Home Chaga Thusim HEU, KAP TAPO HITE

HEU, KAP TAPO HITE

39
0
HEU, KAP TAPO HITE
HEU, KAP TAPO HITE

Fictional Orphan Story

Story and Narrated by
Crosby Haokip

Crosby Haokip kwc
Crosby Haokip kwc

Numei chapang hijong leng kajopa khulsin achan jouva patin keiman kanao Boishi kahin kisinin, genthei hahsa tahin kahung incheng lhon tan ahi. Chuleh kachunnun ang dang koi dinga keileh kanao einuse lhon tah jehin; sangga hinkho mangin lonlhi theh pumin kanaonu loi chungah katousahin ken malama loi kahin kaiyin molhang kahin jot suh lhonin inlam kahin jon lhon tan ahi.

Kanaovin vang achunnu jinei lam ahe naipon, keini jong in kalhun lhon ajing jingkah langa mikhat in eihung seipeh nalai ahin ahi. Chuin kanaovin eihin kouvin kajaha,
KANAO: “Heu, mama ahung tengleh puri eihin poh peh ding chuna?” atin, achunnu hung lhun ding ngahlel a aum chu kagelleh kapona lheh jengin ahi. Chuin kenjong kanao jah a,
KEIMA: “Henge nao, henu ahung tengleh nehthei tampi jong ahin poh peh ding ahi,” katin kanu jinei kanao kahetsah nom pon ahi. Ajeh chu kahet sah ngei ngeileh kap ding ahi. Chuin kanaovin kajah a,
KANAO: “Heu, tunileh henu hung lhung ding hitam?”
KEIMA: “Hung naipon te nao. Jingleh hung ding ahi,” katin, nisehleh kanao koma, “Jingleh henu hung lhung ding ahitai,” kati jin achunnu jinei kasei peh mong mong tapon ahi.

Chutia kanao koma jingleh jingleh, kati ti phatin kanao jong kachunga akiphin tan kajah a,
KANAO: “Heu, henu hung na ding jingleh jingleh nati jin, itihle ba hung ding hitam?” atin ahile, lhaset nan kadimin, chuin kenjong kanao jah a,
KEIMA: “Nao, henu hung vah tan te. Chomkhat ngah hite,” katin, chuin kenjong kanao kapuiyin kanite koma kaga thah tan ahi. Chuin kenjong kanao jaha, “Nao, nang heni koma umin lang, kei henu puiyin gachenge,” katileh kadalhah ding chu anom pon, chuin kanaovin kajah a,
KANAO: “Heu, keijong hung inge.”
KEIMA: “Nao, nang hung theipon nate. Lampi ahahsan chuleh taku jong atam e. Hijeh chun nang heni koma umin lang kei henu puiyin che inge,” katin, hoitaha kajol phatin anom tan ahi. Hitichun kanaonu kani koma kahin dalhan kei kanu koma kache tan ahi.

Chuin keijong kache tan ahile, lampi jong kahe tapon, vadung lah khat kasoh dohin, hiche vadung a chun pasal khatin len anasepin, chuin kenjong amapa koma chun,
KEIMA: “Hepa, Lenkot kiti kho chu hoilaiya iti kiche ham?”
PASAL: “Boi, khuche lampi ni kika khu ven lang lamjet lama che le chun changlei khat anaumin te. Chuleh hiche lampi chu juipeh le chun nalhun jeng ding ahi. Lampi dang aumpoi,” atin, chuin amapan eihilna bangin kache tan ahi. Chuin changleiyah kalemin, hiche lampi chu kajuipeh tan ahi. Thinglhang gamgil ahijehin kichat aum lheh jenge. Juham vaham kidang dang kajan lungneo nan kadim jengin ahi. Kah lah leh Dapa chon thusim kalung sunga akilang jin lonlhi long chut chut in lam kajot tan ahi. Kanu koma kache lona pentah chu ahile, kamu muleh hin nungpui ding kati ahi. Ajeh chu kanaovin angaival tan; kanao ka kave jou tapon ahi. Kanao hinkho man ding dan kagelleh kakap masan kanu chunga kalhase lheh jenge. Mitin in nu kiti ngailu lheh jongleh kanaovin achunnu angaina vang lamdang kasa nalom lom e. Ajeh chu nisehleh kilha kang ngei lhon lou ahi. Hiche nia chu kanun keileh kanao loi hola eisol lhona; kaloi hol kah lhona Thangbul kiti pa toh ana kijam lhon ahi. Kapona lheh jengin kakap kap ji tan ahi. Kanao iti jol leng achunnu ngai louvin aum thei dem? tin kakigel gel tan ahi. Hichun keijong nilhum konin Lenkot kiti kho chu kaga lhung tan ahi.

