-Lelen Kipgen
(7629033890)
(Part-III)
Inlam kahinjot lhon, kahung kihoulim lim lhon leh ginchat phah loubeh in kakoma lungsetna thu ahinseiyin, mipha mikitah ahijeh chun kalungset thou nai. Ahinlah phat chomkhat kive hen, tin “Ugin, phat chomkhat nei ngah in, hung kigel tadinge” kati le ama jong anom in, hiti chun inlam kahinjon lhontan ahi.
Chavang lai ahitan, keiho area chavangkut hi hapta khat masang leh aumna mun a kichep golseh kibol ji ahin, nungah golhang, nupi papi ajao thei chan hapta khat masang leh aumna ding khomun a kigeh doh ji ahi. Kapa in a aum kan khat hin Chavangkut a kajao nom dan thu ho kaseiyin, phalna kathum in ahile kakholsa din 1000/- eipe in, Jiribam langa Ganja po in achedoh pei kittan ahi. Kapa koma phalna kathum pet a kanu jong um ahin, tapsah kun langa mit teh dap dap in eive in, kapa akichat jeh chun imacha jong asei poi.
Keijong Chavangkut a akichedoh kah in Changthul kijou tei hen, tin jingkal leh matah in lou kakon jin, ken katoh lou leh atong ding umlou ahijeh chun, kilosetah in katong nilhum jin, nilhah leh khojin nungin in kalhung jie. Kapan eipeh sum chu ajokhat leh mang khante, tin ka-ponve kah lah khat a kaselin ahi. Chavangkut kon ahitan, sports a jao ding se che ding ati tauvin, keijong numei Volley ball team a kajao jeh chun thanom tah in kakigong tan ahi.
Jingkho hung vah leh vaikon ding kahitah jeh u chun jan in kavon ho kakigontup in ahile kanun “natoh ding natham ding hijat lah a hoiya che kigo nahim? Thepbeh in nalou lho ding kilho in. Nang che angai poi” tin ajat jat in eihouvin, eipet kha deh deh jenge. Keijong kapan eiphal peh ahijeh chun thipbeh in kakigong nah nah in ahi. Kapoimo ding kathil ho kagon chaiyin ponve kah a kasum koi chu kavet leh anaum tapon, chuphat in kanaote ho kadoh leh ahepha pouvin, kanu kadoh le “ken ipi ding kati a nang sum pentah chu kalah ding ham? nang banga jong nei hisah ham?” tin mit neilou mai neilou eibahsah jenge.
Akilep vanga ama ahiding kahet ahi. Kache ding anoplou jeh a kasumkoi chu ana lahdoh a kanaonu(achanu) kholsa ding joh a anapeh ahi. Kasum aumlou phat chun thanom lheh jong leng upai kanei tapon, kajan lhiso tan ahi. Jingkal in “ache lou ding thou thou, mi che jong kimuda hen, thangset sah” tin jingkal mi kitho masang in lhisoh pumin lou lang kajon tan ahi.
Lou kalhun in an nelou kahitoh, kanu chunga kalhaset valjeh chun lou kakon vangin natong louvin kalhisoh nilhum keiye. Kumlhung lha lhunga nikhat jong kichol man louva na kitonga, nikhat nini cha jong kaloi kagol lah, kathanopna a jong kilha theilou. Kaneh dingsa jong eikilahpeh a natoh ipi ham, jong hepha lou; Neh le chah hoiya hungkon ham, ti jong hephalou, kanaonu kam a kiheng. A-inko uva gehthei tah a Vohcha vah a kivah uva, kachunga lunglhaimo ding kichu tho kit nalaiyu. Abang kom leh kakigel jin, ngol jong kakisa lheh jie. Kapa kom a seiding la, kanu lunggel kavet le thilpha mong mong um lou. Kaseidoh ngei ngei le ka-insung u boilo kit dingin aumin, kalunggel agenthei lheh jenge. Hiti chun Chavangkut, min kichep golnop aman laitah in kei lhisoh pumin lou kakon jing tan ahi.
Hiti chun Chavangkut ho jong akichai tan, kapa jong in a kona apot kal lhani lhing ding ahitan, ahinlah ahung kile tapon ahi. Kenjong kapa hung lhun ding kal chu kangahlel lheh jenge. Ajeh chu kapa aum kan leh kanun jong eibolse ngam ji pon, kenjong kadei kangai kakiseina leh lung ngapna a kanei ahijeh chun ahung lhun ding kal kangahlel lheh jengin ahi. Nikhat hi louva konin leltah in kahung vailhung in ahile ka-in u chu mi anadimset e. Keijong ipithu um hitam? tin lungdong tah a kasunglha le “napa aum tapoi. Along jong akimu tapoi” tin nupi hon eiseipeh un, keijong kakigelna toh akitomo val jeh chun kading laiyin kalhu tan ahi.
Jiribam langa Ganja thah a ache teng uleh “Twilang” kiti vadung len khat hi apal jiu ahin, hiche vadung apal nauva hi twiyin alhoh manga along cha jong kimulou dan anahitai. Genthei jong leng kapa jal’a lungmong ham ham kahin, kapan eidalhah phat chun hinlo jong um kasa tapon ahi. Kamalam khankho ding kavet le ling le khao lah abang jenge. Kanu vang chu mi aum kan leh akap dan in aum jin, mi aumlou teng alhi mong mong akimu ji pon, amai hulthet jie. Kanu umchan jeh tah tah jong chun kalhasetna le kalungnatna akibe dehset e. Kapa long akimulou phat chun along khelin Naga/Nado kamang un, alhan melchih theina din lhanmol a kavui tauvin ahi.
