Home L Seikholen Khongsai HINKHO LAMLHAH THUCHIN PHABEP-XII

HINKHO LAMLHAH THUCHIN PHABEP-XII

32
0

Chihna thuguh phabep

By- L. Seikholen Khongsai,
Tuibong, Churachandpur.

August 30, 2021 (Monday)

  1. Thungai nading kum le lha nanei laisen min nahil na phaten ngaijin. Nanu napa chule najilkung hon nahilna jeh nahet masangin manchah ding geldan. Ajeh chu thu kiti leh kihil na kiti hi hinkho a mandinga manchah pha ahijeh in amasan ipi ahi hechen masan. Imanchah khel leh manthahna jong ahitheije.
  2. Milah a aneopen a napan na mun a thusei kilop hih in. Na umkhom pi le nakivop khompi hochu napen masanga pat mihil a pang le thumop a pangsa jeng ahitauve. Hijeh chun nasanga len ho lah ah thusei kitim in.
  3. Khonunga miching khat nahi nom leh nakhongdon laijin min nahilnan phaten ngaiphan. Nadam sot le nang jong khonung teng mihil a napan a thutan vaihom a napan ding ahi.
  4. Theiga aphat louva kilhoulha chu atuina a umpoi. Mihem injong aphat louva adin nalou ding mun a adin teng abol khah sangin abol khel atam jo teijin ahi.
  5. Thu kiti hi aseidoh ahahsa poi. Ahin naseidoh sa chu Thal longa thalchang kikap doh banga hung kinungle thei lou ahi ti gel doh in, thusei kitim jap in.
  6. Alam louvin nanu napa hil din kigot dan. Ajeh chu nanu napan ngailu tah a nahin khou khah ahin noise bol tah in nanu napa hilnan nakhut vaile hih beh in.
  7. Akihilna phatah a ngaipan chihna akimu be jing in, akihilna ngailouva angong vaiput le pan a ima tih in thilpha aboldoh ngaipoi.
  8. Mi tohdohsa chunga vaihom ding leh minphat kihol jing hon kipana lhem akimu diu ahi. Min atohdohsa chunga chan vou anei banga, eiman jong eima tohdohsa chunga nehtheina, minphat theina chanvou jong inei u ahi. Hijeh chun natohna louva neh ding gel hih in, dammo pin natin hichu thilpha ahipoi.
  9. Naneo laija nadon le nasisah a hungpang na-unu na upa chu nahung letnung teng sumil hih in. Sun nilhum lhuma nanapoh le a, nagil kel nadangchah teng jongleh aneh ding khel aloi lhah a navahva ahi. Najun na-eh alhep thenga, khodung khovaija napoh le lai khankho cheng geldoh jingin. Ama jeh a tunia nang hung misoh nahi bouve.
  10. Ajeh beileh phatchom cha lunghan jeh in nasopi chunga khut lha hih in, nagen thei ni hihen nakipani hijongleh nasopi jaolou in nakin nadong alolhing ngaipoi. Sopi ule nao kitihi Pahvui khat a kithil khom pahcha te tobang ahi. Pahcha khat bouvin pahvui asem doh theipoi tijong hen.
  11. Nasopi nanaonu nanaopa chu nunbol hih in, thet jong thet bol hih in, aman alunggil a nakisonpi jing chu suhmil peh hih in. Naneo lai apat nakisonpi na cheng tuni chan a manglou ahi. Nanao ten nakisonpi keu ahipon nalung monpi jingu ahi. Hijeh chun amitlhinlon nau theh hul peh jingin, nanao te tilkhou jing in, athahat nau nahi.
