Fiction Life Story (8)
“Ucha hinkho thusim”
By: Naocy Haokip
Kapa beijou ajingin Gugunin lekha khat eipen kasimle hitin akisun’e.
“Kangaitah kamounu Boiching,
Nei ngailut neikhoto naho alenin nachungin kakipana acham jinge, Boi tunin keima leiset gentheina mun dalha a che ding kahitai, nanu selungmol jongle lungneo louvin hung pang jingin boi, sonlepah tampi hin neiyin, nanu khel’a nang nakipeh jeng chu lunglen kasama ma e, Boi kei napa hi khut le keng la mang thei kahi tapon, nangjal’a hingjou ham ham kahi, hijeh chun katahsa dang jouse manthei ahilou nungin kakal (kidney) anadam jeh-in nanudin kapetai.
Lha lengvai khan nate Mounu, kei umhih jongleng lungkham hih-in, ven thutah dinpi hodin kichatna ding aumpoi, Na-Uson hung kile teng jongle thil jouse hin hethem nante.
Leiset lhepna gal hinjou teidin kahin vailhah-e.”
(Keima: Natehpu Thongsei)
Hitia kijih kamu phat’in lhasetah in kakap’in “Hepa, lhase lou jenin leiset kadam sungin neitepna ho hin molso tei nange, hepa nomin choldo maitan, phat khat teng Pa anga kilamto maitau hite, tin kakap jengtan ahi.
Hospital kajon kit’in hospital bill abonchan kape thengin kanu jong inlanga hungpot theidin ahinsol tauvin ahi, kapa la aum tapon kanu chu jan jongle kaluppi got jile eitheinom jipon masanga bangin eimuda jingin Nengboi bou ahol holjin ahi.
Kanu jong hapta khat ho jouvin ol olin ahungdam tan, hijeh chun kenjong sum bat kalah hochu sa dingin kanu kavailhah-in.
Kei: Henu, sum le pai phabep pi bat in kahol khomin tun Pathen jal’in nang jong nadam tan hijeh chun batsa a thinglhang joulei langa kache ding ahitai, naboina aumle phone in neihin koutan o.
Kanu: Che o, che o, chenlang hung kile tahih-in, imacha ding kahin tipoi, kamounu Nengboi bouvin ijakai eiboipi jing ahi, kahenai, maipha hol’in kakomin awnem bol bol hih-in, eiti phat’in keijong kache tai.
Bazaar in kaloinu Lhingneovin eihung ngah in, auto khat’in joulei lang kajon lhontan tan, kaga lhung lhontan joulei chu anomin huilhi ahung nunghiu heuvin, joulei buh chu amol mol’in akisan keiho umna buh chun alouneiteni nupa toh amani chanu nungah chapang Dyna kiti khat toh kaloinu le kei kaumun, akhel jep hoa chun nungah gollhang jong tampi jong aumun, la asauvin akidaiyun achohlheh in, anom lheh jenge.
Hinla keivang lunggel gentheina le lunghel puldounan bou kadimin ahi, kani (poppy) jong ka-at khapon alou theilou ahitah jeh-in niseh in kahin bol bol tan ahile aje kaumtan ahi, hitichun haptani tobang na kahin tongtan, nisa satji toh kamai ho adup lha jengin katahsa akikhel tel tul jengtan ahi, hinla kabat sah ding chu akeh jong ahinaipon, akumlhun geiya umding chu kahitan ahi.
Mun khat khat network aume atiuvin nungah gollhang holah a chun kaloinu toh kagajaoji lhonin keivang koi houpi ding jong kaneiji poi, ajeh chu kajipa Boison ka call le switch off ahi hijengin, katehpi ka phone le a pickup jipon, Nengboi ka phone jongle ala jipon, kanu le kapa ka phone lela kanaopan eihol’a eikou thu aseiji lhon teng kangai theikit jipon ahi.
Jan khat chu lhavah anom lheh jengin kaloinu Lhingneovin eikou kou jeh chun network umna a kaga che lhonin ahile ka phone chu call ahungin unknown number ahi, ka pickup da leh avel vel’a ei call phat’in kagah pickup le kajipa Boison ahitai.
Kipa le lhaset kop’in He-u dama naum jing hinam? Nahungpot loulai ham? Na phone jong kahin call doh theiji poi, katile imacha dang seilouvin.
“Jingle kahung ding ahi,” Tibou aseiyin call a cut tai.
