-Lelen Kipgen
(7629033890)
(Part-IV)
Thanggin jong kei chan teina dia kanu sum ijat hamkhat anapeh, chule eideichat, eihel a ken Hesei nung kajui ahetdoh phat chun alungthim a thil phalou ahung kontan ahi. Kanu toh ahung kihoutoh lhonin golhang ijat hamkhat ahin thalah lhonin, keini holin ahinsol lhontan ahi.
Keini jong loubuh a kageh lhonin, lungmongselin kaum lhon e. Hesei loipa bu thah in ahung jin, ama jingkal nilhah a ahung jing jeh chun kaumna lhon ahin hedoh tauvin ahi. Keini chu lungmongsel a um kahi lhon e. Ajing sun in khohe pha louvin kanaum lhonin ahile golhang ijat hamkhat ahung tauvin, keinin jong kamu lhon phat in lou pam langa kajam lhontan ahi.
Amahon jong eimu lhon phat chun eihin del tauvin, kei chu numei thalhom kahijeh chun gamlah ling le khao lah a chun kalhai hat jou tapon, Hesei in jong eidalha louvin kakhut atuh in kajam lhontan ahile chomkhat jouvin eidelpha pei tauvin ahi. Eihin delphah phat u chun Hesei khot a konin eikaidoh tauvin, Hesei chunga khot alha uvin, hiti chun kei inlam a eihin nungpui tauvin ahi. Kei eihin nungpui jou uva chu Hesei jong avoh nauva aluchang ajep khah peh jeh un amun a athi den tan ahi.
Lha khat jouvin kenjong nao kanavop man tan ahi. Kanun Thanggin toh kichensah tei eigo in, Thanggin in jong kichenpi din eijol jing nalaiyin, kenjong kanaovop ho kaseipeh leh alung akikhel tan, eikichenpi ngapcha tapon ahi. Kanun jong kanaovop ahetdoh phat chun kanao suhlhah ding Thanggin toh kichensah teiding eigotan ahi. Kanu in kanao suhlhah ding lung angaito jing kahet phat chun kenjong “kathi jong leh thipi jeng tange” tin in a konin kahung jamdoh tan, hilaiya hi genthei tah a kahin chenpi nahi.
Boi, napa chu “Hesei” ahi. Hiti jeh a chu tunia nangin “Hepa” tiding naneilou ahitai. Ken Jennifer chu kadeimo ahipoi. Akoi akoi toh jong kinung hetphah lou ding kadei jeh a Jennifer kikhenpi tan kati ahi. Ahinlah nadei, nangai nachan lou ding kanom poi. Chen lang Jennifer gakipui tan.”
Hitia kanun athusim aseilai chun kamai kamitlhin anachup lha jeng tan, kakhut akithing in kapa phulah ding kanom lheh tan ahi. “Henu, nei ngaidamin, nalunggel kana het them lou jeh in nachunga kana lunghang kha tai. HENU, KAPA PHU KALAH DING AHI” kati le kanun “Boi, phulah kiti hi mihem bol ding ahipon Pathen bol ding ahi. Nalung in agelin jong geldan. Pathen alung ahileh namelma chu nang dinga panpi phatah a ahinsem thei ahi. Chen lang Jennifer gakipui tan” tin eidonbut in, ahin ken vang kalungnat val jeh chun kalungthim in kapa phulah tei katup tan ahi.
Jennifer ngai lheh jong leng kikhenpi ding lung kahingel tan, mu jong kakimupi tapon, hou jong kahoupi tapoi. Nisen leh lekha eihin thot jingin, ahinlah kamchang khat in jong kadonbut tapon ahi. Jennifer khen ding lung kagel vangin kangaiyin, kalhalel lheh jenge. Nilhah khat hi Jennifer lhahna din lekha khat kahin jih tai.
“Jennifer, kahungvil khah lou leh nalekha thot donbut lou jeh in ngaidam kahin thum e. Nitin leh phattin in kahin ngaiyin, kahin gel jinge. Nang louva hinkho man ding kagel leh hahsa kasa lheh e. Nangin jong nei ngailutna kahen, nangin nei ngailut bangin kahin ngaiye. Hijong leh tunin nakoma seinom khat kaneiyin, anagelkhel hih in o? Jennifer, nei mil jeng in, laidang leng tan. Keijong laidang leng tange. Hiche kathusei ho hi anagel khel hih beh in o? Kenjong kahin ngaiyin kahin lhalel lheh e. Hijong leh chung Pathen jang-gop lou himei tahite. Pu-gui pa-guiya kikhen, kigom kit louhel ding ihibouve. Kathusei ho hi anagel khel hih beh in. Lungneo hih in Pathen in namailam a kei sanga ahoijo, aphajo nahin gonpeh ding ahi. Phat chom cha kilungset hinkho imanna sunga suhkhel bolkhel kingaidam tahite. Chetan, nunlui din kahin lhatai.”
