Fiction Life Story (2)
“Ucha hinkho thusim”
By: Naocy Haokip
“LHISONA HINKHO HUNG KIPAT”
Hitia thingpo dinga nupiho toh kacheu chu agam alei kichonkha nailou ahijeh chun gam le lei kahepon thing hah dan dan chu sei d aumpon ahi, jingkah ma thima kacheu ahin amun kalhunu chun sun ahitan ahi, thing go gam le leiyin kahol’un nah changsal’in pohkhat kakimun kahung kile tauve, lampi chu asuh atou aumlou vangin agamlhat jeh chun akimoh lel jengin kinga louhel’in kahungun, nisa lhum jou khojin masang jep’in in kalhung nah nah’uvin ahi.
Insung kagalut le kagil kel toh, kalel toh kapi anaum kit pon, kanaopa chu tapsah lang ngan thuhkhuh chu athai thaiyin, kenjong
Boi, ipi nabol hamo! Tia kagah vetle beri anam kajan, koihai dumchep dum gim aname, tia kagah naiphei le vo henu! Kanaopa chun dum anachep dan ahi.
Kalungna behseh jengin, a beri choi chu kalah peh-in, meilah a chun kagouvamin “Boi, ipi dinga aphalou nabol hitam? Hitiho bol dinga kon nasol ham? Tukal hinbol kit tahih-in, tia kapho le ahung lunghangin eihin kidelpi tai.
Vo nom leng kavoh thei ahin, hijongle awnema hil dingjoh kadeiyin kasama akikhaiyin, kakhut eipe peh-in hinla kakile thuh poi, keijong kalunghan phat’in angeiphe kabengin, nanghi kalungset nahet val jeh-a nahiti ahi, aphalou lou bol dingin kasol poi, kasei nangailou le kavohmo nahipoi, tia kapho le ka thingpoh ho thingkeh khat chu ahin kilah-in, kakong avoh le na kasa val’in kakap tan ahi.
Hinla angachom dehpon thingkeh achun ngavei tobang eivomanin kenjong kalahpeh-in kakoidoh le insah, inlhang hon kakidel lhon chu ahet phat’uvin eihin del lut’uvin kanaopa chu voh ding atiuvin hijongle kenvang lungset tah-in vo hihvo, angol nahlai jeh-a ahimaiye, katin kavohsah pon ahi.
Kapi ahunglut phat’in ipi thu hitam tin alungdongin mi tam jeh chun ima kaseipon ahi, ahung khom ho chun thingkeh a eivohna hochu eijutpeh-un, kanaopa chu aphoh-un, tukal na-u nahinvoh kitle nang nakivo ding ahi tin ahouseuvin eidalha tauvin ahi.
Hichun kapi komin hepi, kagil kel val’e katile bu eithuhpeh-in kap pumin bu chu kanetan ahi.
Jan’in kapi in maicham sem ding ahi tin upa khat le ajinu jong ahin kouve.
Kapi ahung houlimin
Chapa Jangpu, tun keila katehtan itih a kathi ding kahepon, katuteni la neocha cha ahinalaiyin hijeh chun kathinung tengle katu teni inchen khosahna hoa mipa a nahungpan ding kadeiye, kachapa toh min kibang nahin nang tailou midang koima kingahna ding kaneipoi, atin alhi akitheh tan ahi.
Chuin kanaopa toh keini komin Chingthem le Minthang ama hi Napa jolpa ahi, napa min chu (Paojang@Jangpu) ahin amajong hi Paojang ahi, hijeh a chu napa mel’a namu lhon dinga napa a kasempeh lhon ahi, ati
Pa Paojang jong ahoulimin, kei ima hiloupen insung mipa a neikisem jeh’uvin kakipah-e, sum le pai neile gou imalam jousea vejou lou ding hijongleng genthei hahsat nikhoa genthei thoh khompi jingdin insung mipa hinajal’in kakiphal doh-e, atin kanaopa toh kaluchung lhona khut angamin eitaopeh lhone.
Hichea niapat chun Pa Paojang te chun eingailu lheh uvin, jingkah nilhah in eihungvil jiuvin kenjong kapa bangin kagel theitan ahi, neh le chah umlou komle eihungthah peh jiuvin mipa a kakisemu chu khoh eisahpeh lheh jengun ahi.
