Home Chaga Thusim HENU, NA ANGLUM KAKOI NOMME PART I(ONE)

HENU, NA ANGLUM KAKOI NOMME PART I(ONE)

279
0

Sasat Baite


Kipah tah in final exam chai chai in kanao toh kaum ji nalhon, kapite kholang chu kahin jon lhonin ahi. Khosung kalhun lhun lhon chun kanaovin he u tuchung vang eiho kho a kumhei gamang tate na… he nu ho jong kamu nome ati. Hibang tah a kipah tah a kihung chu kamaiso akikhel pai in hepin eisol lhon le iche di chula.. kati le kanao vin he u vete min exam achai teng anuten car, ven ho a ahung pui ji uva eini hibang gamla a keng a iche ji lhon ati. He u henun jong eingai hin veta na? tia eihin doh kitphat chun adonbut ji vang chu hah kasa lheh jeng e. In kalhun chun kanao jong chapang cha gamla tah lam ahin jot jeh chun alel vallin ka i mutsah tan ahi. Keijong kaki silin kapi anhon kaki thopi in ahi. Anneh phat in kanao jong ahung khangin akap tan ahi. Kanao koma chun ipi dinga naka ham? Kim katile aman hitin eihin donbutne…

Kimneo: He u kamang a kaloiho toh kaki chep ule kalel val uva, kaloiho chu anuten ahungpui uva an aneh sah uva nom sella lum uva… keichu koiman eihung pui talou insung khat a kachanga ka imutle kadap sah dan.

Keima: Ipi dinga namang pou pouva naka ong? hungo an kineh doh ute kati.

Kapi: Kimneo boi hiti hochu gel ji hihta nom sellin umji ta…

Kimneo: Hepi kagel jiloupi kamang le kanu kamu ji a aman eisol doh ji chu atin ahungkap tai

Ipi dia naka kitta tin polanga kaga chedoh in nuhgui bingleu vin kag kapin ahi. Ama alungnop mo jeh chun kino chellin in kalut in kanao chu kalhem bi tan ahi. Kapu chu jukham pumin inn ahunglut kittan ahile thule la jong aum kitta pon ahi. Kapu chun ju akhamlou teng hibang eilungse ji lhon chu ju akham teng le vang ima in eigel ji lhon pon ahi. Kapu chu jungol vei ahijeh chun ipi asi jongle kathoh ham ham jin ahi. An kaneh chai chai u chun ka i mu pai pai lhon tan ahi.

Kanao nu chu janle aking king jin ipi ti a ham doh ding la adonbut na ding ahah ji jeh chun kadong ngam ji pon ahi. Jingkah matah in athouvin boarding a exercise abol ji ho chu aboljin ahi. Christmas lhing ding ahitan, kanaovin aloiho von kichoh chu athangset pi jin nikhat lunglut tahin kanaonu chu kadong in ahi.

Keima: Kim tukum ipi naki choh diham? Christmas a dinga.
Kimneo: He u ima kaki choh loudi he tukum ati..
Keima: Hey ipi dinga ong…? khat khat beh kichoh hite na…. jing bazaar hija iche ding ahi..
Kimneo: H e u kei tukum muja bou kaki choh ditai..
KIMNEO koma chun ipi dinga von aki choh nom lou ham tia kadohle ima asei nompon keima jong lungnom motah in kaum tai.. Achai nadin khatvei kadong pha kittan ahi, Kim na u nu ipi dinga thutah naseipeh nom ji lou ong? nalung ngap nakham kahi lou ham? tin kakap tan ahile ama jong akap in he u sum inei lhon loupi chula sum chu school kai na a iman di hi chu ahin titai. Kenjong kidang kasa val jengin ahi, ajeh chu keigol ho jong nule pa gentheina hepha louva ngol thet thut a kanao chu hibang neova a khonung ding agel chu.

Alang khat a kaki pa vang chun aphat lhing lou lai a hito bang agel chu kadei kitpon kanao koma Kim hiti ho chu nangin gel ji hih ta ong.. kei le hepi le hepun ima jouse kabol dingu ahi kati. Nomtahin Christmas kaman chai tavin school kai phat masang in kenjong sum kakilo jin ahi. Kanao chula natong thei ahihih laiyin na tohsah dingla achol ditoh ama a neo nalai toh ahi jehin huima chan kapui doh jipon ahi. Nikhat kana tohna in eihin juiyin keitoh toh chu atong jin bolhih in kati lela abol jijin… ipi dinga nabol ham tia phatah a kadoh le khonungle kaman chah thei a hungpang ding ahijeh a kakithep chuh ahi atibep in ahi. Aphat lo achang louva lungpi aken hi kagel jin ahile kanu kapa koma ana um lhon leng hiti hi agel ji dem tin kalung theh jin ahi. Khatvel le kanu kapan ei dalhah lhon hi kalpohnat ji vangin alang khat a kaki pah kit jin ahi.

