-Crosby Haokip
Chavang lai ahung kichaitan mitin in ahunglhung ding Christmas galdot in sum le pai holin aboigam tan ahi. Chate lunglhaina dingle akipana dingin nu le pate hon ACHATEU von hoitah tah achoh peh un, kichepna pistol chuleh cycle adang dng kaloi hon anei gam tauvin, kaloi ho kichep le akipanau ogin chu damlouva lum kanun ajatan achapa keidinga sum le pai holjou talouva dammoa jalkhun chunga acham agelleh aponan guhthim in amitlhi akitheh theh tan ahi. “Ohe ken jong kachapa vonkhat beh hijongle kachoh peh nome, iti aloiho koma lhangam ding hitam,” tin pona tahin kei khankho ding gelnan alhisoh tan ahi.
Kei jong jingkah matahin kakithouvin houin a taona mangin kachen lhase tahin mitlhi longin kataotan ahi. Kaseiyin, “Achate ngailu jinga thiljouse neipa Pathen, tunin ken ima neihih jongleng Pakai nangma kanei jehin kakipahe. Sil le chen, kichepna jatchom chom neihih jongleng lunglhadai ponge. Keiman kadei le kangaichat pen chu kanu, kapa toh damsel in ahunglhung ding Christmas neimu sah tei teiyuvo. Pakai, thiljouse hi nanga ahisoh keiye, nalung ahileh hiche songtum jong hi changlhah naso sah theiye. Hijongle nangin keidia aphajo neigonpehin natin, lunglhadai louhel in um nange. Kanu le kapa koma jong kiphin ponge,” katin kapohnat jehin hakan kakap tan ahi.
Chujouvin in kakilen an kahon in kahon min jouvin kanu koma kachen
KEIMA: “HENU, nagilkel tam? An kahon min tae. Nahin doppeh tange o?”
KANU: “Boi, naman gang nalom lome. Henge, neihin doppeh tan,” atin chuin kenjong kanu ding an kathuh pehin insung langa kadoppeh tan ahi.
KEIMA: “HENU, hungthouvo, ken naneh sah nange,” katin chuin kanu jong ahung thoudohin thihkhe(spoon) in kanu an kamop tan ahi.
KANU: “Boi, hiche sum 200/- inei sun sun lhon hi kilah in lang tuni le Sachih langa nadei dei gakichoh in, naloi dang ho banga nadei nangai kasuh bulhit loujehin lungsettahin neingaidam o boi,” atin eikoiyin akaptan ahi. Kenjong kanu lunggel kaponan kalhisoh soh jengtan ahi.
KEIMA: “HENU, kap hih o. Nahinkho man kapo joupoi. Henge, kaloihon vang von hoitah tah aneiyuvin akipah lheh jenguve. Henu, ven, amaho kipana sangin kei kipana asangjoi; ajeh chu nadammo pet’a kipahtaha kajen thei hi nacha keidia kakipana len pen ahin, leiset thil le gou sangin neilungsetna hi mantam kasa joi.”
KANU: “Kakipahe boi, Pathenin phatthei naboh hen lang nalampi nahinsem peh jinghen. Na chunnu kinepna nahin, pasal hangsan tahin pangin lang tun genthei jongle chun nikho khat leh mithupi nahung hithou thou ding ahi,” atin kanu an kanehsah jouvin kitchen langa kachen kanu thusei ho kaponan kakap tan ahi. Pathen koma kakitemin, “Pakai, kanu adamlai sungin lhaset sah ponge. Achuti loule keinei gaosap jengin,” katin kanu kalungset valjehin kitepna kamohsem tan ahi.
Nikhat kapan, “Boi, nanu dam ding ham, tia in a ijen lhon vangin adamjou pon hijeh chun jingle lamka ah cheutin napute koma sumpa kithum intin hospital a vetsah tahite ong?”
KEIMA: “Hepa, nangin pha nasah chu kenjong pha kasa jenge. Henge, cheuhite, kanu vetsah hitin Christmas ahunglhun masanga adamdohna ding ngaito hite,” katin kapa toh kanu Lamka langa puiding kaphatsah lhon phatin che dingin kakigong tauvin ahi.
Kaumnau thinglhang gam gari jong alutthei pon, hijeh chun kengin kanu kahin polhon tan ahi. Kapa toh kanu damlou chu kahinpo lhonin kenga lamjot akihijehin lamkim a kho ajing tan ahi. Ahahsa lheh jenge o, hahsa lheh jongle kanu damding ngaito najalin kapatoh genthei tahin kanu kahin polhon tan ahi. Sachih kalhun lhonin mi ina kageh lhonin jinga Bus che ding kangah lhontan ahi.