Insung genthei hen hahsa lheh jongle kanao school kaijom sah jing ding kanomin nikhat sum le pai kakholdoh kham kham kasutup’in kapa Paojang te inlang kajonin kapa koma chun hepa kanao school kaina ding hoilai aphadem gave le hite katileh kapa chun hitin ahin seiye.
Kapa: Boiching phai phah masangjep Canaan venga khun JNV school khat aume, hilaikhu tua hi mi ahol laitah-u ahin, hichea khun gache hite, class ijat sim ding ham?
Kei: Hepa ningkum chun class-5 3rd Division in apassed nah nah-e, 6 hi d dan ahi.
Kapa: JNV a chu class-5 a kipan ding ahin, avangphat le pass ding a pass leh class-12 chan free a asimthei ding ahi.
Kei: Hepa chutia free a asimthei ding ahile pha jeng chula na, private school ho jong chu kijou sot lou ding ahin, gave hite tin kache lhontan ahi.
Vangphat umtah-in seat aum nalaiyin chule exam pe ding jouse lhakhat sung tution alah diu ahidan eiseipeh lhonin, head mistress nu koma kanaopa umsah din kahin gongtup lhonin kipahtah-in kahung kile lhontai.
Achena diu haptakhat bou avat tan kanaopa chu um nomlouvin akiphin phin jengin kenla ama lekhasim dingbou kagel thupi jingin, kalunggim naho kapi hetsah jing dijong tehse akong konta, ajole alung nommo khante katijin kahetsah ngamji poi.
Nikhat kanao Minthang in sum neipen atin, ipi ding nati ham boi sum chu! Ka it poi naman nanom seiyin katileh nehthei kakichoh di he atin, kenjong ama mitmu tah-in thingkong kahongdoh-in som nga chu kapetai, ipia aman vang chu kahe tapon ahi, amajong ahung khang khangin atahsa chu keitoh kakibang tan ahi.
Nikhat honsung kalho lai hin kapi chun adap’e tin nilum aki oiyin Kei chu hon lhochai loiya ponkhon ding kati ahi jingkah nisa hat masanga hon sung kalhojia, nisa ahung hasat tengle insung lima pon kakhonji ahi.
Kanaopa chu suty ahijeh chun insunga achangin akimai maiyin thilse boldia kagelji lou jeh chun donin kaneiji pon ahi, nilhum keiyin pon kakhongin kanaopa chu hoiya che ham kamudoh tapoi, kapi kadoh le aloiho koma kichem hinte atin, kalungmong sel’in nilhah an nedia kagahol jongle kamupon jan 8:00pm langin in ahung vahlut’in, kagelphah loubeh ju ahindontai,
Kalungna val’in hoiya nache ham? Katile kakap doh pai tai, hoiya sum nakilah a ju nadon ham? Tia kap puma kaseile athipbeh buh-in, kapi komin hepi bu eithuhpeh loita kagil kel hichu atin kenjong mitlhi pumin bu kagathuh peh tai.
An aneh laiyin ahung lunghangin bukongin eihin sep’in, sa me nahon mo ham? Jingkah nilhah bepai, bendi kakidah-e, tin ahung phunin kalung kalhason
“Najahcha louva chapang cha cha buleme chunga nahungphun ngam ham? Nadu le nenlang nadu loule ngolta, nang hi kadep dep le nahoitho e onk,” kagah tile kapi jong alunghangin Minthang na-unu tohsa naneh a hite naphah kihet louva na-unu chunga nakitom ngam ham tia ahouset le thingkho khat akilah in eihin vei kit jenge, kenjong kalah peh-in amajoh amal phe laitah khatvei kavei jengle chempong ahin kimat’in eisat got jeng phat’in inpolanga kajamdoh tai.
Kapi in iti apho vangin akidoipon, kapi tehse hita alhiso ding kaphal lou set set toh kanaopa jeh-in alhisoh soh tan ahi,
Aloje kahet lou phat’in kapa kom lang kajonin kapa jolpa kapi in kapa a asem ahijeh chun kapa te ina chun kakap lut’in athu umdan kaseipeh tan ahi, hichun kanu le kapa chun del tou loi dihe tin, kathumuvin kache tou kit’un ahile lupna chungin athal ngan ana kijamin, kapa in iti asuhkhah vangin athou tapon, ajudon chu khamval val ahi.
