Lelen Kipgen.
7629033890
Leiset gentheina thoh ding leh, ahoina, aloupi naho mudingin Mihem in kahung kijil in ahi. Kachunnun kamel amu chun anat thohgim naho sumil in, “O, kachapa hin nikho khat leh tua kagentheina ho hi hin kiledoh sah intin, kipah leh lungmong, lhamong in um ing kate,” ti kinepna lentah aneiyin, kipahtah in eina lemin ahi. Ka Jopan, “O, tunin kakhang-gui kaiso ding leh, kabantha hin khel ding, kadinmun a hung ding thei ding chapa khat kaneitai” ti kinepna lentah nei pumin ajalhaisel jengin ahi.
In-sunga mi upa kahin, kanuiya numei ni leh pasal khat aumin ahi. Nu leh pa, Ule nao kihomtho tah leh kingailu tah in kachengkhom uvin, anom lheh jengin ahi. Sun teng kanaote toh school ka kai jiuvin, nilhah kahung kikhan teng ule ka Chunnun kipah tah in eina lamto jiuvin ahi. Ka Jopa, loukon in ache jin nilhah ahung vailhun teng, “Hepa….hepa,” tin kipah tah in kavailhun jiuvin ahi. Ahinlah leiset hi kikhan namun ahin, kipana jong chomlou kah in nilem kihei bangin akihel mang loi jitai. Nupna achamkim poi, kipana achamkom poi leiset a hin.
Kum get kalhing tan, se le pha hekhen thei chu kahitai. Nikhat hi ka Jopa alou kon na ah ahung dammo tan, hitichun Hospital munna kajen uvin, ahinlah aphachom tapon ahi. Dam ding ngaichat najeh in kanei kagou jouseu kajoh chai taovin ahinlah aphachom tapon, ajo jonan dam doh jou talouvin ahinkho abei tan ahi. Kanei kagou jouseu, ka bong teu, kaloi tehou, kajoh chai soh taovin, kanei kagou hojouseu akichai nungsanga jong ahinkho kahuh doh jou louvu chu kapona lheh jengin ahi. Ahinlah hinkho jouse neipa Pathen ahi. Aman akom a choldo dinga apui ahitai.
Hitichun ka Jopan eidalhah phat uvin, nupna achamkim thei tapon, neo lai khankho kalhangai lheh jin ahi. Nute nikho, Pate nikho, Chate nikho, ahung lhun teng mite insung kikimdel a, kipah tah a alenkhom’u kamu jiteng aguh in lhnlhin eichup ji tan ahi. Kipa golnop ni ahung lhun jong le nupna, kipana tahbeh aumthei ji tapon ahi.
In-sung nei le gou ema aumlou phat chun, ka Chunnu chang seh in ajou tapon, hijeh chun chapang cha hijong leng kei natoh thei leh toh theilou thu umlouvin, niseh in vai kahung kon tan ahi. Kaloi kagol ho umchan ka ot-cha jin, amaho banga um kanom lheh jin ahi. Ahinlah ka dinmun in eijil tapon, kada kacham louvin insung mipa dinmun a chun kahung ding tan ahi.
Christmass nikho jong ahung nai tan, kanaote school fee anah nah in kapedoh jou ham ham lhonin ahi. Kanaote Christmass man nading, phalbi dou nading von lum khat khat beh choh peh angai kit tan, Chule christmass comitte hon in-son in sum ahin dong kit taovin ahi. Hitichun ka Chunnu toh ulsa longin sum kahin hol lhon tan ahi. Ka naoten, “kaloi kagol hon Christmass von kichoh jou taova, ibola keiho nei choh peh nai louvu ham?” tin ka Chunnu kom a akiphin jing taovin ahi. Chuphat in ka Chunnu bazar ache in second hand aga choh peh taovin ahile sum jouse abei tan, Christmass sum toding kanei tapovin ahi.
Christmass nipi ni ahung hitan, kanaote vonthah akivon uvin, milah a thanom tah in aum uvin ahi. Nilhah lang an neh phat ahung lhing tan, bu kipoh dingin ahin sam taovin ahi. Keihon Christmass sum ka tolou jeh uchun, ka Chunnun in-na bu ahonin ahi. Chomkhat jouvin kanaote ahung uvin, “Henu, mihon bu kipoh jou taova ibola eihon ibola i-kipoh louvu ham?” tin ka Chunnu kom a akiphin taovin ahi. Kachun nun, “Boi, eihon sum itojou lou jeh uva bu ne’a i-che thei lou diu ahitai.” tin akap tan ahile kanaote jong akiphin uvin akap taovin ahi. Houbung lamkai hon eikou louvu jong ahipon, jachat le lhaset jeh a chelou kahiuvin ahi. Chomkhat jouvin, mipi hon jong bu ane jou taovin, Houbung lamkai hon me belkhat eihin dom peh uvin, in ahung lut taovin ahi. Hiche pet a chu keihon bu kana neh pat’u ahi. mebel ahindop’u chu ka Chunnu ape taovin ahile ala ngam tapon, apeh tei tei phat uchun kap pumin ala tan ahi. Chuin kei jong room lang kajon in aguh in kaga kap tan ahi, “Hepa, nang um le chun naji nacha hibang lomin genthei povinge. Hepa, kahin lhangai ji val e, ka Chunnu lonlhi khu navet jou mong hinam? kanaote mi umchan ot-cha puma aka gin’u nangai ngam hinam?” tin lhase tah in ka kap kap tan ahi.