Lenkot kho kalhunin kanu kahol tan, inkhat ah kalutin leitola chang phou tehse pi koma kachen ajaha,
KEIMA: “Hepi, hiche khoa hung jinei thah numei khat alhunna in chu hoilai ham?” tia adohleh aman jong eipuiyin leitol koma chun aumna lang eiko pehin kajaha,
TEHSE PI: “Boi, khuche lentol koma in ani channa khu ahiye,” atin chuin keijong kache tan ahi. Chuin keijong kalhunin insunga kalut leh pasal khat insunga konin ahung potdohin kajah a, “Koi nahim? Hilaiya hi ipi nahung bol ham?” atin, chuin kenjong ajah a, “Hepa, kanu kakimupi nom-e,” katileh amapan kanu akouvin ajaha, “Dimja, hung potdohin lang hiche chapang hi koiham?” atin ahileh kanu ahung dohin, kanu kamu mu chun kakap tan ahi. Ahinlah kanun ajipa akichat jehin amasanga eiseilepin aseiyin, “Koi chapang hammo kenjong kahe hih-e,” atin ahileh kapona valin, chuin kanu jong insunga alut go tan ahileh kenjong, “Henu!” tia kakouleh kotbenga ading denin, chuin kenjong ajah a, “Henu, neihet lou mong mong ham? Kihetmo sah nahi hamleh? Lungset tahin kanao akap kap-e,” katileh kakoma ahungin kajaha, “Nang koi nahi kahe khapoi. Na-in a kile tan mingol,” eitin ahile, na kasa valin, chuin kenjong kanu jaha, “Henu, nikhatleh tua nahet tahlou chuleh mingol teni, tia nakou nachate ni lhangaiyin hung kap hih-o,” katin, keijong kap pumin inlam kahin jon tan ahi.

In kalhunin kanao koma kachen ahileh kanaovin kajah a,
KANAO: “Heu, henu hung nailou ding ham?” atin, lung nommo tahin eihin dong tan ahileh, keijong kalai anan kanao jaha,
KEIMA: “Nao, einin henu tiding inei lhon poi.”
KANAO: “Ibola em heu. Henu inei lhon chula!”
KEIMA: “Nao, henun eini ilungset lhon pon; ji dang anei tai,” katileh kanao jong akap tan ahi.

Chutia kanao aka phat chun kalhemin ajah a, “Nao, kap hih’in. Henun eidalha lhon jongleh einin henu hepa ti ding Pathen inei lhon nai.”
KANAO: “Heu, henu aumlou leh kei ipi kati ding ham?”
KEIMA: “Nao, lunggim hih’in. Eini lung mong taha ichen khom lhon ding ahi,” katin kanao kalhamonin; kanaotoh kahung cheng khom lhon tan ahi. Chuin kenjong kanaonu lekhasimna ding kaboipin; natongin sum kalon, kanaonu school kahin kaisah tai. Chuleh kenjong govt. school a admission kakibolin niseha school kaijou louvin natongin sum kahol tan ahi.

Chuin Sugnu langa kanaotoh insan kakilahin kei sumlo dingin saw-mill a na katong tan ahi. Kanao nisehin school kakai sahin, genthei tahin hinkho kahin mang lhon e. Chapang cha hilhon jong leng ka-on kah lhonleh mi insung suthengin sum kakilo ji lhon e. Hoitaha katoh lhon jehin mihon eingailu lhonin, natoh ding kamu jing lhonin ahi. Chuleh lungneo louvin kaumin; kanao katilkhouvin Pathen lama lhasam louvin kakipe jing lhon e.

