HENU, MEITHAI CHAGA IHI LHONPOI(2)

Crosby Haokip

PART 2

Chutia kanutoh lhasetaha kana ka lhon petin Hoinu ahungin keini umchan amuphat in kitim joulouvin akaptan ahi. Hoinu kamu phatin kanu koma,
KEIMA: “Henu, ven, ihahsat pet lhonin Hoinun eikithopi lhonin ajouva chu Christmas sumto jong eitopeh lhon ahi. Lungneo hihin nagenthei, nahahsat nitengle napanpi le na kithopi ding nachate tampi kaum uve. Tukal lhase tahin hinkho mangta hihin, nangin hitia hinkho naman leh nachate keihon iti kipana hinkho kaman diu ham ong henu? Nang johin nachate keiho joh hi neilhamon joh diu ahibouve.”
HOINU: “Henu, nahahsat nagentheina ibola na im a lung genthei taha hinkho naman ham? Janhia Lamka langa pat kahung ahinalaiyin nahahsatna lhon kahin dong manpoi, neingaidam lhonin. Kanu le kapa umta hih jongleh nang kanu banga kagela kadani kakipani jongleh kahetsah ji nahilou ham? Kachunnu banga kagel nahin nangin tua hitia hinkho naman hi kei le ka u dingin lung gel anomtheipoi. Henu, lungmong tahin umin, kei le ka u in phaten najen lhon nange,” atin Hoinu toh kanu kalhem lungmong lhonin chujouvin Hoinun tuisa aom in kanu asiltheng in, vonhoi hoiyin avonin kanu jong Hoinu chunga akipah behseh in ahi.

Hoinun eilungset lhon jehin kaboi na chan a eikithopi jingin, ken jong kangam sungin kavonnen ho kiphalam louhelin sop dingin kaga pe jingin ahi. Chule Hoinun jong ijakai ahethem sohkeiye. Hoinu vang mipha, migunchu le mikhoto them nungah phatah ahin, khanglai sunga dinga jong kineppi umtah ahin ahi. Nisehin jingkah nilhah in Bible asimjingin, lhagao lama jong hattah nungah son umtah ahi. Kaneo lhona pat a golcha kingaitah in kahung kivop jing lhone. Kaneo lai lhona kana kingaival lhon jehin ainkoten keiho koma aumsahin keini jong apengkop bangin kanu anglang a lum ding kana kichu jilhonin ahi. Amabou ahung khanlet a munchoma lekhasima ache phat a kahung kikhen khah u ahi. Chuleh chaga, nu le pa neilou apaneo koma um ahijehin ahinkho mandan kalungset lhehin, neova pat a hung kikivop jing kahilhon jehin aupa bangin eigelin, kanu jong achunnu bangin amonpin ahi. Tun munchom chomin kiumta jongle a in bangin agelin, kaboi phat le anhon, vonsop chuleh adang dang tohle thamin eihung kithopi jingin ahi.

Nikhat jingkah matahin Hoinun eihung thouvin kajah a,
HOINU: “Heu, tunile Sugnu langa thilchon che hite. Ken jong nang thil kachoh peh nome. Jing nikho le Christmas lemna kipan ding ahitan.”
KEIMA: “Nao, che ding chu kanom na-e, hijongle keidingin thil ima cho hihin, von tampi kanei nai.”
HOINU: “Heu, lampi chomin gelhih tango, eini ucha kikaha, nangin nanei nileh kei neichoh peh ding, Ken kanei nileh nang kachoh peh ding hichu,” atin keijong kanomin kanu koma kasei lhonin Sugnu langjon dingin kakipatdoh lhontan ahi.

Kajotna lampi lhon lamsao ahijehin Hoinu alel lheh jengin kakichol ngah jilhonin, Hoinun, “Heu, neikaiyo kalel vale,” atin kenjong kakhut jetlamin kakaiyin kihoulim pumin kaneo lailhon thu kasei lhonin lamlhungin kanui lhungkei lhonin ahi. Jingkah nidan7 in Sachih kalhung lhonin keini jong Bus chunga kakal doh lhonin seat nompen kakilhen lhonin katou lhontai. Bus jong che dingin akipatdohin kache tauve.

