Home L Seikholen Khongsai HINKHO LAMLHAH THUCHIN PHABEP-VII

HINKHO LAMLHAH THUCHIN PHABEP-VII

45
0
poor
poor

Chihna thuguh phabep

By- L. Seikholen Khongsai,
Tuibong, Churachandpur.

August 22, 2021 (Sunday)

  1. Khut le keng tin asaodoh teng kiten chom ji ahi. Chuti louleh itahsa douva panga hindan nom mo a eilha ji ahi. Hibanga chu chate jong alhatdan ahung kitup lou teng minu mipa kimumo sah louva aphatcha tahsa lhagaova pui jang ding gel ngai ahi. Avaigei teng semphat mo a uma, igu ichang sugep a pang diu ahi.
  2. Chapangin letkal angah lel in, gollaijin nungah gollhan kal angah lel e. Nungah gol-lhangin jinei kal angah lel in, nupi upa’n nungah gollhan khang angaijin, tehse hon neolai khankho angaije. Ajeh chu mihem hinkho hi ngaichat nale gentheina a dim ahin lung nachim a hinkho man na a umpoi ti avet sah e.
  3. Vacha nou khat in a-Buhsunga a umpet in api (anu) komah aseijin, “Henu, keijong nang bangin kaleng nom tai ati.” Api’n adonbut in, “nalenphat hung um nante, tua hi nom nasah pet, leng nachan pet ahi. Na buhsunga neh le chah kahin poh peh a tuitah a naneh ahi,. Nalha ving ahung pilhin a nalenthei teng, nanu umna jong nahin hetphah talou ding ahije, Boi” atipeh in ahi. Vanou jong alhaving apilhin phat in len akipatep in abuh akon aleng lhatai. Hjche nung jenga jong api in aching jing nalaijin neh le chah jong apejing nalaije. Ahung pilhin phat in a achanglhat tai. Nikhat neh le chah akimu tapon hijeh chun agam a kon in aleng gamlha tan ahileh Mu khat in ahin del tan ama jong nah nah in aanglah khat a akisel doh nah nah in ahi. Mihem jong inu ipa kona umkal a leiset a mun nom ding umlou ahi. Hijeh a chu hinna theija eima le eima idin thei kahse aainu ipa kithopi a, ilampi kisem jang ding ahi. Aphat louva inu ipa akon igam lat teng eidou ding leh ihinkho sumang thei, eipuimang thei lhepna dimset ahi ti geldoh jing ding ahi.
  4. Numei hon najipa chu mimo lheh jongleh jabol un, ajeh chu najipa jal a minu dinmun nachan a, min najabol ahi. Ajipa jabol lou numei chu ama jong kijabol lou ahin, chule minjong ama aja bol lou ding ahi. Najipa chu nang dinga naven bit a pang nalum le napho tibang ahi.
  5. Meithai tia ihet u ajipa umlou numei hohi athanop jeh uva meithai ahipouvin, vangset jeh a achunga thil lhung joh ahi. Pasal hon nang umlou nunga najite hinkho man ding gel doh unlang Meithei ho lungset un jabol un. Alam louvin meithai ho kihetpi hih un, mohseh a minset lothei ahi.
  6. Ajipa umlou numei ho din lhepna ahat e. Ajeh chu numei hinkho vengdoh a pang aji pasal umlou jeh ahi. Nupa hi idam sunga kingailu tah a um hi lungthim kipana leh inchen nopna ahin chule tahsa le lhagao hinkho a jong inchen khantouna ahi. Jinei jouva ajitoh kithi khen’a, changa hinkho man hi koimacha din nomponte.
  7. Nupa koima akina lou akisam lou a umpoi. Hinla najinu najipa kom ah kithi doh in, kimandoh in, kaning kalai nakihel e tin tamse hih in. Ajeh chu najinu najipa thinung teng nakisihna sang ding ahi. Hinkho kiti hi a-umpet a amantam dan koima tapouvin kigel thupi lou ahi. Ahin mikhat chu athinung teng nanga dinga miman tam ahi nahet doh bep ding ahi.
