Home Crosby Haokip HEU, KAMITLHI ALONG JINGE

HEU, KAMITLHI ALONG JINGE

40
0
HEU, KAMITLHI ALONG JINGE
HEU, KAMITLHI ALONG JINGE

Fictional Love Story

Story and Narrated by
Crosby Haokip

Crosby Haokip kwc
Crosby Haokip kwc

Kaloihon dongma anei gam tauvin, keivang dongma nei ding chapang kakisah val nah lai jehin eihel mi ijat in tam jongleh kanop peh aum pon ahi. Hijeh chun eihe them lou mitampin akiletsah in eigel un, keivang chu dongma nei nomlou kahi.

Nilhah khojin tengleh kaloiho adongma cheh utoh akimuto jiuvin, nomtahin hinkho amang uve. Dongma kanei lou jehin kaloihon mikhat toh kingai sah tei ding eigo jiuvin ahi. Ahinlah kanom mong mong pon ahi. Ajehchu kaloiho adongma toh ahung kikhen teng uleh kakoma ahung jiuvin apohnat dan uleh adongma pa angaidan ahung sei jiuvin, amaho sei jengin jong dongma nei ahah ding kahe themin ahi. Kahet kham khamin boina neiho kalhamon jin hijeh chun kaloihon jong eilungset thei lheh uve. Dongma neilouva kaum chu kaloihon nom asa thei pouvin dongma nei dingin eijol jol jeng uvin ahi. Chuleh kaloiho abang akicheng jong aum tauvin ahi.

Hiche lai chun kaloi ngaitah khat aumin amin chu Vahshi akitin ahi. Kakingai lheh lhonin kakivop jing lhonin ahi. Sun leh tukhaiyin kakilom ji lhonin, kingailu tahin kakivop jing lhonin ahi. Dongma khat aneiyin, adongma toh akiboi tengleh kakoma ahung jin, kenjong kajo chanin kalhamon jinge.

Chutia dongma neilouva kaum jing phatin kaloihon kakho pasal khat toh eikimuto sah un amapa min chu Minlen akitin ahi. Amapan eilungset lheh jengin ahinla keivang chu dongma nei ding chu kanom mong mong pon, kada chanin amapan eiha jol cheh cheh tan ahi.

Nikhat tukhaiyin kachen ahileh Minlen ahungin luikhuh chan kakilhon lhonin kakihoulim lhonin ahi. Chuin Minlen in kajaha,
MINLEN: “Kimneo, tulah nahinkho man nom nom hinam?”
KEIMA: “Heu, anom tiding ahi jenge. Nom hih jongleh ima bolthei umlou. Heu, nangin la nom nasah sah hinam?”
MINLEN: “Neo, keiya din hinkho nopna aumpoi. Kavetna jouse abinge.”
KEIMA: “Ibola ong heu?” katileh lungnom mo tahin aseiyin,
MINLEN: “Chaga genthei keiya dingin kipana aum thei poi. Dongma kanei jongleh apha chom pon.”
KEIMA: “Heu, koitoh na nakingai ham?”
MINLEN: “Nao, masang chun Lamka lang ho khat toh kana kingaiyin, ahinlah amanun ka insung dinmun leh chaga kahi ahetdoh phatin eikhen tai. Hijeha chu chaga genthei keiya dingin kipana aum poi,” atin ahileh kapona valin, chuin kenjong ajah a,
KEIMA: “Heu, lhase hih’in. Nikho khat leh Pathenin nahinkho hin kile sah nante,” katin katilkhouvin, ahinkho man dan vang kagelleh kaponan ahi. Chuleh pasal kahet laha mipha le mikitup khamna theiya lop lou ahi. Eimu seh leh kakoma ahung jin, aseingam lou vangin guhthim a eilungset vang kahen ahi. Kakoma alhasetna ho asei tengleh kenjong kalhamon jin, hijeh chun eilungset lheh jenge.

