(Chaten nu le pa angaidan thugil)
By~ L. Seikholen Khongsai, Tuibong, Ccpur.
—————————————-
Nisim 14 July, 2018. (Saturday)
Nikhat Jingkah anneh masang heuvin chapang Lamneo, kum 6 beh leh apa Ngamboi jong Laptop ah akichem chem lhonin ahileh Lamneo injong apa komah, Hepa, nakoma thu khat kadoh nomin kadoh thei ding ham atileh apan jong henge boi ipi ham? Tia aseiphat in chapang Lamneovin jong, hepa, nikhat leh sum ijat jat nalodoh jiham?tin adongtan ahi.
Hichun apa Ngamboi jong alunghangin, lunghan mel pu in, ipidinga hichu neidoh ham, chapang nakin hilou pichu tin aphohsal tan ahi. Hinlah Lamneovin jong, ahipoi hepa nahet nom ahibouve nikhat a sum ijat nalodoh jou em kati ahibouve tin adong kit in ahi.
Hiphat chun apa Ngamboi injong lunghangtah in achanu Lamneo cbu aven, pungkhat sunga Dangka (₹.) 100/- bou kalo hichu nahet ta, jakhat(100/) atin lung hangtah in akiheimang jel tan ahi. Hijongle chapang Lamneo injong apakom anaiphei kit in, ahile hepa sum 5O neipe in tin athum tan ahi.
Hiphat chun apa jong alunghang cheh cheh tan, chapang ipi ding natiham sum, theidang beija sum namu leh, Barbie, Teddy Bear, Play toy ipi pi chohna ding nati ipia pang ding….. chedoh ta nape hih veh tang….tin Lamneo chu asol doh tan ahi.
Lamneo injong apa lunghan nachunga sum apeh louding ahet phat in insung langah alut in lupna chungah thip behchan atouvin banga kikhai achunnu (anu) limchu alalhan akipom in, a angtoh asipbeh in akap tan ahi.
Apajong akigel in achanu lungnommo tah a asensal a asoldoh chu nopmo asah val in, amajong insung langah alut tan ahi. Hichun Lamneo chun anu lim apom’a anaka chu amu phat in alainatpi val in, achanu ahouset a asensal chu akisih lheh in ahi. Boi, ipidinga nanu limchu nakoija naka ji ham,, kei ka umhi namu louham.. tin achanu chu apom in alhembi tan ahi.
Hichun apan, boi, sum 5O nathum chuna…hi hi hin tin asakhaova sum 5O aladoh in apetan ahileh Lamneo in jong kipah tah in akilah tan ahi. Hichun akile heijin Geometry box neocha a sum anakikoisa 5O chu ahin ladoh tan ahileh apa in hichu amun, boi, ipidinga sum neija keikoma nathum be ham ipidinga ahilou lou nabol ham, ipi chohna ding natiham tin aphoh kit tan ahi. Lamneovin, Hepa, amasa a kakoi 5O chu lhinglou ding ahijeh a nakoma kathum be ahin lunghang hih in, hin hiche Dangka (₹) 1OO/-hin naphat pung khat/nidan khat (1 Hrs) neikichoh sah tei teijin,,tin apa chu sum 1OO chu apen, nilhah leh nanatohna a kon pungkhat mahung inlang jan-an beh neineh khom pin tin aseitan ahi. Hichu apa in achanu Lamneo hin phatseh a anu apa ngaija lunghel gunset a hinkho mang ahidan amudoh phat in apona behseh in achanu chu akoijin akap tan ahi. Chaten nu le pa angaidan hi atepi ding umlou ahi. Apa in sumle pai ahol a aphatcha a inlam jonthei louva a umphat a, apa phat mantam tah chu Lamneo chun akichoh tho ahitai. Minu mipan ichate dia phat ipeh doh diu hilouham, chate joh in eiho phat akichoh diu hi minu mipa dia lhahsam naleh lhinglelna lenpen hidin kagel e. Lunggil tah a igel leh chate hinkho setna atamjo hi chate leh nu le pa kikah a onghom lentah (communication gap) umji jeh hidin ginmo a umtai.
Hijeh chun chate dia minu mipa hi ichan geiya poimo a, manlu a, mantam hitam ngaito temin, chapang dammo veisetna atamjo hi anu apa lhavang ngaina akon ahibouve. Chapangin anu le apa tahsa atoh khah seh seh jong hi damdoi phatah khat ahi suhmil louding ahi. Chapang hi achang’a lhathei ahikah sea minu mipan dal bol behseh lou ding ahi. Anu le apa toh phatseh a umkhom jing ding nom chu chapang ahi.
Sum le pai tampi pi nahol a naji nacha tetoh umkhom man lou leuva hinkho naman jong apoimo lheh nai, hijongle leiset a ithinung teng le iji icha toh kilengkhom thei talou ding ahin, idamsung hinkho phat cbomcha sungah insungmi inu ipa iji ichate toh hinkho mankhom thei hi Danhka (₹) 5O/- sanga mantam jo ahi.
Asim jousen aphachompi dia igel uleh hitobang hinkho jong ahithei chan a mangcha jingdin jong kigel taute. Kakipah e.
Note:- Photo is only for representation.
Thusimbu ahoi jing le aum jing thei nading pan analah cheh ute. Patron member hina ding hilai meh in