  8. Naloi napai khat chu anu apa umlou jeh in Chaga tin noise bol hih in. Pathen lunglhaina ahileh nikho khat le gamsung vaipo a pang thei ahi.
  9. Mi thupi jouse minomsa ahipon, minomsa jouse jong mithupi ahipoi. Pathen in atun ho chu vaicha jong leh mithupi ahithei jenge. Hijeh chun Pathen toh kivopjinga hinkho mang chu ama’n ajumso lou ding ahi.
  10. Tahsa let le neo, hoi le hoilou Pathen sem ahi. Mi tahsa tibah let le neo, hoi leh houlou chu boipi hih in, ajeh chu nasem thei khatcha a umpoi. Nanga ahoileh kipah jengin, ahoilou jongleh lunglhai jengin. Jongku in ama tokhon kivet louvin mi tokhon anuisat e tihi mihem in tholou ding ahi.
  11. Insung nom chu mijousen kidei soh kei ahi. Ibolkhel na ho kingaidamto cheh a, nupa’n Pathen bel a taona toh tho a, kihethem to tah a hinkho aman teng chaten anung ajui ding ahi. Insunga kihet themna kotpi honsa akikoi laichan a insunga kipana um ahi. Ahin Pathen Lhagao jaolouvin insunga kipana dihtah apang theipoi.
  12. Niseh in nisa asoh in niseh in nisa alhume tin angainan gel hih in. Nisa aso a alhum chan a nahinkho a akikhel khat umjing ahi ti geldoh in. Nanatoh nathilbol na ah nitin in kikhol jingin, niseh a natohkhel atam chan a nahinkho khesuh ahin Pathen dei apha naboldoh tam chan a, tahsa le lhagaova nakhan tou ahi. Hiche ithil bol ina toh hi eima thusim bu a kijih lut soh kei ahi heldoh angaije.
  13. Damsunga loi le paipha kilhen them ding ahi. Loipha louvin nalunggim sah a nasuh jum jing ding ahi. Loipha le golpha’n vang igim gentheina akon in jong eikithopin eihuh doh ji e.
  14. Mi hon a theiga sanpeh peh a ga chu ipidinga naduchat a, nehphah teina dinga aveilhahna a molsao naman ham? Theiga phungnoija keh hampa jangkhat jong nabodoh khah lou leh aneh nading chanvou neokhat jong nanei lou kihet in.
  15. Mi gamsung’ah guhthim in cheng hih in, gam neipan gamsung asuhtheng nileh a-sepoy te ahin sol a nada nacham louva Songkul nalut ding ahi. Pakai lenggam jong ama lhatdamna Cross jaolouva, aman eihet louleh guhthima agam kilo theilou ahi.
  16. Mi chapa pha le chanu pha imua ithangset sanga eiman jong icha te chu aphatcha a aphat nading le achihna dinga khou khah ding ahi. Muchi chu aphatcha a avela hampa ilhom ngimsel peh a, twi ichapnou jingle hiisel in apah in pilhing tah in aga teije.
  17. Thinghing iti chan in akhu atam in, thuphalou ihasei chan in ilungthim se’n, mi doumah ibol chan in eidou ding atam un, mi idem chan in ilungthim ajonge.
  18. Thilpha nabol jeh in kisih hih in. Nathilpha bol ho tunia hung kinungle din jong kinepdan. Nathilpha bol jeh a midang nakipa sah sanga nang kipana sangjo ahi ti sumil hih in.
  19. Napenpi nasopi ten nang khutkham le bankham adopjing ding bou geldan, nangin kong nasopi genthei naleh hahsat naho chu kithopi jingin, nasopi ten kisonpi tah a naneiju ahi.
  20. Nahahsst nagen thei pet a nasopi naloi napai ten nahin panpi chu alhom tave tin gel hih in, panpina namu thei jeh in kipah jon. Leiset a mi tampin midang panpina amu lou ahi. Panpi theija khotona nachan chu loupi jo ahi. Nangin koi koi napanpi khah tah em kinung khol jon….