Minlen toh kahung kivop jing phatin kakingailu lheh lhon tan, aphat seh leh phone in kakihou jing lhone. WhatsApp a kakidai ji lhonin, kakingai lhon lou vangin kakihou lhon louleh kahi thei lhon tapon ahi.

Nikhat kakoma lungsetna thu ahin seiyin,
MINLEN: “Nao, tulah kahin ngaiye. Chuleh kalungsetna hi neisan peh o,” atin, ahinlah dongma nei ding chu kagelmo hel in kada tan ajah a,
KEIMA: “Heu, loile paiya ium lhon hi nom jo lou ham? Kenvang dongma kanei nom naipoi.”
MINLEN: “Nao, chuti nante. Hijongle ikivop chan lhonin kahin lungsetna asang cheh cheh e.”
KEIMA: “Heu, lungset tahin neihe them o. Dongma vang nei nai ponge,” katin kasan peh tapon ahi. Eilungset na kasan peh lou phatin eihou nom tapon, aguhin alhisoh soh tan ahi. Chaga ahi jehin kalungset in, ahinlah kingaipi ding kati leh dongma kanei nom pon, ahinkho man ding dan kagelleh kakhoto lheh jenge.

Nilhah khat Houin leitola atouvin phone a akichemin, chuin akoma kachen ajaha, “Heu, nungah ho toh na ki text ham?” tin kadaiyin ahileh aman jong kei enghotnan aseiyin,
MINLEN: “Nangin la neilungset talouva nungah dang kakihol tahi,” atin, chuin kenjong ajaha kaseiyin,
KEIMA: “Heu, nakingaipi nu mangpha kathot e,” katileh kachunga alung hangin kajaha,
MINLEN: “Kimneo, apha phan ham mo!” atin, chuin kajaha, “Nao, lungset tahin kahin lungsetna hi neisan peh tang o,” atin, ahinlah kanom kit pon ahi.

Kanop lou phatin thudang aseiyin kajaha, “In a um um sanga gam pama company natonga che ding kanom tai,” atin, ahinlah kanom pon ajaha,
KEIMA: “Heu, nache angaipoi. Company natong ho min aseileh aphat mo mo theiyu toh. Nache le kalhase ding ahi.”
MINLEN: “Mi aset a ei iphat pouleh ima boi ponte. Kakihet pi kaloihon eikou kou jeng uve.”
KEIMA: “Heu, lungset tahin che hih o. Nache nungleh kei kachanga kamon joulou ding ahi,” katileh eihin houvin kajaha,
MINLEN: “Vo Lhingneikim, mingailu beh kisa ji hih’in. Nakijol le bon nomlou, tua chu nahung kiphat sah ham?” atin, chuin kenjong ajah a kaseiyin,
KEIMA: “Heu, pasal phatah nahi jeha nahung che set khah ding kagelleh ka it nahiye.”
MINLEN: “Akhoh poi. Sum kakikhol ding kache thou thou ding ahi,” atin, che lou dinga iti kajol vangin anom pon ahi.

Company natonga ache ding chu kanom mong mong pon ahi. Ajeh chu eilungsetna kasan peh nailou vangin kenjong kalungset pan tan ahi. Chuleh chaga genthei ahi jehin jong kalungset lheh jenge. Kanop peh lou jehin amanla eihel kit tapon kakoma thu asei jongleh thu dang bou asei ji tan ahi. Kenvang kalungset doh tan, avela eihin jol kit leh anom sa kahi jeng tan ahi. Ahinlah avelin kakoma lungsetna thu asei tapon masanga kananop peh lou kagelleh anungin kakisih lheh jenge.

