Fiction Life Story (4)
“Ucha hinkho thusim”
By: Naocy Haokip
“LONLHI PUMIN”
Kinepna neilou kahi mai lhontai tin ahin seiye……
Inneipa chun mitlhi le naptwi pumin Lalgin hi genthei hahsa tah a na katoh lhona nah changsal’a JNV ahinmu tai, kipah le lungmonga kaum lhonlaiyin jankhat 2:00am vel’in kot ahung kikiu kiu jengin tija thima kagahon dohle Lalgin le aloipa chu ana hitai.
Kenjong hibang jankhang noiya hoilang jon ding nahi lhon ham tia, kadohle School neiten eihin nodoh uve, ati lhonin kenjong ipi jeh a em? Ipi nabolset lhon ham katile sum athumuvin kanei lhonpoi kati lhonle eihin nodoh’u ahitai, atin
Jingle ken nahung thah lhon nange, ken hoitah a kasei ding ahi, katile thu tamsei louvin bu neihonpeh lhonin hibang kigil kel’a ati lhonin ajan janin bu chu nanu toh kahonpeh lhonin kakhovah tauve.
Khovah phat’in kigo lhonin tunile ken kahung sei ding ahi katile tuni kalel lhon val’in kakichol lhon dihe ati kit lhonin hijeh chun ana kichol lhonin jingle iche tei tei diu katipeh-in, nanu toh lou kache lhontai.
Keini potdoh jou jou lhona pot pai kit lhon dan ahitan, kalungmong mo val’in sei ding jong kahepon mi kadoh jousen kamupoi, kahepoi tibou asei phat’uvin na jong tong thei louvin kaumtai.
Hapta khat jouvin thingnoi ho lah a alut lhon tai, tithu kahinja tan lungdong le maimoh pumin thingnoi ho camp lang kajon tai, lamkaipa toh kakimu ton genthei hahsat danle kinepna umsun chapa ahidan ho kaseiyin hinla iti kataotho vangin akidoi tapoi, tulai thulela aboitoh mi kihol khohlaitah ahi, ada daa kimanho sanga ama hung kipelut ho hi chance ahi, tin kathumna hochu jan khanga vacha ham tobang bou ahitai.
Hitia mitlhi le naptwi puma ahin sei chun kalaina behseh-in,
“Ohe, lunggim lunglhamna ding bep sopi kinei sanga sopi bei kihi ngal le nomjonte,” tin laina tah-in kakap tan ahi.
Ajing jingkah an kaneh jou jou’uvin kapa toh keini chu kalel lheh lhon vangin inneipa lamkainan thingnoi ho camp kajon tauve, Lalgin te kho (Kholen) a kona chu khothum kijot galkai peh nalai ahin, khonina chu kagaphah ule vangphat le vangset kikop’in thingnoi hochu group khat anaum’uve, hichea chun kanaopa le aloipa jong anajao lhonin thingnoi vonin ana kivon lhon tai, hinla thal vang achoisah pouve.
Kei ho jong lamkaipu umna in haosate inchu kajon’uvin lamkaipu toh kakihoulim tauvin, mitlhi long chut chut pumin kanaopa le kapi toh kahinkho thusimu kaseiyin ama beiya insung kivaipoh mangthah ding ahidan ho kaseiyin ahi.
Lamkaipu chun kahoulim chu angai ngaiyin ahung ding doh-in hitin ahin seiye.
Sopite, nahung kalson lonau hi agimin nagimuve, hijongle nacha, nanao nasopi houhi amaho le amaho hung kipelut’a meichang kipesah-a kitepna giltah kineisah ahitan, tua nahung thumu hi ken hin phal peh kit leng nikhat le keiho kipalna hung hidiu ahitai, ipi hile Chingthem nahinkho thusimu chun kalunglai atongkhan hijeh chun ama koulut utin, ahung kile dinga ahile ankong nasem diu ahi, atin anunga ding a guard pa komin chenlang Gouminthang chu gakouvin ati.
Chomkhat jouvin kanaopa le Lalgin chu ahunglut lhonin lamkaipu chun Gouminthang nasopi hon nahung kouvu hi nache ding ham? Nache lou ding ham? Nangin seiyin atileh.
Kanaopa: Sergeant major kache lou ding ahi, tia sei pumin kei eihin ven
“Numei naneh moh hung kihol’a hilaiya nahung ham? Gang chel’in kile inlang avel’in neihin hol kit tahih-in ;
Kapa chu ahung ding doh-in kanaopa chu amai chang tah akoh-in, najahcha louva tuni changeiya na-unu noise tah-a nabol jingham? Nang hinkho ding gelna jeh-a neocha ahia kona genthei tincheng nakihet lou ham?
