Fiction Life Story (3)
“Ucha hinkho thusim”
By: Naocy Haokip
Kapi: Kihoi thou nalai hichu o na tin nomtah-in kakitot lhonin ahi.
“HINKHO HAHSA THOH,”
Kapa Paojang in jingkah khat hitin ahung seiye.
Kapa: Chingthem nanao Minthang in exam ajo ding hita chu o, tuni le gapuidoh ngai ding ahitai.
Kei: Ole hepa gapuidoh hite na, ole naboi ham?
Kapa: Kaboipoi chanu anneh joule che hite tin, an kakineh doh lhonin kache lhon tai.
Head mistress nun exam ajou tauvin hapta khat suty ahi, results hi hung out pai ding ahitan, avangpha pha pass intin avangse ho chu iti them jongle pass deh lou ahi, ati.
Jawahalal Novadaya Vidjalaya (JNV) hi school dang tobang ahipoi, tin thu tampi eiseipeh lhonin kanao kahin puiyin kahung kile tauve.
Hapta khat jouvin results ve dingin kanaopa kakipuiyin kaga che le ohh! Kaden kagincgat phahlou pin kanaopa jong a pass tai, iti kakipa hitam! Ka mitlhi kakitheh leuvin ahi, in kalhunin kapi jong kaseipeh le akipah lheh jengin nilhah chun kapa Paojang teni toh maicham kasemun kapa Paojang injong umchan didan ho ahiljin, chule insunga mi-upa nahin, insung hi nang mopohna ahi, naphat kikhel masangin phaten lekhasimin lang, tua na gentheinau jouse nangjal’a nopsahna a hung kile ding ahi, tiho kanaopa chu aseipeh-in ahi.
School sunga alut na ding nikho anaitah jeh chun kapa toh bazaar a kacheuvin kapa in ama sumin adei angaichat ho achohpeh-in, hiti chun school hostel sunga chun kagathah lhontan ahi.
Hapta seh le khatvei kaga vil jingin, kapi jong khatvei kapuiyin hiti chun lha khat ho ahung chetan ahi, nikhat kapa komin hepa kanao gavil hite katile kapa in ;
Kapa: Boiching ipi phat jousea vil ngai kasa hih-e, dama adam poule pasal ahin, alunglet domna dinga changlha dom dom ngai ahe, atin asei chu adih in hijongle
Kei: Hepa adih-e, hijongle nachapa khu mitoh bangmo val’a kalung mong jou poiye, ajole ju adon dem! Mi ahinvo dem! Mithil ahingu dem tiho kagel gel jengji ahiye.
Kapa: Oooo, hikit thou chu o, tin kache lhon tai.
Head master pan hitin eina donbut lhone
Sirpa: Sopi teni, mi hijat jat uma adanghohi koiman hungvil beh louva, Minthang hi nahungvil mun behseh uve, keihon thukhoh aumle hinsei nauvinge, hostel sunga mi kimoh lutsah sah ngailou ahi,
Kapa: Ahipoi, Sir, kachapa hi apum gollhang ahitah vangin alunggel chapang val val’a ajole hostel sunga bolkhel khat tou neikhante tia kahung vil jingu ahi.
Sirpa: Ummm hina chu, hijongle avetup ding teacher tampi kium hila em! Ipi nalung khamu ham, hitia asei phat chun kaha nel nomlhon tapon hijeh chun kapa in.
Kapa: Sir tua konin boina aumkhah le hiche number ahin neihin hetsah tauvin, kachanu vang hin phone aneilou ahi, tin ama number chu apen.
Kei: Sir kanaopa hi sum le pai mandan athempon hijeh chun hiche sangni (2,000) hi nang koiyin lang angaichat akivat aumteng anapejitan, tin kapa toh kahung kile tai.
Kanaopa kakineppi dan dan chu! JNV a aum sunga hi aban itile kasot jom jou ding ham tin kajo chanin sum le pai kahol khom jingin, phat chomkhat jong kichol man louvin na katong jingin invel sunga hon melei kabol toh kaponkhon toh, Pathenin eilungset jeh-in katohlam jouse chu kamachal jingin kaponkhon ho jong kakhon chai masangin mi ahung kikham jitan ahi.