Chutia Bus a katou jinglai lhonin, masanga kapa toh kanu damlou vetsah dinga Lamka lang kajot u kageldohin, chule Bus jong kanatounau Bus ahikit in kagelleh kalunghel in milungneo chu kalhi anapot mantan ahi. Ka mitlhi valha chu kachunga kingai Hoinu maiyah achukhan, eihet phatin eihin touvet in kakihetmo sah vangin kakisel joutapon ahi. Chuin Hoinun maingui tahin eiven,
HOINU: “Heu, ipitinahim? Ibola nalhiso ham?”
KEIMA: “Nao, vutvai khuvala le kamit’a boh lut’a kalhipot ahibouve,” katin kalep in, chuin atoudohin,
HOINU: “Heu, lhisoh hiho, nang nalhiso leh kapo joupoi, nang nalhiso chana lhisoh kahin, nakipa chana kipah kahiye.”
KEIMA: “Nao, kalhisoh poi kiti, lung gim hihin imakatipoi.”
HOINU: “Kilep hiho heu,” atin chujouvin kachunga akingaiyin aihmu kittan ahi. Damselin Sugnu kalhung lhonin Khulmi Bazaar hotel a an kane lhon in ahi.

Kaneh chai lhonin Sugnu Bazaar kajon lhonin, nehthei tampi kacho lhonin, Hoinun kajah a, “Heu, tunia hi nang le henu vonchoa iche lhon ahiye, hijeh chun nadei dei kilhenin kahin lungset vale. Kiphat lam hihin, tuchung ka-scholarship ahung lutin nang le henu von chohna ding mong mong a kakoi ahiye,” atin iti kada vangin anompon, von eilhenpeh tan ahi. Kanu dingin jong von tampi alhen pehin hitichun phat chelam hilou leovin Bazaar a kakimei lhontan ahi.

Nilhah langin Bazaar kakai jou lhon phatin Khulmi Bazaar Bus parking lang kahin jon lhonin chule inlam kahin jonlhon tan ahi. Nilhah nilhum konin in kalhung lhonin Hoinun amakhut tahin kanu von achohpeh ho apen kanun jong Hoinu chunga kipathu aseiyin ahi. Chuin Houbung mijousen jing nikho ngahlelin kaum uvin, kho avahtan, youth ten khosung a social work kabol uvin anomlheh jenge.

Nilhahin Christmas akipantan mijouse kaikhom a dingin a kigong uvin, keijong kakigongtan ahi. Ahinlah kanu vang kaikhoma jao dingin anomtapon, “Boi, nang gache o, kei kadam thimhih in hungda tange,” atin ken jong, “Henu, na damlou leh keijong cheda tange,” katin kanu toh lungnommo tahin bench chunga kalum lhonin ahi. Mipi kaikhom ho lasah gin kajahleh kathanomin, ahinlah kanu achanga kadalhah nomlou jehin kaumpi tan ahi. Chutia kingaito puma kana lup lhonleh polanga patin Hoinun eihin kouvin
HOINU: “Heu, ibola nahung nailou ong? Hall pama nakingah ngah jenga, nahung mong monh lou phat’a in a kahung vet nahiye,” atin keijong kathoudohin pamlanga kagapot leh Hoinu anadingin, smart tahin akivonin amel ahoiyin vet nom nom aumlheh jenge. Chomkhat pi kakimohvet to lhonin chuin Hoinun, “Heu, nakigot chainai louham? Chetaute.”
KEIMA: “Hoi, henu damlou intin kei hungda tange. Kahungle henu umpi ding koima umlou ding ahiye,” katile kanun,
KANU: “Boi, nangni gache lhonin kei anaum tange,” atin katha lhon anop jehin keini jong lenkhoma dingin kache lhonin nomtahin kagajao lhontan ahi.

