Home L Seikholen Khongsai HEPI HEPI NATAI CHE PHOU AHCHA’N ATHAIJE LE TULAI KUKITE

HEPI HEPI NATAI CHE PHOU AHCHA’N ATHAIJE LE TULAI KUKITE

62
0
lasim
lasim

Khankhology Online Textbook

By- L. Seikholen Khongsai,
Pantha Chowk, Srinagar,
08/08/2022 (Monday)

Kuki te lasim khat (Folksong) a chu “Hepi Hepi Nataiche phou Ahcha’n athaije” kitk chu ina jahkhah soh kei diu katahsan e. Kei neolai in jong, kapa neolai in jong kapi kapute neolai in jong kapuson kapison te ho neolai in jong hiche “Hepi hepi nataichephou ahchan athaije” kitk lasim hi ana kisei jingsa ahitai. Hiche Lasim (folksong) hi alhingin sei leuhen hiti ahi.

Hepi hepi nataiche phou Ahchan athaije.
Ahcha lah em, Mu’n alhoh tai.
Mu lah em, Thingphung chungah atouve.
Thingphung lah em, Chempongin aphuh lhu tai.
Chempong lah em, Banglaijah akithet e.
Banglai lah em, Meijin akavam tai.
Mei lah em, twijin achummit tai.
Twi lah em, Sel in achip kang tai.
Sel lah em, Humpin alhoh tai.
Humpi lah em, louto langah akikho mangjel tai.

Hiche hi lasim lhanglhong chu ahi. Hiche lasim leh tulai Kuki te thusim hi kitoh lheh jeng ahi. Hepi hepi nataichephou ahchan athaije kiti hi, taiche hi tulai khangthah ahelou tam ding ahijeh in neokhat gah hilchen leng -Taiche kiti hi masanglai pite pute chun Ju anasem jiu ahi. Ju a sem ding chu Ngan kiti Bu hi bel lentah tah a ana hon jiu ahi. Bu ahon min teng uleh Changvai jong asop theng uva, ahon hul kit uva, Bu chuleh changvai chu Lopi lentah khat a ahal tha uva chu jouteng leh Chol asokhum jiu ahi. Chol aso chai theng ule hoitah a ahal toh chet uva chujou teng Jubel a abil jiu ahitai. Ju bel a kibil ngan chu amin deh teng ahon doh uva Ju chu atwi chih lai jouse achep chai uham ahilouleh alhit chai tenguleh atamsa, a-al talou bu le changvai kilhi kangsa chu Taiche kiti ahi. Hichu ipai jongle paithei ahin Vohcha vah hon vohcha an a jong aman kit u ahi. Hiche lasim a hi ivet le tehse pi chun hiche taiche chu ipi ham khat a manchah dinga aphou dan ahi imudoh theijun ahi. Ahilou leh hiche a Taiche aphou kiti hi Ngan ahou hidia jong ginmo ahi.

Hiche a Taiche phou chu Ahcha in athai thanga aneh a athaijah deh ahitai. Atute dol pasal khat pa chun hiche thilsoh chu amu jou kei nunga api nu koma aseipeh le api nun koi pen mitmo ham tichu ahin khol thuh kei ahi. Akhol thuh kei vanga Humpi pa jong loutol langa jam mang a kikho mang del a, holna ding jong umthei lou khop a athu hi seilouva tuni chan a um den ahitai. Hiche hin avetsah chu hiche Taiche kiphou na thua themmo na nei chu koipen ham, asei chen je umthei lou, amimo pen jong koiham kisei thei lou ahitai.

Ipu ipa ten jong Kuki te din 1777, 1825 gal ana douvun, 1891, gal jong adouvin, chu jouvin 1917-1919 First World War ana dou kit uvin chule 1939-1945 (Second World War) or Japan Gal jong anadou kit un, gal tampi adou nau thsuim akimu theijin ahi. Ahilou leh masang lai Kuki te chun khonung atu achate dingin thusim tampi ahilouleh Taiche tampi ana phou uvin ahi. Ahin Kuki te pule pate Taiche phou chu phatseh in Ahcha ten athai thai jengun athai jah deh un ahi. British ten Lopi a kiphou tupchet chu Divide rule policy mangcha in, Ahchan taiche athai jah bangin Kuki te athai jah deh uvin ahi.