Jingkho avahin Lamka lang jon dingin Bus a kahung touvun kahung kipat doh tauve. Kanu damlouna ahijeh in sum le pai umhih jongleh Lamka lang kahin jon tauve. Bahara ding sum jong kanei pouvin kanei sun sun u dangka 200/- mangchan Sugnu kalhung nah nah uvin ahi. Kasum ula kamangchai tauvin tua Lamka lang jotna ding bahara kanei tapouvin, kalung lhon agimvalin Pathen koma katao tao tan ahi. Kanu la alel ma ma jeng in agimdan kavet leh kapona val jenge. Chutia lunggim taha kana umpetin kaloipa Lelen ahung in,
LELEN: “Min, hoiya nache got ham?”
KEIMA: “Len, kanu damlou Lamka langa vetsah dinga kahin pui ahiye. Nangla hoiya nache got ham?”
LELEN: “Keijong Lamka lang che ding kahiye. Christmas a kivonna ding von themkhat gaki kichoh hen kati ahiye. Ahile nalung gim toh na-e.”
KEIMA: “Len, kanu damlou hi kalung gim ngeihih ding ham?”
LELEN: “Hoiche ong henu chu?” atin eidongin kanu seat a khosih puma kithing thing a tou ahin kanu koma kapuiyin ahile amanjong alungset valin,
“Min, henu adamlou le nama vetsah diu chula, lel mong mong ta hime.”
KEIMA: “Len, inu damlou ibola vetsah louva kikoi nom ding ham? Bahara dingla kinei talouva, thiljouse hi sum le pai hijeng ahiye. Sum le pai ijakai Lamka langa kapute kamoh nganse ahita e.”
LELEN: “Min, henu lungset aumbehseh e. Henu, lungneo hih ta o. Nadam thou thou ding ahiye. Ken Lamka chan Bahara napeh peh nauvinge. Hiche sum 500/- hi nadu du anakichohna ta o,” atin kanu chu apen ahile kanu jong ham joulou sasan,
KANU: “Kakipahe boi, nathilpha bol hi Pathenin nikho khat leh nang chunga phattheina tampi hin bunglha hen. Chuleh nungah hoitah hinkimun boi,” atin ken jong kaloipa koma,
KEIMA: “Len, kakipahe. Nang umlou hile kalung gimna asan ding dan hi itijong Lamka kalhun jou dingu ham? Nachunga kakipahvale Len.”
LELEN: “Min, lung gim hihin, henu damthou thou ding ahiye. Na hahsat naboi tengle nin hetsah ji ta o,” atin a-phone no eipen hitichun kaloipa toh kihoulim pumin Lamka kahinjon tauvin ahi.
Lamka kalhun uvin kapun einangah uvin inlanga eipuiyuvin kanu ahadammo jeh chun anilhah maman District Hospital Emergency ward a kapolut tauvin ahi. Thinglhang gam, mun gamlataha pat’a hung kahijeh uvin kalelin kapin inlanga kichol dingin eisolin kenjong inlang kajon in kakicholtan ahi. Kalelval jehin kaha ihmut in athi kabang jengin ahi.
Jingkah khovah in Hospital lang jonin kachen ahile kanu ana phadomin lupna chunga anatou kamu chun kakipah lheh jenge. Kanu damlouna chunga kaputen ahaboipi uvin kalung gim lheh vangin lungmonna kaneitan ahi. Hitichun kanu damlou chu ni 15 sung Hospital a kaumpi uvin chujouvin damselin Pathen jalin kahung pot tauve.
Kapin eilungset in kadei dei eichohpeh in, Christmas von ding tampi eichohpeh in kapi chunga kakipah valin ahi. Tunvang kaloiho sangin Christmas manna ding von katamnei jotan ahi. Kagelleh nikhat a houin a mitlhi longa kataona Pathenin asan ahi kahedohin kalungthimin Pathen kathangvah vahtan ahi. Chuleh Bible in, “Nangho dingdet pou pouvun, Pakaiyin nangho dia gal asat ding ahinai,” tia Sunday School a kajilkung hon eihiljiu kageldohin Pakai milungsetna kahin hechen tan ahi. Kalunggimna pen kanu adamdoh theiya, nomtah a Christmas kaman diu kagelle kathanomin Christmas lhunding kal kangahlel tan ahi. Kanu adamphatin keiho jong inlang jon dingin kakigong tauvin, jinga che dingin kaum tauvin ahi. Kapin Christmas manna dinga von tampi eichohpeh jehin inlang lhuna kavonnei ho kaloiho mitmua kasil dingkal kangahlel mama tan ahi.
Jingkho ahungvahtan keiho jong kipatdoh dingin Tuibong Bazaar kajonun Gari kangah tauvin ahile sot louvin Town Bus khat ahung kinga pei peiyin keiho jong kakaldoh un kei le kanu jong Gari sung mi adimjeh in amasang langa kading lhonin kapa vang anung langa adingin chuin Gari jong akipan pai tai. Minute 1 jong lhingnai pontin HMARVENG kaphah uvin vangset umtahin katounau Town bus abungbun thumvei lamlaiya akilihtan ahi. Kajet kavei kavet leh thisan naisan jeng kamun akap a apeng kadimlha jengun ahi. Chuin mipin eihin dellut uvin gari sunga konin eipodoh uvin vangphat umtahin kei le kanu vang ima kati lhonpon katichung lhon apop khatcha jong aumpoi. Chujouvin kanu toh kapa kahol lhonin ahile mihon kapa kho helouva gari sunga a pat ahindop dohu kamu lhon phat in kanu toh kakika tet lhon tan ahi. In lhun ding ngahlel a kiuma hitobang vangset katou kagelle kalhase valin Pathen koma kakiphin phin tan ahi.