Avel’a ka call kit jongle a pick tapon, Delhi a kona hung diham! Phaiya kona hung diham, ole ina kona kaumna a hung diham tibeh jong aseilou jeh chun kalunggim lheh jengin ahi.
Kanu ka phone kitle aladehpon hijeh chun ihmu dingin loubuh kajon tan ahi, lungthim nomlou tah a kaumji jeh chun kaumpi jouse chun eilungset lheh jeng jiuvin totna ho asei jiuvin kalunggim naho haimil sah ding eiti jiuvin ahi, phat chomkhat khat chu kinuiji jongle kipana tahbeh kaneideh jipon ahi.
Ajing nikho chun na katong kit’un, sun 12:00pm ahi phat’in sun kicholdin akisamto to tauvin, keiho jong loubuh kajonun cha kadonun Dyna in puri asem chu kaneuvin ahile kajao uva nupa khat jong ahung tou lhonin hiti chun kakihou lim limun ahile ginchat phah lou beh-in kajipa Boison le Nengboi chu Royal Enfield thahbet khat’in ahung kipolut jeng lhonin ahi.
Keijong kapotdoh loiyin He-u nahung hitam? Tia kagah hou le eihin beng paiyin ima seibe louvin kakap kit tai.
Boison: Numei chavai doumah mah a kisanu, kapi kangailut jeh a ken thu tamsei louva kahinkhoa kaji dinga kakilhen le nanghi ka insung suboiyin nahung pange o.
Kei: He-u ipi ham kabolkhel, ipi ase kabol khah ham? Nadeilou kabol khah jongle nei ngaidamin he-u.
Nengboi: Najahcha lou bank a sum jouse nakisel manga kani jong bat tampi kalah a kakijen dam ahi, tua najipa hungta naphatlouna jouse kiphongdoh ahitai.
Kei: Itih a ken bank a sum kalah khah em? Hospital bill jong aboncha bat kalah a kasah jou phat’a tua hi kasum lah kasah ahin hopsom a hop khat jong kasah doh loulai ahi, phamo lheh jongleng nangho banga joulenal manga kichem kahipoi.
Nengboi: Hichu o hichu chen lang hospital bill khu gavetang namin sikiman jong aumpoi.
Kei: Kamin umhih jongle akhohpoi, hinla jou kasei poi, sum le pai kisumang chu ka it poi, ajeh chu katehpi adam tah jeh-in achesa thu sei sei dau hite, leiset’a themchan kangeh poi, thudih hejong Pathen bou ahi.
Nengboi: Heuson veta ajouseiya sum jouse aneh chai phat’a kilepna ding hetmoa Pathen apansah ahitai, hiche thu ho mai maiya Pathen pansah nading lampi aumpoi, tin eihin kohsan henhunin ima kaseibe tapoi.
Hichun kajipa Boisonin Hoichingthem nang jia kaneikhah kavangse behseh jenge, tunin vang kaji tin jong kasim nom tapoi, nachatvai toh ikitepna jouse jong Hepi jong lhase dahen kahinkhoa cha kahin tahlou jongle akhoh tapoi, tunia pat kaji nahi tapoi, jidang kanei ding ahitai, tin kalu chunga akhut ahin koiyin keijong kalunghang val’in.
Kei: akhut chu kabenglha tho in, pasal nahile thu kholtoh masan lang seiyin, pasal kahiti mana thu moh sei sei thei nahisah ham? Kei michavai neiti vanga nang chu nahi chu michavai, insunga iti kikivaipoh ham hetoh louva nanun eihouset toh Nengboiyin eihouset toh nang kisanin neihung houset nahlai ham? Alunghang theilou neihisah ham, tin kakisen jah jengtan ahile eihin beng kit’in buh bang chu kabo jeng le gomong khat’a kakitat’in kaluvun akoh-in thisan ahung longlha paitan ahi.
Keijong anop le eithat hen tin kaseibe kit’in.
“Genthei le chaga kihi jongle nangho kichepna ding kahipoi, chaga kahi vangin pap kaneiye naki oipoule neithat’in kakicha poi,” katile thingkeh banga kitung chu alan buh leitol’a chun eichuti voh tai, buh a touhon aphotoh atuh toh akop vangun eiha voh cheh cheh jengin kakhut jong kajet lang avohkhah toh akenga achot kit le kachat thei tapoi.