Alang khat’in inmun’a me hungla ji Mimin jong nikhat kihal’in ahungla jingin, chule kumlhun nailam ahitah jeh-in me jong alhomjep jep tan ahi.
Nikhat sun nisa ahat jeh chun insung limin pon kakhongin, kajo ding koncha ahijeh chun jotei tei ding katin, kapi in patphei eiholpeh-in, kakoma alumjin abangle kakidai ji lhonin ahi.
Chutia kino thima pon kakhon lai chun kainmai tah uva bolero thahbeh khat ahung kingan, asunga koi um ahi kahepon gari bou chu kamun kichatnan kadimin ahi, ajeh chu kei lunggela chu kanaopa hin bolkhel neiya police ho eiman dia hung hinte, ti changei kanagel man ahi.
Kaponkhon kakilha loiyin kapotdoh-in kagavet le kapi jong ahung potdoh-in, hichun Mimin chun nupi officer khat le pasal dang mini ahin puichu kamutai.
Lungdong tahle kiphalam pumin hunglut’uvo tin touna kapen, keiho touna chouki mai maiya tou din amaho chu alen behseh-un, akalval chula adang kaneipon touna jong chu lhing kit lou nalai ahi.
Amaho joh chu akiphalamun chubang smart tah a kivon hopi chu veranda tol’a chun carpet akiphauvin atoulha jengun ahi.
Keijong insunga kalut’in twi kaga domin abon chauvin kapen ahile, akipah thei lheh-un, kapi toh akihou tauve
Nupinu: Henu tugeiya nadam nahlai hi lungmon ume, keiho kahiule kachapa hin nangho koma me ding manlhom cha cha nahinpeh jiule keiho ichan ham eikhang doh uvin, hijeh a chu video record kahinbol sah kitle amun tah chu kamu nom behseh a kahung ahi.
Kapi: Kipaum tave nangho jal’a katunu jong olchom ahiye, ajeh chu aman alua apoh a lamlen panga agajoh a atoupi pi sanga in muna nahunglah jiu hi a-olchomin kakipaji dan hi.
Nupinu: Henu ama natunu bouseh in na atoh dan ham?
Kapi: Henge keila kitehta koi natoh malah katunu hin kei jeng jong eiboipi thoji bou ahitai.
Nupinu: Ahile henu pasal umlouva hitia nangni bou nachen chen lhon sangin kei komin hung jeng lhontan.
Kapi: Mounu katupa khat aume, amahi kakinepnau ahi, tun Canaan venga JNV hostel in aume.
Nupinu: Ohh! Henu chuti ham! Apha lheh e, tin kei chu eihin kouvin Boinu khatvei hungo.
Kei: Henu twidap kahin dom’e, hiche twidap hi hon sunga theiga hoa kon kasem ahi, tin thei twi chu kapeh le adu theiyuve.
Nupinu: Bazaar a kicho ho sangin atuiye, kadonbe nome tin ahung nuiye,
Mimin: Henu naval tave min aphabep napea.
Kei: Donbe uvo tin bottle khat kape kit’in ahile
Nupinu: Inlanga kakipoh dihe ahin tin,
Kei: Henu donuvo akhohpoi inlanga nakipoh diu athah beh sempeh nange katin ahi.
Nupinu chun kapi komin henu natunu hi kachapa Mimin toh kichensah thei hilou ham, phaicham nungah ho sang sangin amel ahoijon, achingin kadei lheh-e.
Kapi: Hanuiyin anuiyin hiche lou natong pentah ipi ding natipouve, asam jong kipoman jilou hikhu o, asamlah hokhu phet le chun ahit jong ohlih gam tante.
Kei chu kanuijat toh kajachat toh Mimin chun eihinven amit eihin sih-at khumin ahi
Nupinu: Henu chuti sei hih-o, tulai nungah ama tobang bou kihol ahitai.
Kapi: Katei ahiloubeh ding seidau hite, nang ho opisal ngen hiuva (officer) ati ahin asei theilou ahi.
Chuphat’in kenjong opisal chu anasatai katile kabon chauvin kanui khomuve kakitot tot ule phat chelam kaheman pouvin nilhah lang 3:00pm ho ahi phat’in nupinu chun nilhah 6:00pm le program kaneiyin kilevah ding kahiuve ati phat’in, keijong mehol’in kakigon Mimin chun eihin juile hon sung ve dingin abonun ahung kijot lut tauvin ahi.
