Fiction Life Story (5)
“Ucha hinkho thusim”
By: Naocy Haokip
“NGAILUT HELOU,”
Thingvom kho jonin kapa bolero a chun tulebe hitoh kitol’in kache tauve.
Akho chu gari alhun vangin lampi anompon chol le nangin kagalhung nah nah’uve, khojin koncha jong ahitai, khosung chu athip chet jengin mihem amakhu koi ham gahti ding jong akimudoh poi, injong lhomcha ahikit’in khosung lailungtah chun gari kangauvin, thingnoi ho mel kamudoh lou jeh uchun suhna ding jong kahe pouve.
Kapa phone kathumin lamkaipu chu message kagah thot’in
Hello, Sir Thingvom kho kahung lhung tauve, mihem mel him him kamudoh pouvin, hoiya ipi kati diu hitam?
Minute nga jouvin reply ahungin
Chingthem, keiho jong kaum nauve, hijongle kikiveng ahi, haosapu in jonuvin, kaseipeh tai, ahin tin chomkhat jouvin upa tehthim khat ahungin gari chu hintol lut’un hilai hi keiho in ahi, tin eihung kouvun kache tauve.
Jan ahung hi phat’in haosate leitol’a chun an kakihon’uvin, kaneh jouleu 7:30pm ahitai, chuin thingnoi hochu ahunglut’uvin guesthouse atinau mun langa din eipui tou kit tauve, khosung upa phabep’in ka vohcha poh’uchu athat’un asemuvin, keiho se chu insunga meeting katou tauve.
Lamkaipu: Gouminthang ipi atile akisol pet’a chenom louva tua group a kona hai ding nagot pai ham? Organization dan dungjui tah a nathu kitan ding hile nomtol nachot lou ding ahi, hijongle ven, na insung hinkho ding kagel le napa chilhah manthah jenglou nadinga tunia hi khoto tah a thil kabolpeh’u nahitai, tu hihen itih hijongle nampi dingin boina sem ponge tin soi (signature) bol’in tin lekha khat apen ache ho se se chun soi kabol tauvin ahi.
Chujouvin keiho bepa chu ahoulimin dangka lakh khat demand ahinbol dungjuiyun sum chu kape doh uvin, seidinga kagel hou le kakihounau jouse kabepauvin abonchan aseisoh keiyin ahi.
Kapan jong kipathu tampi aseiyin, nampi damtheina dingin jong vang athumpeh in ahi, chomkhat jouvin lamkaipu chun aloi chapang khat akouvin kanaopa le ajinu chu apuidoh sah-in, achedoh phat’uvin lamkaipu chun hitin ahin seiye.
Lamkaipu: Sopite nahung kondoh nau jong agamlhan chol le nangin nahung lhunguvin tuni hin kaseisa bangin dan dungjuiya kan ding hileng lakh nga jong ka demand ding ahi, hijongle Chingthem le api hi kavet le tua nahinpoh jat’u nungsah kit ding ahi kahen, kavejoupoi hijeh chun lakh khat lah’in akeh khat chu koiyun lang akeh khat chu nalah nauvin nungsah tauvin, hinla hiche kakhoto nau thu hi koima jah-in seipoh hih hel’un, Chingthem beh hi pasal hile gah thima jong kanthei nahiuvin tua numei khat gah teh a kan ding chu kahinan apojou poi, ahinti tai.
Hichun kabonchauvin kipathu kaseiyuvin kapi jong amitlhi akitheh in lamkaipu koma chun kipathu aseiyin ahi, kapa in Boiching nahoulim nom em! Tin eidongin keijong mitlhi vachut chut’in kipathu seitheilou sasan kaseiyin ahi.
Lamkaipu chun kapi komin
“Hepi, keile katoh khompi lamkai cheng phatthei neiboh uvo, ajeh chu nang tobang tehse kumtam hi mi alhomtan, milui it umtah nahi, atileh kapi jong anomin hichun akikou khomun lamkai cheh mi get (8) chu kapi in phatthei aboh-in.
Nampi damsot hen, hingsot hen, gam le nam sungin nangho khutsoh a konin gaphatah gadoh henlang, nachotpha nauchan nagam’u hihen, van daitwiyin nahin chapnou jinguhen, nangho cheng vaihomna sunga konin thudih dinpi jingun lang nampi jalenna kolni hungsoh doh hen.
Tin phattheina tin tang athumpeh-in, hiti chun jan khovah in ihmulouvin ankong chu kasem’un jingkah kho ahingvah vah-in keiho jong kahung kipatdoh pai tauve.
