Home L Seikholen Khongsai HINKHO LAMLHAH THUCHIN PHABEP-XV

HINKHO LAMLHAH THUCHIN PHABEP-XV

31
0

(Kipana mun hoilai ham)

(Hinkho le phat)

By- L. Seikholen Khongsai,
Tuibong, Churachandpur.

September) 4, 2021 (Saturday)

  1. Mihem koima lungkhamna neilou aki- umpoi. Lungkham naleh genthei nahi mihem in akideipoi ahin kikhenpi thei louva kikivop pi jing kikhenpi theilou golpa golnu tobang ahijeh in akivoppi dan thep angaije. Athoh dan ithep loula hiche lungkham lunggim naho hin eima hinkho kipana ding jouse leh ihinkho geija alah mang thei ahi.
  2. Iseijing bangun mihem hin kipana ding mun holna a hinkho kimang jing ahi. Ahin kipana hinkho hi mijousen angaichat pen ahijeh in neiding kigo tei ahi. Kipana hinkho neilou chu leiset mihem hina a achamkim lou hinkho ahijenge. Ahin kipana hinkho imu jong eikom ah chomcha bou a-umjin chuteng kipana chu eija kon in achemang kit jitai. Ahile Kipana jong chu eima a umden thei lou ham?
  3. Konkhat chu kipana hinkho holnan khamna thei abol in ahi. Khamna thei hi kipana a agel jeh in, anen adon in akham in khomil mon alum in ahi. Akham sungin alunggim alungdon nachu asumil nai. Ahin ahung limdoh teng alunggim na cheng chu ajatni jat thum in akibe kit in amadin poh gih akibe jon ahi. Khamna thei bol jong lungmonna ahideh pon, asopi a-u anao toh asukhen bep in ahi.
  4. Lungmon na aneina din amachun Sum le pai tampi ahol in, ahahol chan in asum mujat chu abukim deh poi aman nading atamcheh cheh jon ahi. Sum le pai tampi aneichu alung monpin adu du anen, adei dei akichoh in ahi. Ahin sum le pai angailut tah jeh in anu apa asopi a-u anao te angailutna analhasam kha in, achunga mi tampi alhaset lo tauve. A-insung mite sangin aloi agol te athupisah in, asum neijong ahung kichaijin sum tamjo cheh ahin ngaichat jeh in masanga along gimna sanga sangjon ahung lungkham kit ahi. Ahun dammo in, koima ajenle ding leh asisah ding a umlou phat in akisih in, a-insung mite ngailut ngaijin dangchah geuvin athi lo tai.
  5. Lungmon nading holnan sum le pai tampi anei sun sun chun nungah mel hoi hoi tampi akivop pin, hinkho nom tah in amangkhom un, asum le pai jouse ahung bei phat in nungah jousen adalha tauvin achangseh in lenpi bei chunga leng Vacha bangin hinkho amangin, masanga agentheina hosanga jat ni a tampi agentheina akibe in akisih vangin apha chom tapoi.
  6. Lungmon nading hol nan Mol le lhang sangtah tah in kal jong lechun hikom a jong chu lungmonna nanei deh louding ahi. Vannoi kolning li sung chonjong lechun hiva jong chu lungmonna nanei deh lou ding ahi. Ajeh chu lungmon nachu nasunga dihtah a nanei ngai ahi. Polam thilho a kipana hohi thingna pul a jing nikho a gop ding tobang bep ahi.
  7. Leiset hoina le loupi na jouse musoh keijong lechun kipana chamkim nanei lou ding ahi. Tunia namit a namu ahin jing nikho leh hichengse jong chu kitolmang kit ding ahitai. Aban teng ngaichatna chom khat nanei kit ding ahin ahi vanga nangaichat jouse jong namu kim deh lou ding ahi.
  8. Naloi napai toh mun thupi tah tah a chenlang nekhom un donkhom in, kipah tah in umjongle chun insunga nahin dalhah nanu damlou jalkhun chunga kijam chu gel doh kit in, naneh tuideh louding ahi. Ajeh chu nangin nanu napa sumil jongle chun amahon anehkon adonkon chan seh’a chate eigel doh jingu ahi.
  9. Junom Sanom naneh a, hinkho anopna thei chan a naman laitah jongleh naneo laija nanakichep khompi, nanehkhom pi, nagenthei khompi napenpi nasopi genthei laichat a umchu geldoh kit in, mi mudinga hinkho nom dan a naman a. lungsung la nomsa deh lou chu hinkho nom ahideh poi. Nathi nikho leh nakongpanga touding kitha lo in.
  10. Hijeh chun sopite, insunga kilungtoh tah le kingailu tah akha inehjongleh nehkhom’a, alhum ineh jongleh nehkhom’a, genthei naho leh nopna hojong insung mite toh kingailu kilungset totah a ithohkhom kal val’a idamsunga kipana ding dan a umpoi. Pathenlungdei hinkho imankhom’a, Lhagaova insung mi iboncha ikipa khom tailouva laeiset a kipana dang hohi kipana lhem tobang ahi. Kipana mun chu insung nom ahi.