Hichun numei chavai, neigah houset ngam nahlai tia vohbe ding eitile kagal languva kon gollhang phabep ahung lhailut’un atuh uva amajoh voh ding agot phat’un tol’a kijam pumin kaloinu Lhingneo kakoule eihungtuh phat’in avogo hochu kakhutchal katun khumin kalu kapeile alha tauvin ahi.
Kajipa Boison kisen gin ho kajan ipi asei ham kahe tapoi, Nengboi toh garineova akaldoh a akitol lhon chu mangphil phel’in kamun, kanahthi alongin kamai le kavon jouse thisan adimtan keijong kho kahe tapoi.
Kahungkhah doh chun innomtah khat’a kanaumin kalupna jong chu athupi nalom lom, kalu chu na kasa val’in kalu kasip gotle kakhut achat thei tapoi, bandage einabolpeh-un, kadang chah val’in koi in hoilai ahijong helouvin “Kadang achah val’e,” Katia kapen jeng le nupi athaova thao khat ahungin twi eihungdonsah-in, lungdong thima kavet le nupinu chu ahungkap’in, kadatmo cheh kit’in ahi.
Nupinu chun eihin houvin
“Boiching, nomtah-in kicholin Boi, imacha lungkham hih-in, tin kadehpang chu achop’in apot kit tan ahi.
Lungdong tah-a kaumna room ho kavetle le leh banga lim tampi kitah chu kamun phatah-a kavet le kapi lim kamutan ahi, aban bana kavet le kapi damlaiya honsunga melei laiya kaumnaho le kaponkhon pet kapi toh kakikol toa kanui lhonpet lim ho kamutan, kalunghel val’in lhase tah-in kakap kit tan ahi, chutia kaka phat’in kakagin chu ajah u hiding ahin, eihin del lut loiyun ipi nati ham? Nakichat ham eitiuvin ima kaseipon kakinuh nuh jengin ahi.
Nupinu chun ahunglut jouse chu asoldoh-in, doctor khat le nurse khat akoulut’in BP avelhonin checkup eibol lhonin lou eikap lhonin ahi, chejou chun doctor teni jong apot kit tan, nupinu chun kamai ahin chul’in mitlhi longlha pumin kapji hihta boi, imacha tipon nate anaumta o, na-u hunglut ding ahi, tin apotdoh kit tai.
Banga limho bou chu kave ve jengin ahile pasal khat smart thet jeng amel jong hoisel khat kot’a chun ahinglut’in kagah vetle einungngat toh akitoh-in amitlhi akitheh ahichu kahen, koi ahijong kahepoi.
Chomkhat jouvin eihinven pahcha hoitah khat eihin choipeh-e, amaiso chu kamukhah toh kilou kasan kahedoh thei poi, pahcha chu eihinpen kilah ding katile kakhut achat thei poi, mitlhi pumin kakipah-e, tin kakhut veilangin kakilah tai.
Keisangin amachu lhase tah-in kinuh dut dut’in akap jengin, ajeh la ima kahepon, kenjong kiphalam pumin kahoupi masat tai.
Kei: He-u, ibol’a chuti lhaset nahimo? Kei neihet khah khat ham?
Ama: Eihin kol’in Ching kalungset val’e, iti nang haimil’a kaum ding ham?
Kei: Ahile nang koipen chu nahitam? Lungset’in eiseipeh o.
Ama: Kakoma ahungtou naiyin kamitlhi hochu eihin theh hul peh-in, Chingthem neihai hitam? Mimin kahiye, tin amitlhi abenga ahung longlhan
Ching, kahung kahsen eina ngah jingin kati hilou ham? Tua kei neidalhah a jidang nana neiya genthei nathoh hi kahinve jou poi.
Kei: Ohhh!! Umin nang nahimo, dama naum jing hinam? Phat chesa ho kagah gel le lunghel aum nalome, hepi kangai dehset’e, tin kakinuh pha kit tai.
Mimin: Ching, kapkap tahih-in, boi nathan ajou tapoi, ipi hijongle boi kei khankho ding gelin lang kei selungmon nadin hungkile kit tan boi, angdanga chuldin kahin phal poi.
Kei: Umin hiche hochu avelin seikit tahih-in, phungdang changsa kahitan “HUNG KILE THEI KAHI TAPOI,” nasopi bangin neigeltan, katin anu chu kakou tai.
Henu, hungo katile ahunglut’in ipi ham Chingthem, kaum jingnai nomtah-in kicholdo in boi, nadam vah ding ahitai, atin achapa chu asoldoh tai.