Amaho chu nop chom chomin avahleuvin lim akilauvin kei chun me ho chu kinotah a kahol le Mimin chun eihung holhu in, maipum khat chu len asahval ham lo ding agot le alou theipon ipi pi chu alo ham akhut ahin kisuhkhah tai, athi ahapot phat chun eihin kouvin.
Ching, eitin kahouda le Boiching eitikit’in hoiyo Umin katile kakhut mai pumin ei at peh-e ahin tie.
Hichun kache pheiyin loubong do le japando kanoiyin kalukhuh kabot keh-in katompeh e, me kahol nga phat’in kakisop thengin thei twi kasempeh kit’in amaho jong chedin akigo tauve.
Mimin chun seinom nei hile kilom kasan insunga kalut le ahunglut’in
Mimin: Nao ipi nasem hammo?
Kei: Thinglhang mi gentheite fruit juice kasem ahe.
Mimin: Nao jing le thaile ka posting mun jona che ding kahite, kalunghel val’e
Kei: Azzzz! Umin nang nache le konba kamejoh ahung chohji di taimo
Mimin: Kanu solchah ho hungji nante, tua gollhang ni ahinpui teni khu hungji ding ahi.
Kei: Ahile nang itih nahung kile di mo?
Mimin: Kasei theipoiye kumkit kum lhun jong tahsan aumpoi, Nao kahung kile kahse einangah jingta o.
Kei: Hoija kache ding onk kei, kananga jing ding chu!
Mimin: Nao, kaseinom atame hijongle phat’in eitoh joupoi, hiche sum sangsom (1,000) hi koiyin lang mobile ana kichoh o, ikihoumat jing nading hiche ka number tin number eipen
Kei: Umin sum vang la ponge, kapi in eisapset ding ahi, PCO in hin phone ji nange, mobile choi kham jong kahipon amanchah jejong kahepoi, katin sum chu kalepeh le anompon hijongle ahet lou kah-in a court pocket in kahetpeh tan ahi.
Theitwi bottle thum kasempeh-in me ding ho kasem chaipeh-in amaho jong akile ding phat’un nupinu chun kapi chu envelope a kichun khat apen,
Henu, hiche hi kikoiyin lang phatthei neiboh-in, keiho langa konin imacha hinpoh dingla aumji pon, nangho tohga kine ne thei ahin kakipah-e, tin kapi injong envelope chu alan Mimin le anu chu phatthei aboh-in taona amanpeh-in ache tauve, Mimin chun alhum mang changeiyin eiven ahi, hicheni chu Mimin toh kakimu achaina jong ahitai.
Kanaopa hostel a aum lhani jou ahitan, kapa chu jingkah khat lung himo tah-in ahungin Boiching kigo o, hostel lang gavil ngai ahi, thukhoh aume ahung tin, kin loiyin kakigon kache lhon tai, kagalhun lhonle head mistress nun mitchang san let lut’in einave lhonin katijat tabah kahe khapoi.
Kapa: Oijapi kachapa toh kakimuto thei diu ham?
Head mistress: Nachapao chu kamu mu naa ahinga kakoi lou ding ahi, hostel asuminse bep’e hitobang chapang gilou chu ipi kan na dinga lekha nasimsah uham? Sum leusah ingap sah tin ahangjah jah jenge.
Head master pan office a eikou lhonin kagache lhon le kapa komin
Head master: Sorry parents na chapa chu tuban le hostel sunga hunglut theilou ding ahitai, beri Sigarete achep toh, ju adon toh mi mobile aguh toh tuhin ajamdoh-in hoilang asuh kahe tapouve nithum masanga kaholmou ahitai, ginchatna jouse kahol’un kamudoh tapouve, hijeh chun register a konin amin kahlhah ahitai, nommo sahih-un, government rule ahi, thinglhang kho ho khatma Lalgin kiti khat toh kilhon ahin ginchat toh abahle Lalgin te kho chun um lhonin te,
Kapa: Lalgin te kho chu ipi kho ham? Name of village
Head master: Kholen kiti hile akilome.