Kaputen kato set tou ajahphatin eihin del pei peiyun kapi le kapu ahung lhun chun kaum nau chu kana ogin akithong tan ahi. Ajan maman Dist Hospital a konin RIMS a refer eibol pei peiyun RIMS lam kajon kittauve.
Kanun kapa aka ka tan, “Heu, nache na lampi adih tapoi kinungle tauhite, ‘Tuchung nomtah a Christmas iman diu ahi,’ nati hilou ham ong. Hung thouvin lang inlang joh jontau hite,” atin kapa khut atuhin akap kap tan ahi. Kanu umchan kavet ule koima avejou kaumpouvin, kabon un kakap tauvin ahi. Chujouvin kanu kalhembin kaphei chunga kakingai sahin kanu khankho ding kagelle kalhi kang theilouvin apul pul tan ahi.
RIMS kalhun uvin Dr hon aboipi uvin ahinlah adamjou ding ginchat ahitapoi. Kalungnop nadiu meiyuva ICU a alupsah u ahin kapa vang akichaisa ahitai. Jingkah in Dr pa ahungpot dohin kakoma, “I am Sorry Son,” ahinti chun kapona valin nao kan kakap tan ahile kainkoten ahin hedoh un kapa chunga kap ding kakichu tho tauve. Ani maman inlanga alongdamsa kapouvin khojinin damsel a kahung kipatdoh nau kakhou kalhung un kalunghel lheh jenge. Khosung kaphah ding kon un khomol a thidah gin kajatan ahi.
Kapan eidalhah lhon a pat’in kanun kapa aka ka tai. Iti kalhep vangin kalhembi joutapon kahinkho man lhon ahahlheh jenge. Kadei kavon cheng jong keidin kipana eipe joutapon hijeh chun Christmas kichai kahsen kaladoh tapon ahi. Mitin kipana Christmas ahunglhung tan keini din vang lunghemna asohtan ahi. Kanun, “Boi, einin Christmas jong manda tahite, Christmas fund ding jong ineilhon pon, napa umlou toh kimang jongle nomjou taponte,” atin kanu thusei ho kagelle kapona valin kapin kavon eichoh peh ho chu kijoha Christmas fund a man dingin kahin ladoh tan ahi.
Mitlhi long pumin ka it tah kavonthah ho bag in kapon ainson tin in kagajoh tai. Kavonthah ho ni bou aumtan, Ken jong Headeacon te in a kaga joh kittai, kasang khol jouse kajoh chai chaiyin inlam kahinjon tan ahile lampia kaloi ngaipen Hoinu in einalamtin in, “Heu, ipi naga joh ham?” tin eina dongin ahile seiding helouvin kei jong kalhase valin amasanga kamoh ka tan ahi. Kaum chan le kathilto ho ahet phat a chu kavon joh ahung kham got ahin, ahinlah ahungvai geiyin kavon jouse kana johdoh mantai.
HOINU: “Heu, ibola nahahsatna na im a genthei nathoh ham ong? Ken nang le henu Christmas fund nato peh nange,” atin Christmas Secretary pa koma eipuiyin sum eito peh tan ahi.
Nikhat kanun kajah a,
KANU: “Boi, hung o, napa koma cheta hite, kangaivale,” atin akap tan ahi.
KEIMA: “HENU, hoilang a iche ding ham? Kapan hinve leh kipah lou ding ahi. Henu, lungneo hih o kei kaum nai.”
KANU: “Boi, MEITHAI – CHAGA ho dingin leiset a hinlo aumpoi,” atin ken jong kapona valin,
KEIMA: “HENU, MEITHAI – CHAGA IHI LHONPOI. Koiham meithai? Koiham chaga? Tuchan a nahet nailou ham henu? Kapan nadalhah vangin meithai nahipoi. Ajithi nunga Christaa Hinna neilouva hinkho mang ho bou khu meithai ahiuve. Nang vang meithai nahipoi. Ajeh chu Bible in, ‘Nasempa chu najipa ahi,ʼ atibouve. Keijong Chaga kahipoi. Leiset a avetup ding umtalou ho khu chaga ahiuvin ken nang kanei nahlai hila o henu. Pakai chu keidia kanu le kapa ahiye,” katin kanu kakoiyin kakap tan ahi. Chutia lhase taha kaka pet lhonin Hoinu ahunglutin keini umchan avet joulou phatin amajong akaptan ahi.
To be continued…..
©2018, Crosby Haokip All Rights Reserved