Nikhat kahet louvin apute kho langa sumlo dingin ache doh tan ahileh kahet doh doh chun kakap jeng tan ahi. Ajeh chu kahin lungset doh phatin amel mu louvin kaum thei tapon ahi. Apute kholang chu network umlou ahijehin kahoupi thei tapon, anungin apul kadou dou tan ahi. Kangaival phatleh ainkote koma kache jin akoudoh diuvin tot le tah gomin kaga seijin ahi. Sumlo a che ahijehin ahung umsot ding kahen ama ngaiyin kagenthei lheh tan ahi. Hitichun lhakhat lhingset apul kahin dou tan ahi.

Nikhat Minlen ahung kile thu kaja tan, akoma che a amelmu ding kangahlal lheh tan ahi. Nilhah khojin in ain uvah kholai lengin kachen ahileh anaumin, chuin nehthei eipen kakilahin kane tan ahi. Chuin a inkote atot un Minlen jah a, “Gollhang khat ahung lhun vang chu, nungah khat vang kipahin aumna lam jong he tapon te,” atiuvin kei eiveuvin anuiyun ahileh kajah acha lheh jenge. Ahinlah thu ima sei louvin kaumin, chuin chomkhat jouvin kile dingin kaum tan ahileh Minlenin eihung thahin kajah a,
MINLEN: “Nao, lhathah leh Delhi a company natonga kache ding ahite,” atin kipahtahin aseiyin ahinlah keivang guhthimin kamitlhi along tan ahi. Chuin kenjong ajah a,
KEIMA: “Heu, chutia company natoh aphat chom leh keijong neipuiyo.”
MINLEN: “Nao, numei dingin vang boiyin te,” atin, ahinlah kaseiyin,
KEIMA: “Pasal dinga ichom ham? Numeiyin atoh le iti chom ham?” katin kalung nommo pan tan ahi. Chuin aman kajah a,
MINLEN: “Nao, kahinkho man nahet chula! Keiman sum kakihol lou leh nikho khat leh ka genthei ding ahiye,” atin chuin amajong akilen keivang lhisoh pum pumin in kajon tan ahi.

Nikhat kakoma ahungin, mai nguitahin eiven kajah a, “Nao, lungset kahin tila pet chun nang kahin lungsetna vang alamdange. Neilungset ding kinemin kalung sunga um kalungsetna ho nangkoma kana phongdoh tan, ahinlah genthei keima kalunggel ana guilhung jou tapoi. Hapta jouleh che ding kahi tai. Kalungset pen nahi jeha tunia hi kahung vailhah nahiye. Ikivop khom sunga kabolkhel, kaseikhel ho ngaidam kathum e,” atin, akile pei pei tan ahi. Chuin kapona valin amuna kakap den tan ahi. Chuin anung kadelin kakouvin ajaha, “Heu, lungset tahin khongai ta di o,” katin kaka ham tan ahileh amajong akhongaiyin, chuin kenjong kajolin ajaha,
KEIMA: “Heu, lungset tahin che hih beh o. Nache ding kanom mong mong poi,” katin, chuin aman kajaha,
MINLEN: “Nao, che dinga thil jouse kagon toh soh ahitai. Kache nungleh nalungset pen toh nom tahin hinkho hin mang lhon tan,” atin, kapona valin ajaha kaseiyin,
KEIMA: “Heu, nangtoh nom tahin hinkho kamang nome,” katin ahileh kakoma ahung naiyin kajaha,
MINLEN: “Nalungset pen toh nom tahin hinkho hin mang jon,” atin, ache tan ahi. Chuin kap pum pumin kakouvin ajah a,
KEIMA: “Heu, kalungset pen nang nahiye. Lungset tahin neidalha hih o heu,” katin kakap doh tan ahi. Chuin kajah a, “Nao, jingleh kihou tate,” atin, kakikhen lhonin kain cheh kajon lhon tan ahi. Janin kaimu thei tapon kajan ka tan ahi.