August 23, 2021 (Monday)

  1. Mihem khat nahi leh najat nanam sumil hih in, suh minset ding jong gel hih in, nahung kondohna ahin vannoijin nahet na jong ahi. Inam ingai lut teng nam’a dia thilpha kibol bep ahi.
  2. Najat nanam midangin ahin noise ding nadei lou leh amasan nangin najat nanam jabol masan, Nampi khat jong Pakai sem ahin, amadin jat len jat neo a um chompoi.
  3. Hoilaiyah umjong lechun nachihna nathepna chule nachonphat, na kisinsah naho chingthei tah a naman chu nangma le nangma bou kichoisang nahipon najat nanam jong choisang nahi.
  4. Na umna mun a naphat louna, nagit louna chule najon nakih na thu akisei tengleh nangma ding bouva minse nahipon, najat nanam dinga jong minset na nabol doh ahin najat nanam johdoh pa/nu nahi kigel doh in. Chon thanghoijin chon hih un, nahinkho kiledoh louding ahi.
  5. Koijat koinam nahi nakihet leh nanam chondan kijil in, he’nlang tho in, najat nanam chondan nahet louva natho lou leh jatdang namdang hotoh nakikhehna ipi um ham?
  6. Vannoijin koi nahi chu nachondan leh nanam lhah a nahin het ding joh ahi. Kei hi ama chu kahi tia kiphon lele ngailou ahin ichon na a pohdoh ding joh ahi. Ajat anam chondan kholhil a midang anga seithei ho nampi a dia miching ahiuve.
  7. Najat pon nanam pon jabol in, ngailun, khohsah inlang chule tahlangin. Hichu ahiding dol a nakivon them angaije. Napi napu ten iti anaman uvem, iti anasil uvem chule iti ana kivon uvem, kholgil in. Nangma deidan dan in napu napi chondan suse hih in. Chondan khankho hi kichepna ahipoi. Nabon nasil nachen twng adih in kivon un.. kivon khel hih un aphapoi.
  8. Kei hi Kuki kahi jeh in kakisih e, keihi Thadou kahi jeh in kakisih e tin nakamchenga jong seipoh hih in, hitia paocheng lhathei chun ajat anam dia jong thilpha abol doh lou, ama sanga midang angailut ahi. Mihem ama kingailu lou chun midang jong ngailut dihtah achan jou poi.
  9. Kuki nahileh Kuki te chondan khankho lhongpi nahet a natho theija nasei thei ding angaije. Meilhei nahileh Meilhei chondan lhongpi nahet a nasei thei ngai ahi. Mihem khat hija najat nanam chondan nahet louva midang koma nasei thei louleh alhing naisai lou nahi.. Hitobang hochu midang jat danga anga kijumso ding ahi. Ajat anam chondan ngailu ho miching ahiuve.
  10. Ipidinga najat von nanam von sanga midang jatvon midang nam von nadeijo a nakhohsah joh ham? Nanam nangailut lou jeh ahi. Ajat anam von khohsah a ngailu ho chu miching ahiuve.
  11. Ipidinga nanam chonna nangailut lou nakhohsah lou ham? Nanu napa najabol lou jeh ahi. Na insung nangailut lou jeh ahi. Napi napu nahet phah lou jeh ahi. Puchon pachon tin sei hih un, kajat kanam chon tin seijun, ipu ipi te chonna seh seh ahipoi. Eiho jong ichon nau ahin ichon diu ahi.
  12. Midang jatdang te nei le gou ho khohsah sanga eima nam thil le gou ho khohsah a vannoi henga khantou sah ding ahi. Ajeh chu mi a ikhohsah laichan a eima nei le gou mangthah a, igam neo cheh cheh jo ahi ti geldoh ding ahi. Ehhh…..ima ahipoi tia nagel laichan a ima lou nahi jing ding ahi.
  13. Napao naham kikhohsah in, midang jatdang pao tho thei jong thilpha chom ahinai. Ahin nacha te nanu pao ahaimil del thei chu nabolkhel lenpen ahi. Pao kimansah kiti hi jat le nam kimansah ahin thuneo ahipoi. Kimitsah nan gel hih in, namitmo na lentah ahi.
  14. Thutah thudih sei chu najat nanam chonna ahi. Napu napan jou le nal in thu aseipon lepthol in jong hinkho anamang pouve. Ipidinga eihon jou le nal a thu iseidiu ham, ibol a eihon lepthol hinkho iman diu ham? Kitahna hinkho hi ipu ipa chonna ahin amahon Pathen dei ahi ti anatahsan u ahi.