Kanaopa: Kon anomsa e ati onk? Neihin hol tahih-in katibou ahi.
Kapa: Navon ho kikhelta ichesuh diu ahitai, school nakai nomlou jongle na-unu natoh kithopin lang mi-upa insung vaipo ding nahin nang thingnoiya pang thei nahipoi.
Kei: Boi, chapang nahin nalunggel pilhin nailou jeh-a namoh thanop nop ahi kahenai, thingnoiya pan hi thilnom ahipon, na hinkho nakhut’a kichoile le nahi, nakhehsah le thina chu imacha kah ahipoi, hijeh chun hungin kile taute, hepi in nangaiyin phat seh-in nangbou nakou kou jeng jie, tehse thikon ahitan adamlai phat chomcha hi kipanan dip dim peh hite.
Kanaopa: Hung ponge katile hung lou ding kahi, kahapi in neimanin lang neikai jongle chun kahung lou ding ahi, ati tei tei phat chun kakap tan ahile kapa jong lunghang thimin vailhahna thu aseipeh-in.
Kapa: Chapa Minthang keihi napa jong kahipoi, insung kinaicha jong ihipouve, Kei le nang hi ikimatna umlou sim le mal tobang ihi, hijongle ven, amollemsa napa toh min kibang kanahi jeh mai maiyin napi in Chapa a eikisima kenjong nangni hi cha le naova kakisim lhon nahi, keihi vangset jeh-in kajinu nanu khu cha kanei masat chung lhona naobu cancer jeh-a naobu kiladoh a tuni kathi changei lhona chaneilou ding lungmongmo tah-a kaum laiya napi in nangni ucha cha le naova kisim dinga eihingon vangpha kisa lheh jeng kahi, miching hile chun khonung changeiya nagoulo ding jong tamtah sempeh ding kati ahin tun kagel loubeh in hinkho namangin phat khat teng hung kisih jongle chun navaigei ding ahitai, na-u Chingthem invang ijakai ahethemsoh keiye, Chapa iba kilo ding ham! Ken nachunga thu kaneipoi, tin kei komin Boinu ven nisa khu alhumna ding jonin achetai, muthim dingkon ahitai, chen kinungle tahite, nang le kei lungdon lungkhamna nanaopa hin itih-in hethem ponte, tin mitlhi kitheh pumin apot tai.
Kenjong lamkaipu komin
Lamkaipu kakipah-e, nangin khotona neitah-in thu neiseipeh-in hinla ka sopipa ngol jeh-in kathumna jong vutvam tobangbep ahitai, hijongle tunin vang nampi lamkai cheng jong na themmo pouvin kei le kapa jong kathemmopoi, themmona jouse kanaopa ahi, tin chibai kabol’in hung kile din kahung kipatdoh tai.
Kanaopa koma chun Boi, itih chanpi ngol dinga kigo nalai nahi ham? Tua in kalhun tengle hepi khu ipi kam chenga kadonbut ding hitam? Tehse thikon geiya lunggim le lungdonga kikoi jing hi nakioi ham? Hepi alhaset ngei ngei le pap nakipoh ding ahi, tu chun nanop chan chan hung pangtan ken ima kahinbol peh theilou ding ahitan nathi tengle navuiyin hung kit nange, katia mitlhi puma lhase tah a kaseile ama chula kigumsah the thu, ki thingnoi sah tah-in achomte nadu ha, asaote nadu ha? Pap nakipoh di neigahti nanahthi kalhoh dihe, ahin tin kiseibe le ahinbol tahbah ding jeh chun kadalha tai.
Khopam kalhung tauvin Lalgin chun apa ahindel’in
“Hepa sum themkhat beh eidalhah peh tango, ahung tin.
Apa: Kaseibon ngailouva sum nathum nahlai o? Keikhel’a pa a nakisem na boss pao koma chun kithum tangu, tin enghou pumin janga (500/-) chu agah pen ahi.
Lalgin chun kei komin He-u, kaloipa ding jong dalhah peh o, sum ahin tin
Kei: Ikhohsan vet vut’a sum kapeh ding onk keihi sumphung neihisah lhon khat ham? Thu akiseile chal keukouva alim neocha ahamdoh le mi tha ding voh ding ngen seiyin tin ka ipi sumpeh ding akan poi, tin kadalha kit tai.
Gal’a pat eivet vet’u chu kapa chun nommo asan akinung heiyin Minthang hung tadin, agahtile ahung nomjep pon Lalgin joh chu ahin sol’in kapa chun nangjoh hungin ati phat’in ahung lhaisuh vet vut’in kapa in a purse aladoh-in sum jong kanei lou hi o, tin sangni note (2,000) khat apen.