Kapa: Kakipah lhone Sir kile lhon tange,
Kei: Sir kanaopa mitdohna ding gel’a phat chomkhat jong noma hinkho mang manlou kahin, tua ipi kati ding hitam? Kanaopa jeh-a kei jeng jong mi muda chang ding kahitai, lungset tah-in kanaopa bolkhel jouse kei bolkhel danin gel’in lang nei ngaidam uvin chule mobile aguh jong chu aman ken dit nange, athemmo chu kahitai, keiho jeh-a nanghon jumleja nathohlo u ahitan, ngaidam changdin lomjou tahih jongleng nei ngaidam tei teiyuvo tin kakap lhatan ahi.
Hichun kapa in eilhemin head master pan jong
“Chanu, miching tah nahi ima kagelse tapoi, aphalou chu aphalou ahimaitai, tun holdoh-un lang phaten sinthem themin kisin mai tauvin, mobile aguh man jong ken kadit ahitai.
Kei: Sir thil akichai ding jouse kichaita jongle lungset tah-in hiche sum hi neilah peh-in, tin sangsom (1,0000) kapeh le anompon hijongle kataotho jeng phat’in alan staff ho khat akouvin mun khat’a agakoi sah tan ahi.
Lungna pum le jahcha pumin inlang kahin jontai, lampia chun kapa komin hepa lungset tah-in kapi komin kanaopa thu hi seipoh poite o, ajole pona val khante, lep thei theiyin lep hitin imulou beh le oltah-in hetsah mai hite,
Kapa: Dih chu Chanu, napi jong tehta ajole veisetnan neikhante jing mama le thinglhang lang chu ijot ngai ding ahitai, napi jong nanu in umpi nante tin lampia chun kakihou toh chet lhonin ahi.
Kagalhun le kapi in nanaopa dam nam? Lungmonga um hinam? Tin eidong hai lehluh in kenjong hepi einin bou ingai ahin, aman eihephaji lhon poi, nom asah a asah ahi katipeh-in, alungmon theina dingin kaseipeh tan ahi.
Ajingin kapa ahungin kapi komin hitin ahung seiye
Kapa: Henu tunile Chingthem toh thinglhang jougam kal ding kahi lhone, namounu toh anaumin.
Kapi: Ipi bol ding ipi ngaito nahi lhon ham?
Kapa: Moh a business bolthei ahikhat le tia kagava lhon ding itih a kahung kile lhon ding kaseithei poi, namounu Chongnu jong kaseipeh ahitai, anaum lhonin tin thu tamsei louvin kakipat lhontai.
Nilhum keiyin thinglhang lamsuh lamtou kajot lhonin kalel lheh jeng lhone, itih a thinglhang kal khalou cheh kahi lhonin kapa deh deh chu anem toh athaotoh a-oipoh toh lamtou ahiteng kilih le kilom leuji ahi.
Nah changsalin Lalgin te kho chu khojin chipchep’in kalhung lhone, Kholen kiti ahin khosung chu huilhi anungin adapjin jenin anopna khat aumin ahi.
Lalgin te in chu mi kadong lhonin eihil bangun kajon lhon tai, kagalut lhonle lou nupa khat teh thim lhonta vaikon hung lhungpan ana hi lhonin phate chan einalem lhonin ina twilumin eikisil sah lhonin an kaneuvin bal me eihonpeh uchu atui lheh jenge.
Kache lhon lonapen thu chu kasei lhon le janmang dia jong kadeilou koijah dia jong ngainom umlou hel thu chu eiseipeh lhonin, kalaina behseh jengin sei ding le gel ding helouvin senlai naobang kakap den jengtan ahi.
In neiteni chun eilhem lhonin kap hih-in boi, iba ilo diu ham? Keini dinga jong Lalgin chu chapa changkhat kinepna umsun ahi, hinla tun kinepna neilou kahi mai lhontai tin ahin seiye…….
Part-3 hichan hin chaikit taute.
Upcoming part-4,
“LONLHI PUMIN”
NOTE
Ngeijou hih jongle nasim chai jeh-in kakipah-e, asim jouse Pathenin phatthei boh hen.
Aban jingle simkhom kit taute…
©️Copyright
Thusimbu Machal jing thei na ding a pan lanom ho kipah tah in lem ahijing in ahi anoiya button “Click Here” khu meh utin details anasim ute.