Kapi toh kani lhonin kakap lhonin ahile kanu le kapa in eiphoh lhonin kanaopa dingin maicham kasemun mitlhi longin taona kamanguvin ahi, kanu le kapa jong jansot ahitah jeh-in akile lhontan, keivang ihmu thei louvin kakap kap jengtan ahi.
Hostel’a thah ding ahi phat’in kapa toh kagathah lhonin, kei eikichat lou jeh chun kapa apanloule aboi lhehjin hijeh chun kapa chun ima jouse eiboipi jingin ahi, hostel sunga head mistress nu chu sang khat kapen “Madam, ama kapeh le phalou ding ahin, adei angai avat aumteng som ni, somthum tin anapeji o, tin kahin dalha lhontai.
Kanaopa kagel toh abahmo behseh jeh chun lunggim nan kadimin, ajole mithil ahingu dem! Mi ahinvo dem! Teacher ho thu angai nadem tin lungkhamnan kadimjin, jingkah nilhah in kanaopa hinkho chekhel louna din mitlhi long longin taona kamang jingin ahi.
Chaga genthei eikhoto ding aumlou nakah-a hitia phamo tah a hinkho ahinman kit jeh chun mitinin eiseise jing tauvin mit jong hahdoh ngam louvin lunggel genthei tah in hinkho kahin mang jingtan ahi.
Jingkah matah le honsunga toh thei thei katongjin, sun le pon kakhongjin, nilhah langle lamlen panga me kajohjin janle Bible kasimjin taona kamang jingin, nungah akihi tah vangin insung vea akipan jeh chun noma kicholna man phat kaneijipon ahi.
Hijongle kalungneopon, tun genthei jongleng kanao pasal uma, tun ngol nalai jongle nikhat le eihin ngailut thou thou ding ahi, tin kinem tah-in hinkho kamang jingin ahi.
Nilhah khat kaboival jeh chun me joh in kache man tapon ahile, ka inmai tah uva chun Scorpio thahbet khat ahung kingan, mundang jon ding hinte tia kadonse da le “Chingthem, Chingthem tia eikou kajan ka ding doh-in kagah vet le mel hetlou pasal khat’in eihin khut jap’in, kagapot doh-in, kei neikou hammo katileh.
Pasal: Chingthem chu nahi hina lou ham?
Kei: Henge kahiye Hepa
Pasal: Ipi dinga hepa neiti ham? He-u neiti tamgem, eijong gollhang thengsel kihija, tin nui hiuheuvin eihinven.
Kei: Ohh! Sorry He-u, ipi thu ba hitammo?
Pasal: Me cho dinga kihunga road panga kanga nga le kanga joulou phat’a hung kahe.
Kei: Hihamm he-u kaboi behseh a kahung manlou hita chu o.
Pasal: Tua me neiholpeh thei ding ham? Kanu’in mang mejoh ho bou hi angaisang hichu o, ikigamlhat vanguva hilai bouva hincho dia eisei ahiye.
Keichu jachat toh, kiphatlam toh kipatoh kakop’in
Kei: He-u, insunga hung touvo, gang chelin me gahol nange, tin honsungin me hochu gang chelin kahol loiyin adeijat chu kapetan ahi.
Asum a sangni bou hiding ahin, sang nga jen eipen kenjong
He-u, ibol’a chujat neipeh hammo, sang ni bou eipe o, katileh
Pasal: Jing jongle kahunglah kit ding ahin jinga din ana koito, ken kapoh le ka man chailam kahepha jipoi ati phat’in kakoitan ahi.
Hiche gollhang pa chun khohsahna tah khat einei jingin, nikhat me choa ahung kit phat chun kenjong an nehsah ding tin Boiler (Ahsa) kahonin ahung phat’in hitin kadong tai.
Kei: He-u, namin ipi ham? Hoija nachen hija nahung na hi agamlhat toh ji lheh-e.
Ama: Kamin Mimin ahin, phaisunga Dorcas venga khu kachen’u ahi.