Chu in ahcha chu Mu in alhoh mang bangin British Emperor in India pumpi a vai an hom chu ahung kichaijin, agam langu Britain langah akile tol tauve. Akile tol uva agam languva nomtah a ama ho sunga akivai hom uva Thingchunga Mu toubanga atou vangun, chihna thepna (Education) le kivaihomna Politic le administrative system jouse adalha un ahi. Hinlah India in British a kon chamlhat amutoh kilhon in Education policy le Public Administration tuh den jongle British kivaipohna jouse chu Chemponga thingphung kiphuh bangin aphuh lhu ngimsel tan ahi. Ahin hiche thing kiphuhna Chempong (Divide and rule) policy chu guhthim cha le chingthei tah in Banglai ah athet in amangcha jingun ahi. Kuki ten pi le pute taiche phou thangdeh chu lotup ding lunggel neija Thingnoi iphut doh uvin chamlhat del ibol vangun miten Chempong mangcha in eiphuh lhu jinguvin ahile ikithou thei mong mong pouvin ahi. Hiche divide rule policy mangcha chun Indian le Manipur govt.in SoO noija eikoi kit uvin, Chempong kithetna banglai meija kihal vam bangin Kuki te kinep a Kuki State jong ageina kihe louvin eihal vam peh tauve. Thingnoija a jalen galsat a pang ho min list le Hem le thal ineihou jouse list hoitah in akhol chil un chat thei louvin i-um tauve.

Hiche SoO thu a boina sang tah hung lhung ding le gel banga thil Kuki te dia hung soh talou ding chu Territorial Council in eikilhem kit un, Banglai meijin akah a Twidap in achen mit bangin Kuki te chu ilungu amongsel kit tan ahi. Tuhin hiche Banglai meika Twijin achen mit pen twi chu Sel in achip kang kit tai. Manipur BJP Govt. Kivaihomna lah a Kuki MLA minister holeh Kuki Thingnoi lamkai phabep hohii Twi chip kang Sel lah a chu pang kit u ahitai. Mipi le CSO ho kipeng peng hen lang kithi chai kei jongleh Selpi sunga donthei Twi jouse alut phat in mipi hon imacha ingaito vangin apilhing ding leh asoh doh ding um thei lou ding ahi.

Ahin tua hi hiche twi chipkanga pang Selpi chu Humpi in ahin tha a, ahin lhoh mang ding koncha ahitai. Tulai Meilhei holeh Manipur Govt. chaloh dan hi veleu hen Sel twi chip kanga pangho chu isei bangun Kuki lamkai luboh phabep, MLA Minister phabep jong jaokit u ahin ama hochu Humpi in aneh ding kon cha ahitai. Humpi chu koiham seilouva jong ihet soh ekiju ahi. Ipi bol jong leuhen phachom behseh ding um talou ahi. Sel chu Humpi in ahin tha chai tengleh aneh chaija Humpi chu Louto langa kikho mang jelding ahitai. Chuteng leh Humpi hol a che ngam ding Kuki te lah a koima um lou ding ahitai.

Hijeh a chu Hepi Hepi nataiche phou, Ahchan athai jah in aneh tai..kiti lasim hi Kuki te manthah ding leh ahung kichai nading chule asucha vai a pang lah a Kuki te sung mama a kona apedoh a pang um dingu ahi. Chuteng le mite lunghol a panga maipha ve a pang ho jong Humpi in aneh nalah a jaotha thou thou diu ahi. Tun Meilhei ho lung hol jongleu nikhat le akap lah pangthou thou diu ahi. Ijat vei midang kithopi in kipang jongleh nikho khat leh ipanpi pa ahung let doh tengleh eisumanga pang thou thou ding ahi tihi leiset leng kivai poh lai khanga pat a ana umsa ahi. Isopi toh khat vei kikina jongleh nikho khat leh ahilouleh ithi ding nikho tengleh ilong phonga panga chu isopi pa hithou thou ahi.

Pu te Pi te thusim lasim ho hi tulai Kuki te dinga Thulhun tobang leh Themgao ho thilmu tobang jeng ahi. Kuki te tu idin mun u kikhol chen u hitin, khonung itu icha khanga ahinkho mandiu jong sumil pou hite. Kakipah e.

©️ copyright: Hiche articles hi asunpa phalna bei a mundang a publish louding in temna ahung kinei in ahi.

Articles hi anom lheh e nati le anoiya “LIKE” button khu meh in writer ho na support nau vin, chule seinom nanei le anoiya comments nahin bolthei u ahi.

Site nalut a notification pop up hung potji ho allowed anabol ji uvo maban a thusim thah ahung ki post teng notice namu ji diu chule Bell button a subscribe kiti chu meh un.

Thusimbu mobile app ki install nom hon Google playstore a “thusimbu” tia search nabol u le namu lei diu ahi.

Previous articleKUKI TE CHOLDOL A LAM (CULTURAL DANCE) HO
Next articleKEI HOTEL AH KALHUNG NGAI POI

LEAVE A REPLY

Please enter your comment!
Please enter your name here