Jingkah matah leh kathou lhonin Houin a taona mangin kiche ji lhonin, chuleh janseh leh taona kamang jing lhonin ahi. Kagenthei val lhon tengleh kanao hetlouvin guhthimin kakap ji tan ahi. Kanu chunga kalha asen, lainat nan kadimin ahi. Nikho khatleh akisih tei ding kahen, eidalha lhon tajongleh kachunnu ahijehin kaponan ahi. Kanao alungmon mo khah ding kanop lou jehin akipana dingin kakichep khompi jin, adei dei kabol pehin kalhamon jingin ahi. Hitichun kanaonu toh kahung cheng lhonin, phat le nikho ahung che che phatin kanaovin jong achunnu ahin mil tan ahi. Amiltai tijong leng achunnu mil ding koima aumlou jehin kah lah leh ahin holjin ahi. Chutengleh asuhmil theina dingin mun chom a kapuidoh jin, alungthim thil dang khatʼa kahei mang peh jin ahi. Hijeh chun kanaovin jong ol olin achunnu ahin mil mil tan ahile, kataona Pathenin asan hin tin achunnu ahol tapon ahi. Chua pat chun keijong kalung amongin, chaga genthei hijong leng Pakaiyin selchal chaga banga nikho khatleh eihin kile doh sah lhon ding kahen, gunchu tahin kanaotoh lekha kahin sim lhon tan ahi.

Kum phabep jouvin Pathen lungsetin kanaovin Class XII ahin chai tan, result out ding nikhon lunggim nan kadim lhon tan ahi. Hijeh chun Pathen koma taona kamang mang jing tan; Result a out tai ti thu kahin ja lhon tan, ahinlah kanao akison lel val jehin kave ngam lhon pon, koima jong kadong ngam lhon pon ahi. Hijeh chun keile kanao jong lunggim tahin insunga kanatou lhonin ahileh, inneinun eihin kouvin chuin keijong kache tan ahi. Chuin aman kajaha,
INNEINU: “Kimneo, nanaonu congratulation kahin bol-e. Hichan a lolhinna sangtah ahin nei jehin,” atin ahileh kalung adongin, katahsan thei him him pon, chuin kenjong amanu jaha,
KEIMA: “Henu, kanao hipon tin midang joh hinte.”
INNEINU: “Ven! Hoitahin ven! Amin chuleh apa min jong kibang hime. Chen lang a admit card galan ve hite,” atin, chuin keijong kachen kanao admit card kalan kavetsah tan ahi. Chuin aman kajah a, “Boi, nanao ahi mong monge ven!” atin, chuin kenjong kaven ahil, kanao ahi kahet phatin kaneova patʼa kagentheina jouse kahin geldohin ahileh tua hichan a pachanna ahinmu thei kagelleh kakipah valin amuna kamoh ka tan ahi. Chuin amanun eilhamonin kajaha, “Boi, kap hih’in. Pathenin na gentheina amuʼa tua hichan a nanaonu lolhinna amu sah ahi,” atin, chuin keijong kakipah valin ajaha kap pum pumin,
KEIMA: “Henu, chaga genthei hijong leng hichan geiya phatthei chang dingin kakilom poi.”
INNEINU: “Kimneo, hinante. Hijongle Pakaiyin amite adonda poi,” atin, chuin keijong kanao koma kachen, kanao kamu mu chun kakoiyin kakap tan ahi. Chuin kanaovin kajaha,
KANAO: “Heu, ibola naka ham? Heu, Kap Tapo Hite,”atin, chuin kenjong kanao jaha,
KEIMA: “Nao, akap kahipoi. Anuijoh kahibouve,” katin mitlhi long pumin kanuiyin ahileh kanaovin kajaha,
KANAO: “Heu, ipi ti nahi ham?”
KEIMA: “Nao, Class XII exam napeh chu 80% na mu-e,” katileh kanao jong akipah valin akap tan ahi; nilhahin maicham kasem lhonin, Pathen koma kipathu kasei lhonin ahi.