Ajingin kakimuto lhonin, chuin kenjong avelin katem-in ajaha, “Heu, nadei deiyin um nange. Company natongin vang che hih o,” katin, chuin amanjong kajaha,
MINLEN: “Nao, kalungsetna neisan peh leh che ponge,” atin kakipah valin, chuin kanomin,
KEIMA: “Heu, kahin lungset e. Kei dalhaa nache doh ding kanom poi.”
MINLEN: “Neo, chutia lungset nei chan leh ibola nang kadalhah ding ham?” atin, hiche ni chu keiya dia lungset hinkho kipat ni ahung hitai.

Dongma kahin nei phatin angol kabang tan, ka-u Minlen kangai lheh jeng tan ahi. Niseh leh akipeh be kabangin kihou louvin kaum thei tapon ahi. Kangaival jin, abangle dongma kanei khah kakisih jin, ahinlah nung kou thei ahi tapoi. Hijeh chun phatea kilungset pi dingin kakigel lha tan ahi. Niseh le kakivop jing lhonin, chuleh kakingai lhon kaloihon ahet phat un akipah lheh jeng uve. Aman eilungsetna sangin keiya asang jo danin kagel tai. Dongma kahin nei phatin kaphat mandan jong ahung kikhel tan, kaphat tampi kadongmapa dinga kapeh doh angaitai. Hijeh chun kahung kilungset lhonin, aman jong eilungset lheh e. Lungset val jehin nupa hinkho jong kahin mangkhom kha lhontai.

Ahinlah nikho phabep jouvin aman eihou nom tapon, kakihoupi jongleh akilep le le tan ahi. Eilungset lou hitam tia kagel jongleh eilungset danin asei kitin, numei lungneo kiti chu kachunga ahung chu tan ahi. Keiman ka call masat loule eihin call deh pon, Whatsapp a-online vangin ka message thot jong vaigei tahin ahin reply jie. Hiche phat chun kachangin kakap kap tan ahi. Kalhaset tengleh kaloinu Vahshi koma kachen masanga ama bangin akoma kaga lhisoh ji tan ahi. Aman jong eilhem lungmong jie. Keiman kahet lou vanga kaloinu Vahshi toh anakingai ahi lhon tai. Kenvang kahe pon, kalung nop mona jouse kaloinu koma kaga seiyin ahi. Kaloinu jong kihetmo sah tahin aum jin, hijeha chu amani kingai lam kana het phah lou ahi.

Nilhah khat ka-u Minlen ka call in ajaha, “Heu, lhanmola kimuto hite. Nahung louleh nop mo kasah ding ahi,” katin ama jong ahung tan ahi. Chuin lhanmola katouvin, ahung lhun chun ajaha,
KEIMA: “Heu, tulah ibola nei hou nom lou hitam?”
MINLEN: “Nao, neihe them o. Kaboi val jeh ahi,” atin, chuin laina tahin kaseiyin,
KEIMA: “Henge, naboi nachu kahei. Kenjong katoh ding jouse dalhaa nang kahin houpi ji chula. Im louvin sei jeng o. Dongma dang nanei jongleh tun sei jengin,” katin ahile ahung lung hangin,
MINLEN: “Kaboiye kati chula. Chutia dongma dang nei dinga nei ginmo leh hisah jeng tang.”
KEIMA: “Heu, kahin ginmo jong nahipoi. Nei houpi nom tahlou jeha kasei ahi. Lung hang hih o,” katin, alunghan phatin kale jol tan ahi. Chuin aman eile jol lungdam kit in kajaha,
MINLEN: “Nao, lungneo ji hih o. Ka-on seh leh kahin houpi jing ding nahi. Kahin lungset jinge,” atin, kakipah valin kakoiyin ajaha,
KEIMA: “Heu, kenjong kahin lungset e. Ikilungsetna lhon khenna so sah po hite,” katin, kakihoulim lhonin kakile lhon tan ahi. Chuin kaloinu Vahshi koma kachen kakihouna lhon kaga seidoh kit tan ahi.