Hitichun lekha khat kathot in, keijong in a kaum nomlou jeh chun kanu koma kaseiyin, thinglhang langa kagolpa koma chomkhat kihuilha din kachedoh tan ahi. Jennifer kakhen vang chun suntin jantin kalunglaiya amabou alang jingin, kangai lheh jenge. Jan teng Jennifer kangaina jailan ka-oi jin, sun teng jong leh hiti chun Jennifer ngaiyin hinkho kamang jie. Kagolpan “golpa, chubanga nangaiya nalungset ahile ibola nakhen ham? Namil jou lou mong ahile kithah ngaipi kit in, ama jong da ponte” tin, kakithah ngaipi kitna din eijol jie. Jennifer kangai lou, kalungset lou jeh jong ahipon, kanu abolnau kapohnat val jeh joh ahi.
Kalung amon khat leh tia thinglhang langa kapotdoh vangin kalung among chum pon, chuphat in inlam kahung kile kittai. In kahung lhun leh kanun niseh a Jennifer in a ahung thu ho eiseipeh in, chuleh Jennifer kakichenpi din hatah in eijol jinge. Chubangsea kangaiya kalungset vangin kalung kakhel thei pon, doi le aiya kibol kabang jenge.
Nikhat hi Kelcha, Kelngoi ho kachingin, sunin kakigel gel leh “lungmonna din nilhah leh loi le gol ho toh Ju kidon hen” tin, nilhah lam in matah in kakisutheng in Bazar langa kagolho kom kahinjon tan ahi.
Hiti chun kagolho toh kakisuto un, Ju kahin don pan tauvin ahi. Kalungnop louna ho kasei jin, kadon jin chutia kadon don leh kahung khamse tan ahi. Kho jong ajing tan, ka-inlam cheh u kahin kijot tauvin, Kei le kanu chenna hi Phaitol leh thinglhang chinlah ahijeh in gammang saothimpi kijotpa ji ahi. Keijong kakham val jeh chun ka gari jong kathatjo tapon, kalung noplou toh chun gari hatah a katol lam jong kahe tapon, munkhat a hin ka accident tan, ka accident chu kahe in adang imacha kahe tapon ahi.
Lampia khohe louva kana um chu ipi leh ipi kisuto ham, Jennifer nu le pan eina tokhah lhon a Hospital a eina pohlut lhon dan ahin, kei chu kakham toh ahile kho jong kana hetlou dan ahitai. Kahung khah doh le kho anavah tan, kakoma Jennifer anatouvin, kho kahet phat chun akipah lheh jenge. Katho kigot leh kapumin kana in kachat thei pon, kakeng kavet leh lentah khat in ana kitom e. Aumdan chu ka accident na a chu kakeng kana kisuhkhah dan ahi.
Katho theilou phat chun Jennifer jah a “ipi kati ham? Henu lah em?” kati leh “Henu in langa bu la in ache e” tin thil umdan ho abonin eiseipeh in, kana kihoulim lim lhon le kanun bu ahinpo in ahung lhung peitan ahi. Hiti chun kanun Jennifer nu le pa um hih leh nasatah a kaboi ding dan ho aseiyin, chuleh Jennifer toh kakichen lhon ding aphatsah dan ho Jennifer masang tah a aseiyin ahile athusei ho imacha kanilkal thei tapon ahi. Keijong kakigel gel leh kalunggel kangaito ho chu ngolhoi kakisa lheh jenge.
Hitia kana kihou laiyuvin sun lang ahitan, Jennifer nu leh pa jong ahung lhonin, kanu toh akihoulim lim uvin, Hospital sunga chun kei leh Jennifer kichenna ding ahin seilha tauvin ahi.
Keijong kahung dam don in, ka-inkote lhonin Jennifer toh kakichen na lhon ding kin thupitah in eigonpeh un, hiti chun keini jong kipahtah in kakicheng lhontan ahi. Achesa hinkho luicheng kasumil un tucha nupa kingailutah in kakhosa tauvin ahi.
Phulah kiti hi Pathen kin ahin, mihem bolding ahipoi. Achesa hinkho geldoh jing hi aphatchomna umlouhel ahi. Phulah ding ngaito louvin Pathen nganse le chun namelma lenpen jong chu nikho khat leh nang dinga nakihinsona theiya hung pang thei, nang dinga nagol phapen a hung pangthei chuleh nang dinga Pathen in phatthei konna a ahinsem thei ahi. Kakipah e, achai chan lungluttah a sim jouse Pathen in phatthei naboh cheh tauhen.
THE END.
©2020, Lelen Kipgen, All Right’s Reserved