Kei: Ohh! Achutile mi nomsatah nahidiu ahin, ipi jeh a thinglhang me tamtah tah nahung lahji hammo?
Ama: Kanu hi social welfare ahin, kapa hi police ahi, keijong Navy sepai kahin sa le nga sanga kadujoh-u ahiye, tua konin road komin anajoh ji tahih-in, ken hilaiya hi kahunglah jing ding ahitai.
Kei: Ole, kakipah-e, Umin genthei tah a road panga kathah lele sanga amuna neihung lah peh jihi keidin ol aumval’e.
Mimin: Ummmm hidehta kalungset jeh ahiye, nangla namin ipi ham?
Kei: Kamin Hoichingthem@Chingthem ahiye, ahile me hohi tamtah niseh le nahunglah jia nikhat’a naneh chai jeng jiu hammo? Umin
Mimin: Ummm khatvei kahungpoh jat hi nivei thumvei kihona beiji ahite, ajeh chu kanu tohkhompi ho kapa loiho keiho in khu niseh a mi tampi umji ahe, sa le nga ihon le koiman angaisang poi, thinglhang anche metam ho bou adujouve.
Kei: Umin Kei chunla tuni an nehkhompi ding tin bazaar a ahsa kana chon kana honpeh-in.
Mimin: Assss! Kanao hi aphaji tave o, hungo le bu netaite, tin amajoh chun eihin tem masan.
Kei: Sa nadulou hilou hammo
Mimin: Nanghon chu kidu dehta, tin insunga kalut lhon le kapi chu ipi pi ham metam honin ana kisa boi chei choiyin kenjong.
Hepi, amahi ahiye me mantam tah tah a eihung chohpeh ji chu, an netaute atia kahunglut lhon ahitai.
Kapi: Kipa ume, tupa katunu genthei tah a road panga me athah le le sanga inmun a nahung chohpeh ji hi, iti kakipa hitam?
Mimin: Chingthem koi hammo? Henu hepa la tin olchan eidongin.
Kei: Umin, chiitttt tin kabol’in ima kaseibe poi, Umin amahi kapi (kapa nu) ahin kaneuvapat eihin don ahiye, chule kanao pasal khat aumin Canaan venga JNV a exam bol lai ahi, tin houlim pumin an kane tauve.
Mimin: Chingthem iti nahon’u hammo, anche metam hochu! Keiho kihon sangin atui mong monge, ina khun tunia ka buneh jat hi tuni chanin kane kha naipoi.
Kei: Umin tot che hih-o, moh-in iti eile officer ho neh toh eiti neh kite diham ipi hile tui hih jongle tuitah-a neineh peh kakipah-e.
Mimin: Chingthem nakijo tahle hon sung ho gave le hite, kanu in video hinkap’in atin namelei boldan lim kakap nome atin kapi komin hepi melei laiya nahunglut ding ham, Kaumin hin avet nome, atolang peh chan kapui ding kanatohna kavet sah dihe.
Kapi: Boi kahung ngapcha hih-e, kakong anan nilum ana ki oi tange.
Kei: Ole hepi anaumto tin Mimin chutoh kache lut lhontai.
A phone a lalui khat ahin lha a video camera ahinkap lele chu alalha chu kangainom dan chu o, me hol toh la ngai chu kakop’in kihot det det’a me kahol le ama chun einaguh vet’in aname tet tut’in ahi.
Ala chu
“O kei Lenchonghoi, kumsot’a dia kadeinu, hooo…. Iding nangin neidalhah jeng hitam?
O nangbou kakinepna le kangaisangpen ho.ho
Nangbou kangailut le kalungsetpen ho..ho
Lenchonghoi, Lenchonghoi mol dingin kahinphal theiji poi, ankam lei lai dunga ina kimutoji lhon lai chu..!
Hichela hi ahin kangainom dan dan chu, me kahol nga phat’in, inlim sungin kathahlut soh keiyin amajong kijou tam tia kagahdoh le eihin khut jap’in, kaga che le hitin ahin seiye.
Mimin: Nao hepa henu hoiya um ham?
Kei: Umin, ipi dinga nahol ham?
Mimin: Kamunom chula.