Chuin maicham a kanaonu jaha kaseiyin “Nao, henun eidalhah ding kon lhonin, kilepnan eini loi holin isol lhonin, hiche kah chun adongma pa toh ana kijam lhon e,” katileh thusei thei talouvin kakap den tan ahi. Chuin kaseikitin, “Chuin einin jong loi ihol lhonin, imu phat lhonin mol lhanga ihung suh lhonin; nang loi chunga natouvin, ken amalama loi kakaiyin inlam ihin jon lhon e. In ilhun lhonin henu aum tapon, hiche phat chun ajinei ahi kahe tan; hijongleh kanao lung leng khante tia kageljeha chu kaseidoh peh lou ahi,” katileh kanao jong akapin eikoiyin kajaha, “Heu, neilungsetna hi alen vale. Nang jeha hichan kahung phah ahin, chuleh heu tithei ding nang kanei hi kalung among e,” atin, chuin eilhamonin kajaha,Heu, Kap Tapo Hite, atin, chuin kenjong ajaha, “Nao, kap taponge,” katin kanaotoh Pathen koma kipathu kasei lhonin ahi.

Chuin kanaovin BA asim ding tah jehin kanaotoh Sugnu kahin dalha lhonin Ccpur kahin jon lhon tan ahi. Chuin Tuibong ah insan kala lhonin kaum lhon tan ahi. Kanao school kakai sahin ken tuition kabolin; kanaotoh kahung kimang cha lhon tan ahi. Hahsatna le gentheina tampi katoh jing lhon e. Abangleh lekhasim ngaha thinglhang langa kani lei lhouva che ding kathanom jin, sum tampi pi muna ding lampi kagelin ahi. Ahinlah abang komleh themmo kakichan kit jin ahi. Ajeh chu chan chunga lung oi dingin Pakaiyin eideiye, ti kahen, chuleh nikho khatleh aman lolhinna eipeh lhon ding kakinemin ahi. Jingkah le nilhahin kanaovin tuition abolin sun tengleh College achen ahi. Sun tengleh sumlon miho toilet suthengin kache jin, sum muna ding ahipouleh katin, tin le ha patin sum kahin lo lo tan ahi.

Keijong nungah lhingset kahi phatin kanaonun jinei dingin eijol jin, ahinlah kanaonu kaphoh jin ajaha, “Nao, nangin lolhinna nahin nei tengleh jinei nange,” katin kanao nu kalhamon tan ahi. Kanaovin jinei dinga eijol vangin jinei ding vang kanom tapon ahi. Ajeh chu lekha lama la ima kahi tapon koiman jong eidei tapon te. Niseha kabol thei pen chu sumlo a mi insung sutheng a kapan ji ji chu ahijenge. Hijeh chun eihin hel ho jong kanop peh ji poi. Keiman katup le kadoi pen chu ahileh anun adalhah nao chaga kanaonu alhunna ding mun lhunsah tei ding ti kalung gotin ahi. Jinei louva kanaonu hoitaha sem ding kanop jehin dongma jong kanei pon, nisehleh mi in a natongin sum kalon ahi.

Kanaovin BA ahin chai chun kanao jaha atup le doi ho kadongin ajaha, Nao, nahinkhoa ipi nahung hi ding natup em? katileh kanaovin kajah a,Heu, kahinkho kadoile katup hi nang lunggel toh kibang lou ding ahijehin amasapenin ngaidam kahin thum masa-e. Keiman kadei le katup pen chu Pathen natoh ding hi ahi. Hijeh chun lungset tahin heu maban a Bible kasim nome, tin kiphat lam tahin kakoma aseiyin ahileh kenjong kanao jaha, “Nao, lunggim hih’in. Christa thupha jalʼa gim genthei thoh ho avangpha penʼui. Nalunggel chu keiman jong kadei lheh jenge,” katileh kanao jong akipah valin, chuin Bible asimna ding kahin gong tan ahi. Ahinlah genthei kahi lhon jehin keima nia konin vang ahithei pon ahi. Hijeh chun kanaotoh mitlhi longin taona kahin mang jing lhon tan ahi.