Eilungset jing ding kinemin kaumin ahinlah amavang akikhel chom pon ahi. Ajingin phone eihin bolin kajaha, “Janhia ikimuto lhon chu Vahshi koma nasei ham?” atin lung hang tahin eihin dongin, chuin kenjong ajaha, “Heu, Vahshi chu kaloi ngaitah ahi jeha kana sei khah ahiye. Kabol khel ahijongle neingaidam o. Avelin akoma sei taponge,” katin, chuin amajong alungdam tan ahi. Ahinlah kenvang kaloinu le kadongma pa kikaha ginmo khat kahin neipan tan ahi. Kamit taha kamu lou jehin ima kaseinom pon, ahinla kalung a-oi thei tapoi.

Nikhat Minlen te ina kachen ahileh anaopa anaumin, chuin insunga lim ho kave lhonin ahileh Minlen le Vahshi lim akikap khomna lhon tampi kamu doh tan, lima akikoina lhon jong kamu doh tan ahileh kalung ana valin kalhisoh tan ahi. Chuin anaopa kadongin ahileh a-upa le Vahshi kingai ahidan aseiyin kalung ana valin ahi. Chuin alim kilah khomna lhon khat kala dohin kahung pot tan ahi. Kot a kona kapotdoh chun Minlen ahung pei peiyin, chuphatin kanung langa lim chu kasel tan ahi.

Chuin kakoma ahungin kajaha, “Nao, nanung langa chu ipi nasel ham?” atin ahinlah donbut louvin kasel sel tan ahi. Chuin kakoma ahungin thahat sanin eihung lah peh tan ahi. Chuin lhisoh pumin laina tahin ajaha kaseiyin, “Heu, hiche lim hi ham neilungsetna chu. Ken kitah taha hibanga kahin lungset a, nangin tua kaloi ngaitah toh neita to hi. Naki-oi mong mong hinam?” katin kakinah pi tan ahi. Chuin kachunga alung hangin kajaha, “Thu ima nahet them louleh moh ham ham hih’in. Neikisuh lung hang ding ahi,” atin, chuin kenjong laina tahin kadonbut in, “Henge heu, kahe them poi. Tunvang kahe them tai neilungsetna hi. Neilungsetna hi hiche lim a hi kichaiya ahitan, lungset kiti jong hi nangin neihil doh a, puldou kiti jong hi nanga kon ahi. Apha e, kei sanga hoijo le phajo kaloinu toh nakingai hi. Kei che tange,” katin kap pum pumin in kajon tan ahi. Ahinlah akingai kahi lhon phatin hatahin kangaidoh tan, kakhen thei mong mong tapon ahi. Hitichun ama puldouvin kaumin jan khovah vahin kakap tan ahi. Kana nop khah kakisihin ahi. Chaga ahijeha kakoma alhasetna thu ho ahung sei tengleh kalainaa kangaidoh khah ahiye.

Janin houin kaiyin kachen ahile lampia einangah-in, ahinlah kihetmo sah tahin kache peiyin ahi. Chuin kakoma ahungin kajaha, “Nao, nahet themlou ahi. Lungset tahin neingaidam o,” atin, chuin kadonbutin ajaha, “Heu, lungsetna lama vang neilou kahibouve. Nanao pan jong aseidoh ahitai,” katin, adih jeh chun ima asei tapon, eidalhan achemang tan ahi. Ima seilouva eidalhah jeng chu kalai ana valin kalhisoh kit tan ahi. Ka-genthei chanin kangai cheh cheh jengin, kahinkho agenthei lheh jenge. Houin kikhen in kaloinu Vahshi koma kachen ahileh eimu chun kamai ave ngam pon, chuin akoma kachen ajaha, “Nangnu, Minlen toh nakingai ham?” tin kadongin ahileh aman kajaha, “Henge neo, hoi kasah val jehin kalungset doh e,” atin, chuin kenjong ajaha, “Ken Minlen khu amelhoi jeha kalungset ahipoi. Chaga genthei ahin, alung nop mo tengleh kakoma ahung jin alung a apohgih jouse kakoma ahung sep lha jie. Agentheina leh achagat kamu chen jeha lungset kachan ahi. Hijeh chun tun phaten kilungset pin lang, amavang Minlen in kei eibolna banga nangin ama nabol leh vang nanei lou ding ahi. Ajeh chu amakhu chaga lungset umtah ahiye,” katin, kain uva kache tan ahi.