  12. Itobangin thilse bol in lang khanse jong lechun nanu napan nangailut na vang naneo laija a a-nglum lhon a napom jinglai banga amani akona gamlha louva eikoijing ahi ti geldoh jingin. Hoilai mun ah umjong lechun inu ipa hin angailutna hongsunga homtho na, lungset na eichan jingu ahi geldoh jingute.
  13. Phat chomkhat moh kipana mai mai hinkho ding gel nan nanu napa lhemlha hih in, hichu sapsetna ahibouve. Anu apa joulhep mihem tuchan a koima nomsa a umpoi. Nu le pa lungset ngailut na kiti hi leiset nei le gou sum le pai toh lhat thei ahipoi.
  14. Mihem anu apa leh a -insunga kipah thei lou chu hoilaijah umjong leh kipah deh lou ding ahi. Thisan khat a ipenkhom pi isopi i-u inao toh inu ipa angsunga kipana kalval a leiset a kipa chamkim na mun umpoi ti hechen in. Hitobang nikho chu nikho khat le nahin lhangai ding ahi.
  15. Insung kiti hi Mihem hinkho a ijakai kipatna ahi banga akichaina jong hisah ding ahi. Insunga kona pampet a vahtham le chu alhun nading mun kihet lou kholjinpa tobang ahi. Insung kingailut na hi lhahdai sah lou ding ahi.
  16. Chanu ching chapa chingin anu apa chonkhel na amelchih pon, seijong asei ngam poi. Chanu ngol chapa ngol in vang hitobang hojeh chun anu apa asosal in hounan aneije. Hichu anu apa din Damun meikong sunga kichomlut abahsah a ijalkai lhahsamnan aneilo lhon e. Nanu napa jabol lechun khonung teng nacha ten jong nang nahin ja bol ding ahi.
  17. Insunga kijatolou na akon a kitomona le kihet khel na hunglhun ji hohi leiset hinkho a khopi khat munchim in akaimang sanga eima hinkho a dia manna lentah hijo ahi. Hijeh chun insunga kihet khel naho umlou na tei tei ding gelcheh ding ahi. Insunga chamna sem them le chamna sem a pang hohin chamna adeijun, chamnan anung ajui in khosung veng sung le gam sunga jong chamna sem a Pathen in amanchah diu ahi.
  18. Minu mipan chate hilding le phoding kichat lou ding kiphatlam bol lou ding ahi. Chanu chapa hil louva ikoi teng ahet diuva dol khat jong anahet jilou u ahi. Kihil naho le kipho nahi ngailut lungset jal ahi jong hetsah ji ji diu angaije. Pahcha jong twi khatvei ichap jeh a kumlhung lhalhunga nganse ding ahipoi. Khatvei chap a akhuh vumleuva twi isuntho jongleh pahcha chun athilo thei kit ahi.
  19. Insung nom pen chu insunga i-ucha a ajineidoh um masanga atui a-al ineh khom lai, lungthim le lunggel kibanga inui khom lai khu ahitai. Ji nahin neija nahung kikhen kang jap jap teng uleh inchom cheh a nahung chen diu nikho gel doh unlang kingailu tah in insung hinkho mangjouvin.
  20. Mihem khat chunga ahiding kalval a kinepna koi lou ding ahi. Mihem chunga kingai hin nikho khat le lhasetna mun eilhut ding ahi. Hijeh chun michunga jong nalunggel ha-ngap hih in chule michunga kingainjong habol hih in. Nangma kenga nadin thei kal val a nanga dinga pha a umpoi.