Lamkaipu chun Chingthem imacha kisonglel hih-in, khoto thei chan’a kahin khoto jing ding nahi, lungneo louvin pan hinla jingin “Tah chanu, kuki chanu, kapa chanu, tahbeh nahi,” Nang banga numei lunglen’a genthei thoh a kipedoh hi mi koima umtaponte, tin lhamonna thu tampi eiseipeh’in chu jouvin kahung kile tauve.
Pathen panpi jal’in galjona khat chu kahin neitauvin kalung amongdom tan ahi, bat le tham kila ho sahna din niseh le pon kakhongjin ponve jatpon ajem hoi dom dom amantam ho kakhongjin lel vang kalelji mong monge, hijongle alou theilou ahitan, kihambol tah-in kapangin, chol le nan jong kakihetmo sah jitan ahi.
Kamounu chula imacha tong theilou, an jeng jong honthei kitlou, ahontheiya kihonmo sah ham la kahepon, toh ding seipeh louva don loubeh ahin, kenjong Hoinu, honsunga me hol’in lang nilhah le min ahunglahji ahin, keila pon kakhon hat loule sum muna ding aumpon kithokhom hite tin kaseiyin chomkhat chu igahsol jongle akipat jet jet jinan lhakhat ho ahung lhin jouvin thil khat’a igahsol le amuhsao jenjun jitan, abunehna kong akisop louna jong ahungtam jep jep tai.
Nilhah insung maicham sem phat ahunglhin le anupa lhonin kholai langa akithip mangji lhonin, kapi in aphoh jingin ahile insung maicham sem phat ahitengle ken kasemjin amani nupa chula mi nungat geh guh’in atouji lhonin kenjong insunga kivaihom dingdan le umchan dingdan ho kahiljin hijongle kahahil chanin akhoh cheh cheh ji lhonin ahi.
An kahon loule honlou hijeng ji, kamounu an hin honin boi, igahtile kahon thei hih-e, nanop le kihonin tin alhaimangjel jitai, kathu angai lhonlou vangin mit thipna neocha jong kaneipon ahi.
An kaneh tengule keinin nenai lhon ponge atiji lhonin kapi toh keini an nehjou joule atui tui akihonji lhonin tuitah-in aneji lhone, khatvei nivei chu ima kaseipon ahinbol bol lhon phat’in kalunghangin kenjong kasei tai.
Naoteni phaten ngai lhonin, an ineh tengle iboncha nehkhom cheh ding, atui hihen tui hih jongle thakhat’a nehkhom ji ding ahi, tukal le achom choma an neh ibol loudiu ahitai, tia kaseipeh le kanaopa chun Hoichingthem kadei phat phat lhonin kineh lhon nange, keini kama ne ding nahi em? Nalol katan ding ahi.
Kei: Chuti ahile nangni bou atui tui dua alol hom nahi lhon onk? An thakhat’a nehkhom chu apha hichula, insung mi akilhom nakah a achom choma an kine chu atuina jong umlou kitona jong umlou ahi, kagahti le atouna koma thingkeh kikoi chu ahin kilap’in eihin vei kit tai.
Kakong avei chu tol’a kalumden jengin kathou thei tapoi, kapi in alunghan khumin Gouminthang michavai nakhut chu kavohboh peh ding nahim? Na-unu vohnan kihatsah hih-in, nang chunga chu ding ahi.
Kanaopa: Tehse chavai nang jong hiche uipinu hi napanpi jinge onk, ajole nang jong chu nakong kavoh boh ding hichu, tin kapi chu ahin houvin keijong kap pumin kading doh-in angeiphe tah chu kabengin.
Kei: Najahcha lou nulepa khel’a nulepa a kinei hepi jong nahin houset ngam, hepi in nasamset ngei ngeile khovah namu lou ding ahi, tia aphotoh abeh toh kakop le kahung kidel lhon tai.
Kapi in iti eiphel lhon vangin tehse thabei ahitan, aloje ahepon ahi, kamounu Kimjahoi chula nui tet tut’in ajipa chu atil’in habolta, habolta tin ahin seiyin kathangtom val’in ajinu komin
Numei chavai jinei thei kahitai kitia insunga chamna sem ding jong geldoh lou, nahiti louleu hiti pouvin nate tin kahouset thatan ahi.
Ajinu kahouset chu kanaopa chun athimah-in,
Aree,, kajinu jong ahin house ngam nalaiye tin ei chuti voh tai, kilethuh leng khohcheh cheh ding ahi kahet jeh-in kakipumdo tai, ajinu chun kahousetna chu apao mepin kajam thou thou ding, ka inkote kahinsol’a kabolchah sah ding ahi, atin ima kaseibe tapoi.