HINKHO LAMLHAH THUCHIN PHABEP – (28)

September 5, 2021 (Sunday)

  1. Mihem ho chungthu seiya napan jing kei leh itih kah a amaho lungset phat napeh ding hitam? Mi chungthu seiya napan sangin mi khoto them leh lungset them joh in pangin, nathinung teng nahin sot joh ding ahi.
  2. Phatseh a nakimupi jouse henga kipah le mailhai sel a na-umthei chu nalungsunga milungset them le mikhoto them nahina Jem hoitah khat ahin midang henga thilpeh loupi tah khat nanei chu ahi. Namailhai mel mu a kipah theilou khat le ni nakipasah jong chu sum le paiya heitoh thei ahipoi.
  3. Janhi kiti phat jong eiho adin achemang ahitan, jing nikho jong ahung lhung naipon chule tuni kiti bou hi eihon ineisun sun u ohat chu ahi. Hijeh chun ibol ho tunin kioan jengu hite.
  4. Nathilpha bol ho kanungmu tei tei kitding ahi ti ngaito nan midang chungah thilpha bol hih in. Midang chunga thilpha nabol thei jeh leh mipha nahijeh in bol jon.
  5. Leiset a kikhelna lentah semdoh inge tia nagel leh mundang dangah che hih in, chenlanga na in’ah kilen lang na insung mite jouse ngailutna dihtah le lungsetna dih tah neimasan, insung mi khat leh insung mi jouse kikhel nahi leiset a kikhelna nasapen ahi.
  6. Lamlhah khomol ah tehse chatmi lhem chavai hih in, hanset nalo khan tin nadam kumkho a napoh lel loding ahi.
  7. Japi twineh na ah najun tha hih in, nachil jong set hih in, na-engset nakhanset jeh in junchil veijin natin ihmu mo jankhangmo a na um ding ahi.
  8. Miji micha kipalna ding le O-na dinga Sou idoleh eima ji le eima cha a-oh in, ithil bolkhel ho seidoh ngam louvin akumkhom ilung agenthei ji bouve.
  9. Vadung napal teng leh twi kikho hatna lai pal hih in, nakho lhuh a twijin nalhoh mang paipai ding ahi. Thil ihet chen masanga noise bol lou ding ahi.
  10. Nakholjin na gama vadung twi napal ding leh napal galkai masangin kisil hih in, napal galkai jouteng lebou nom tah in kiail in. Ajeh chu ibol itoh ijo masanga ikinom sah leh laplou tincheng in ilap den jin lolhinna akinei jouji poi.
  11. Pahcha leilai najot teng leh ipi namu doh ji em? Ahung pahdoh til til pahcha chu ahoijo teijin ahi. Pahcha achul a agop teng ahoina jouse beisoh jitai. Ahin Pahcha muho apilhin theina dinga Pahcha pah chu hungmol ji a hung gopji ahi ti aumil hih in. Ajeh chu leiset a mihem te jong achulsa pi le pu nu le pa te jeh a son le pah tampi iphah u ahibouve.
  12. Pahcha mu, ahilouleh muchi chivo mu nalolhah teng kitup keichan koijin, atuphat alhin kah se a nakoina akitup louleh ganhing ju le va ten alhoh manga kon khat anehdoh a, konkhat gamjang lah a kehdoh a pilhing thei louva mohseh a mang thah ding ahi. Chate tute jong muchi tobang ahiuvin akhou khah dan ithep lou uleh gelphah louna mun a ga jengjong sep louva hung kehdoh diu ahin chu a a-op ding ling le khao tamding ahi.
  13. Gophung le tjingphung asan behseh leh khopi hui nunlaileh athoh lel in abohlo ji tai. Ajeh chu adinpi ding le akingaina ding koima anei lou jeh ahi. Nang jong naloi napai lah a dohveh vuh hih in, muda nachan a thet leh hot a na umlo ding ahi.
  14. Ipi nahi kihet inlang naseina louding mun ho ah nasei ding kalval thu sei hih in. Natohna louva nehding jong go hih in, hiva chun dammona a ume.
  15. Soh bangin tongin lang Leng bangin nen. Najan choldo teng jongle naosen bangin kho helouvin lungmmong tah in kicholdo in. Ajeh chu mi gilou tevang jan jeng jong lungmongin achol do kha pouve.
  16. Kai dong hon jong nadon ding kalval in hunam le jotho’n kai dang dang dong hih un, natu nacha khankho ding joh gel in. Ajeh chu mihem khat lhasetna sum le neh le chah chunga hamphatna a umpoi.
  17. Pathen deilou Doi le Kaova kichem ho tu le chate alhoupoi. Ajeh chu Pathen douna natoh kiti taphot chu aman adoute chunga Phuba alah tei tei ahi. Apu pa Doikungpu ahi jeng vangin atu acha te lungmotna jendam je jong atheipoi. Ajeh chu Pathen kiti hin mihem te dih le mo chungthu atan jing ahi.
  18. Mi.kicham nading leh kipana ding ibol thei lou leh mi kinah nading, kidou nading chule mi lunghan nading jong bol lou ding ahi.
  19. Mipha louvin mi chungthu ahaseinom un, miphan vang itih leh bolkhel kanei khadem tin kiphalam tah in hinkho amangin, ahinkhon suhkhel anei lhom teije.
  20. Mi gilou toh umkhom kiti hi chi le malcha kitoh loutah a kihon Me kime tobang ahi.

Articles hi anom lheh e nati le anoiya “LIKE” button khu meh in writer ho na support nau vin, chule seinom nanei le anoiya comments nahin bolthei u ahi.

Site nalut a notification pop up hung potji ho allowed anabol ji uvo maban a thusim thah ahung ki post teng notice namu ji diu chule Bell button a subscribe kiti chu meh un.

Previous articleCONORA VIRUS COVID 19 HI PANDEMIC A KON ENDEMIC HI DING AHITAI.
Next articleNatahsan na sudet jing in

LEAVE A REPLY

Please enter your comment!
Please enter your name here