School kai phat ahung nai tul tultan….. nikhat admission bol din kache tan ahi. Kanaonu chun class atop jeh chun admission tailou adang se se chu free hiding ahi tai eiti pehun ahi.Jilkung ho chun kanaonu chu Class III simsah louva class IV simsah ding joh in aki hou tau vin ahi. Ahivangin Sir Papao ahung in nanao khu phaten lekha simsah in chule bannei chan simsah in ajeh chu kalbi khat kichom a ikal se kisim chu kalbi ijat um ham aki hepoi atin ahi. Jilkung dang hon eigel khoh vang un sir Papao sei chu ka gaiyin class III a chun admission kabol peh tan ahi. Kei dingin jong class IX a kahin kibollin lekhaho vang khatcha kalapon ahi. Boarding kalut lhontan lhani lang kaum lhontan nilhah seh le kanaotoh lunglut tahin taona kamang ji lhonin kanu kapa, kapi kapute dingin jong katao ji lhonin ahi. Lhathum channa in boarding fee le school fee ho akipe tapoi ti warden pan eiseipeh tan, ahile lungnom loutahin school kakai ji tan ahi. Lhali alhin phat chun Principal pan eikouvin nain kote toh nahung uva bat ho nahung kisuh navah louleu kinodoh ding nahi tai ati. Che nilhah chun wardenpan eikouvin kapi toh ei kihou sah in ahi. Kapin aboina ho asei in kapu jong hospital a um ahijeh chun ima cha abol thei ji pon nopmo kasa lheh jeng in ahi.

Keijong school kakai nom lheh vang chun kapi kithopi ding in kaki gel lhatan ahi. Kanao koma chun Kim hepu adampoi ken hepi gaki thopi ingting nangin lekha phatechan ana simta ong? kati le kanao vin heu nang naumle hibang kilungmonga neida lhahle min einoise ding ahi ati. Kenjong kanao koma lung kham hih in phate chan na DREAM kisem in lang niseh le vejin lang nasuh bulhit tei nadin phate chan lekha sim ta ong? kati le aman jong eihe them in henge ati. Phaten ana um jinglang taona jong phaten ana mang ji ta ong, katin kaki gotai. Kanao kangai vang chun kaki timin ama aka vang chun kei kakap pon kalungsung vang chu ana lheh jenge ngai lheh jongleng alou theilou ahi jeh in kaki khen lhon tan ahi. Kache na lamkah a chun orphanage home a umho evening walk ahung uvin chapang chacha ahiuvin ahi. Keijong kaki gellin hibang genthei kiki sah a chiho pi khun anu apa iti ngaiya angai dingu hitam tin kangai ton ahile keigenthei thoh chu ima cha louvin kaki gellin ahi.
In kalhun chun kapi jong hospital a kapu ve a achen ahung kile loulai jeh chun chomkhat kaki chollin ahi. Kaki chol vang chun kalungsung chu iti sei ding ham aki chol thei pon nuneilou paneilou ho chu kalungmit in aki lang lang jengin ahi. Chuphat chun keiman jong kalung sunga umho chu kagellin la khat kasem tan ahi.

“Aw chung Pathenin hinve temin
Chunnu a dalhah chapangte hohi
Alungkim nadiuvem chunnu beiyin
Chunnu toh lenkhom ding ngai ngei u te

Mong joulou chunnu beiyin
Kadiuvin chunnu in hungpang jengin
Lhasamte kai thouvin aw Pakai
Nangma bou nahi e kaki nepnao

Achunu hinlaiya ahinkhou
Koukit ding nommun te phat chesa ho
Kou kitthei ding hile koukit unte
Ahinla nungkou kit thei hi talou

Kipani nopni hunglhung jongle
Koiyin a lamto ding aki panao
Chamkim ponte aki panao jouse
Lonlhi in lamtonte akipanao.

Mitlhi long pumpumin kasa jin taona in kagel doh jingin ahi. Kapi jong inn ahunglhungtan…. aman jong inn a kaum chu adatmo lheh in, datmo tahin Tingcha ipi dinga chelai naum ta tin ading dentan ahi. Kenjong hepi eini kitho hitin kapu ahin kanao ahin phate chan vetup hite ahiloule jouteng kanao jong ima hungsoh lou ding ahi katin ahile aman jong alu asu dot dotin ahi. Kapi chu ateh thimtan ahivangin adam theijin natoh jong ahat nalaiyin ahi. Kenjong hah jongle phun louvin kapi nung chu kajui jin na katong ji lhonin ahi. Kapu jong ahung dam hiu heutan ahile hosoital a kona kaga puidoh lhonin in a kaum sah lhonin hinla louho vang chu aphat toh kitoh in ane jingin ahi. Nikhat kanaonu ve dingin second saturday a visiting a kache tan ahi. Aroom kaga lutle ama ana umpon abang a chun chat paper a My Dream atin anoi a chun point 4(li) ana jih in ahi. Kasim suh suhin ahi. Thil kijih chu ahile
i) Henu na anglum kakoi nom e, hepa namel khatvei eimu sah o.
i) IAS kahi thou thou ding ahi
iii) Kagenthei nahi kaki ledoh sah kit ding ahi
iv) Pakai nei kithopi jing in tin akijih in ahi.

