Home L Seikholen Khongsai HINKHO LAMLHAH THUCHIN PHABEP-XIV

HINKHO LAMLHAH THUCHIN PHABEP-XIV

28
0
kuki tradition
kuki tradition

Chihna thuguh phabep

(Hinkho le phat)

By- L. Seikholen Khongsai,
Tuibong, Churachandpur.

September) 2, 2021 (Thursday)

  1. Hinkho hi Kholjin na ahi subukim in. Leiset a khojin mai mai ihiu ahi. Kholjin n agama hi ipiejh a hungkhol jin ihiu ham ajeh (Purpose) nakihet angaije. Nakholjin sunga natoh ding le nabol ding tampi hochu nachai soh ding hinam? Phat tam tah leh lunggel tamtah po a nahung kisol ahin nasuh bukim jou ding hinam? Oleh nakholjin nagam’a mohvaitham dia hinkho naman jing ham? Hijeh chun nakholjin sungin, na-insung beh kisem tup in, minu mipa lolhing khat nahina din..
  2. Hinkho thilpeh manlu tah ahin kisan them ding ahi. Hinkho thilpeh manlu tah ahilam helou hon hinkho mantam dan agel doh ji pouve. Hijeh chun Hinkho a Pathen a kon a thilpha nachan hohi nanga ding thilpeh loupi tah ahijeh in asandan them in, chule aman chah dan themin. Nei le gou manlu tah bangin kikhol khom in. Ajeh chu Pathen in nang napeh hinkho le nabol theina hohi midang apeh lou ahi. Pathen loupi phondoh nan mangjingin mangthem in.
  3. Hinkho hi vangsetna ahin chingtheijin. Mihem khat adamsunga avangphat naleh avangsetna hohi kisim sah leh avangset na tamjo a asim doh ding ahi. Ajeh chu mihem in jing nikho a ipi ahunglhun ding kimamu thei lou ahi. Naloi napai ngaitah khat in jong jou le nal a nalhep lha thei ahi. Nachihthei lou leh napenpi nasopinu nasopipa akona jong joulhep a na umthei ahi. Hijeh chun Vangsetna atamjo chihthei lou jeh ahijeh in, Chingtheijin hinkho mangin.
  4. Hinkho hi kihilna phatah ahin phatah in ngaijin. Miching mithem hon ahilna hoitah a ngaijing hon chihna akimu u ahi. Hetdinga pha leh hetgil dinga lom jouse ihet theina dinga ihinkho a kihilna hohi gunchu tah a ngai masat ding ahi. Hetna neilouvin mihil injong pandan. Ajeh chu Hinkho hi kihilna dinga phat phatah ahin khonunga thil hetkhen na nanei theina dingin amasan nakihilna jouse ngaipha’n.
  5. Hinkho hi kichouna ahi, pangin. MIhem khat in amakho a jona leh lolhinna aneitheina dinga, alampi a songpi banga kisong vum letlut hochu akimaitopi ngam ngai ahi. Hiche kichouna hohi otdoh jing ding ahipon, kichouna masanga chu lolhinna um ahi. Kichouna ho masanga pang ngam lou chun, a-ima tih a jong lolhinna anei louding ahi. Hijeh a chu nalam jotna a chouna (challenge) nanei teng tahsan na neitah a napan ding ahi.
  6. Hinkho hi phat in achulsah ahi. Phat hi chejing lou hileh nahinho jong kum le lha’n chule anikhon isim ponte. Hijeh chun nahinkho kisim dan dungjui in nalunggel nahin dan nungvet in lang ipi nabol kigel doh thah kit in, ikho ni chotna mun jouse a ikeng nung a umbanga, nachon nanam lhah najouse a melchihna na um ahi.