Jan kalup’a ka-ihmut got phat’in kapi in eijut jut’in, kalungin
“Henu, Hepa hinve lhonin kei themmo ham, ole koi themmo ham! Nulepa umlouva insung kivaihom vang hi chamna aumpoi, hitia genthei thoh dinga leiset’a neina hin lhon dan ham, tin kinuh dut dut’in ihmu mon kakap khovah tan ahi.
Nithum geiyin natong theilou chat theilouvin kaumin kapa in ahet phat’in hospital in eipuiyin ahile hichun kahun chat thei panin ahi, hinla kakong ahung nadohjin kaveiset kipatnan ahung pangtan ahi, mankhuma chena ding haptani bou avat tan, keila kadam thei tapon kanaopan eivohna ho jeh-in na kagah toh patle kanapai jitan lungkhamnan kadim tan ahi.
Aphat anaitah jeh chun kapa in tulebe ho akhomin kanu le kapa ina chun kakihou khomun kapa in tulebe insungmi kinaipi dom dom ho komin panpina athumin kei eingailua eipanpi nom atamin hinla kanaopa gitlou jeh-in koiman jong eipanpi nom tapouvin ahi.
Kabepau chun keiman khisong hinhol ingting khivuiya chun keima pang nange, kei kapanda lela Chanu Chingthem gimna ding bou ahin kabolthei pen ahi atichun kakipatoh kakiphatlam toh “NGAILUT HELOU,” kasopipa hi itihle ihmut’a kon ahung khangdoh tadem tin phat jousen NGAILUT HELOU kasopipa jeh-in lhisonan hinkho kamang jingin ahi.
Angol la hisam louva kiletsah kihatsah lungthim neiya masang hinkho ding geldoh louva anop nop’a aumhi vet hah kasa mama jengjin ahi, man khum ding chungin jong insung hahsat danho le sum le pai bat le thama kiholthu ahin, kin kichai le phatea sumhol’a bat sah ding ahi, tia kapa tehon aseileu kamcheng ngeimo tah-in.
Nakhum nomlouleu khumda tau, mi-upa kahi chu ken kikhum nange, ahin tin hijongle kei ding gelna jal’in lungna jongleu insungmi hochu apang ham hamun ahi.
Hiti chun hahsa tah in kakigong ham hamun, kanaopa tohman ho le kamounu khut’a sum lut jouse chu ipia aman jilhon jong kahepon sum le pai jong nidanga bangin kakhol doh pung jou tapon, aumsun sun abonchan kapouvin kache tauve.
Man le mol ho chu atepjat’u lhingset’in kapouvin kihoupi hahsate ahikit’utoh alungu ahol hah mama jengin kei ding chu hile khoh kasapon ka insung mi tulebe ho dingin ahoulimu chu ngaida aumlheh jengin ahi, hijongle ahitheidan danin kihouna chu kachaiyun thil ken jeng jong imacha eikenpeh pouvin, ponve thum toh Kimjahoi von ho bou eipeuvin sahap toh ahin adanga adang imacha eikenpeh pouvin ahi.
Nommo jong kasan kajahcha lheh jengin kakile phat’un insung mi tulebe ho kichin dinga peh ding cha jong aumpon kanu le kapa in amani thil lelo tampi ahinpodoh lhonin tulebe hochu kahom mai mayun jum ong chu kahuh jou ham hamun ahi.
Lhakhat lhin masang ahinalaiyin Pathenni (Sunday) nukhat kapi kapuiyin kikhomin kache lhonin Kanaopa teni katep le ahungnom lhonpon thu kihaseile kidel kit ding ahi katin kadalha lhon tai, houina kona kahung kile lhonle insunga ana kina lhonin keijong kagah lut le kanaopan ajinu avoh got toh ajinun kidelpi ding agot kit nahlai kenjong ani lhonin kaphoh-in hitin kaseiye.
Kei: Hey,,, Hey,, naoteni ipi nakisei lhon ham? Tuni Pathenni ahin kinah lou ding ahi, nangni nakinah lhonle hoiya hithei ding ham, thip lhonin, thip lhonin.
Kanaopa: Kanop le paoving ting kanop nop bol vehtang na ikin umem! Nang puma kaveilih tha ding nahi chu.
Kei: Ipi onk Nang pasal nahi chula, ibol’a numei kivo ding ham, pasal ihile numei lungset ding ahi.