Keijong niseh le doctor hon eihung ve jingun haptani (2 week) ho jouvin ol olin kahung chat thei tai, nikhat Mimin nu chutoh kakidai lhonin sofa seat ho chunga katouvin TV kaven (Tom and Jerry) cartoon ho kavet vet le leitol langin mi khat’in Chingthem tia eikou kajan kache got le Mimin nu chun eikhamin amajoh agachen ahunglut kit’in pasal khat’in nahol’e, Boiching kihoupi o ahung tin kaga che le common room in kajipa Boison chu anatouvin keijong lunghang thimin kaven ka room lang kakijot kit tai.
Nupinu chu alungdongin nakihet khah u hammo boi, atile kajipa chun
Henu, Boiching jipa kahiye, ahin tile Mimin nu chu amit ahtui te apha jengin aphoh in.
Mimin nu: Ipi suhset aneiya hibanga najinu nahinvoh ham? Kichat chat naumuve.
Boison: Henu, kei lunggel themlou jeh le kanu le achanu phatlou jeh a kajinu chunga khut kalhah khah ahitai, kalungset lou jeh a kavoh vang ahipoiye.
Mimin nu: Ahile tunia hi ipi ding natia nahunghol kit ham? Navoh kit got ham, ole napui doh got ham?
Hitia adoh pet chun Mimin pa le aloiho police officer ahijeh chun a guard ho ahunglut’un amun munin adinguvin ahi.
Boison: Ahipoi Henu, thil umdan jouse abonchan kahesoh keitan kajinu Boiching themmona imacha aumpon hijeh a chu ngaidam kithuma nungpui dia hung kahi.
Mimin nu: Athemmona umle umlou chu iti nahet doh ham?
Boison: Henu Delhi a kaum laiyin kajinu hi pasal khat toh alumkhomin alim ho akap’un hiche hochu eihin thot’uve, kamu chun kalhase val’in kajinu kale thot’in ka phone jong kasep setai, kapa gari accident chungin jong kanu le Nengboiyin kajinun abol danin asei kit lhonin kanu damlou chungin jong kajinun aneh lah a poison alhahpeh ahi atikit uvin, keila munchoma kium hitiho chu tah hiding ham kanati khah ahi, hinla kajinu jal’a ka insungu gep lou ana hijo e.
Pasal toh alum khome atiu chu aman kapa sunle jana damlou aumpi jingle alel val’a athi banga ihmumil jeng ahi, hiche nakah a Nengboiyin (chloroform) kisunam hanky perfume anahsah a pasal upa khat sum peh dinga ada da a alim lahna dia alupkhom sah u anahin, kapa umpipa Gugunin athilbol hou video record ana bol’a proof abol ahitai.
Kapa gari accident jong chu Nengboi le kanu bol mama anahi kit’e, ajeh chu kapa chu kithat le keile Nengboi kicheng ding dana agel lhonjeh ahin, kajinu jal’a kapa jong anadam doh kit ahi.
Kanu damlou chunga jong Nengboiyin bank a sum jouse akilah a ajam mangpia kanu jong chu poison anadonsah ahi, kapa jong kanu kidney donors a akipeh jouvin Gugun video record anabol sah-in thil jouse aseiyin memory chu Gugun koma ana koi ahi.
Kajinu kavoh a kaki nungle jouvin Gugun toh lamlena kakisuton hitin eina houve.
Gugun: Hepuson hoiya naga che ham?
Kei: Joulei buh lang kagaphah ahi.
Gugun: Ipi nagabol ham? Kauching nagavoh chu nalungdam tam? Kei tua chu Kauching vea kachea houpi thei ahilou phat’a nang toh kimutoa hung kahi.
Kei; Kivodehta numei chavai katha ding bou vat ahi.
Gugun: Nang le nanu chu mi chavai nahi lhone, naumpinu Nengboi lungthima na inkouva nalhah u ahi, nalim limutoh, Kapusei dam ngei ngei le nop tol nachot lou diu ahi,
Hitin eina houvin keijong lunghang kisan voh ding kagot le heicha (axe) akilah-in eipen pasal nahile mol chu ipi ding ham? Heicha a chun neitulih in, ipi ase kasei ham? Hepu jong katinom poi, nangho tobang hepu tisangin uingol khat pua neiding kadei jo e.
Kapivah jong kavet nomlou nang jong kavet nomlou eiti phat’in thu ahet um hinte, katin awnem heuchan kadongin
Kei: Gugun ipi thu thu nahet ham, abonchan eiseipeh-in.