Kahinkho vang chu nopna aumpon khatvei iki pa gotjongle lonlhin eina lamto jitan lonlhi hi kagolnu danin kagel jitan ahi. Kakipa jongle lonlhin hilai a kaumme atijin, kahahsat kagenthei jongle mitlhi chun eina lamto jin ahi. Chomkhat katouvin ahile kanaovin kipah tahin eina houvin heu class iv a kakaite jilkunghon eichon uta atin ahung nui in ahi. Kenjong aki papa nadin apha e Kim phate chan lekha simji ta ong katile Kimneo chun heu nang itihle nahung kai kit ding hitam atin ken jong kei kakai nom ta hih e hepi kaki thopi intin nangin phate a nasim ding joh kadeiye katie. Heu naloi hon nangchu itihle hung ding ham ati ti jeng u chula ati chuphat chun kenjong ima cha kasei tapon ahi. Kanao koma chun phaten lekha simin lang chat paper a najih khu namu got ding ahi tin chat paper a ajih adream chu kakoh in ahile aman jong akha asu dot dot in, he u kalung tup kamol so tei teiding ahi ati.

Keijong kaki letan, lampanga katoule kanu kamu pel japin kenjong kapot kada lhan kadel paijeng in ahile car khat a atoulut pet kamu in kadel in ahile kapha jou tapon ha sap a kasamin ahile atouna car chu khatvei aki ngajap in kadel pha kitin ahile gang chelin alhai pai paitan ahi. Keijong kahung kile in gari chunga katou doh gotle ka sakhao neo kamu tapon gari la che ding ahitan kaki pei lelen ahile,kidang tahin kanung lang a pusal khatin hey! tia eihin sap kajan keijong kaki heiyin kaven ahile kahe pon ipi ham? heu katile ka sakhao chu eihin pen kadatmo lheh in kave changmel in ahile ama jong ahung han seuvin hinla amai chu adup lai asanlai aumin kenjong heu ipi ti ham? namai chu tia kadoh le ima aseipon, kenjong kakipah e heu katile gari horon agin gin phat chun gang chellin kakal doh tan, koi huilang mi, ipi mi, ham jong kahe pon kaki moh khen lhontan ahi. Chomkhat kacheuvin kalep got phat uvin nuiheu chan akhut ahin jap in kenjong kipah tahin bye bye… kabollin ahi. Hitia kalung gim le ka lhaset laiya mikhat behin eiki thopi chu kaki pah lheh jengin, hinla koi ham iki hetlou jeh chun kalung atheh lheh jeng in ahi. Inn kalhun in kapi koma chun kaseiyin ahile aman jong kidang asain amin nahet louham? atin kahe poi, koi ahijong kahe hih e alim seh sehbou kalungmit in kamu ji e katin ahile kapin iti danna min chuti tah a kithopi a amin jong dongman lou nahim atin kenjong kaki nodan ho jeh ahi chu kaseipeh in ahi.

Hahsa tahle genthei tahin nah nahin kakum lhung uvin ahi. Nikhat kumhei masang jep chun kanao to kasum nei sun sunin kailhang(bazaar) a von chodin kache lhontan ahi. Thil kachoh choh lai tahin aning lang khat a chun kanu kamu kittan, kanao aumjeh chun ima cha kasei nompon hijeh chun kanao koma Kim chi langa thil chonu khu gah ve o tin kako pehin ahile kanaovin ipi ti a ham atin ahi. Kenjong kanao koma chun ima atideh poi phaten mitlha louvin vechim deh o, joule thil khat kaseipeh ding ahi kati. Von kachoh chai lhon phat chun hotel khat a cha dondin katou lhonin ahile amasa a pusal eiki thopi pa chu kamu kitin houding le houlou ding kasai kah lai tahin aman eihin hou masa joh tan ahi.

Gollhangpa: Neo, ipi nahung kichoh lhon ham?
Kei: Kanao toh, von kahung kichoh lhon ahe.
Gollhangpa: Aw.. nanao min ipi ham?
Kei: Kikim ahe, nangla ipi nahung kichoh dan ham heu?
Gollhangpa: Christmas le New year kikah a exam kanei jeh a lekha kahung kichoh lhin ahe.
Kei: Aw…..
Gollhangpa: Neo phone nachoi lou ham?
Kei: He u tupet hin fon kachoi hih laiye
Kei: He u namin ipi ham?
Gollhangpa: Haoboi ahe
Kei: Aw.. heu huilang ham nangho kho katin ahile aloihon ahin koudoh phat chun ima cha asei man tapon ahi. Kanaovin heu ama chu na dongmapa ham? tin ahin dongin ahi. Kenjong ahipoi amasa a eina kithopi jeh a kaki het lhon ahi bouve tin athusim che danho kasei peh in ahi. Nilhah lang geithimin in lang kaki le lhonin, nomtah in kumhei kamang taovin ahi.

banjom kit ding………………

Previous articleKHANG KIKHEL-NI KIKHEL IV
Next articleNGOLNA THEIKHOP LUNGSET PART II(two)