Kanaopa: Seitam hih-in,
tin ahung kisenin kalol ahinmeh-in, labu Bible kachoitoh von jong kikhel nailouva neilha o ipi chu kihatsah lheh nahim katile kapi chu lunghang val val hintin kot panga atenggol chun kanaopa malphe tah chu avohpeh le kapi tenggol chu alan atan boh peh-in kei chu kasamin eimanin bangsuh suh nan eineiyin kanahthi alongin cement banga eita ahijeh chun kalu ana val’in chomkhat set khohe louvin kanaumin ahi.
Kahung khah doh le nilhah lang ahitan, kanu le kapa toh kapi in eina toupiuvin Kimjahoi te nupa chula alupna lhon chunga nomtah-in ana kijam lhonin akidai dai lhonin pohlah lah-in ananui lhonin ahi.
Aumchan chan lhon chu kathohda cheh cheh jengin aloje kahe tapon ahi, akinah lhonle phel tei tei ngaiji, igaphel poupoule ei kithohlo ji, kanaopa chula ajudon alouneh toh, ajinu la chomlou numei judon kahet patna ahi, jankhat jong alupna chung lhonin ahung kina kit lhonin room chom choma kigeh ahijeh chun kadonda beh-in, pohkhuh khuh in akiveito lhonin kapi in kamit asip toh kamuh asip toh aseilou vanga chu che hih-in eiti dan ahi.
Chomkhat jouvin keini room in Kimjahoi chu ahunglut’in kaki ihmut lhemsah le kalupna munin kakong tah ahinlho in, ipi hitam? Tia ahelou banga kakikhah dohsah leh
Kimjahoi: Nasopipan eithat deh deh a donin jong nanei poi onk! Na inkouva kihatho tauvang, keihi uicha neihisah uham? Tin kap dot dot pumin ahung kisenjah jah-in,
Kei: (Kalungthimin namaikhah hichu kivobe lhon tang katin ahi) seidoh ding chula kinomjep lou Kateiyoooo…. Hoinu ipi nakisei lhon khat haimo tin akhut’in katuh-in aroom lhonin kapui lut’in
Kinaji lhon hihta boi, nangni tailou naodang kaneipoi, akina din kahin phalji lhon poi, awnem heuchan kaga thah lut leh kanaopa chu aneh ho chun abol ham ti dingla phat seh a achuti hijing jeng ahung kithou doh-in kei chu eihin lho le kathal lhuh jengin.
Kei: Gouminthang neivo vo hih-o, neivoh voh jeh-a natongmoa umlo kahitai, kathi tengle kon navah ding ham, katile ahung kipanpha kit’in kasam chu ponse bot’eh kigo bangin kasamin eikaiyin inbang jep jep nan eineiyin, kathoh khop val phat’in kathi le kathi tin kahung kile thuh tai.
Numei kihi jongle alenjo akihi jeh chun kakicha pon kahin voh tah tah asangkhol jong kabot-eh chaideh in, asamin kale mat’in bang tanan kaneiyin akhut jong he kitin kahepeh-in eijo lou ding ahet phat’in ajinu komin chempong galan tin, chem la dingin asol tai.
Ajinu chu kapin nagalah le nang nathoh ding ahintile anupa lhonin ahung kitho lhontai, kathumuva kahung kidel uchu thisan jong avasao sau tan ahi, insah inlhang hon ahin het phat’uvin eihung phel khen’uvin kanaopa chun hitin ahin seiye.
Kanaopa: Mi upa kahi chu, insung hi kathu thu hichu tujan mama in kipotdoh lhonin, tehsepi jong kipuidohta tujan mama inchoma nachedoh lhon loule nalol katan ding ahi.
Kimjahoi: Ken kanu kapa te hibang kangaiya ka insunga genthei thoh louva nomtah a kiuma nangho insunga hibanga genthei kahung thoh kakisih val’e, tin kinuh hot hot’in ahung kap’in.
Kei: Ipi ba kasuhkhel uma o, nakinah lhona kadonda le neiphel poi natia awnema thu kaseile ase ipi kaseiya kei chunga khut nalhah lhon ham? Mi-upa kahi itile insung sendoh ding tundoh ding ahi, tun mi-upa kahi tin insung suhchatvai ding nago lhone,
Kimjahoi: Najahcha lou ham, napho le nanaopa kiphota kei chu ningot tha hih-in,tin ahung kisenin, kanaopa jong chun kapi toh keini von ho ponho chu inpolanga agapai doh-in,insah inlhang hon jong sei ding helouvin amohvet tho jengun ahi, kanu le kapa jong ahung lhai lut lhonin ahile kanaopa chun.