August 30, 2021 (Monday)

  1. Thil khat i itval jeh a hoitah le kitup tah in kasel doh e iti leh kisel manga kihol mo paipai ji ahi. Chapang jong iha lungset behseh leh ahinkho manthah ko thei ahi.
  2. Tohgon khat naneija nahutna jing laitah losamna nanei teng, naloi napai, nahin muneo hon nahin nuisat sat diu ahi. Hijongleh lungneo hih in, jahcha hih in. Lolhinna nahin neiteng masanga nana nuisat ho chun nachunga kipana khut abeh poh lah lah diu ahi. Nalolhin masangin lungneo louvin pangin lang nakinepna lhaso hih beh in.
  3. Tunia nathoh genthei naho chu na sa-hih beh in, jing nikho a natha hatna a hung pang tei tei ahi. Ni nga ni som genthei nathoh a na ulsa long chun nikho khat leh Belcha Bu kemlou nahin pohpeh ding ahi.
  4. Twi japthei ding natileh twilah a nachop lhah a nakijap ngai ahi. Twipi panga tou mai maija twi lah a nga te banga hinkho man thei ahipoi.
  5. Tupet a nahinkho nakum le nalha hi kicholdo nathei kum le lha ahi naipoi. Tua nakichol do leh jing nikho a nagen thei ding ahi. Chen lang naloi napai nung del loijin, lampi pam a tou le le hon jing nikho leh nahin otchat diu ahi. Ama ho hinkho man dan otcha hih in. Amaho khu anu apa nei le gouva kinem u ahin nang vanga nachanga dingthei din kigo jingin, ama kenga ding thei hochu midihtah kisoh ahiuve.
  6. Nangma le nangma alhasam pen in kigel hih in, mijouse ahung penlhah a naosen a hung peng cheh ihiuve. Koima achamkim jong a um poi. Hijeh chun natha kisuh hat in, hatna kiti hi galpi matum a pang Gal lamkaipa tobang ahi.
  7. Hinkho a koima gentheina toh khalou a umpoi. Nopna jong nikhat vang kitoh soh kei ding ahi. Nop nale gentheina hinkho hi loiphatah ahin kikhen thei ahilhon poi. Nopna nadei leh amasan genthei thoh masan. Gentheina jouse masangah nopsahna a umin hichu khoiju tobang ahi.
  8. Solam akona jing ninou ahungso teng mijousen kho phat le set ding ahet theija, tohgon akisem thei ahi. Chule gamla tah a kon Vah khat ahung vah teng mijouse akhodah un ave cheh uve. Nang jong mijouse mit a nakikam teng ching theijin. Ajeh chu nabel ah nalolhin nading le nakipana ding ho jouse gumang thei atam e.
  9. Leiset hinkho a mivaicha le migen thei koiman athei nom poi. Hinlah mihaosa ho leh milen milal ho chunga jong athangse adimset in ahi. Hoilang hitaleh mihem in adeipen chu ama phatchom nading bou ahi. Hijeh chun mohseh in phat sumang hih in. Naphat chom nading kihol in,
  10. Gal nasat masangin nagalsat ding chu lunglal masa hih in, galmun a vang nalal maithei najo maithei ahi. Hinlah alung gil a ngaplal neihon gal asat masanga jong Gal chu alal sau ahitai. Hijeh chun nabol natoh ding jouse chunga kajo ding ahi tin kipan doh phot phot in lunglha louvin tong jengin jona nachan thou thou ding ahi.
  11. Phat phalouvin nahin lhunden khah le lungjing hih in. Ajeh chu phat phalou lah a phat man dan nathep a doudan nathep leh phat hahsa ijat hung jong leh nakimaito pithei ding ahitai. Ahahsa thoh dan kihil them in..
  12. Nahinkho ah kiletsah le kihoitho sah habol hih in ajeh chu Twikhanglen chunga jong hui le go ahung kithokhom teng Twikhanglen chunga kitol Kong innei jong twi noijah alhalhum mang kei jitan ahi. Hinkho a hahsatna tah tah ahung lhun teng milen milal tah tah hojong amai jum pet un mihem hina jeng jong akisuh mil hel thei uve.
  13. I-lunga tohdoh dia igel khat chu anatoh a juiding ahi. Lunggel lentah tah neija anatoh umlou chun kikhelna anei lou ding ahi. Mutheina lentah nanei banga nalunggel jong naki khel ngai ahi. Mihem alunggel khel thei louchun adam sunga imacha kikhelna jong anei lou ding ahi.