Bible sim ding kanaonu athanop vangin insung gentheina ho ahin gel ji tengleh alungneo jin Bible sim tahlou dingin ahung kigellha jin; ahinlah kanaonu katilkhouvin, hoitahin maicham kasem pehin kalhamonin ahi.

Chutia lung dong taha kaum lai lhonin khosunga houbungin keile kanao dinmun ahin heuvin, chuleh kanaonu lungtup; Pakaiya dia akipeh doh dan ho ahin het u chun, houbungin kanaonu a-Bible simna a sponsor ahinbol tauvin ahi. Kakipana lhon asang lheh jenge. Hitichun Pakai milungsetna jalin kanaovin B.Th ahin chai tan ahi.

Hiche kum ma ma chun kanao le Pastor khat ahung kingai lhonin; pasal pa jong lhagao mitah ahin, kanaonu alungset lheh jenge. Chuin kanaovin eidongin ahileh kenjong kakipapin, chuin amani jong kicheng dingin aum lhon tan ahi. Kanaonu Marriage programme a dingin kakigong tauvin; chuleh B.Th ahin chai jong lop peh ding katin ahi. Chuin kanaonu jinei na sun programme a thuseina phat eihin peuvin ahileh keijong kading dohin mitlhi long pumin kahoulim tan ahi. Chuin kaseiyin, Kachunnun keile kanao gammang laha loi hol dingin eisol doh lhonin, hiche kah chun aman ji dang ananei tan ahi. Hichun kenjong kanaonu loi chunga katou sahin ken amalama loi kakaiyin ahi. Pathenin kagentheina lhon amun; hiche laiya loi chunga tounu chu Pakai jala tua hi imasang uva touna thupi taha tou ahitai,” katin ahileh thu dang ima seibe thei talouvin kakap tan ahi. Chutia mipi masanga kaka phatin kanaonu ahungin kalhi athehin eikoiyin kajah a,“Heu, Kap Tapo Hite,atin, chuin kenjong ajaha, “Nao, akap kahipoi. Kakipa joh ahi,” katin, kanaonu mitlhi long pumin asam kajut pehin; chupet tah chun mipi langa konin nupi khat laina tahin ahung kapin, chuin amanu jong ahung dohin keile kanao jaha, “Boi, Lungset tahin nachunnu lhon hi neingaidam lhon o. Kakisih vale boi. Kei nanu lhon kahi,” atin, keile kanao eikoi lhonin akap tan ahi. Chuin kanu lhon ahi kahet phat lhonin kakipah lhonin, chuin kenjong kanu jaha, “Henu, tunia kanaovin lolhinna amu thei hi nang jal ahibouve. Lhase hih’in. Kap hih’in. Pathenin imalampiu joh asem ahibouve. Kachunnun themmona aneipoi. Kaneo lai lhona neinadalhah lhon jong tun kahin ngaidam lhon e,” katin, kathum uvin mitlhi long pumin kipahtahin kakikoiyuvin ahi.

Keiho nucha umchan chun mipi tampi mitlhi apotsahin, chuleh kanaonu kichenna programme jong lolhing tahin akichai tan ahi.


——THE END——


Kakipahe asim jouse Pathen in phatthei boh tahen.


©️2018, Crosby Haokip, All Rights Reserved.

Thusim hi anom lheh e nati le anoiya “LIKE” button khu meh in writer ho na support nau vin, chule seinom nanei le anoiya comments nahin bolthei u ahi.

Site nalut a notification pop up hung potji ho allowed anabol ji uvo maban a thusim thah ahung ki post teng notice namu ji diu chule Bell button a subscribe kiti chu meh un.

Previous articlePUBLIC RELATION KITI HI IPI PEN KHU KISEI NA AHITA DEM?
Next articleTILLAI 1960 MASANG CHUN TULAI A FAKE ALHEM KITI HO HI ANA UMPON AHI

LEAVE A REPLY

Please enter your comment!
Please enter your name here