Chapa Minthang, kasei ngai hih jongle chun hiche hi kikoiyin apha pha in anamangtan, tubanle la kikimulou maithei chu ahitan, damsel lhonin lang thingnoi hijongleu chun Pathen sumil hih-un, sum jong beri, talab, nehlou nehmah neh nan mang hih-un, damna ding oiva nading bou kingaito uvin, atipeh le. Neipeh chu nakin ahin aman nading chu kei kin ahitai, tin ilou thet’in aseiyin akile lhontai.
Keiho jong lhase tah in LONLHI PUMIN kakinungle tauve, hichejan chun Lalgin nulepa koma kakicholpa lhonin ajingin matah-in kakile lhon tan ahi.
In kalhun lhonin kapa in thil umdan jouse kapi komin aseiyin, alhaset louna dingin ajol’in ahile kapi joh chun
“Thingnoi pangin tin ahung genthei tengle achihdom khah jongle apha ahijenge, kei koma aumle akilungmon ji vangin ajole a-unu Chingthem hi aja lou jeh-in Chingthem genthei thoh thohna ding, avoh voh sangin thingnoi ho khut’a aman genthei agathoh chu apha jenge ahin ti vanglah-in ahi.
Kapi lunghel’a genthei khah ding kakichat ahin, agelthem thei jeh chun lungmonna khat kahin neiyin ahi, hinla athingnoi panna lha nga (5months) ho vel hipan nalaiyin jankhat kapi toh ka ihmut lhon jingkah khovah ding kon 3:00am donin kanaopa kot bul’a konin hepi, hepi tin kapi ahin kou kouvin kathoudoh-in kot kahon le numei khat ahin puilut kit tai.
Kenjong Boi, hoiya che ding nahiuvem? Ipi ngaitoa nahungu ham katile, ipi kingaito de, in ahijeh a kihung hichu atin kei gel’a chu thingnoi apanpi numei ho khat tou ham kanati ahin Vohenu!!!
Kajinu ahi ahin titai, kajachat toh kalungdon toh sei ding helouvin kamoh kamkat den jengin ahi, ajeh chu keijong kum somni lhing nailou amajong kum som le gup lhing loulai ahi, (hichepi chun ji ahin kipui)
Sei ding helouva kamoh tou thim jengle ipi nangaito ham cha beh omtang hibang kilel’a ahintin, ima seilouvin cha chu kaomtan ahi, kapi ahung thouvin Minthang lungkhamna chapa phatah khat vang nahiye onk, na-unu hi nangjeh a thilo pai ding bou ahitai, chingdom domin atin, aw kithing det det’in ahoulimin ahi.
Kho avah phat’in an kahonin amin phat’in kathuh peh-in an kineh uvo tin kapa koma din kache tai, kapa komin athu umdan ho kaseiyin ahile ama jong ahungin thudoh tampi abolin ahin kipuinu te kho chu gamlha matah ahikit’e, shortcut ijui jongle nikhat lhingset kenglam kijot ahikit’in, kapa chun lamjot ding pichu kalungjo hihbeh jenge tin akhoisa vung vung jenge.
Amani jahlou cha khat’in kei komin Boinu, amasa a ichena hojong kapum changin kadam hihlaiye atin ale langin kapa lunggim chu kavet le kanui amohjat leuvin ahi.
Nithum jouvin kanaopa le ajinu Kimjahoi@Hoinu chu kapui lhonin tulebe toh thinglhang kho Molphei kiti kho chu kajon tauve, bolero gari khat kakilah-un gari lhunjouna chan chan toldoh jengdin kahung kipat’uvin kenglam chu saotah kahinjot kit tauvin lel vang aum mama jenge, kapa toh kakihou lhonin chapang ahiuve tin khen ding kitilela nanaopa ngol toh, kitomsejah jah kit ding ahin, thingnoi apanna muna aboikit ding toh kichensah ding ahimaiye tin kakihoulha lhonin amun kagalhunu le inneite pi chun ankong nasem louleu insung nahunglut lou diu ahi, anatiuvin anahang jah jah jenguve.
Koi ahijong kihelou haosate ahiuve atimanun haosate ina chun kapan sauvin vohcha choh ding kahol kit’un tuh li val bep khat sangsom le sang nga man ahi atiuvin adang umkit lou jeh chun kacho uvin ankong kasemun, man le mol khum ding ajat jat eitep peh-un, Kimjahoi anu chu minasa ahi atiuvin alim vet’a jong jam jeng thei ahi, ahoulim jong ngaihahsa mama jeng nahchang sal’in kakihou lhauvin lhathum joule mankhuma nahungdiu sum lakh khat toh selpi, khisong, lutom laisui ipi pi atiu ham, eitep peh-un kahung kile tauve.