Kei: Umin aumlhon tapoi kenjong henu hepa mel kamuman poi, henu chu kamu manin hinla amel ho tun kahai gamtai.
Mimin: Chingthem ipi tia henu hepa um talou ham?
Kei: Hepa hi naga gal laiya bei ahin henu hi dam louva bei ahi, tua kaumnau hilai inmun ho jong hi henu khutnung ahi, injong aman anasah ahin, hichepet chun kei toh kapi le kanao phai sunga insaan a eiumsah uva school einakai sah ahi,
Mimin: Ahile class ijat nasim man ham?
Kei: Umin class-3 bou kasim nalaiyin henu abei phat’in kasim tapoi.
Henu beiyin jong thu kahevah pouvin abeijou nithum lhinnia kahin het bep’u ahin, along jong kamu man tapoi, compound a lhan khu henu lhan ahi.
Hitia kakihou jing lai lhon chun amitlhi ana kitheh in, kenjong Umin ipi da naka hammo?
Mimin: Nao kapona lheh-e, ila kalo theipon, tua school nakai nom nahlaiyem?
Kei: Ummm kikai nom dehta hijongle insung ve ding aumpon, kapi jong kadalha nom poi.
Hitia kakihou jing lhon chu huilhi anung hiuheuvin honsung chu adap jin jenin anom lheh jengin ahi, hijongle ama ahin kou kou jeng phat’uvin akile din aumtan, me kahol hochu kasemtup peh-in, jingle kimuto din kakilha doh-un achetan ahi.
Achedoh nungin kapi in eikouvin hitin aseiye.
Kapi: Boiching, ama chutoh nakihet ham?
Kei: Hepi, kikihe chula ihet loule kikihou hou diham na?
Kapi: Boinu, kaseipeh nom aume, tun chapang nahi nalaiye tin kaseinomji pon, hijongle numei chu akum chapang jongle atahsa akilhit le jinei atam tai.
Hijongle nang vang moh jinei thei nahipoi, Ajeh chu insung kihoulhuhna thuguh khat kaseipeh ding aume.
Chingthem ven, naneulaiyin napa Paolal chapa khat toh nadam lhon poupou le suhto a kichensah ding katisau ahitai.
Kei: Hepi koiham Paolal chu! Hoiya chengu hitam kahekha poi ken.
Kapi: Masanga naga gal masanga chu khokhat inahiuvin chule insung khat ihiuve, Paolal te dinga chu keihi apinu u kahitai, pute chanu anasei jingu ahin, hinla keima veiset jeh le napu in aphat louva einadalhah jeh-in chanu kanei tapon Paolal jong midang toh akicheng tai.
Hijongle nang nahungpen chun napa Paolal chun chapa khat aneiyin ama chutoh kichensah teidin thuboi masangin kihoulhuhna kana neikha uve, naneite ding ahiuvin adamnah ule akitepnau apechah jingdiu kakineme, napa Paolal nu chu tehse mong mong akum jong ja val ahitan, mikitah ahileu nahin holdoh teidiu ngah jingin lang midang toh moh kingai hih-in.
Kei: Hepi ijemtin amaho chun eihol tahih le la hitia kaum um jeng ding ham?
Kapi: Kisonglel hih-o, Chingthem tehse ho thulhuhna guilhung lel ponte, keihi kateh vangin kum jakhat kapha nai poi, lunggel genthei behseh jeh a bou hitia tehse kahi, ahin tin kenjong kagah daiyin
Kei: Hepi lunggel genthei jeh a bou nateh ahin, gollhang igahol diham? tia kanuisat le amajong anuijat lot lot’in asam hochu agah chul vel’in
Kapi: Kihoi thou nalai hichu o na tin nomtah in kakitot lhonin ahi.
Part-2 hichan hin chai taute.
Upcoming part-3
“HINKHO HAHSA THOH”
NOTE:
Ngeitah hihih jongle nasimchai jeh-in kakipah-e, asim jouse Pathenin phatthei boh hen.
Aban jingle simkhom kit taute…..
©️Copyright
Thusimbu Machal jing thei na ding a pan lanom ho kipah tah in lem ahijing in ahi anoiya button “Click Here” khu meh utin details anasim ute.