Kapan eidalhah phat chun imacha kalunga aumthei tapon, lou kakon jong leh kalhisoh nilhum lhum jin, natoh ding jong kalunga aum thei tapoi. Kapa pul kadou toh, nikhat tou kichol inge kati jong le kanun neh ding bolin eibol jin, niso temin lhisoh pumin lou kajon jing tan ahi. Chang tinthum lei kalho ahin, mikhat boipi dinga chu hahsa ahi. Chang-at lai ahitan, kachanga kajo lou ding jeh chun kanaonu eikithopi din kaseiyin ahile kanun “natoh ngap lou le neh dan” ti pouvin eihouvin, kaseingam lou phat chun kachang in kahin at tan ahile kalou alet jeh chun kajou tapon ahi. Khosungmi eingailu khat le nin eihung kithopi uvin, anah nah in kumkhat a din lou natoh kachai ham hamin ahi.
Kapa aumlou phat chun kanun thingko hom, songko hom a kiladoh eibahsah jenge. Seikham lou thil neocha cha hahsatna tampi nitin in kathoh jingin ahi. Genthei kakisah val teng kanu le kapa lhan a kagakiphin jin “Hepa, Kagenthei val tai. Keijong neihung pui tan. Keijong nang le kanu koma kahung nom tai. Nacha kagentheina hi navet jou mong lhon hinam? Min thingko hom, songko hom a kiladoh eibahsah jeng hi navet jou mong lhon hinam? Henu, hepa kan ngai lhon val e” tin kanu le kapa lhan a lhase tah in kagakap jin ahi.
Thanggin in eijol jingin, hinlah kigellhahna kanei thei pon ahi. Hiche laitah chun kakho kom uva kho khat a golhang khat amin “Hesei” kiti khat in eijol kit in, ama chu napa ahi. Hesei(napa) in eijol kit in ahinlah kahinkho genthei toh lunggel ji jong asuh sah kaum thei pon “phat chomkhat hung kigel inge” tin kalhadoh kittan ahi.
Alangkhat a kanun Thanggin in eideichat ahet jeh chun guhthim in Thanggin koma sum ijat ham khat anakilah in eina kijoh doh tan ahi. Nilhah khat hi kanun kanaote jouse kholaiya apuidoh in “in nana dalhah theilou ding ahi” tin eigeh in, kachang in eidalha tauvin ahi. Kanaonun akihou u ana thimhet jeh chun apotdoh konin “heu, munchom a ana potdoh inlang in a anaum hih beh in” tin eithim seipeh in apotdoh peitan ahi. Aumdan chu Thanggin in kichepna a einei theina dia “in nana dalhah theilou ding ahi” tin kanaote apuidoh a kachanga eidalhah dan ahi.
Kanaonu thusei chu kagel le dihthei kasah lou phat chun chomkhat jouvin keijong kahung potdoh tan ahile leitol a Thanggin toh kakitoh pei lhontai. Chuin Thanggin in kanu thilgon ho abonchan eiseipeh in, kanu lungthim phat lou jeh chun ajokhat leh ahilou lou hintoh khan nate, tin kichenpi din eijol tan ahi. Thanggin chu miphatah ahi. Hinlah kanu lunggel leh umchan ho jeh chun Thanggin chu kamunom tapon, kanu toh kamudana akibang chet tan, kichenpi dia eijol vang chun kanom tapon ahi. Hiti chun lhahdohna thei theiya kalhadoh in, keijong in a kaumnom lou phat chun kagolnu koma kagageh doh tan ahi.
Jingkal in vaigei thimin in kachen ahile kanun “in ana dalha hih in kitia hoiya potdoh a tua hung vahlut bep nahim?” tin mijong houvin eihou kit in, bu nelouvin louva Bar pon eisolin ahi. Nilhah in Hesei le agolho jong ahung kholaileng un, kenjong “in ahin kium sot leh ahilou khat hungsoh ding ahi” tin Hesei jong mipha, mikitah ahijeh chun thil umdan imajouse kaseipeh in, ahithei leh agang thei pen a kichen doh jeng ding kadei dan ho kasei le aman jong pha asan, phat kilemchang kahin ve lhontan ahi.
Sunday ni khat hi Hesei le agolho jong ahung kholaileng kit uvin, nilhah langin chapang khat eihung kousah in keijong kache tai. Kakihou lhon le kei puiya hung ahidan aseiyin, keijong kanu kathohlel behseh jeh chun Hesei nung kajuitan, kanun eihol ding kaginmo lhon jeh chun louchul langa kagakisel lhontan ahi. Nilhah in kanun Hesei nung kajui ahet phat in muntin gamtin eihin hol pantan, Thanggin jong kei chan teina dia kanu sum ijat hamkhat anapeh, chule eideichat, eihel a ken Hesei nung kajui ahetdoh phat chun alungthim a thil phalou ahung kontan ahi.
To be continue….
©2020, Lelen Kipgen, All Right’s Reserved
