lhan na ka chen kaga kap in ahile kanu thah nu jong ahung kit in, nanu lhan chunga naga kaman na chu nanu chu hung thou doh ding nahi sah ham, gang chel in na bu hung kineh doh loi in, ahung tin kei jong bu ne talou vin ka room na ka um thim beh kit tan ahi. Jan ahung hi phat in kei jong ka lup na chungin lhi long in Pathen koma katao vin, Aw Chung Pathen idinga kap ji kahim mo, nacha genthei nahi kile lou ding hitam, ka in sung uvin nang man vai hin hol in lang kanu thah nu jong ahung kisem thah a nangma nahin kimu doh thei na din nangin alung sunga hin houlim pi tei tei in o, tin tao jong tao thei talou vin ka mitlhin eihin chup den tai.
Hitia kap pum puma ka tao aw gin chu kanu thah nun ana jan, jingkah ahung hiphat in, ei hung thou vin ka koma ngaidam aki thumin ahi. Hiche nia pat chun kanu thah nu jong aum chan le akhan chan ho ahung kikhel hoi hoiyin, kei jong eibol engset naho le ei suh genthei naho jong anga doh in, ahung chen til la eilungset eingailut bang bang chun eilungset kit tan ahi. Hitia kingailu tah a ka hung um phat uvin kei jong ka hinkho jong anom lheh jeng tan kadei kangai chat ho jong seilou vin acham tah in eibol peh peh jeng ji tan ahi. Hitia nom tah le kipah tah a ka hung um thei nau jong Pathena kon ahi jeh chun ken jong Pathen komin kipah thu kasei kit in ahi. Nikhat kanu thah nu le kapa chule kei kathum uvin kanu lhan na ka cheu vin kanu thah nun jong kanu athi nu kom chun ngaidam aki thumin chule ken jong kanu athisa hita jong le lungmong a aki chol thei na din, hitin kasei tai.. Henu tun vang ka genthei na ho le kaka na ho jong kipah nan ahung kile tan, chule henu nang jong tunia pat in lung mongsel in kichol maitan henu tin, pahcha ka choi chu kanu lhan chunga chun kakoi yin henu lungmong in ana kichol maitan che kit tau vinge henu, tin keiho thum jong kaki nung le kit tau ve.