Gugun: Kholaiya imacha seiponge, na inuvin neipuiyin.
Kei: Hungin che hite katin kainuva kapui lut tai, Nengboiyin Gugun ahin mumu chun ahung kisenin
Nengboi: Ipi ding natia hiche chapang gilou chu nahin puilut kit ham? Soldoh-in insunga hin lutsah hih-in.
Kei: Thip chet’in umuvin, tia mitsal thima kavet le koima apaongam tapouve.
Hichun Gugunin Hepuson na phone neipen atin kagah pehle memory khat ahinladoh-in voice khat ahinlha doh le kanu le Nengboiyin Chingthem ahousetna lhon ngen thu bou agingin aban ban chan ahinlha in ajonan kapa houlimna chu ahinlha doh tai.
Kanu kidney donors a Chingthem akipehna sum hol’a ache ding kona kanu availhahna ho kajahchun kajinu chunga kabolkhel ho kahedoh-in kakap lhatan ahi.
Chujouvin kajinu lou anahkhamsah uva pasal khat toh alupkhom sah uva Nengboiyin lim akap pet ho anunguva kona Gugun le kapan video record abol lhon jouse akisel beiyin ahinlhadoh soh tai, hiche ho keu hilouvin kajinu potdoh kahle Nengboiyin kapa a engbolna ho ajatchom chom kamu chun kitim joulouvin kakap tan ahi.
Alang khat’a Nengboi thilbol jouse akisel theilou phat’in ajam mangin asuhna akihepha tapoi, kanu jong Nengboi phatlouna ho amit tah a ahinmu phat’in alunghangin Nengboiyin poison adonsah ho ahin kihet phat’in amounu abolna ho ahung kisih-in kei komin ngaidam athum thum tan ahi.
Kanu jong thadoh dingbou kalungin aumin ama jong themmo akichanin akisih a aka ka phat’in sei ding le gel ding hemon angol bangin kaumtan ahi.
Gugunin Hepuson kapu thijouvin keijong hi thu themkhat khat kahet jeh-in Nengboiyin thadin eihol hol jengin, khatvei pasal thum ahin puiyin eiman gouvin kajam mangin hitih chan chu akisel’a kamathah ahi, abangle nithum cheng gamlah-in kaumjin katahsa jong kichai deh jeng kahitai, Ka-uching nabolnau achet achaiya kaphondoh nomjeh ahin, tunvang thi ding jong kaki it tapoi atin ahi.
Kajipa Boison thusei jouse ka room a konin kangai chaisoh keiyin ahi, chuin Mimin nu chun eihin kouvin
Chingnu, najipan nakouve hungin, ahin tin kot’a kona kagah potdoh le Mimin chu kot panga adingin kakhut ahintuh-in.
Kei: Umin lungset tah-in neilha o.
Mimin: Che hih-in Nao lungset tah-in kakomin umtan, nagenthei ding kave joupoi.
Kei: Umin thina dingmun hijeng jongle che ding kahi, Pathen janggopsa kahi lhon tah jeh-in lhase hih-in, “HUNG KILE THEI KAHI TAPOI,” katin Mimin nu chu kagah vet le mailhai selin eihinven alu ahin sudot’in, chuphat’in Mimin khut chu kaladoh-in kajipa kom kajontai.
Ka-Usonin eikol’in Boi, Neingaidamin o, thil jouse kei themmo ahi, tunia konin vang avel kitin nagentheisah taponge, tin kinuh dut dut’in akap jengin ahi.
Kei: Amitlhi katheh peh-in, kei koma ngaidam nathumna ding aumpoi, Henu le Umin komin kipathu gaseiyin ajeh chu amanin einajen lhon lou hile damdoh lou ding kahitai.
Ka-Uson jong Mimin kom lang ajonin
Bhai, kakipah-e, kajinu hi nang komin umle genthei lou ding ahi, hijongle keini hi kapi teu tehse hon insung kiguijopna amanthah louna dinga einagop uva kitepna giltah eineisah u ahitah jeh-in, tunin nang napedoh jongleng hinkho lhuma cha le nao hingthei ding nahi deh lou diu ahi, keijong numei dang toh kicheng jongleng chutima hiding ahin, kasenji hi ken kipui tange Pathenin ama tobang jipha nahinpe mai hen, tin akikolto lhonin Mimin in eiven amitlha vachut chut jengin ahi.
Mimin nu komin jong kipathu tampi aseiyin sum le pai ho ledit ding atile anom mong mong pon hiti chun mitlhi lha lha in kakivetouvin keini jong inlang jonin kahung lhon tai.