Lenkhom anop lheh jengin, totna jat chom chom le kitetna chom chom kabolun phat chelam jong kahepon ahi. Chuin kenjong Hoinu kathimvet le le vangin kamutapon, kalungdong lhehin, hoilai pena che ahideh o, ahiloule ngaichat khattou aneijeha pot ham, tin kagellin iman jong kagel kit tapon ahi. Ahinlah ahung kile mong mong louphatin aloiho kadongin ahile kanun ahinkou dan ho eiseipeh phat u chun keijong inlanga kachen kelkot kaphah le kanu mitlhi longa Hoinu koma thu asei ho kajan ken jong polanga kangaitan ahi.
KANU: “Boi, naneova patin kacha bangin kahin sin in tuchan hin kahin ngailutna jong akemdeh poi. Hichan a keini chunga thilpha nabol hohi akhela ipi kapeh jou ding ham? Ven, kalung gentheina ho jehin katahsa alhasuh suhtan ichan hinkho kaman nahlai ding ham jong kasei theipoi, nanun adamlaiyin eina thumopin, `Neng, kache nungle Hoinu hi nangin phaten anakhoukhah jingo. Nacha bangin gelin lang alunghel gentheina lou dingin nangman hin lhamon jin, aman jong kei sangin nang nangaijon tun kaleiset hinkho beiding hita jongle nang jalin lungmonna kaneiye. Ichate ni lhon ahung kikhanlet tengleh anakichen sah tei tei lhon o. Amani kin thupi ken kamitin mujou tahih jong leng tunichan in amani dingin taona kamang jinge,ʼ anatin tuchan hin kalungsunga nanu thusei aging jing nalaiye. Minlal hinkho ding kagelleh kalung gimin niseh in kaka pi jinge. Hijeh chun nangni jong nanu lungtup namolso tei lhonna dingin pan hinla lhonin, itihama lampi choma nache lhon leh nangni chunga kei le nanu lha damlou ding ahi, ti sumil lhon hih ta o.”
HOINU: “Henu, tuchana nacha banga neigela neihin khoukhah jing hi keidin amantamin a loupi-e. Keijong nang jala kanu umta hih jongle lungmonga um kahin, itih hijongle na lungdei lou lamin chon ponge. Nang le kanun neithumop banga ken jong hinkho kahin man jing ding ahi. Henge, henu kanu lung gel kasuhbulhit tei ding ahi.”
KANU: “Nao, thukhat nasei peh inge, tuchan a hi kenjong na u Minlal koma kaim jing nalai ahiye. Ven, na u Minlal khu kei le napa thisan a peng ahipoi. Kaloinu ngaitah chapa ahiye. Amapen ding konin anu Hospital a nao nei dingin aumin chule ajipa nao neina ding sumhola ache na a garin atahkhah a anathi ahi. Ajipa thi kaloinun ahet phat a heart attack jeh leh athisan ahalon valjeha aleiset hinkho anabei kha ahi. Chuphat a kenjong keima cha banga kahin kivah ahi. Keima thisana peng ahilou vangin kachapa bangin kahin kivah e.”
HOINU: “Henu, thiljouse hi Pathen thilgon ahibouve. Nangin ka u Minlal anakipui hihle chun asen a pat a Chaga hinkho ahinman ding ahin, tunvang amajong nangin pasal phatahin nasemdoh tai. Keiya dia nahinsem ahiye,” tin atot in,
KANU: “Ahinai boi, nanu keiman na u Minlal kipana boldoh peh jing ding hi katup thupipen ahin, ahinlah inchen vaichat jehin ima kabol doh peh joupon kagelleh kapona lheh jenge. Na u Minlal toh nadamsung lhona nakikhen thei lou ding chu o.”
HOINU: (Akipahvalin) “Kakipah vale henu, kenjong ka u Minlal guhthima kalungset jing ahi. Ka u kagakou ding chu o,” atin kipahtahin kot ahongin polanga ahunglhai doh leh mitlhi long puma kana din chu amutan ahi. Amajong atijavalin, “Heu, nahung hitam?” atin kanu thusei hochu kalainat behseh jehin insunga kalutin kanu koma,
KEIMA: “Henu, nathusei hochu dih mong mong hinam? Adihe, tia nasei ngam ding ham? Nacha kahilou mong ham ong henu?” tin kanu lengkou teni katuhin kakaptan ahi. Kanun jong eidonbut ding dan ahe tapon,
KANU: “Henge boi,” atin akap tan ahi.
KEIMA: “Henu, ibola neima seipeh lou ham ong?” katin kalhase valin polanga kapotdoh tan ahi. Hoinun kanu alhemin mitin dia kipana janchu keiho thuma din ka na asoh tan ahi. Chuin kanu koma kachen,
KEIMA: “Henu, neilungset na hi asange. Keidia lhihul manlouva naum hi, nang sanga eingailu ding umta ponte. Tun genthei jongle chun nikho khat leh nalonlhi cheng kipanan hinle tante. Lung gim hihin nahinkhon na lhaset sah ponge. Nacha kei kaume ti hen lang lung gim jita hihin,” katin kanu lupna kasem peh lhonin nomtah in kakichol sah lhonin kei le Hoinu jong mei kakioi lhonin kakihoulim
lhonin nom kasan, ahinlah lungsetna thupan ding koima kaum lhonpon ahi.