Amapa la kangai cheh cheh tan, hijeh chun nikhat akoma kachen kakhenin ajaha, “Heu, namel hoi nan kalung lai akipa sahe. Kenvang namelhoi jeha lungset kana chan nahipoi. Kakoma nahung jin nalhasetna le nalung nop mona ho nahung seiyin, a-itiha lungset helou nun nang hinkho lainatna jalin lungset kahin he doh e. Tunvang nalungdei nakimu ahitan lung mong tan nate. Tunia hi khenna thuseiya hung kahi. Hijongleh ka First Love nahin nakhen jou ponge. Kahin lungsetna hi kathi chan a kalung sunga kakipoh jing ding ahitai. Chuleh tua kei neibolna bang hin midang nahin bol tah lou din kahin tem e,” katin khatvei kakoiyin kakile tan ahi. Kathusei ho jalin amajong alhisoh leove. Hiche nia pet chun apul kadouvin dongma kiti mong mong nung nei tah lou din kakitem in kum 1 sungin lhavang tahin hinkho kamang tan ahi. Ahinlah Minlen vang kamil theipon, kageldoh komleh kangaiyin kamitlhin eichup jin ahi. Chuleh amajong company natongin ache tan, akum kitin Vahshi jong achen itobang hinkho aman lhon ahivang kahe tapon ahi.

Kumni jouvin Delhi a Minlen leh Vahshi kicheng lhon tai ti thu kajan ahileh ka-inkote masanga hakan kakap kap tan ahi. Amahon jong ahe them un, eilhamon uvin ahi. Akichen jou inlanga ahung lhon chun achanu toh ahung kilhon khom un, aman vang kamai ave ngam tapoi. Chuleh koima het louva kicheng sa ahilhon tah jehin Vahshi jong alim le amel agop deh tan ahi. Adammo bangin ahung vailhung lhonin, Delhi a Vahshi sottah dammo dan ahin, hijeha chu atahsa gop bet ahi.

Nikhat ka-inkote toh Minlen te in a kacheuvin, maicham kasem un, kenjong lhisoh pumin kahoulimin Minlen jah a, “Heu, thinan akhen ho sangin kei hinkho hi ana joi. Tun nachagat gentheina Pathenin akile sah tan, numei phatah khat napen, chuleh chanu melhoi tah khat jong na pei. Hichan a lolhinna nahin mu tah jehin tunvang kei lung mong tange,” katin kap pum pumin kaseiyin, “HEU, KAMITLHI ALONG JINGE,” katin kakile tan ahi. Hiche kum ma ma chun khosunga konin kakichou doh un Ccpur a kaum tauvin ahi. Tun cha pasal 2 le numei 3 anei lhon tai ti thu kajan ahileh kakipapi lheh jenge. Amavang akisih lheh jenge.


THE END


Kakipahe asim jouse Pathen in phatthei boh tahen.


©️2019, Crosby Haokip, All Rights Reserved.

Thusim hi anom lheh e nati le anoiya “LIKE” button khu meh in writer ho na support nau vin, chule seinom nanei le anoiya comments nahin bolthei u ahi.

Site nalut a notification pop up hung potji ho allowed anabol ji uvo maban a thusim thah ahung ki post teng notice namu ji diu chule Bell button a subscribe kiti chu meh un.

Previous articleKAKINEPNA JOUSE ABEI NUNGIN-I
Next articleLAIYA ANA THANGSA VARCA ZIUS-III

LEAVE A REPLY

Please enter your comment!
Please enter your name here