  15. Napi napu lamdohsa nei le gou chu joh mang hih in. Hichu jat le nam a dia nei le gou man lutah tah ahin nang kichepna thei ahipoi. Napu gou napa gou najoh mang nia pat nang jong amangtha nahitai ti kihet in.
  16. Numei hon nave diu khamtang pon le Nampon dang dang khongun, isil diu Saipikhup le namponsil dang dang khongun, khongthem un, ipidinga midang jatdang ten eiho nampon akhon khon jenga eiho acho a ipan pan jengu ham? Eihon ikhon diu eihon ijoh diu, eihon ikhan tou sah diu ahi. Jat le nam von khohsah a nitin a khong jinga pontho tah a pangho chu miching ahiuve.
  17. Itidan a tunia Kuki te inn mun a Sum.le suh kimu lou hitam? Kukite a ahin eiho ina umding ahi. Ole ihet lou kah uva midang jatdang te ipeh doh u hitam? Eiho a ahin midang guhmang sah poute. Chonna khanna lah a jao ahi. Rice mill toh hungoen tha ihi pouve. Thinglhang gama Sum le suhtoh hung pentha ihiuve.
  18. Ipidinga tulai Kuki te in’a Beng le Nam, Paipeh Longkai, Kongvo, pocha chuleh Sengkeng kimu lou hitam? Eiho a ahi lam ihet louvu jam? Ole kakhangtou tai itiuva idon dau ham? Midang ten eilah peh kit u hitam? Ipidinga inei igou houjong ikichin tup jouji lou uham? Pasal ho ipidinga hiche ho sahdan ikithem chuh nom lou ham? Isah diu isem diu ijoh diu ahi. Ipidinga ipu ipa te lamdohsa inei igou houjong midang isah sah uva acho a ipan jingu ham? Ilhahsam nao akhangtul tul e.
  19. Ipu ipate kichep goseh jong khantou sah ding ahi. Khosung vengsung jenga jong ipu ipa te kichep golseh koiman bolnom lou, chondan khandan khohsah khangthah lhomchel cheh ta. Kangkap thei nungah um talou, Kangchoi sep thei gollhang jong um talou, Kangtalai sem thei um talou, kichep jeng jong koiman gel khoh talou, ijat inam ingailut naujong adih lou lama khangtou tul tul jeng ahitai.
  20. I-tumging hou jong mangthah vah ding ahitai. Koiham Gosem semthei, koiham Lhemlhei semthei? Koiham Pengkul/Sumkon sem thei? Chule koiham hiche ho ahina banga mut ging thei?? Kuki te Pathen in nei le gou manlu tah tah eipeh houhi leiset chunga jatdang nam dang te apeh lou tam tah um ahi. Ahin eihon amanlut dan ihepouvei. Ajouleh Kuki te khut a kona alah doh a midang te joh ahin peh ding naicha um ahitai.
  21. Kipa golnop ibol nahou ikitonau um talou, ijat inam chondan khohsah a tahlang ding Lamkai um talou, ahi thei leh Nam lamkai Kut lamkai chule khosung vengsumg lamkai hon Nam kichep golseh ho leh tumgin saithem inei hou kitetna ho a pohdoh a khangthah te kitil khousah ding gel u hite.
  22. Khamtang Saipikhup le pondang dang inei hou ahina ding bangin khong utin sem toh ute. Chonna khanna kisuh toh taute. Ham le pao kisuh toh taute. Khosung kivaipoh kisuh toh taute. Gamsung kivai poh kiauh toh taute. Ihinau ponlap domsang tau hite.
  23. Ichon dan ikhan dan amol suh suh in, ichen nau thinglhang gam jong angul joutai. Kitahna hinkho mang uhitin, ijat inam chondan in gamsung jem hoi taute. Ihinau amang cheh cheh in, midang te hinan nitin in igamsung alojinge. Eima jong kingailu u hitin ijat inam jong ngailu u hite.

Articles hi anom lheh e nati le anoiya “LIKE” button khu meh in writer ho na support nau vin, chule seinom nanei le anoiya comments nahin bolthei u ahi.

Site nalut a notification pop up hung potji ho allowed anabol ji uvo maban a thusim thah ahung ki post teng notice namu ji diu chule Bell button a subscribe kiti chu meh un.

Previous articleMEL MULOU LANU-V
Next articleLUNGLHAI NA CONTENMENT HI HINKHO A MUTHEI AHI DEM?