In kagalhun lhon le kanu le kapa kanaopa le ajinu toh katehpi anaum uvin kipah tahle kiphalam pum pumin eina lemuvin, keivang kavetna mun jouse lhasetnan kadimin kakadoh lou vangin mitlhi chu atang theipon ahi.
Gugunin eihinmu mu chun Heuching nahung hitam tin eikol jengin, Gugun toh keini kakika masat pen lhonin ahi, abanin kanaopa le ajinu ka masanga bohkhup’in ngaidam athum lhonin donbut je helouvin kamohka tan ahi.
Chuin kanu le kapa ahungin kapan hitin aseiye.
Boi, Nanao teni Gouminthang le Kimjahoi hi ngaidam tei teiyin, mihemin nom asah lai chana ching theilou ahin tua hi genthei tincheng ahinthoh lhon phat’in ahung chingdoh lhonin kisih a ngaidam athum lhon ahi, ven kei le nanu jong eiumpi lhonin eilungset lhonin eingailu mama jeng lhone, chule vetang naosen jong hite phata apen chunga hospital a igache lhon chu nahet em? Nanutah numin kalosah-un Chinboilhing@Boilhing kasah uve, ahintin naocha chu kum nga lang anahitan Heni tin eihin del’in katouvin kagah sanle eihin ngongkoiyin ahi,
Hiche phat chun kenjong kangaidamin ahile kakeng atuh lhonin anupa lhonin akap lhonin ahi, hiche jou chun katehpi ahung kit’in
Boiching, Mounu Neingaidamin o, thil jouse keima suhkhel jeh a kon ngen bou ahiye kathemmona ho hi ana kimahet leng hichan geiyin genthei pon nate boi, hinkho phal ngama kadinga kitah tah a napanna jouse tun kahechen sohtai, Mounu nang tailou moudang neilou ding kahi, kabolkhel ho Neingaidamin, tin kakeng ahin tuh gon kenjong katuh in.
Henu, leiset’a suhkhel neilou koima aumpoi, Pathenin bon hibanga michonse mihemte eingaidamleu ibol’a eiho ikingaidam da diu ham, kangaidam sohkeiyuve, tin kipah tah-in kabon chauvin kakikol to tauvin ahi.
Kumni jouvin Pathen lungset’in chapa melhoitah khat kanei lhontan, masanga kagentheina jouse kamilsoh tan lung himo nading le lhasetna ding imacha umlouvin kipah tah-in kacheng khom tauvin ahi.
Kanu le kapa toh kanao teni jong kitoh tah-in achengkhom uvin, kanaopan gari atoljin kamounun honsunga na atongjin kanule kapa chu naodonin apang lhonin akivaihom theima ma tauvin kanaopa toh insunga kaum khom lai lhona kitohlou beh kana hi lhon jeh-in ahung chihdoh phat’in akisihjin eikou kou jin “He-u, phat chomkhat beh neihung umpi o,” ahin tijin kenjong Boi, neikou kouji hih-in, insung dalha thei kahi poi, phung dang chang jong kahitai, kadei deiya hinkho mang thei kahi tapoi, “HUNG KILE THEI KAHI TAPOI,”
Iumnau cheh-in Pathen geldoh pumin hinkho mangute, tin kahoupi jin ahi.
(BEITA)
MORAL
- Thohhat hi galjona ahi.
- Kitahna in gapha tah asodoh theiye.
- Tua gentheina ho phat khat le kipana a akile theina din nagentgeina ho thudih hisah-in.
- Ikam ahom mana thu mohsei sei lou ding, itha ahat mana mi moh voh voh lou ding ahi.
- Insung kitona dinga thutah kholtoh chet jing ding ahi.
Adang jihbe thei tampi umjongle, hichan hin chaitaite.
Thusim “HUNG KILE THEI KAHI TAPOI,” Part 1-8 chan nasimna sunga jildoh thei khatbeh nanei ding kakinem’e.
Min, khomin kiseiya kiphapoh jouse semthu cheh ahi, akibahpi aumkhah jongle inahet them diuvin kahung taove.
Thusim ngeijou hih jongle abul’a pat achaina chan lunglut tah a hin simchai jouse chungin kipathu kaseiye, asim jouse Pathenin phatthei boh hen, ngaimah theile jihkhel tampi umthei ahin inagel them cheh diuvin avel’in kahung taove.