Alang khat’a athingnoi panna langa konin ni nga (5 days) masanga alut kit loule themmo neichan theilou diu ahi tin lekha kamu kit ngal’uvin man le mol suhtup diha, ole ipi ngaito diham kapa toh keini chu jan choldona jeng nopna him him umtalou ahi.
Hijeh chun thingnoi lamkaipu chu phone a houpi tho din kakihou lha lhonin ka phone lhon tai.
Lamkaipu chun ahin pick up vanglah-in kiphalam pumle kicha pumin kapa in ahoupin hitin aseiye.
Kapa: Jaumtah lamkaipu, lekha neihinpeh-u chu kamu nauve, lungset tah-in neihepi nau chung chonin neihepi kit diuva kahung tao masat ahiye, kachapau chung changa hin kagim lhon behseh jenge, ipi jong kiseibe ding hitam? Ka chanu jong thinglhang akal kalnan adammo kigotan hijeh a chu kahin phone tho jeng ahiye.
Lamkaipu: Henge hepa ipi ham naseinom?
Kapa: Lamkaipu nangho lah a hung le thah kit ding jong ajinu ipi tikit ding hitam, lungset tah-in haisah theitaleu chun kati ahiye.
Lamkaipu: Hepa ipi hijongle ama chu hinsol phot phot tadiuvin chuteng kihou chen naute, tin phone a cut tai.
Hijeh chun kanaopa chu kasol lhonin imathu boi umlou ding ahidan kaseipeh lhonin amajong ache tai, nithum jouvin ahung kile kit’in kapan ipi aseiyuvem tia adohle.
Kanaopa: Sum lakh khat nahinpoh diu ankong nasem diu ahi, eitiuve.
Kapa: Hoilai muna sem dinga eiseiyu ham?
Kanaopa: Amun jong aseihihve.
Kapa: Itihle atiu ham?
Kanaopa: Tu hapta sungma ma atiuve,
Kapa: Kaden!!! Minthang lungkhamna ding jeng bou neigonpeh uve, tua sum lakh khat hoiya imaidoh diu ham, man le mol khumna ding thil ijakai hol angaitoh lungkhamna a thipai ding kahitai, atin ulsa longdoh leuvin aumin ahi.
Kenjong sum le pai bat le thamin kahol khomin lakh khat toh vohchal tuh nga chohna ding toh genthei le lungdong pumin kasutoh nah nah-in ahi.
Chaga akihia mimusit akichan nakah-in kanaopa ham ngailou toh aphatlouna ho jeh-in koima lungset jong akichang jou pon, nitin kahinkho chu “LONLHI PUMIN,” kahin mang jingtan ahi.
Mitlhi long chut chut pumin kapa phone a chun thingnoi lamkaipu chu ka phone kit’in hitin kaseiye.
Kei: Sir nakoma panpina kathum nom jeh a kapa phone a kahin houpi nahiye.
Lamkaipu: Ipi hitam? Chingthem nalunggel seiyin.
Kei: Sir thinglhang langpeh hungkal kit leng kadammoa kathilo ding ahitaiye, kalelji val jengin khonai dungin ankong sem ding chu neisem sah tauvin lungset tah-in, katilaiyin kakinuh doh tan ahi.
Lamkaipu: Ole Ole itihle hung ding natiu ham?
Kei: Sir thaini (jing hilou akit) le hung ding katiuve.
Lamkaipu: Ole (Thingvom) kho chan chu gari lhailut ahin hilaimuna khu kanaum diu ahi Thingvom kho chu hinjon tauvin.
Kei: Henge Sir neikhotona chungin kakipah behseh jenge, Pathenin naumpi jinghen, nampi lamkai nahin najat nanam mite nangailui ti kamu chenin nang tobang lamkai pha naumhi kakipana asange.
Lamkaipu: Ole kipa ume, ipi hile kam chengin houlim taute, tin phone a cut tai.
Keiho jong kanao teni kapuiyun kapi le kapa teni jong kabon chauvin Thingvom kho jonin kapa gari bolero a chun tulebe hotoh kitol’in kache tauve.
Part-4 hichan hin chaitaute.
Upcoming part-5 “NGAILUT HELOU
NOTE
Ngeijou hih jongle nasim chai jeh-in kakipah-e, asim jouse Pathenin phatthei boh hen.
©️Copyright
Thusimbu Machal jing thei na ding a pan lanom ho kipah tah in lem ahijing in ahi anoiya button “Click Here” khu meh utin details anasim ute.