Hitichun genthei tah in hinkho kahin mang taovin ahi. Kum le lha jong akiheiyin, kei jong kum som le kum thum, kum som le kum li ho kahung lhing tan ahi. In-chen akigenthei val beh jeh chun abang kom leh kalungthim a hin thilse ahung kon ji tan ahi. abang kom leh kalungel agenthei val teng leh Ju kahin don ji tan, Ju kakham teng le chun kalungel genthei na ho jouse abei ji tan ahi. Chuti a khamna thei lama kahung kipeh phat chun kahin bol jing tan, nilhah seh le Ju kahung kham jing tan ahile ka Chunnun eika pi pi jin ahinlah a-nisa kahet doh phat chun kamoh ngah thei tapon ahi. Abang le kakham val teng lampam lah dunga ka kijam den jitan, ka Chunnun eihung holdoh jin mitlhi pumin inlam a eipui jin ahi.
Hitichun Ju kamu leh kadonin, ganja kamu leh kachep in, nisa lam a kahung kipeh phat chun kaloi kagol jong ahung tam tan ahi. Ka Chunnun maicham eisempeh jin, mitlhi longin eitao peh jin ahinlah ken vang ka-nga thei chom tapon ahi. Kum le lha ahung sot phat chun kahung addict tan, Ju kadon lou leh ka kithing tan ahi.
Ka Chunnu genthei tah le lung lengvai tah a, lungthim kicholdo man louva kalha jing phat chun ama jong ahung dammo kit tan ahi. Hitichun sumthoi hol nathei chan a kaholin, dam ding ngaichat najal in kahin jen tan ahi. Ahinlah damdoh jou talouvin ka Chunnun eidalha kit taovin ahi. Kagenthei na akibe cheh, akibe cheh jeng tan, chuphat in kei jong kahung kigelse tan, ka Judon nga louvin kahin hadon cheh kit tan ahi. Hitia Ju kahin donjing phat chun kanaote jong ka Palen te hon ahung kipuidoh jou taovin, kachangin kaum tan ahi.
Sun leh na katong jin, kasum lodoh sun chu Judon nan kahin mang jing tan ahi. Ka judon na phat asot lheh tan, katahsa jong vet thei ahitapon ahi. Chomkhat Ju kadon lou jong leh ka kithing jin, kadammo ji tan ahi.
Nikhat hi Houbung lamkai ho khat hin, (Jacob Prayer Mount) mun a Camp aum ding ahidan eiseipeh tan ahi. Chuin kei jong Camp a jao dingin ka kigong tan, kavon ho ka kisop thengin, ajingin Jacob Taona mol, kajon tan ahi. Amun kalhung tan ahile kalung aleng lheh jengin ahi. Ajeh chu chom khat jong Judon louva umthei lou pa hapta lhunga Ju kahin ngol ding chu kagelmo lheh jengin ahi. Nilhah an neh jou hin kai khom na kahin nei taovin ahile ipi thu asei vang uvin kalunga alut thei mong mong pon, kalungthim a chun Ju bou alang jigin ahi. Ju kangaichat val jeh chun kati akithingin ka dammo lo kit tan ahi.
Hitichun kithing pum pumin Pathen thu a kahung kimangcha taovin, Ju kaduchat a kadammo kom le, Camp comitte hon damdoi einehsah jiuvin, hitichun hahsatah in Pathenthu a kahung kimangcha taovin ahi.
Speaker pan, “kahenga hungki hei un lang huhhing in um uvin.” Isaiah 45:22 hiche thupi mang chan Pathenthu ngainom umtah eiseipeh uvin ahi. Ni ni, nithum lang kahung kimangcha taovin, kei jong kahinkho kisem phat ding chu kadei lheh tan ahi. Ka Chunnun maicham eisempeh a mitlhi pum’a eitao peh naho kahin geldoh in, ka chunnu genthei naho thoh hu louva agenthei na chung chon a ka kasah sah, kei ding leh kanaote ding gelna’a ulsa longa na atoh a, ulsa longa kaneh kachah diu angaito, keiho ding von hoitah tah eichoh peh uva aman von taldeh duh ho pou akivon ji ho kalungmit in ahung kilangin, ka kap lha jeng tan ahi. ka Jopan, “O, kachapa hin khonung le kadinmun hin khel intin, ama jalin insung hung khangtou intin, a-u anao te vet jui theiyin hinkho hinmang intin, anu apa kipana, lunglhaina hung hinte,” tia akinep na hepha louva Ju neh, sa neh nop na a kahinkho akichai jeng ding chu ka Jopa alunglhai ding katahsan tapon ahi. Ka Chunu koma ngaidam kathum nome, ka Jopa koma ngaidam kathum nome, ahinlah ka vaigei tai.
Hitichun hahsa lheh jong leh hinkho thah mang dingin kahung kigellha tan ahi. Kei kingolsah jeh in kanaote jong muntinna akithe thang jou taovin ahi. In-lhun na kanaote ho puikhom a maicham sem ding kanom lheh tan ahi. Hitichun Camp jong akichai tan in-lam kahin jon tan ahi. In kalhun in ka Chun le Jo lhan a kachen, alhansong lhon kakoiyin ka kap tan ahi. “Henu, nei ngaidamin, ka vaigei tai. Nacha ti dinga jong kilom lou hita jong leng, lungset in nei ngaidamin, na genthei na hepha louva ka kasah sah nei ngaidam jou ding hinam, henu.” tin kakap tan ahi. Chuin ka Jopa jah ah, “Hepa, nei ngaidamin. kachunga na kinepna hepha louva Ju neh, Sa neh nop na a hinkho kaman, hepa, nei ngaidamin.” tin ka kap kap tan ahi.
Hitichun kei jong hinkho thah kahin mang tan, kanaote kapui khomin, mitlhi long pumin maicham kasem taovin ahi.
BEITA.
©2020, Lelen Kipgen, All rights reserved.