Jingkah khovah in kanu toh taona kamang lhonin chujouvin houin kai dingin kaki gong lhontan ahi.
Houin dah ahung gingtan, kei le kanu jong hall mun lam kajon lhonin masanga kapan, “Ahunglhung ding Christmas hi nomtah a imandiu ahi,” tia anasei chu kagel dohin, hijongle kapa hi vangama mithengte toh nomtahin Christmas mangkhom uvinte, tin kagelin kalung mong jon ahi. Special no. kachan jehin in kaphat ahunglhin in kanu lhamonna dingin Ng Hoineilam in asah “Aw kachunnu” tila kasan ahile kanu lhiso kamun ahile kanu kalungset na asang lheh jengin ahi. Kanu katilkhouvin, CHAGA – MEITHAI IHILHONPOI, tin kanu kakipa sahtan ahi. Kapan eidalha lhonta jongle kanu le Hoinu jalin nikho chelam jong kahepon hitichun chomlou kahin Chrismas le New year akichaitan ahi.

Christmas le New year akichai phatin mijouse natoh le thamin aboikit tauvin, simlai ho jong athemjilna diu mun cheh u ajon kitauvin ahile phat dang bangin khongahin kapang kittan ahi. Hoinu jong lunghel lheh jongle athemjilna mun jon ding in Sugnu chan kagathahin kalhamon in amajong lunghel tahin Khulmi Bazaar a patin Winger a Lamka jonin achetan ahi. “Heu, Republic Day suty kakilha phat uleh inlanga kahung ding chu o. Chu tengle Khulmi Bazaar a neina nga tei tei ding, kahinmu louleh nachunga kalhasetna sang ding ahiye,” atin lhisoh pum pumin achetan ahi. Hoinu chedoh a patin kalunghelin kamongmo lheh tan ahi. Kalunghel phat le Hoinu te in a kagache jin guiter khatin kamao mao tan ahi.

Nithum jouvin Chassad langa kapalen ten eihin kou lhonin, ka genthei val lhon jehin kakho lang uva kakile ding aphal tapon ahi. Chassad school LMA a private ojan eiheng lutin genthei hahsa akihijehjn kenjong sum sanna ding ahipouleh tin kapangtan ahi. Ahinlah Republic Day ahungnai tan, Hoinun, “Heu, Republic Day suty kakilha phat ule inlanga kahung ding chu o. Chu tengle Khulmi Bazaar a neina nga tei tei ding, kahinmu louleh nachunga kalhasetna sang ding ahiye,” ati chu kageldohin kaum thim thei kittapon ahi.

To be continue….

©2018, Crosby Haokip All Rights Reserved