Nachanu le nanu chu nanop le kipui dohta, umsot lhonle kathadoh kop lhon ding ahi, mi-upa kahin koiman kei chunga thu aneilou ding ahi ken nulepa ulenao pilepu kaneipoi, tin kapa chu ahin houvin.
Kei: aphai mi-upa nahi, insung pumpi hi nangnia ahi, tua keini neinodoh lhon ahin insung hi nahin semdoh lhon ding, henu kivuina inmun sung, henu chohdohsa le sahdohsa insung hi nahin mansah lhon lou ding ahi, tin kapi chu kapuiyin lhase tahle kap pum pumin kapate inlang chu kajon lhonin kanunga kanu le kapan ipi pi ahin seipeh lhon ham kahe tapoi, kavon lhon apaidoh jatsese chu ahinpo lhonin ahung lhontai.
Eikivohna ho chu (hamset louva) humpi toh kidel kabang jengin kalu jong athi vachut chut jeng kasam jouse thisanin akanmat gamin jankhovah keiyin kanu le kapan eijen lhonin ahi.
Khovah phat’in hospital in eipui lhonin acha bang bangin eingailu lhonin phatah a eijen lhon jeh-in kadam doh tan ahi, phat le nikho ahung che chen kanaopa toh kakikhen nau lha khat alhing tai.
Keijong ol olin pon kakhong kit tan, sum kamu kham phaten kakholjin kanu le kapan jong kimanchahna ding ho eipeji lhonin kapi toh kadu du einehsah ji lhonin hibanga mikhoto them nulepa a kaneikhah vangpha kakisa lhehjin aguh in Pathen koma kipathu seiyin mitlhi long longin kataojin ahi.
Nikhat kabepau ahungvah lut’in hitin ahung seiye.
“Chingthem, Gouminthang te nupa jong kidel del lhona ajinu nungjama ajipa jong akouva chea hitih chan chu hungum ahi, janhi masa chun ahungsuh-in kakomin inmun ahungjoh-e.
Kei: Hepa ipi inmun eimo ahingjoh?
Kabepau: Nangho inmun khula, atin
Kei: Hepa chohpeh hihbeh o, kanu mel’a gouva kachinu ahin johdoh ding vang kaphal hihbeh-e tin mitlhi kakitheh le.
Kabepau: Chingthem ken kachoh loule midang koma akijoh ding hichu o, kenjong nanu khutnung ibol’a najoh doh got ham katile, mi athia thita chu ipi kasei sei hih-e, atin kenjong Gouminthang ipi jeh a najoh hammo? Ipi boina um ham? Tia kadohle, kajinu anungjamin kaga koule inmun le thil ho gajoh chaiyin lang hilanga joh cheng taite atin hijeh a chu kajoh ahitai, nang nakichoh ding ahile sangsomni (20,000) in pe nange, midang hile sang somnile sang nga (25,000) a kapeh ding ahi, atin kahung hetsah nahi ahin titai.
Apet pet’in kanu le kapa toh kapi kaseipeh-in sang somni (20,000) chu kabepau chu kapen keiho dingin kaga lhatsah got tai.
Hinla midang komin anajoh kit manin kabepau chu apenom tapon hiche phat chun sang somni le sagi joh-in kathumsah kit’uvin ahile ahinpe in sum chu akipoh-in achemang tai.
Kasum nei jouse akichaidoh kit tan, inmun chu kathah lokit lhonin kanu le kapa toh kingailu tah-in kakigalvet thouvin kapi toh keini jong masanga bangin kipah-in kaum kit lhontan ahi.
Inchen chu ol olin kathah pat kit’in hinla eikivohna ho jeh-in masanga bangin kahat jou tapoi, eingailu sah le lhanga konin eilhamon mi ahung jingin chule kapi ahin kanu le kapa ahin kanaopa thu hi agel a gel talou din eisei jiuvin, genthei thoh a ahung kile kit jongle insung lutsah louding chanin eitil jiuvin ahi.
Hijongle NGAILUT HELOU pa le ajinu hinkho ding kagel jile chapang ahijeh-un kalungse jin, kama seidoh louvin lungguh-in kagen theipi ji lheh-in ahi.
Part-5 hichan hin chaikit taute.
Upcoming part-6
“NEIKOU KOU DATAN,”
NOTE
Ngeijou hih jongle nasim chai jeh-in kakipah-e, asim jouse Pathenin phatthei boh hen.
Aban jingle sinkhom kit taute…..
©️Copyright
Thusimbu Machal jing thei na ding a pan lanom ho kipah tah in lem ahijing in ahi anoiya button “Click Here” khu meh utin details anasim ute.