  14. Leiset a gentheina hinkhon alhun khum lou koi um em? Ahin chingthei tah a hinkho mangho chun lampi phapen akimudoh theijin, kham natheija lop a kingol sah hon adamsunga lamdih jong akimudoh louhel diu ahi.
  15. Lungthim beiho le mithase hon kilepna ding ahol hol jengun ahi. Bu tui me tui dulou koi umding ham? Ahin koiman louna atoh nom poi, alounei sun jong mi atohsah un agasoh akihop pi kit e. Hibang chun hinkho nomtah a man ding akidei cheh in hinlah koiman atha ajedoh nom poi.
  16. Sopi, nang jong itobang lah a najao vem? Hinkho nom le hinkho pha nadei leh lamdih le gunchuna lam ah nakal song inlang che jingin, lampi a nasuboi thei, aphachom lou akon kikangse jingin nalolhin teng ama hochun kipana khut nahin beh khum diu ahi.
  17. Min lhaset nathei, mi thaset nathei mi minset nathei bol bol jeng hohin ipidinga hiche hi agel doh ji lou uham -“Ama hon jong mit ni aneiju ahi”. Maichanga kinah hi khonunga kiseiset sanga kingailutna aneijo ahi. Ajeh chu thutah a hinkho neihin koima aseise poi. Misei se chu mithangse ho ahiuve.
  18. Mihem khat nalem naleh nakipapi nakipapilou chu namaija kihethei jeng ahi. Welcome jong pondal a kisun ahin ilungthim gilpa vang isomaija hung kilang doh jeng ahi. Koima seipeh angaipoi. Hijeh chun nakilem louna te ina chu cheda jengin, nakihomtho na mun joh a kipahtah in lhajo in, nang le nang jong kikhol chen ji in. Ajeh chu kihem in idam sunga thutah a ikipa theina mun kihol joh ding ahi.
  19. Sopi sanggam hina a ikimuto chan a koi chu koiham ti kisei peh peh jengte insung chun masang laija kihet them louna thusim ananeiju ahi ti kihedoh thei ahi. Ana kihet khel jeh uva tua atu acha ten asopi sanggam te mel jeng jong ahet lou u ahitai.
  20. Masang chun ipi ipu te chun kilungset kingailut kiti hi lungthim le maiso a kon ahi anatiu ahi. Khangvang akikhel lheh jengtai. Tukhang a mihem ten nei le gou sum le pai joh aveuvin chuteng kilungset kingailut apan (start) joh ji tauve. Kipahtah a ahinkho man ding natileh nalungset najong midang pehdan, mi lungset najong ngeh khoh da jengin..
  21. Phat kiti hi kikhel jing ahi. Phat kikhel banga mihem te lung gel leh hinkho jong kikhel ahi. Phat kikhel lou hileh Tjingna lui leh thingna thah jong kehkhom in tin, Hinkho jong kikhel lou hileh pilui pului te toh tuchan a ilen khom diu ahitai.
  22. Nakoma mikhat in awnem tah a nahin houpi a, nahin khoh sah jeng jeh mai maijin amachun nahin khohsah a nahin lungset in gel jeng hih in. Mithai lhumkei jong thina thei gu (poison) toh kihal a thina theija kimang ahidan gel doh in.
  23. Midang hinkho thangsetpi naleh engset pina lungthim pailha thei chu minun nom ahin amachun hinkho nom aman ahitai. Ajeh chu nanei kham kham a nakiman chah kal val in midang otcha hih in. Hitibanga nang sanga neijoute nei le gou hao te vet lelna lungthim nanei khah chu suhdam theilou alungthim gentheina Songkul a kihen oh tobang ahi.
  24. Thu khat asoteng pengleng lunga thusei na a nalei nale pel jeh a them chang ding nahipoi. Midih le themmona neiloupa joh chu, adihna le akitahna joh chun Solam a kon a nisa hung soh banga hungsoh a mijouse mit mua them chang ding ahibouve.

Articles hi anom lheh e nati le anoiya “LIKE” button khu meh in writer ho na support nau vin, chule seinom nanei le anoiya comments nahin bolthei u ahi.

Site nalut a notification pop up hung potji ho allowed anabol ji uvo maban a thusim thah ahung ki post teng notice namu ji diu chule Bell button a subscribe kiti chu meh un.

Previous articleTHUSIM DING BEP-IV
Next articleMEET ME IN DREAMLAND-VI

LEAVE A REPLY

Please enter your comment!
Please enter your name here