  7. Hinkho hi Kipnana ahi kipapin. Hinkho hi kipana leh gentheina kilhon jing ahi. Kipana phat nanei pet in kipah in. Ajeh chu phat phalouvin nahin lhun khum teng kipana ding kou kou jong lechun nakou phah tah louding ahi. Chule naheng nakom a akipahte jong chenlang kipapin ajeh chu nangin jong kipana nanei teng nahung kipapi ding chu naheng nakom ho ahibouve. Mihem hi kipana ajong kipahu a chule hapa a kipa pi cheh ding ahi.
  8. Hinkho hi Lhasetna ahi lhaset hun. Phat jouse a hinkho a kipahjing koima aki umpoi. Lhaset genthei nikho mihem in kineisoh kei ahi. Nang nalhaset nikho ding kigel doh inlang, naheng nakoma, naloi nagol lhase a lunghem a umte chu chenlang lhaset hu in. Kholjin na leiset a alhase te lhaset huhi mihem in imihem chanpi khat chunga mantah a ibolthei thilpha khat jong ahi. Amaho chun nang lhaset nikho teng nahung lhaset hu uva, namitlhi ahung theh diu ahi.
  9. Hinkho hi Kichepna ahi. Nadamsunga kinepna nanei louleh nahinlo umlou ahitai. Nakianepna ding chu nanatoh a kingam ahi. Na tongliuvin vang ahinkhon kinepna ding anei pon ahi. Hiche Kinepna kiti hi toh nakikhen kang louna ding natoh nabol jouse gunchu tah in tongin lang, kisong tah in bol in. Nahin lhemchavai thei ho akonin kikangsen. Ajeh chu loi le gol phalouvin jong ikinepna ho guhthim a aguh mang thei ahi. Hijeh chun Hinkho hi kinepna ahin hanep a kinep a atonso nadia lungthim le tha jong senkit ding ahi.
  10. Hinkho hi Gentheina ahi thoh in. Hinkho hi gentheina ahi bouve.Hiche genthei thohdia inu naobu a kona hungpeng doh ihiuve. Nagentheina chu itobang ham nangin nakihet ahi. Mijouse gnetheina jong akibang theipoi. Tahsa hinkho a gentheina a umin, lungthim gentheina jong a-umin ahi. Tunia genthei ithoh nauchu khonunga kipana ahithei nadin chingthei tah in igenthei namun chu ngaitou hite. Khonunga kipana le kinepna bei gentheina jong aume. Kinepna nei genthei thoh honvang Khonunga ikipanau pahcha namtui banga ahung pahlhah nadin hiche genthei naho chu thoh jong leuhen kipanan ahin le ding ahi.
  11. Hinkho hi Kana ahi kapi in. Damsunga koiman kei kap ponge akiti theipoi. Ajeh chu Pathen in mit a mitlhi twi eipseh soh keiju ahi. Mitlhi twi neijouse nikhat leh ika soh keidiu ahi. Aji acha anu apaatoh kumkho a chengkhom ding jong aki-um pon chuleh nikho khat leh ingaicheng toh kikhen soh keiding ihiuve. Leiset thildang dang tampi ingaichat jouse neijong leuhen chuho ngaina chun kana neipon nate. Ahin Insung mi ngaicheng chunga jong kikipah jing thei lou ahi. Amaho jong hi nikho khat leh imitlhi sosah dinga Pathen eipeh u ahibouve.
  12. Hinkho hi Kidouna ahi kidou pin. Leiset a kidoupi neilou koima aki umpon ahi. Khonunga Thepna chihna neina dinga Lekha ksim jong dougal khat ahi. Lollhinna ianeitheina dinga gunchu tah apan ilah jong eima dinga idougal khat ahi. Gal le tol a ikisatpia ikidoupi pa bou Dougal ahipoi. Thilpha bolna dinga thilse tampi inandoh jong kidouna thupi tah ahi. Hijeh chun hinkho hi kidouna ahin kidoupi ding mong ahi. Ahivangin ajeh apol beijin koima dou hih in. Apanna uma, gapha hinso doh jouse vang kidoupin,…..

(Nupa kah Hinkho)

September) 3, 2021 (Friday)

  1. Leiset mihem koima achamkim a0umpoi. Achamkim in kigel hih in. Pathen taolou mihem chate hi lhinlel na jeng ahi. Keivang kalhingset in kachamkim tai tihon Pathen douna thu asei ahi. Nalunggel nangaito chengse jong adihjenga nagel vangin naheng nakom din adih lou jeng ahithei.
  2. Bible in, “Oimo nachan louna din midang oimo dan” ati. Nangma mitmo nacheng selmang ding deinan nasopi khat themmona Ahpi tol khot in khot hih in. Themmo nading kiholto kiti jong aphatchom na a-umpoi. Mi minsetna ding nahol leh nang themmona jong tampi phondoh a umding geldoh jingin.
  3. Nupa kitohmo jong milah a ahungkhom teng mit’a vetding otchat a umji nai. Ahin amani kikah thu hi amani bouvin ahet ahin midang in asungil aha het poi. Nupa kilungtoh le kingailu mong mong ho kikah jong lhepna tampin asuh khen theilou ahi. Amani hinkho chu Thihkhoava kikankhom tobang ahin, midang tahsan leh ginmo chuleh sum le pai jengin jong asuh boi thei ahipoi. Hijeh chun mi mitvet a akilomna maimaija nupa hinkho mankhom sangin lunggil tah le kitahna jouse a kikankhom nupa hiding neicheh ding ahi.
  4. Nupa kigingmo hat hojong akitoh theipon, insunga chamna leh kipana a–umlou jeh in hitobang insunga um chate lungthim’a jong lungmon naleh kitahna akondoh theipoi. Ajeh chu hiche chapang chunanu jong, apa jong khatcha atahsan lou ahitai. Nupa kitohna insunga hinkho mang chate chu anu le apa umsunga jong Chagat hinkho aman u ahitai.
  5. Nupa chu ihung kichen tengleh, nopna le kipana jeng neidinga kigot lou ding ahi. Genthei hahsa thoh dinga kikicheng ahi ti geldoh masat ding ahi. Tahsa ngaichat suh bulhit a nupa hinkho kichai jeng ahipoi. Hahsat gentheina ito teng inupa a thohkhom ding ahi. Numei konkhat in hahsat naleh gentheina neokhat ahinto teng, ajipa kom’ah, kikhen tate, kachim val jenge, kakitha ding ahi, kalungset tapoi tiho aseijiuve. Seilou ding ahi. Hiche hojeh a lamsih lamgei lhokha jong umthei ahi. Hiche ho seithei kiti jong, ajipa jalou leh nahsah louna symbol khat ahi.
  6. Pasal injong numeijin tahsa le lunggel gentheina ahinto a, nakoma ahung kiphin teng , kajinu ahin keichunga kingai ahin, kachunga kiphin ding mong ahi ti het tehm peh ding ahi. Hetthem tahsanga achunga moltum lapjeng lou ding ahi. Ajeh chu angaitah anu apa kom ahindalhah a, nathi thina a thidinga naheng ahinjot thei chu leiset a dia thil neo ahi tapoi.
  7. Nupa kikah a khatvei kihet khel nahin imakho a thil tampi asemtoh thei chule thil tampi jong asuhboi thei ahi. Hijeh chun kihetkhelna a um masanga hahet a kihet them tei teiding chu aphapen ahitai.
  8. Nupa kah a kitahna kiti hi damsung keuseh hilouva thinung geija jong achi anam dinga phatthei channa jong ahi. Nupa kah a aji anga kitah lou chu muntam tah ajong kitah louna hinkho anei tina ahi. Hiche thua nupa kijou lhep lou ding ahi.
  9. Thugil lagil tampi nahet nom leh kihetsah a milah a muhtamle louvin, thungai ponthon. Natehpi natehpu dampet in insung khankho a nahet ding dol ho kijil doh in. Nateh te ahung beinung teng koiman thutah nasei peh taponte.
  10. Numei konkhat in tehpi tehpu atheida un hcihe hi adihlou tah ahi.Tehpi tehpu theida ho ama leh ama kitheida ahiuve. Ajeh chu amou ding amunom lou ahin namouding nunjong nang nahinthei da ding ahi.
  11. Atehpi atehpu naosen jen a jengthei mou chu mou mantam ahin phattheina chang diu ahi. Ajeh chu amajong adamleh amou ten ahin jen kit diu ahi. Atehpi atehpu theida ho, amajong amou ten abu kong aluidoh peh diu ahi. Atehpi atehpu abu kong luidoh hochu amajong amou ten insunga kona ahin pehdoh diu ahi.
  12. Atehpi atehpu lungset thei mou chu ajipa lungsetna chang ding ahi. Mouvin ateh akhang akhoto naleh ajabolna chu ajipa ajabolna ahi. Ajipa bouseh lungset bol a ngailu mounu chun ajipa jong angilut ahipon anei agou bou angailut ahi. Insung ngailu ahipoi.
  13. Pasal in naloi nagol masangah najinu phohsal hih in, ajumpia lhaset loding ahi. Numei injong najipa noisel bol hih in, na umchan banga lethuhna namu ding sumil hih in. Hijeh chun najipa mipha ahi chu chance lahnan neida in, jabol joh in, nakingailut nalhon huilhum jo ding ahi.
  14. A-umlou henasa san nupa kah ah kiphin na bol hih in, a umlou chu ngaito khom ding, ahithei leh nalunggot bangin insung semin, ahithei lou leh kingohto louding ahi. Hiva chu kinahna hung kipan ding ahi. Kinahna kiti hi thina thei Gu tobanga ahi. Hiche gunei hochu thet bol ding ahi.
  15. Najipa chu min seise hen nangni kitomona ding thu tampin seihen demjong leh nangni nakitahsan nalhon apilhin laise a koimna nakah lhon suhset louhel ding ahi. Hijeh chun kholaiya mi thusei insunga vaihom sah lou ding ahi.
  16. Najinu minset nading hol a, amitmo nading hol a suhlhai toulhai tho tampi umjongleh nangin nangailut nalungsetna nakolchah laise a koiman nalhep lhah jou louding ahi. Hiche dinga chu nupa kah kitahna lhahsam sah louding ahi. Kitahsan toding ikitahsan nabanga hinkho man cheh ding ahi.Kitahna chu umkhompet sanga umkhom loupet a kitahna kilang jo ding ahi.

Articles hi anom lheh e nati le anoiya “LIKE” button khu meh in writer ho na support nau vin, chule seinom nanei le anoiya comments nahin bolthei u ahi.

Site nalut a notification pop up hung potji ho allowed anabol ji uvo maban a thusim thah ahung ki post teng notice namu ji diu chule Bell button a subscribe kiti chu meh un.

Previous articleAIZAWL A SOLOMON TEMPLE NA HET KHAH EM ?
Next articlePU PAOTHANG KHONGSAI, GELNAL THUSIM CHOMCHA

LEAVE A REPLY

Please enter your comment!
Please enter your name here